1. Hikwalahokayini hi hlamula etidyondzweni?

 HIKWALAHOKAYINI hi ya etinhlengeletanweni ta vandlha? Xivangelo xa nkoka hileswi hi lavaka ku dzunisa Yehovha. (Ps. 26:12; 111:1) Hi tlhela hi ya etinhlengeletanweni ta vandlha leswaku hi khutazana emikarhini leyi yo tika. (1 Tes. 5:11) Loko hi hlamula, hi kota ku fikelela swilo leswi hinkwaswo.

2. Hi rini laha hi kumaka nkarhi wo hlamula etidyondzweni?

² Vhiki ni vhiki hi kuma nkarhi wo hlamula etidyondzweni. Hi xikombiso, hi mahelovhiki hi kuma nkarhi wo hlamula eka Dyondzo ya Xihondzo xo Rindza. Eka tinhlengeletano ta le xikarhi ka vhiki, hi kuma nkarhi wo hlamula eka Endla Ndzavisiso, Dyondzo Ya Bibele Ya Vandlha ni le ka swiyenge swin’wana.

3. Hi yihi mitlhontlho yin’wana leyi hi nga ha langutanaka na yona naswona Vaheveru 10:24, 25 yi nga hi pfuna njhani?

³ Hinkwerhu hi lava ku dzunisa Yehovha ni ku khutaza vamakwerhu. Kambe ku ni swilo leswi nga endlaka swi hi tikela ku hlamula. Hi nga ha chava ku hlamula kumbe hi nga ha va hi swi rhandza ku hlamula kambe hi nga kombiwi ko tala hilaha hi lavaka hakona. Hi nga yi hlula njhani mitlhontlho leyi? Hi kuma hlamulo eka papila leri muapostola Pawulo a ri tsaleleke Vaheveru. Loko a hlamusela nkoka wo va hi hlengeletana  swin’we, u vule leswaku hi fanele hi “khutazana.” (Hlaya Vaheveru 10:24, 25.) A hi nge chavi ku hlamula loko hi xiya leswaku van’wana va khutazeka hambiloko hi nyikela nhlamulo yo olova leyi kombisaka ripfumelo ra hina. Loko va nga hi kombi ko tala, hi nga tsaka ku tiva leswaku van’wana evandlheni va ta kuma nkarhi wo hlamula.—1 Pet. 3:8.

4. Hi tihi tinhla tinharhu leti hi nga ta bula ha tona eka nhlokomhaka leyi?

⁴ Eka nhlokomhaka leyi, hi ta rhanga hi bula hi ndlela leyi hi nga khutazanaka hayona evandlheni leritsongo, laha ku nga ni vanhu va ntsongo lava hlamulaka. Kutani hi ta kambisisa ndlela leyi hi nga khutazanaka hayona evandlheni lerikulu laha vo tala va hlamulaka. Xo hetelela, hi ta bula hi ndlela leyi hi nga khutazanaka hayona hi tinhlamulo ta hina.

5. Hi nga khutazana njhani loko hi nga talanga evandlheni?

⁵ EVandlheni leritsongo kumbe eka ntlawa, a va tati na xandla vanhu lava mufambisi a nga kotaka ku va komba leswaku va hlamula. Nkarhi wun’wana mufambisi a nga ha boheka ku yima nkarhinyana leswaku ku va ni loyi a tlakusaka voko. Loko sweswo swi endleka, tidyondzo ti nga ha phirha leswi nga endlaka vanhu va nga ha khutazeki. Xana u nga endla yini? Tiyimisele ku yimisa voko mikarhi yo hlaya. Hi ku endla tano, u nga ha khutaza van’wana leswaku va hlamula nkarhi ni nkarhi.

6-7. I yini leswi nga hi pfunaka leswaku hi nga chuhi ngopfu loko hi lava ku hlamula?

