Xana wa ha swi tsundzuka leswi u swi hlayeke eka timagazini ta Xihondzo xo Rindza ta lembe leri? A hi vone loko u ta swi kota ku hlamula swivutiso leswi landzelaka:

Hi fanele hi va khoma njhani Vakreste lava totiweke?

Hambileswi hi tlangelaka ripfumelo ra vona kambe a hi va xiximi ku tlula mpimo. Hi papalata ku “ndhundhuzela vanhu.” (Yuda 16) A hi fanelanga hi va vutisa swivutiso swa munhu hi yexe mayelana ni ntshembo wa vona.—w20.01, tl. 29.

U nga tiyiseka njhani leswaku Yehovha wa ku rhandza?

Bibele yi vula leswaku u ku tive u nga si velekiwa. Nakambe u yingisa swikhongelo swa wena. U tiva leswi nga embilwini ya wena ni leswi u swi ehleketaka naswona swiendlo swa wena swa n’wi khumba swinene. (1 Tikr. 28:9; Swiv. 27:11) Hi yena loyi a ku kokeke leswaku u ta eka yena.—w20.02, tl. 12.

Hi wihi nkarhi lowunene wa ku vulavula ni wa ku miyela?

Ha tsaka loko hi vulavula hi Yehovha. Ha vulavula loko hi vona un’wana a endla swilo leswi nga n’wi hoxaka ekhombyeni. Loko ku ri ni munhu loyi a lavaka ku tsundzuxiwa vakulu va vulavula. A hi vulavuli kumbe ku boxa vuxokoxoko bya ndlela leyi ntirho wa hina wu endliwaka hayona ematikweni lawa wu yirisiweke eka wona. A hi vulavuli hi timhaka leti nga xihundla.—w20.03, matl. 20-21.

Tinjiya leti ku vulavuriwaka ha tona eka Yuwele ndzima 2 ti hambana njhani ni leti ku vulavuriwaka ha tona eka Nhlavutelo ndzima 9?

Yuwele 2:20-29 yi vula leswaku Xikwembu xi hlongole tinjiya xi tlhela xi tshembisa ku riha khombo leri ti ri vangeke. Endzhaku ka sweswo, Xikwembu xi chululele moya wa xona. Sweswo swi endlekile loko Vababilona va hlasela Vaisrayele. Nhlavutelo 9:1-11 yi vulavula hi tinjiya to fanekisela, ku nga Vakreste lava hlawuriweke lava twarisaka ndlela leyi Xikwembu xi nga ta yi avanyisa hayona misava leyi yo homboloka, leswi swi endla leswaku vanhu lava seketelaka misava leyi va sungula ku nyunganyungeka.—w20.04, matl. 3-6.

I Mani Hosi Ya Le N’walungwini Namuntlha?

I tiko ra Rhaxiya ni matiko lama ri seketelaka. Ri xanise vanhu va Xikwembu, ri yirise ntirho wo chumayela naswona ri venga Timbhoni. Hosi ya le n’walungwini yi karhi yi kwetlembetana ni hosi ya le dzongeni.—w20.05, tl. 13.   

Xana “mihandzu ya moya” yi katsa timfanelo leti xaxametiweke eka Vagalatiya 5:22, 23 ntsena?

Doo! Moya lowo kwetsima wu endla leswaku hi kota ku kombisa timfanelo letinene to tanihi ku lulama. (Efe. 5:8, 9)—w20.06, tl. 17.

Hi rihi khombo ra ku vekela swinepe eka Social Media?

Ku vekela swinepe kumbe tivhidiyo eka social media swi nga kombisa leswaku wa tikukumuxa naswona a wu titsongahatanga.—w20.07, matl. 6-7.

Vakreste va nga dyondza yini eka vaphasi va tihlampfi lava nga ni vutshila?

A va ya laha tihlampfi ti kumekaka kona ni hi nkarhi lowu ti kumekaka ha wona. Va leteriwa leswaku va ta kota ku tirhisa switirhisiwa leswi faneleke. Hi xivindzi va tirha ehansi ka swiyimo swo hambanahambana. Na hina hi nga endla hilaha ku fanaka loko hi endla ntirho wa hina wo chumayela.—w20.09, tl. 5.

Hi nga swi pfuna njhani swichudeni swa Bibele leswaku swi rhandza Yehovha?

Hi nga swi khutaza ku hlaya Bibele ni ku anakanyisisa hi leswi swi swi hlayaka. Nakambe hi fanele hi swi dyondzisa ku khongela.—w20.11, tl. 4.

Marito lama nge: “Hinkwavo va ta tlhela va pfuxiwa hikwalaho ka Kreste” ma kombetela eka vamani?—1 Kor. 15:22.

Muapostola Pawulo a a nga vuli swona leswaku vanhu hinkwavo va ta pfuxiwa. A a vulavula hi Vakreste lava hlawuriweke “lava nga ni vun’we na Kreste Yesu.” (1 Kor. 1:2; 15:18)—w20.12, matl. 5-6.

I yini leswi Vakreste lava hlawuriweke va nga ta swi endla endzhaku ka loko ‘va hundzuriwile hi ku tsopeta ka tihlo, loko ku chayiwa mhalamhala yo hetelela’?—1 Kor. 15:51-53.

Va ta tirha swin’we na Kreste leswaku va risa vanhu hi nhonga ya nsimbhi. (Nhlav. 2:26, 27)—w20.12, matl. 12-13.