1. I yini leswi Yehovha a swi vonaka loko a languta vanhu vakwe?

YEHOVHA XIKWEMBU “u tsakela vanhu vakwe.” (Ps. 149:4) Mayana ku tsakisa ka swona ku tiva mhaka leyi! Loko Yehovha a hi languta, u vona swilo leswinene eka hina; leswi hi nga kotaka ku swi endla naswona u hi kokela eka yena leswaku hi va vanghana va yena. Loko hi tshama hi tshembekile eka yena, vuxaka bya hina na yena a byi nge heli.—Yoh. 6:44.

2. Hikwalahokayini van’wana va ehleketa leswaku Yehovha a nga va rhandzi?

² Van’wana va nga ku, ‘Ndza swi tiva leswaku Yehovha wa va rhandza vanhu vakwe hinkwavo kambe ndzi nga tiyiseka njhani leswaku mina wa ndzi rhandza?’ Hikwalahokayini van’wana va tivutisa xivutiso lexi? Oksana *, loyi a voneke maxangu loko a ha ri ntsongo, u ri: “Loko ndzi khuvuriwa niloko ndzi sungula ku phayona, a ndzi nga tikoti hi ku tsaka. Kambe endzhaku ka malembe ya 15, ndzi sungule ku tsundzuka mangava lawa ndzi ma voneke loko ndza ha ri ntsongo kutani ndzi gimete hi ku tibyela leswaku Yehovha a nga ha ndzi rhandzi naswona a swi ndzi faneli ku rhandziwa hi yena.” Yua, makwerhu wa xisati loyi a nga phayona, loyi na yena a kuleke ku vava, u ri: “Lexi endleke ndzi tinyiketela eka Yehovha hileswi a ndzi lava ku n’wi tsakisa. Kambe a ndzi swi tiva leswaku a nge pfuki a ndzi rhandzile.”

3. Hi ta bula hi yini eka nhlokomhaka leyi?

³ Ku fana ni vamakwerhu lava se hi vulavuleke ha vona, swi nga endleka leswaku na wena wa n’wi rhandza Yehovha kambe a wu tiyiseki leswaku yena wa ku rhandza. Hikwalahokayini u fanele u tshemba leswaku wa ku rhandza? I yini lexi nga ku pfunaka loko  u vona onge Yehovha a nga ku rhandzi? A hi buleni hi tinhlamulo ta swivutiso leswi.

4. Hikwalahokayini swi ri ni khombo ku ehleketa leswaku Yehovha a nga ku rhandzi?

⁴ Rirhandzu ri ni matimba swinene. Loko hi tshemba leswaku Yehovha wa hi rhandza ni ku hi seketela, hi ta lava ku n’wi tirhela hi timbilu ta hina hinkwato hambiloko hi hlangavetana ni mitlhontlho. Kambe loko hi nga tshembi leswaku Xikwembu xa hi rhandza, “matimba ya [hina] ma ta va matsongo.” (Swiv. 24:10) Loko hi hela matimba naswona hi nga xi tshembi Xikwembu, Sathana u ta hi hlasela hi ku olova.—Efe. 6:16.

5. Ku endleke yini hi van’wana lava a va nga tshembi leswaku Xikwembu xa va rhandza?

⁵ Ripfumelo ra Vakreste van’wana, ri sungule ku tsana hileswi a va nga tshembi leswaku Yehovha wa va rhandza. Makwerhu James loyi a nga nkulu, u ri: “Hambileswi a a ndzi tirha eBethele naswona a ndzi tiphina evandlheni ra ririmi rimbe leri a ndzi ri eka rona kambe a a ndzi nga tshembi leswaku Yehovha wa tsaka hi ntirho lowu a ndzi n’wi endlela wona. Mikarhi yin’wana a ndzi pfa ndzi tivutisa leswaku njhe wa swi yingisa swikhongelo swa mina.” Eva, loyi na yena a nga eka ntirho wa nkarhi hinkwawo, u ri: “Ndzi xiye leswaku swi ni khombo ku ka u nga tshembi leswaku Yehovha wa ku rhandza hikuva sweswo swi ta khumba vuxaka bya wena na yena. Swi ta endla leswaku u nga swi tsakeli ku dyondza hi yena ni ku n’wi tirhela.” Michael loyi a nga nkulu tlhelo phayona, u ri: “Loko u nga tshembi leswaku Xikwembu xa ku rhandza, u ta hambuka kutani u tshika ku xi tirhela.”