⁶ Ku vuriwa yini loko ku hlamula swi hi khomisa rhumbyana? Vo tala va hina swa hi chuhisa. Kambe leswaku u khutaza vamakwerhu, swi nga va kahle loko wo lava tindlela leti nga ku pfunaka leswaku u nga ha chavi ngopfu. U nga swi endla njhani sweswo?

⁷ Swi nga ku pfuna ku kambisisa swiringanyeto swin’wana leswi nga eka timagazini ta khale ta Xihondzo xo Rindza. b Hi xikombiso, lunghiselela kahle. (Swiv. 21:5) Loko u yi tiva kahle nhlokomhaka leyi dyondziwaka, swi ta ku olovela ku hlamula. Nakambe, u nga lehisi loko u hlamula. (Swiv. 15:23; 17:27) Nhlamulo yo koma a yi nge ku karhati. Nhlamulo yo koma, kumbexana leyi nga riki na marito yo tala, yi nga ha olovela vamakwerhu leswaku va yi twisisa ku ri ni nhlamulo yo leha leyi nga ni tinhla to tala. Loko u hlamula hi marito ya wena naswona u nga lehisi, u ta va u kombisa leswaku u lunghiselele kahle naswona u yi twisisa kahle nhlokomhaka leyi dyondziwaka.

8. Yehovha u titwa njhani hi matshalatshala ya hina?

⁸ Ku vuriwa yini loko u ringete swin’wana swa swiringanyeto leswi kambe u tama wa ha chuha loko u hlamula? Tiyiseka leswaku Yehovha u ta ma tlangela matshalatshala ya wena. (Luka 21:1-4) Yehovha a nga lavi leswaku hi endla leswi nga ehenhla ka matimba ya hina. (Filp. 4:5) Tiva leswi u nga kotaka ku swi endla, hlela leswaku u swi fikelela naswona u khongelela ku va ni mbilu yo rhula. U nga ha sungula hi ku nyikela nhlamulo yin’we yo koma.

9. Hi wihi tlhontlho lowu nga ha vaka kona evandlheni lerikulu?

⁹ Loko evandlheni ra wena ku ri ni vahuweleri vo tala, u nga ha langutana ni tlhontlho wun’wana. Kumbexana vamakwerhu vo tala va hlamula lerova mikarhi yo tala a wu kombiwi loko u yimise voko. Hi xikombiso, Danielle wa swi rhandza ku hlamula loko a ri  etidyondzweni. c U swi teka ku ri xiphemu xo gandzela Yehovha, ndlela yo khutaza van’wana ni ndlela yo tiyisa ripfumelo rakwe eka leswi Bibele yi swi dyondzisaka. Kambe loko a ta va a rhurhele evandlheni leri nga ni vahuweleri vo tala, a a nga ha kombiwi ko tala leswaku a hlamula naswona mikarhi yin’wana a a huma a nga hlamulanga etidyondzweni. U ri: “A ndzi nga tsakanga. A ndzi twa onge ndzi tsoniwa swo karhi. Loko sweswo swi endleka mikarhi yo tala u sungula ku tivutisa loko va endla hi vomu.”

10. Hi nga endla yini leswaku hi kuma nkarhi wo hlamula?

¹⁰ Xana u tshame u titwa ku fana na Danielle? Loko swi ri tano, u nga ha lava ku lan’wa ku hlamula etidyondzweni kutani u yingisela kunene. Kambe u nga tshiki ku hlamula. I yini leswi u nga swi endleka? Swi nga ha ku pfuna ku lunghiselela tinhlamulo to hlayanyana. Loko u nga kombiwanga leswaku u hlamula loko tidyondzo ti sungula, u ta va ni nkarhi wo tala wo hlamula loko tidyondzo ti ri karhi ti ya emahlweni. Loko u lunghiselela Xihondzo xo Rindza lexi dyondziwaka evandlheni, ehleketa hi ndlela leyi ndzimana ha yin’we yi fambisanaka hayona ni nhlokomhaka yoleyo. Loko u endla tano, a swi kanakanisi leswaku u ta nyikela tinhlamulo leti khutazaka. Nakambe u nga ha lunghiselela ku hlamula eka tindzimana leti vulavulaka hi tidyondzo ta Bibele leti enteke leti swi nga oloviki ku ti hlamusela. (1 Kor. 2:10) Hikwalahokayini? Hikuva swi nga endleka vo tala va nga yimisi mavoko eka tindzimana teto. Ku vuriwa yini hambiloko se u tirhise swiringanyeto leswi, u kuma leswaku ni sweswi endzhaku ka tinhlengeletano ta vandlha to tala a wu kombiwi loko u yimise voko? U nga ya eka mufambisi loko tidyondzo ti nga si sungula kutani u n’wi byela hi xivutiso lexi u lavaka ku hlamula eka xona.

