1-2. Hi nga yi landzelerisisa njhani mikondzo ya Yesu? Kombisa.

HI MAHLO ya mianakanyo tivone u ri exikarhi ka ntlawa lowu nga eku valangeni ekhwatini leri chavisaka ngopfu. Mi valangisiwa hi munhu loyi a ri tivaka kahle khwati rero. Loko a kandziya, mikondzo yakwe ya tsala laha a fambaka kona. Mikarhi yin’wana, muvalangisi u pfa a nyamalala mi nga n’wi voni. Kambe sweswo a swi mi vilerisi. Hikuva loko a famba, mi sala mi landzela mikondzo yakwe endzhaku!

² Leswi hi nga Vakreste va ntiyiso, hi ndlela yo karhi swi fana ni loko hi famba ekhwatini leri tsuvulaka ni misisi, ku nga emisaveni leyi yo homboloka. Kambe lexi tsakisaka, Yehovha u hi nyike mukongomisi lonene, ku nga N’wana wakwe Yesu Kreste, loyi hi nga kotaka ku landzelerisisa mikondzo yakwe. (1 Pet. 2:21) Buku yin’wana ya tinhlamuselo ta Bibele, yi vula leswaku laha Petro a fanisa Yesu ni muvalangisi. Ku fana ni muvalangisi loyi a siyaka mikondzo laha a fambaka kona, Yesu na yena u hi siyele mikondzo leyi hi faneleke hi yi landzelerisisa. A hi hlamuleni swivutiso swinharhu mayelana ni ndlela leyi hi nga yi landzelaka hayona mikondzo ya Yesu?

3. Swi vula yini ku landzelerisisa mikondzo ya munhu un’wana?

³ Swi vula yini ku landzelerisisa mikondzo ya munhu un’wana? Mikarhi yin’wana, eBibeleni rito “famba” ni leri nge “mikondzo” ma vula ndlela leyi munhu a hanyaka hayona. (Gen. 6:9; Swiv. 4:26) Mahanyelo lamanene ya munhu, ma nga fanisiwa ni mikondzo leyi salaka yi tsarile loko munhu a hundzile. Hikwalaho, ku landzelerisisa mikondzo ya munhu, swi vula ku tekelela mahanyelo yakwe.

4. Swi vula yini ku landzelerisisa mikondzo ya Yesu?

 ⁴ Swi vula yini ku landzelerisisa mikondzo ya Yesu? Swi vula ku hanya hi ndlela leyi a a hanya hayona. Eka tsalwa leri nhlokomhaka leyi yi tekiweke eka rona, muapostola Petro u vulavule hi xikombiso lexinene lexi Yesu a hi vekeleke xona loko swi ta emhakeni ya ku tiyisela maxangu; kambe ku ni tindlela tin’wana to tala leti hi nga n’wi tekelelaka hatona. (1 Pet. 2:18-25) Ku vula ntiyiso, Yesu u hi vekele xikombiso lexinene hi marito ni hi swiendlo.

5. Xana vanhu lava velekiweke va ri ni xidyoho va nga swi kota hakunene ku tekelela Yesu? Hlamusela.

⁵ Leswi hi velekiweke hi ri ni xidyoho, xana hi nga swi kota hakunene ku tekelela Yesu? Ina. Tsundzuka, Petro a nga vulanga leswaku hi landzelerisisa mikondzo ya Yesu hi ku helela kambe u te hi ‘landzelerisisa mikondzo ya [Yesu].’ Hambileswi hi velekiweke hi ri ni xidyoho, loko hi tikarhatela ku landzelerisisa mikondzo ya Yesu, hi ta va hi yingisa marito ya muapostola Yohane lama nge: ‘Fambani hi ndlela leyi Yesu a fambeke hayona.’—1 Yoh. 2:6.

6-7. Hikwalahokayini hi vula leswaku ku landzelerisisa mikondzo ya Yesu swi ta endla hi va ni vuxaka lebyinene na Yehovha?

