1-2. Xikombiso xa muapostola Pawulo xi nga va pfuna njhani vakulu?

MUAPOSTOLA Pawulo a a va rhandza vamakwavo. A a va tirhela hi matimba. (Mit. 20:31) Na vona a va n’wi rhandza swinene Pawulo. Siku rin’wana vakulu va le Efesa va ‘ririle’ loko va twa leswaku a va nge he pfuki va n’wi vonile. (Mit. 20:37) Hilaha ku fanaka, vakulu lava tirhaka hi matimba va rhandza vamakwavo swinene naswona va tikarhatela ku va pfuna. (Filp. 2:16, 17) Mikarhi yin’wana vakulu va langutana ni mitlhontlho. I yini leswi nga va pfunaka leswaku va yi hlula?

² Vakulu lava tirhaka hi matimba va nga dyondza swo karhi eka Pawulo. (1 Kor. 11:1) A a nga ri ntsumi. Pawulo a a swi endla swihoxo naswona mikarhi yin’wana a swi n’wi tikela ku endla leswinene. (Rhom. 7:18-20) A a ri ni swiphiqo swo tala. Kambe a nga swi pfumelelanga sweswo swi n’wi hetela ntsako. Loko vakulu va tekelela Pawulo va nga hlula swiphiqo ni ku tshama va tsakile loko va tirhela Yehovha. A hi voneni leswaku va nga swi endlisa ku yini sweswo.

3. Hi ta kambisisa yini eka nhlokomhaka leyi naswona hi ta dyondza yini?

³ Eka nhlokomhaka leyi, hi ta kambisisa swihinga swa mune leswi vakulu va langutanaka na swona: (1) ku rhangisa ntirho wo chumayela loko va ri karhi va endla mitirho yin’wana, (2) ku va varisi lava khathalaka, (3) ku va ni langutelo lerinene hi swihoxo swa vona, ni (4) ku va ni langutelo lerinene hi swihoxo  swa van’wana. Hi ta bula hi ndlela leyi Pawulo a swi hluleke hayona swihinga leswi ni ndlela leyi vakulu va nga n’wi tekelelaka hayona.

4. Hikwalahokayini vakulu swi nga ha va tikelaka ku rhangela entirhweni wo chumayela?

⁴Leswi nga endlaka swi tika. Vakulu va rhangela entirhweni wo chumayela va tlhela va endla ni mitirho yo tala. Hi xikombiso, va cincana hi ku va mutshamaxitulu enhlengeletanweni ya le xikarhi ka vhiki ni ku fambisa Dyondzo ya Bibele ya Vandlha. Va tlhela va nyikela ni mivulavulo. Va letela malandza ya vutirheli naswona va tsaka ku khutaza vamakwerhu mikarhi hinkwayo. (1 Pet. 5:2) Vakulu van’wana va katseka eka tiprojeke to aka ni ku lunghisa Tiholo ta Mfumo ku katsa ni miako yin’wana ya nhlangano. Kambe ku fana ni vahuweleri hinkwavo evandlheni, ntirho wa nkoka swinene lowu vakulu va faneleke va wu endla i ku chumayela mahungu lamanene.—Mat. 28:19, 20.

5. Hi xihi xikombiso lexi Pawulo a xi vekeke tanihi muchumayeri?

⁵Xikombiso xa Pawulo. Leswi pfuneke Pawulo leswaku a va muchumayeri lonene swi kumeka eka Vafilipiya 1:10 laha a hi khutazaka a ku: ‘Mi tiva swilo leswi nga swa nkoka swinene.’ Pawulo na yena u xi yingisile xikhutazo xolexo. A a nyikiwe ntirho wo chumayela naswona a wu teka wu ri wa nkoka evuton’wini byakwe. U chumayele “erivaleni ni hi yindlu ni yindlu.” (Mit. 20:20) A a nga ti vekelanga nkarhi kumbe siku ro chumayela ha rona. A a chumayela nkarhi wun’wana ni wun’wana lowu a a wu kuma! Hi xikombiso, loko a ha yimele vanghana vakwe eAtena, u chumayele ntlawa wa swidyondzeki naswona swi n’wi yingisile. (Mit. 17:16, 17, 34) Pawulo u chumayele ni loko a ri “ekhotsweni.”—Filp. 1:13, 14; Mit. 28:16-24.

6. Pawulo u va letele njhani van’wana?

⁶ Pawulo u wu tirhise kahle nkarhi wakwe. Mikarhi yo tala a a rhamba van’wana leswaku va chumayela na yena. Hi xikombiso, eka riendzo rakwe ro sungula ra vurhumiwa u fambe na Yohane Marka, kasi eka riendzo rakwe ra vumbirhi u fambe na Timotiya. (Mit. 12:25; 16:1-4) A swi kanakanisi leswaku Pawulo u dyondzise vavanuna lava ku hlela vandlha, ku endla ntirho wa vurisi ni leswaku va va vadyondzisi lavanene.—1 Kor. 4:17.