6. Hi fanele hi endla yini loko hi sungula ku nga tshembi leswaku Xikwembu xa hi rhandza?

⁶ Timhaka leti se hi buleke hatona, ti swi veka erivaleni leswaku swi ni khombo ku va ni langutelo leri hoxeke. Kambe hi fanele hi endla yini loko hi sungula ku nga tshembi leswaku Xikwembu xa hi rhandza? Hi fanele hi bakanya miehleketo yoleyo hi ku hatlisa! Kombela Yehovha a ku pfuna u susa ‘miehleketo yoleyo leyi karhatekeke,’ u yi siva hi ‘ku rhula ka Xikwembu loku nga ta rindza mbilu ya wena ni mianakanyo ya wena.’ (Ps. 139:23; Filp. 4:6, 7) Tsundzuka, a hi wena ntsena. Ku ni vamakwerhu van’wana lava va titwaka ku fana na wena. Hambi ku ri malandza ya Yehovha ya khale, na wona ma tshame ma titwa hi ndlela leyi fanaka. A hi voneni leswi hi nga swi dyondzaka eka muapostola Pawulo.

7. Hi swihi swiphiqo leswi Pawulo a a langutane na swona?

⁷ Xana mikarhi yin’wana u pfa u vona onge u ni mitirho yo tala lerova a wu nge swi koti ku yi endla hinkwayo? Loko swi ri tano, u ta swi twisisa kahle leswi Pawulo a a langutane na swona. A a karhateka swinene hi vamakwavo ‘emavandlheni hinkwawo.’ (2 Kor. 11:23-28) Xana u ni vuvabyi lebyi nga tshungulekiki lebyi byi ku dyisaka mbitsi? Pawulo a a ri ni “mutwa enyameni” lowu a wu n’wi karhata, lowu swi nga endlekaka leswaku a ku ri vuvabyi byo karhi lebyi a a lava leswaku byi hola kambe a a byi nga holi. (2 Kor. 12:7-10) Xana u pfa u hela matimba hikwalaho ka swihoxo swa wena? Pawulo a a pfa a titwa tano. U kale a tivula “munhu wa maxangu” hileswi a wa a pfuka leswaku a endla swilo leswinene.—Rhom. 7:21-24.

8. I yini lexi pfuneke Pawulo a kota ku tiyisela swiphiqo?

⁸ Pawulo a nga tshikanga ku tirhela Yehovha hambileswi a a langutane ni swiphiqo swo hambanahambana. U pfuniwe hi yini? Hambileswi a a swi tiva leswaku u velekiwe a ri mudyohi, a a ri ni ripfumelo eka nkutsulo. A a xi tiva kahle xitshembiso xa Yesu xa leswaku ‘hinkwavo lava pfumelaka eka Yesu va ta kuma vutomi lebyi nga heriki.’ (Yoh. 3:16; Rhom. 6:23) Pawulo i un’wana wa vanhu lava a a va ri ni ripfumelo eka nkutsulo. A a kholwa leswaku Yehovha u tiyimisele ku rivalela vanhu hinkwavo lava hundzukaka, ku katsa ni lava endleke swidyoho leswikulu.—Ps. 86:5.

9. Hi dyondza yini eka marito ya Pawulo lama nga eka Vagalatiya 2:20?

⁹ Pawulo a a tiyiseka leswaku Xikwembu xa n’wi rhandza hileswi xi rhumeleke Kreste a ta n’wi fela. (Hlaya Vagalatiya 2:20.) Xiya marito lama tiyisaka nhlana lawa Pawulo a ma vuleke loko a gimeta ndzimana leyi. U te: ‘N’wana wa Xikwembu, u ndzi rhandzile kutani a tinyiketa hikwalaho ka mina.’ Pawulo a a swi tiva leswaku Xikwembu xi rhandza vanhu va xona hinkwavo, hi yona mhaka a a tiyiseka leswaku na yena xa n’wi rhandza. U tsundzuxe Varhoma a ku: ‘Kreste u hi ferile loko ha ha ri vadyohi.’ (Rhom. 5:8) Swi le rivaleni leswaku a xi kona lexi nga sivelaka Xikwembu ku hi rhandza!   