⁶ Ku landzelerisisa mikondzo ya Yesu swi ta endla hi va ni vuxaka lebyinene na Yehovha. Hikwalahokayini hi vula tano? Xo sungula, Yesu u hi vekele xikombiso lexinene loko swi ta emhakeni yo hanya hi ndlela leyi tsakisaka Xikwembu. (Yoh. 8:29) Hikwalaho, loko hi landzelerisisa mikondzo ya Yesu hi ta tsakisa Yehovha. Hi ta swi vona leswaku Tata wa hina wa le tilweni u tshinela eka vanhu lava lavaka ku va vanghana vakwe.—Yak. 4:8.

⁷ Xa vumbirhi, Yesu u tekelele Tata wakwe hi ku helela. Hi yona mhaka leyi a nga te: “Loyi a ndzi voneke u vone na Tatana.” (Yoh. 14:9)  Loko hi tekelela vumunhu lebyinene lebyi Yesu a a ri na byona ni ndlela leyi a a tirhisana ni vanhu hayona, hi ta va hi tekelela Yehovha. Hi xikombiso, Yesu u ve ni ntwelavusiwana eka munhu loyi a a ri ni nhlokonho ni le ka wansati loyi a a vabya ngopfu naswona a a twela ni vanhu lava loveriweke. (Mar. 1:40, 41; 5:25-34; Yoh. 11:33-35) Loko hi tekelela Yehovha, hi ta va ni vuxaka lebyinene na yena.

8. Hlamusela leswaku ku landzelerisisa mikondzo ya Yesu swi ta hi pfuna njhani hi ‘hlula’ misava.

⁸ Loko hi landzelerisisa mikondzo ya Yesu a hi nge pfumeli ku kavanyetiwa hi misava leyi yo homboloka. Loko Yesu a nga si dlayiwa, hi vusiku byakwe byo hetelela u te: “Misava ndzi yi hlurile.” (Yoh. 16:33) A a vula leswaku vanhu va misava leyi a va swi kotanga ku endla leswaku a cinca mahanyelo yakwe ni xikongomelo xakwe. Yesu a nga kalanga a swi rivala leswaku xikongomelo xakwe xo ta laha misaveni a ku ri ku ta vangamisa vito ra Yehovha. Ku vuriwa yini hi hina? Emisaveni leyi, ku ni swilo swo tala leswi nga hi kavanyetaka. Kambe loko hi tikarhatela ku endla ku rhandza ka Yehovha hilaha Yesu a endleke hakona, na hina hi ta yi ‘hlula’ misava.—1 Yoh. 5:5.

9. Hi fanele hi endla yini leswaku hi tshama hi ri egondzweni leri yisaka evuton’wini lebyi nga heriki?

⁹ Loko hi landzelerisisa mikondzo ya Yesu hi ta kuma vutomi lebyi nga heriki. Loko jaha leri fuweke ri vutise leswaku ri fanele ri endla yini leswaku ri ta kuma vutomi lebyi nga heriki, Yesu u ri hlamule a ku: ‘Tana u va mulandzeri wa mina.’ (Mat. 19:16-21) U byele Vayuda van’wana lava a va nga tshembi leswaku hi yena Kreste, a ku: “Tinyimpfu ta mina . . . ta ndzi landzela. Ndzi ti nyika vutomi lebyi nga heriki.” (Yoh. 10:24-29) Yesu u byele Nikodema, xirho xa huvo ya Sanedri, loyi a a tsakela ku twa leswi a swi dyondzisa, a ku: ‘Lava pfumelaka eka yena va ta kuma vutomi lebyi nga heriki.’ (Yoh. 3:16) Hi kombisa leswaku hi ni ripfumelo eka Yesu hi ku hanya hi swilo leswi a a swi dyondzisa ni hi ku tekelela mahanyelo yakwe. Loko hi endla tano, hi ta tshama hi ri egondzweni leri yisaka evuton’wini lebyi nga heriki.—Mat. 7:14.