7. Vakulu va nga endla yini ku yingisa xitsundzuxo xa Pawulo lexi nga eka Vaefesa 6:14, 15?

⁷Leswi vakulu va swi dyondzaka. Vakulu va nga tekelela Pawulo hi ku chumayela hi yindlu ni yindlu ni ku tlhela va tshama va vambe ngoma leswaku va chumayela loko va  pfulekeriwa hi nkarhi. (Hlaya Vaefesa 6:14, 15.) Hi xikombiso, va nga chumayela loko va ya eku xaveni kumbe loko va ri entirhweni. Loko va ri karhi va endla mitirho yo aka miako ya nhlangano, va nga chumayela vaakelani ni van’wamabindzu mahungu lamanene. Ku fana na Pawulo, vakulu va nga tinyika nkarhi wa ku letela van’wana loko va ri eku chumayeleni, ku katsa ni malandza ya vutirheli.

8. Mikarhi yin’wana swi nga ha lava leswaku nkulu a endla yini?

⁸ Vakulu a va fanelanga va va bizi ngopfu hi swiavelo swa vona lerova va nga ha wu kumi nkarhi wo chumayela. Leswaku va kota ku yi endla hinkwayo mitirho ya vona, mikarhi yin’wana swi nga lava leswaku va ala swiavelo swin’wana. Endzhaku ko khongela eka Yehovha ha swona, va nga ha xiya leswaku loko vo amukela xiavelo lexi, leswin’wana swi ta salela endzhaku. Swilo swa kona swi nga ha katsa ku khoma vugandzeri bya ndyangu vhiki ni vhiki, ku chumayela hi xitalo ni ku pfuna vana va vona leswaku va kota ku chumayela. Vakulu van’wana swa va tikela ku ala xiavelo kambe va nga tiyiseka leswaku Yehovha wa swi twisisa leswaku a vo ala kambe va lava ku ringanisela.

9. I swiphiqo swihi leswi vakulu lava nga bizi va langutanaka na swona?

⁹Leswi nga endlaka swi tika. Vanhu va Yehovha va khome nyarhi hi timhondzo. Emasikwini lama ya makumu, hinkwerhu hi lava ku khutaziwa, ku seketeriwa ni ku chaveleriwa. Kasi mikarhi yin’wana van’wana va lava ku pfuniwa leswaku va nga hambuki. (1 Tes. 5:14) I ntiyiso leswaku vakulu a va nge yi susi miringo leyi vanhu va Yehovha va langutanaka na yona. Nilokoswiritano, Yehovha u lava vakulu va khutaza ni ku sirhelela tinyimpfu takwe. Vakulu va nga wu kuma kwihi nkarhi wa ku pfuna van’wana hambiloko va ri bizi?

10. Hi ku fambisana na 1 Vatesalonika 2:7, Pawulo u va khathalele njhani vanhu va Yehovha?

¹⁰Xikombiso xa Pawulo. Pawulo a a lava tindlela ta ku bumabumela vamakwavo ni ku tlhela a va aka. Vakulu va endla kahle loko va tekelela xikombiso xakwe hi ku komba vanhu va Yehovha rirhandzu. (Hlaya 1 Vatesalonika 2:7.) Pawulo u tiyisekise vagandzerikulobye leswaku wa va rhandza ni leswaku Yehovha wa va rhandza. (2 Kor. 2:4; Efe. 2:4, 5) A a teka vamakwerhu evandlheni va ri vanghana vakwe naswona a a tinyika nkarhi wa ku va na vona. U va kombe leswaku wa va tshemba hi ku va byela leswi n’wi chavisaka ni swihoxo swakwe. (2 Kor. 7:5; 1 Tim. 1:15) Kambe Pawulo a nga ti putanga vusiwana hi swihoxo swakwe. Ku ri na sweswo, a a lava ku va pfuna.

11. Hikwalahokayini Pawulo a tshinye vamakwavo?

¹¹ Mikarhi yin’wana a swi lava leswaku Pawulo a tshinya vamakwavo. A nga va tshinyanga hileswi a a hlundzukile. U va tshinye hileswi  a a khathala ha vona naswona a a lava ku va sirhelela. U endle leswaku ndzayo yakwe yi twisiseka naswona a a nga lavi ku va khunguvanyisa. Hi xikombiso, eka papila leri Pawulo a tsaleleke Vakorinto, u va tshinyile swinene. Endzhaku ko va tsalela papila, u rhume Tito leswaku a ya eka vona. Pawulo a a lava ku tiva leswaku ri va khome njhani papila rakwe. Swi n’wi tsakisile ku twa leswaku va yi yingisile ndzayo yakwe.—2 Kor. 7:6, 7.