10. Hi dyondza yini eka Varhoma 8:38, 39?

¹⁰ Hlaya Varhoma 8:38, 39. Pawulo a a kholwa leswaku Xikwembu xa n’wi rhandza. U vule leswaku a xi kona ni xin’we lexi nga hi “[hambanisaka] ni rirhandzu ra Xikwembu.” A a swi tiva leswaku Yehovha u lehisele Vaisrayele mbilu. Nakambe, u swi vonile leswaku Yehovha u n’wi kombe tintswalo. Hi nga katsakanya marito ya Pawulo hi ndlela leyi, ‘Leswi Yehovha a rhumeke N’wana wakwe leswaku a ta ndzi fela, xana  ndzi na xona xivangelo xo kanakana leswaku wa ndzi rhandza?’—Rhom. 8:32.

11. Hambileswi Pawulo a endleke swidyoho swo fana ni leswi boxiweke eka 1 Timotiya 1:12-15, i yini lexi a xi endla a tshemba leswaku Xikwembu xa n’wi rhandza?

¹¹ Hlaya 1 Timotiya 1:12-15. Mikarhi yin’wana, Pawulo a a tisola loko a tsundzuka swilo swo biha leswi a tshameke a swi endla. A swi hi hlamarisi leswi a a tivula “mudyohi lonkulu!” Loko Pawulo a nga si va Mukreste, u xanise Vakreste etindhawini to tala, van’wana u va pfalele ejele, a tlhela a seketela ku dlayiwa ka van’wanyana. (Mit. 26:10, 11) U ehleketa leswaku Pawulo a a ta titwa njhani loko a hlangana ni muntshwa loyi a nga Mukreste, loyi a nga ha riki na vatswari hikwalaho ka yena? Pawulo a a tisola hikwalaho ka swihoxo leswi a swi endleke kambe a ku nga ri na lexi a ta xi endla. A a kholwa leswaku Kreste u n’wi ferile naswona u tsale a ku: “Ndzi leswi ndzi nga swona hikwalaho ka musa lowukulu wa Xikwembu.” (1 Kor. 15:3, 10) Hi dyondza yini? Swi tive u tlhela u tiyiseka leswaku Kreste u ku ferile naswona u ku pfulele ndlela yo va ni vuxaka lebyinene na Yehovha. (Mit. 3:19) Xa nkoka eka Xikwembu hi leswi hi swi endlaka sweswi ni leswi hi nga ta swi endla enkarhini lowu taka, ku nga ri swihoxo leswi hi tshameke hi swi endla, swi nga ri na mhaka leswaku se a hi ri Timbhoni kumbe a hi nga si va tona.—Esa. 1:18.

12. Marito lama nga eka 1 Yohane 3:19, 20, ma nga hi pfuna njhani loko hi titwa hi nga pfuni nchumu kumbe hi nga rhandziwi?

¹² Loko u ehleketa hi ku va Yesu a fele swidyoho swa wena, u nga tibyela leswi, ‘Ndzo va mani mina leswaku a nga ndzi fela.’ I yini lexi nga endlaka u titwa tano? Timbilu ta hina ti nga hi kanganyisa, ti endla hi titwa hi nga pfuni nchumu kumbe hi nga rhandziwi. (Hlaya 1 Yohane 3:19, 20.) Loko hi sungula ku titwa tano, hi fanele hi tsundzuka leswaku “Xikwembu i xikulu eka timbilu ta hina.” Hi fanele hi tshama hi swi tiva leswaku Tata wa hina wa le tilweni wa hi  rhandza naswona u tiyimisele ku hi rivalela. Hi fanele hi yi tshemba hi ku helela mhaka leyi. Leswaku hi kota ku endla tano, hi fanele hi dyondza Rito rakwe, hi khongela ni ku tihlanganisa ni vamakwerhu nkarhi ni nkarhi. Hikwalahokayini ku endla tano swi ri swa nkoka?

13. Ku dyondza Rito ra Xikwembu swi ta hi pfuna njhani? (Vona ni bokisi leri nge “ Ndlela Leyi Rito Ra Xikwembu Ri Va Pfuneke Hayona.”)

¹³ Dyondza Rito ra Xikwembu siku ni siku, u ta swi vona leswaku Yehovha u ni vumunhu lebyinene. U ta tlhela u swi vona leswaku wa ku rhandza swinene. Loko u anakanyisisa hi Rito ra Xikwembu siku ni siku, u ta kota ku ehleketa kahle ni ku “lulamisa swilo” emiehleketweni ni le mbilwini ya wena. (2 Tim. 3:16) Kevin, loyi a nga nkulu naswona a a titeka a nga pfuni nchumu, u ri: “Ku hlaya ni ku anakanyisisa hi Pisalema 103, swi endle ndzi lulamisa langutelo ra mina ni ku twisisa ndlela leyi Yehovha a titwaka hayona hi mina.” Eva, loyi ku vulavuriweke ha yena, u ri: “Ndzi gimeta siku hi ku anakanyisisa hi ndlela leyi Yehovha a ti twaka hayona. Swa ndzi phyuphyisa ni ku tiyisa ripfumelo ra mina.”