10. Hi fanele hi endla yini loko hi lava ku n’wi ‘tiva’ kahle Yesu? (Yohane 17:3)

¹⁰ Leswaku hi kota ku landzelerisa mikondzo ya Yesu, hi fanele hi n’wi tiva kahle. (Hlaya Yohane 17:3.) Ku dyondza hi Yesu a swi heli. Leswaku hi kota ku n’wi tiva kahle, hi fanele hi dyondza hi vumunhu byakwe ni ndlela leyi a a endla swilo hayona. Swi nga ri na mhaka leswaku hi ni nkarhi wo tanihi kwihi hi ri Timbhoni, hi fanele hi ya emahlweni hi dyondza hi Yehovha ni N’wana wakwe.

11. I yini leswi Tievhangeli ta mune ti vulavulaka ha swona?

¹¹ Yehovha u hi nyike Tievhangeli ta mune leti nga eRitweni rakwe, leswaku a hi pfuna hi  tiva N’wana wakwe. Tievhangeli leti ti vulavula hi vutomi bya Yesu, ntirho lowu a wu endleke, leswi a swi vuleke ni ndlela leyi a a titwa hayona. Ti tlhela ti endla hi kota ku ‘ehleketisisa’ hi Yesu. (Hev. 12:3) Ta hi pfuna leswaku hi kota ku n’wi tekelela. Hikwalaho, loko hi tinyika nkarhi wo dyondza Tievhangheli leti, hi ta ya hi n’wi tiva kahle Yesu. Sweswo swi ta endla hi kota ku landzelerisisa mikondzo yakwe.

12. I yini leswi hi faneleke hi swi endla loko hi lava ku vuyeriwa eka Tievhangeli?

¹² Ku ni swo tala leswi hi faneleke hi swi endla leswaku hi ta vuyeriwa eka Tievhangeli leti. Hi fanele hi ti hlaya hi vukheta hi tlhela hi anakanyisisa hi leswi hi swi hlayaka. (Ringanisa na Yoxuwa 1:8, nhlamuselo ya le hansi.) A hi buleni hi swiringanyeto swimbirhi leswi nga hi pfunaka hi kota ku anakanyisisa hi Tievhangeli ni ku tlhela hi tirhisa leswi hi swi dyondzaka eka tona.

13. I yini lexi nga ku pfunaka leswaku u teka rungula leri nga eka Tievhangeli ri ri ra xiviri?

¹³ Xo sungula, teka rungula leri nga eka Tievhangheli ri ri ra xiviri. Hi mahlo ya mianakanyo vona leswi endlekaka, twana leswi vuriwaka, u tlhela u titwa ku fana ni vanhu lava a va ri kwalaho. Leswaku u kota ku endla tano, endla ndzavisiso eka mikandziyiso leyi humesiweke hi nhlangano wa Yehovha. Kuma mongo wa leswi endlekaka, hi ku hlaya tindzimana leti nga ehenhla ka ndzimana leyi u yi hlayaka ni leti nga ehansi ka yona. Kuma rungula leri vulavulaka hi vuxokoxoko bya vanhu ni swiendlakalo leswi u hlayaka ha swona. Hlaya ni rungula leri fambisanaka ni leri u hlayaka ha rona eka Evhangeli yin’wana. Mikarhi yin’wana Evhangeli yo karhi yi boxa vuxokoxoko lebyi nga riki kona eka yin’wana.

14-15. Hi nga swi tirhisa njhani leswi hi swi dyondzaka eka Tievhangeli?