11. Vafilipiya 2:4 yi hi khutaza ku endla yini?

¹¹ Hlaya Vafilipiya 2:4. Hi ku pfuniwa hi moya lowo kwetsima, muapostola Pawulo u khutaze Vakreste leswaku va ehleketelela van’wana. Hi nga xi tirhisa njhani xitsundzuxo lexi loko hi ri etidyondzweni? Hi ku tsundzuka leswaku ku fana na hina, van’wana va swi lava ku hlamula.

12. Hi yihi ndlela leyinene yo khutaza van’wana etinhlengeletanweni ta vandlha? (Nakambe vona xifaniso.)

 ¹² Ehleketa hi mhaka leyi. Loko u ri karhi u bula ni vanghana va wena, xana ku ta vulavula wena ntsena u nga va nyiki nkarhi? Doo! Wa swi lava leswaku na vona va katseka eka bulo rero. Hilaha ku fanaka, etidyondzweni hi lava leswaku vo tala va hlamula hilaha va nga kotaka hakona. Entiyisweni, ndlela yin’wana ya nkoka yo khutaza vamakwerhu i ku va nyika nkarhi wo kombisa ripfumelo ra vona. (1 Kor. 10:24) A hi voneni leswaku hi nga swi endla njhani leswi.

13. Hi nga swi endlisa ku yini leswaku vamakwerhu vo tala va hlamula?

¹³ Hi nga ha nyikela tinhlamulo to koma, leswi nga ta endla leswaku van’wana va kota ku hlamula. Vakulu ni vamakwerhu van’wana lava nga ni ntokoto va nga va xikombiso emhakeni leyi. Hambiloko u nyikela nhlamulo yo koma, papalata ku vulavula hi tinhla to tala. Loko u vungavunga tinhla hinkwato eka ndzimana yo karhi, van’wana a ve nge he swi koti ku hlamula. Hi xikombiso, eka ndzimana leyi, ku boxiwa swiringanyeto swimbirhi, ku nga leswaku nyikela nhlamulo yo koma ni ku papalata ku vulavula hi tinhla to tala. Loko ku ve hi wena u sungulaka ku hlamula eka ndzimana leyi, ringeta ku vulavula hi yinhla yin’we ntsena.

14. I yini leswi nga hi pfunaka hi tiva leswaku hi ri tlakusa kangani voko? (Nakambe vona xifaniso.)

¹⁴ Tirhisa vuxiyaxiya loko swi ta emhakeni ya leswaku u ta hlamula kangani. Loko hi tshamela ku tlakusa voko, hi nga ha endla leswaku mufambisi a titwa a boheka ku tshamela ku hi komba hambiloko van’wana va nga si hlamula. Leswi swi nga ha tshikisa van’wana ku hlamula.—Ekl. 3:7.

15. (a) Xana hi fanele hi endla yini loko va nga hi kombi leswaku hi hlamula? (b) Vafambisi va nga swi kombisa njhani leswaku va anakanyela vanhu hinkwavo? (Vona bokisi leri nge, “ Loko U Fambisa Dyondzo.”)

¹⁵ A hi nge swi koti ku hlamula hilaha hi lavaka hakona loko vahuweleri vo tala va yimisa  mavoko. Mikarhi yin’wana mufambisi a nge swi koti ku hi komba hinkwerhu. Sweswo swi nga hi heta matimba, kambe a swi fanelanga swi hi khunguvanyisa loko va nga kombanga hina leswaku hi hlamula.—Ekl. 7:9.