14. Xikhongelo xi nga hi pfuna njhani?

¹⁴ Khongela nkarhi ni nkarhi. (1 Tes. 5:17) Leswaku vunghana bya wena ni munhu un’wana byi tiya, mi fanele mi vulavurisana nkarhi ni nkarhi. Swi tano ni hi vunghana bya wena na Yehovha. Loko hi khongela hi n’wi byela ndlela leyi hi titwaka hayona ni ku n’wi phofulela leswi nga etimbilwini ta hina, hi kombisa leswaku ha n’wi tshemba naswona ha swi tiva leswaku wa hi rhandza. (Ps. 94:17-19; 1 Yoh. 5:14, 15) Yua, loyi a tshahiweke eku sunguleni, u ri: “Loko ndzi khongela, a ndzi vuli ntsena swilo leswi endlekeke hi siku rero. Ndzi phofulela Yehovha ndlela leyi ndzi titwaka hayona. Sweswo swi endla ndzi nga n’wi teki tanihi ndhuna ya le ntirhweni kambe ndzi n’wi teka tanihi Tatana loyi a rhandzaka vana vakwe.”—Vona ni bokisi leri nge “ Xana Se U Yi Hlayile?”

15. Yehovha u swi kombisa njhani leswaku wa hi rhandza?

¹⁵ Tihlanganise ni vamakwerhu; vamakwerhu i nyiko leyi humaka eka Yehovha. (Yak. 1:17) Yehovha u kombisa leswaku wa hi rhandza hi ku hi nyika vamakwerhu lava hi kombaka “rirhandzu mikarhi hinkwayo.” (Swiv. 17:17) Loko Pawulo a tsalela Vakolosa papila, u boxe mavito ya Vakreste vo karhi, lava a vuleke leswaku va n’wi “chavelerile swinene.” (Kol. 4:10, 11) Hambi ku ri Kreste Yesu a a lava ku seketeriwa naswona u swi tlangerile swinene loko vanghana vakwe ni tintsumi va n’wi seketela.—Luka 22:28, 43.

16. Vamakwerhu va nga hi pfuna njhani leswaku hi va ni vuxaka lebyinene na Yehovha?

¹⁶ Xana u tiyimiserile ku amukela ku pfuniwa hi vamakwerhu lava Yehovha a ku nyikeke vona? Loko u byela makwerhu loyi a wupfeke swiphiqo swa wena, a swi vuli swona leswaku u tsanile kambe swi ta ku sirhelela. Twana leswi James,  loyi a tshahiweke eku sunguleni a swi vulaka, u ri: “Ku va munghana wa vamakwerhu lava wupfeke swi ndzi pfune ngopfu. Loko ndzi sungula ku va ni langutelo leri hoxeke, va ndzi yingisile loko ndzi tiphofula, va tlhela va ndzi byela leswaku va ndzi rhandza. Va endle ndzi swi vona leswaku Yehovha wa ndzi rhandza naswona wa khathala hi mina.” Hakunene, i swa nkoka ku va ni vunghana lebyinene ni vamakwerhu!

17-18. I mani loyi hi faneleke hi n’wi yingisa naswona hikwalahokayini?

¹⁷ Sathana u lava hi tshika ku endla swilo leswinene. U lava hi tshemba leswaku Yehovha a nga hi rhandzi naswona a nge hi ponisi. Kambe hilaha se hi swi tweke hakona, wolawo i mavunwa.

¹⁸ Yehovha wa ku rhandza. U ku teka u ri wa nkoka. Loko u n’wi yingisa, u ta ku “rhandza” hilaha ku nga heriki, ku fana na Yesu. (Yoh. 15:10) Hikwalaho, u nga n’wi yingisi Sathana kumbe mbilu ya wena leyi kanganyisaka. Kurinasweswo, yingisa Yehovha, loyi a vonaka swilo leswinene eka hina. Tshama u swi tiva leswaku Yehovha wa ‘va rhandza vanhu vakwe,’ ku katsa na wena!