¹⁴ Xa vumbirhi, tirhisa leswi u swi dyondzaka eka Tievhangeli. (Yoh. 13:17) Loko u heta ku hlaya mhaka yo karhi leyi kumekaka eka Evhangeli, tivutise: ‘Xana ku na leswi ndzi swi dyondzaka, leswi ndzi nga swi tirhisaka evuton’wini bya mina? Ndzi nga swi tirhisa njhani  leswi ndzi swi dyondzeke leswaku ndzi pfuna van’wana?’ Ehleketa hi munhu wo karhi loyi u nga n’wi pfunaka kutani loko u kuma nkarhi n’wi hlamusele leswi u swi dyondzeke.

¹⁵ A hi voneni ndlela leyi hi nga swi tirhisaka hayona swiringanyeto leswimbirhi. A hi buleni hi noni leyi nga xisiwana leyi Yesu a yi voneke etempeleni.

16. Hlamusela xiendlakalo lexi ku vulavuriwaka ha xona eka Marka 12:41.

¹⁶ Vona leswi endlekaka hi mahlo ya mianakanyo. (Hlaya Marka 12:41.) I Nisani 11, 33 C.E. ku sale vhiki leswaku Yesu a dlayiwa. Yesu u hete siku hinkwaro a ri karhi a dyondzisa etempeleni. Lava a va n’wi kaneta a va n’wi yimisa hi nenge wun’we. Eku sunguleni, van’wana va n’wi vutise leswaku u ma kuma kwihi matimba lawa a endlaka swilo ha wona. Kasi van’wana va n’wi vutisetele swivutiso hi xikongomelo xo n’wi phasa. (Mar. 11:27-33; 12:13-34) Sweswi Yesu u ya endhawini yin’wana ya tempele leyi vuriwaka Xivava xa Vavasati, u fika a tshama ekusuhinyana ni mabokisi ya minyikelo. Loko a ri kwalaho, u vona vanhu va ri karhi va khitikanela emabokisini ya minyikelo leswaku va ya nyikela. Swigwili a swi ri karhi swi nyikela hi mali yo tala ya nsimbhi. Loko a ri laha a nga tshama kona u twa mali ya nsimbhi yi ri karhi yi ku nkecee, endzeni ka mabokisi.

17. Noni leyi nga xisiwana leyi ku vulavuriwaka hi yona eka Marka 12:42 yi endle yini?

¹⁷ Hlaya Marka 12:42. Endzhaku ka nkarhi, loko Yesu a ku kelu, u vona wansati un’wana. Wansati yoloye i “noni leyi nga xisiwana.” (Luka 21:2) Noni leyi yi hanya hi rikoko ra xilondza. Hambiswiritano, yi kongoma emabokisini ya minyikelo kutani yi fika yi hoxa tisente timbirhi, ni leswaku ku hoxiwe yini emabokisini a swi twalanga. Yesu wa yi tiva mali leyi noni yoloye yi yi hoxeke, i tilepton timbirhi, ku nga tisente leti nga nyawuriki. Tisente toleto a ti xavi ni xindzingiri, lexi nga chipa swinene ku tlula swinyenyana hinkwaswo.

18. Hi ku ya hi Marka 12:43, 44, Yesu u vule yini hi munyikelo lowu nyikeriweke hi noni?

¹⁸ Hlaya Marka 12:43, 44. Yesu u tsake ngopfu hileswi endliweke hi noni leyi. Hikwalaho, u vitana vadyondzisiwa vakwe a va hlamusela leswi endliweke hi noni leyi, a ku: “Noni leyi, leyi nga xisiwana yi nyikele ku tlula hinkwavo.” U ya emahlweni a ku: “Hinkwavo [ngopfungopfu lava fuweke] va nyikele hi leswi va swi pambuleke eka leswi va taleleke, kambe yona yi nyikele hinkwaswo leswi a yi ri na swona, leswi a yi ta tihanyisa ha swona.” Loko noni leyi yi nyikela hi swimalana swa yona swo hetelela, a yi kombisa ndlela leyi yi n’wi tshembaka hayona Yehovha leswaku u ta yi khathalela.—Ps. 26:3.