12. Vakulu va nga va tiyisa njhani vagandzerikulobye?

¹²Leswi vakulu va swi dyondzaka. Vakulu va nga tekelela Pawulo hi ku tinyika nkarhi wa ku va ni vagandzerikulobye. Ndlela yin’wana yo endla sweswo, i ku hatla va fika etinhlengeletanweni ta vandlha leswaku va ta khutaza vamakwerhu. Swo lava timinete tintsongo leswaku va khutaza makwerhu. (Rhom. 1:12; Efe. 5:16) Nkulu la tekelelaka Pawulo u ta khutaza vagandzerikulobye hi ku tirhisa Rito ra Xikwembu ni ku tlhela a va tiyisekisa leswaku Xikwembu xa va rhandza. U tlhela a va komba leswaku wa va rhandza. U tshama a ri karhi a vulavurisana na vona ni ku va bumabumela loko va endla leswinene. Loko swi lava leswaku nkulu a nyikela ndzayo u fanele a nyikela ndzayo leyi humaka eRitweni ra Xikwembu. U pfuna makwerhu a vona xihoxo xakwe kambe hi ndlela ya musa hikuva u lava leswaku makwerhu a pfuneka.—Gal. 6:1.

13. Swihoxo leswi vakulu va swi endlaka swi nga endla va titwa njhani?

¹³Leswi nga endlaka swi tika. Vakulu a hi tintsumi. Va endla swihoxo ku fana na munhu un’wana ni un’wana. (Rhom. 3:23) Mikarhi yin’wana swi nga ha va tikela ku va ni langutelo lerinene hi swihoxo swa vona. Van’wana va nga ha dya mbitsi hikwalaho ka swihoxo swa vona lerova swi va heta matimba. Van’wana va nga hatla va swi ba hi makatla, ivi va debyisa voko va nga ha antswisi.

14. Hi ku ya hi Vafilipiya 4:13, ku titsongahata ku n’wi pfune njhani Pawulo leswaku a va ni langutelo lerinene hi swihoxo swakwe?

¹⁴Xikombiso xa Pawulo. Hi ku titsongahata Pawulo u swi xiyile ku u lava ku pfuniwa leswaku a va ni langutelo lerinene hi swihoxo swakwe. A a lava ku tiyisiwa hi Xikwembu. Khale Pawulo a a ri muxanisi wa Vakreste la nga ni tihanyi loyi a nga lavi ni ku twa nchumu. Kambe hi ku famba ka nkarhi, u xiye swihoxo swakwe ni ku tlhela a tiyimisela ku cinca langutelo ni vumunhu byakwe. (1 Tim. 1:12-16) Hi ku pfuniwa hi Yehovha, Pawulo u ve murisi la nga ni rirhandzu, ntwelavusiwana ni ku tlhela a titsongahata. A a nga tsaki hi swihoxo swakwe kambe u hlawule ku tshemba leswaku Yehovha u n’wi rivalerile, ematshan’weni yo tshamela ku ehleketa hi swihoxo swakwe.  (Rhom. 7:21-25) A a swi tiva leswaku u ta swi endla swihoxo. U kulule a n’watseka leswaku a va ni vumunhu lebyinene bya Vukreste naswona u titshege hi Yehovha leswaku a n’wi pfuna a endla ntirho wakwe.—1 Kor. 9:27; hlaya Vafilipiya 4:13.

15. Vakulu va fanele va va ni langutelo rihi hi swihoxo swa vona?

¹⁵Leswi vakulu va swi dyondzaka. Vakulu a va hlawuriwi hileswi va nga endliki swihoxo. Kambe Yehovha u langutele leswaku va amukela swihoxo swa vona ni ku tikarhatela ku va ni vumunhu bya Vukreste. (Efe. 4:23, 24) Nkulu u fanele a tikambisisa hi ku tirhisa Rito ra Xikwembu ivi a antswisa loko swi fanerile. Kutani Yehovha u ta n’wi pfuna leswaku a tsaka ni ku va nkulu lonene.—Yak. 1:25.

16. Ku nga endleka yini loko nkulu a tshamela ku languta swihoxo swa van’wana?

¹⁶Leswi nga endlaka swi tika. Vakulu va nga ha tivela vamakwerhu evandlheni leswaku i vanhu va njhani hikwalaho ka leswi va tirhisanaka ngopfu na vona. Loko va nga tivoneli, va nga ha nyangatsiwa hi vamakwerhu, va va xopaxopa ivi va nga ha va kombisi musa. Pawulo u lemukise Vakreste leswaku Sathana u lava va va tano.—2 Kor. 2:10, 11.