16. Hi nga va khutaza njhani lava hlamulaka?

¹⁶ Loko u nga swi koti ku hlamula ko tala hilaha u navelaka hakona, hikwalahokayini u nga yingiserisisi loko van’wana va ri karhi va hlamula kutani endzhaku ka tinhlengeletano ta vandlha u va bumabumela? Vamakwerhu va nga ha khutaziwa hileswi u va bumabumelaka hilaha a va ta khutaziwa hakona hi tinhlamulo leti a wu ta va u tinyikerile. (Swiv. 10:21) Ku bumabumela i ndlela yin’wana leyi hi nga khutazanaka hayona.

17. (a) Vatswari va nga va pfuna njhani vana va vona va lunghiselela tinhlamulo ta kahle? (b) Hi ku ya hi vhidiyo, hi wahi magoza ya mune yo lunghiselela nhlamulo? (Nakambe vona nhlamuselo ya le hansi.)

¹⁷ Hi yihi ndlela yin’wana leyi hi nga khutazanaka hayona etidyondzweni? Loko u ri mutswari, pfuna vana va wena va lunghiselela tinhlamulo leti ringaneke malembe ya vona. (Mat. 21:16) Mikarhi yin’wana, nhlokomhaka leyi dyondziwaka evandlheni yi nga ha vulavula hi timhaka ta nkoka leti khumbaka vanhu lavakulu to fana ni swiphiqo swa vukati kumbe ku tikhoma ku biha kambe ku nga ha va ni tindzimana ti nga ri tingani leti vana va nga hlamulaka eka tona. Tlhela u pfuna vana va wena va twisisa leswaku a hi mikarhi  hinkwayo laha va nga ta va komba leswaku va hlamula. Ku endla tano swi ta pfuna va nga khunguvanyeki loko ku kombiwa van’wana.—1 Tim. 6:18. d

18. Hi nga swi papalata njhani ku tikokela mahlo loko hi hlamula? (Swivuriso 27:2)

¹⁸ Hinkwerhu hi nga lunghiselela tinhlamulo leti khutazaka vamakwerhu ni ku dzunisa Yehovha. (Swiv. 25:11) Hambileswi mikarhi yin’wana hi nga vulaka ntokoto wo karhi wo koma lowu hi veke na wona kambe hi fanele hi papalata ku vulavula ngopfu hi hina vini. (Hlaya Swivuriso 27:2; 2 Kor. 10:18) Ematshan’weni ya sweswo, hi tikarhatela ku vulavula hi Yehovha, Rito rakwe ni vanhu vakwe mikarhi hinkwayo. (Nhlav. 4:11) I ntiyiso leswaku loko xivutiso xi lava leswaku hi vula ntokoto lowu hi veke na wona, swi kahle ku endla tano. Xikombiso xa leswi, xi hlamuseriwa eka ndzimana leyi landzelaka.

19. (a) Ku ta endleka yini loko hi kombisa leswaku hi anakanyela vanhu hinkwavo? (Varhoma 1:11, 12) (b) I yini leswi ku tsakisaka hi ku hlamula etidyondzweni?

¹⁹ Hambileswi ku nga riki na milawu leyi bohaka eka ndlela leyi hi faneleke hi hlamula hayona, hinkwerhu hi nga tikarhatela ku nyikela tinhlamulo leti khutazaka. Leswi swi nga ha lava leswaku hi hlamula ko talanyana. Kumbe swi nga lava leswaku hi eneriseka hi tinhlamulo leti hi kotaka ku ti nyikela ni ku tsaka loko van’wana va kuma nkarhi wo hlamula. Loko hi ehleketelela vamakwerhu loko hi ri etidyondzweni, hinkwerhu hi nga tiphina hi ku “khutazana.”—Hlaya Varhoma 1:11, 12.