19. Hi yihi dyondzo ya nkoka leyi hi yi kumaka eka marito lawa Yesu a ma vuleke hi noni leyi nga xisiwana?

¹⁹ Tirhisa leswi u swi dyondzaka. Tivutise, ‘Ndzi dyondza yini eka marito lawa Yesu a ma vuleke hi noni leyi nga xisiwana?’ Ehleketa hi noni yoleyo. A yi swi lava ku nyikela hi mali yo tala eka Yehovha. Hambiswiritano, yi endle leswi a swi ri ematimbeni ya yona, yi nyike Yehovha swimalana swa yona swo hetelela. Yesu a a swi tiva leswaku Tata wakwe wa tinyungubyisa swinene hi munyikelo wa noni yoleyo. Hi leyi dyondzo ya nkoka leyi hi yi dyondzaka: Yehovha wa tsaka loko hi n’wi nyika swilo swa hina swa nkoka ni loko hi n’wi tirhela hi mbilu hinkwayo. (Mat. 22:37; Kol. 3:23) Yehovha wa tsaka loko hi endla matshalatshala yo n’wi tirhela. Matshalatshala wolawo, ma katsa nkarhi ni matimba lawa hi ma hetaka entirhweni wa Yehovha, ku katsa ku ya ensin’wini ni le tinhlengeletanweni ta vandlha.

20. U nga swi tirhisa njhani leswi u swi dyondzaka emhakeni ya noni? Kombisa.

 ²⁰ U nga swi tirhisa njhani leswi u swi dyondzaka eka noni? Ehleketa hi vanhu lava u nga va khutazaka, u va byela leswaku Yehovha wa tsaka hi ntirho lowu va n’wi endlelaka wona. Hi xikombiso, xana u tiva makwerhu wo karhi wa xisati loyi a dyuhaleke kumbe a vabyaka naswona a tivonaka a nga ha pfuni nchumu hileswi a nga ha swi kotiki ku tirhela Yehovha hilaha a a endla hakona khale? Kumbe, xana u tiva makwerhu wo karhi loyi a nga ni vuvabyi lebyi nga tshungulekiki naswona a nga ha swi kotiki ku va kona etinhlengeletanweni ta vandlha nkarhi ni nkarhi? Loko va ri kona vanhu vo tano, va chavelele. (Efe. 4:29) Va byele mhaka leyi khutazaka leyi hi yi dyondzaka emhakeni ya noni leyi nga xisiwana. Leswi u nga ta va byela swona swi ta endla va swi vona leswaku Yehovha wa tsaka loko hi tikarhatela ku n’wi tirhela hilaha hi nga kotaka hakona. (Swiv. 15:23; 1 Tes. 5:11) Loko u bumabumela van’wana hikwalaho ka matshalatshala lawa va ma endlaka entirhweni wa Yehovha, u va u landzelerisisa mikondzo ya Yesu.

21. U tiyimisele ku endla yini?

²¹ Mayana leswi hi nga ni Tievhangeli leti hi hlamuselaka hi vutomi bya Yesu naswona ti hi pfunaka leswaku hi kota ku landzelerisisa mikondzo yakwe! Onge hi nga tinyika nkarhi wo dyondza Tievhangeli eka vugandzeri bya ndyangu kumbe eka dyondzo ya munhu hi yexe! Leswaku hi kota ku vuyeriwa eka Tievhangeli, hi fanele hi vona leswi hi swi hlayaka hi mahlo ya mianakanyo, hi tlhela hi swi tirhisa evuton’wini bya hina. Loko hi lava ku tekelela Yesu, hi fanele hi endla leswi a swi endleke ni ku yingisa leswi a swi vuleke. Eka nhlokomhaka leyi landzelaka, hi ta bula hi marito yo hetelela lawa Yesu a ma vuleke.