17. Pawulo a a va teka njhani vamakwavo?

¹⁷Xikombiso xa Pawulo. Pawulo a a languta leswinene eka vamakwavo. A a swi tiva kahle swihoxo swa vona naswona mikarhi yin’wana swiendlo swa vona a swi n’wi khumba. Nilokoswiritano, a a swi tiva leswaku loko munhu o endla xihoxo a swi vuli swona leswaku i munhu wo biha. A a rhandza vamakwavo naswona a a languta vumunhu bya vona lebyinene. Loko va tsandzeka ku endla leswinene, a a tibyela leswaku va swi lava ku endla leswinene kambe vo lava ku pfuniwa.

18. U dyondza yini eka ndlela leyi Pawulo a khomeke Efodiya na Sintika hayona? (Vafilipiya 4:1-3)

¹⁸ Hi xikombiso, xiya ndlela leyi Pawulo a pfuneke vamakwerhu va xisati vambirhi va le vandlheni ra le Filipiya. (Hlaya Vafilipiya 4:1-3.) Swi tikomba onge Efodiya na Sintika a va tlulane milenge leswi nga endla leswaku va nga ha chayisani. Pawulo a nga va holovelanga kumbe ku va xopaxopa kambe u langute swilo leswinene leswi a va swi endla. A va tshembekile naswona a va dume hi leswinene. Pawulo a a swi tiva leswaku Yehovha wa va rhandza. Leswi a a ri ni langutelo lerinene hi vona u va khutaze leswaku va lulamisa timhaka. Langutelo lerinene leri a a ri na rona hi van’wana ri n’wi pfune leswaku a tshama a tsakile ni ku va ni vanghana evandlheni rolero.

19. (a) Vakulu va nga endla yini leswaku va tshama va ri ni langutelo lerinene hi vagandzerikulobye? (b) U nga dyondza yini eka xifaniso xa nkulu loyi a nga le ku basiseni ka Holo ya Mfumo?

¹⁹Leswi vakulu va swi dyondzaka. Vakulu, xiyisisani swilo leswinene leswi vamakwerhu va swi endlaka. Munhu un’wana ni un’wana wa  swi endla swihoxo kambe ku ni leswinene leswi a swi endlaka. (Filp. 2:3) Nkarhi ni nkarhi swi nga ha lava leswaku vakulu va pfuna makwerhu a va ni langutelo lerinene. Kambe ku fana na Pawulo, vakulu va fanele va tikarhatela ku nga dziki ngopfu eka mavulavulelo ni maendlelo ya munhu ya swilo lama nga tsakisiki. Va ta va va endla kahle loko va xiyisisa ndlela leyi a rhandzaka Yehovha ni ku tiyisela hayona loko a ri karhi a n’wi gandzela nileswaku a nga swi kota ku antswisa. Vakulu lava nga ni langutelo lerinene va endla leswaku vamakwerhu evandlheni va tsaka.

20. Vakulu va nga endla njhani leswaku va ya emahlweni va vuyeriwa eka xikombiso xa Pawulo?

²⁰ Vakulu swi ta mi pfuna ku dyondza hi xikombiso xa Pawulo. U nga dyondza swo tala hi Pawulo loko u ya eka Watch Tower Publications Index, eka nhlokomhaka leyi nge “Pawulo” ivi u ya eka nhlokomhaka leyitsongo leyi nge “xikombiso xa vakulu.” Loko u ri karhi u hlaya rungula leri nga kwalaho tivutise leswi, ‘Xana xikombiso xa Pawulo xi nga ndzi pfuna njhani leswaku ndzi tshama ndzi tsakile loko ndzi ri karhi ndzi tirha tanihi nkulu?’

21. Vakulu va nga tiyiseka hi yini?

²¹ Vakulu tsundzukani leswaku Yehovha wa swi tiva leswaku mi ta swi endla swihoxo kambe u lava mi tshembeka. (1 Kor. 4:2) Yehovha a a tsaka hileswi Pawulo a tshembekile ni ku tirha hi matimba. U nga tiyiseka leswaku Yehovha wa tsaka hi ntirho lowu u n’wi endlelaka wona. Yehovha a nge pfuki a wu ‘rivarile ntirho wa n’wina ni rirhandzu leri mi ri kombiseke hikwalaho ka vito ra yena, hi ku tirhela vakwetsimi naswona ma ha ya emahlweni mi va tirhela.’—Hev. 6:10.