1-2. I yini leswi hi faneleke hi swi endla loko ha ha rindzele misava leyintshwa?

 XITSHEMBISO xa Yehovha xo herisa misava leyi ivi a hi tisela misava leyintshwa yo lulama i xa risima swinene eka hina. (2 Pet. 3:13) Hambileswi hi nga swi tiviki leswaku misava leyintshwa yi ta fika rini, vumbhoni byi kombisa leswaku a hi nge yi rindzeli nkarhi wo leha.—Mat. 24:32-34, 36; Mit. 1:7.

² Loko swa ha ri tano, swi nga ri na mhaka leswaku hi ni nkarhi wo tanihi kwihi hi ri entiyisweni, hinkwerhu hi fanele hi tiyisa ripfumelo ra hina leswaku hi tshemba xitshembiso xexo. Hikwalahokayini? Hikuva hambi ku ri ripfumelo leri tiyeke ri nga tsana. Entiyisweni, muapostola Pawulo u vule leswaku ku pfumala ripfumelo i “xidyoho lexi hi phasaka hi ku olova.” (Hev. 12:1) Leswaku ripfumelo ra hina ri nga tsani, nkarhi ni nkarhi hi fanele hi kambisisa vumbhoni lebyi kombisaka leswaku misava leyintshwa yi ta fika ku nga ri khale.—Hev. 11:1.

3. Hi ta bula hi yini eka nhlokomhaka leyi?

³ Eka nhlokomhaka leyi, hi ta bula hi tindlela tinharhu leti hi nga tiyisaka ripfumelo ra hina leswaku hi tshemba xitshembiso xa Yehovha xo tisa misava leyintshwa: (1) hi ku va hi anakanyisisa hi nkutsulo, (2) hi ehleketisisa hi matimba ya Yehovha ni (3) ku va hi endla swilo leswi nga ta hi tshineta eka Yehovha. Kutani hi ta bula hi ndlela leyi rungula ra Yehovha leri a ri byeleke Habakuku ri hi tiyisaka ripfumelo hayona namuntlha. Kambe, a hi rhangeni hi kambisisa swiyimo swin’wana leswi kumbexana hi langutaneke na swona sweswi, leswi lavaka hi va ni ripfumelo leri tiyeke eka xitshembiso xa leswaku misava leyintshwa yi le ku teni.

 SWIYIMO LESWI LAVAKA RIPFUMELO LERI TIYEKE

4. Hi swihi swiboho leswi lavaka leswaku hi va ni ripfumelo leri tiyeke?

⁴ Siku ni siku hi endla swiboho leswi lavaka leswaku hi va ni ripfumelo leri tiyeke. Hi xikombiso, hi endla swiboho loko swi ta eka ku hlawula vanghana, vuhungasi, dyondzo, vukati, vana ni ntirho wo tihanyisa. Hi endla kahle ku tivutisa leswi: ‘Xana swiboho swa mina swi kombisa leswaku ndza tiyiseka leswaku misava leyi yi ta lovisiwa ivi yi siviwa hi misava leyintshwa ya Xikwembu? Kumbe, xana swiboho swa mina swi hlohloteriwa hi vanhu lava hanyelaka bya namuntlha ntsena?’ (Mat. 6:19, 20; Luka 12:16-21) Hi ta endla swiboho leswinene loko hi tiyisa ripfumelo ra hina ra leswaku misava leyintshwa yi kwala nyongeni.

5-6. Hikwalahokayini hi fanele hi va ni ripfumelo leri tiyeke hi nkarhi wa maxangu? Kombisa.

⁵ Hi langutana ni miringo leyi lavaka leswaku hi va ni ripfumelo leri tiyeke. Hi nga ha xanisiwa, hi khomiwa hi vuvabyi lebyi nga tshungulekiki kumbe hi langutana ni swilo swin’wana leswi nga endlaka hi hela matimba. Loko swa ha sungula, hi nga swi kota ku wu tiyisela ndzingo wolowo. Kambe loko wu teka nkarhi wo leha hilaha mikarhi yo tala miringo yi endlaka ha kona, swi ta lava hi va ni ripfumelo leri tiyeke leswaku hi kota ku tiyisela ni ku ya emahlweni hi tirhela Yehovha hi tsakile.—Rhom. 12:12; 1 Pet. 1:6, 7.

⁶ Loko hi langutane ni ndzingo, hi nga ha vona onge misava leyintshwa ya Yehovha a yi nge pfuki yi fikile. Xana sweswo swi vula leswaku ripfumelo ra hina ri tsanile? Doo! Xiya xikombiso lexi landzelaka. Loko xirhami xa vuxika xi vuyisa ni n’wana evukatini, hi nga vona onge ximumu a xi nge pfuki xi fikile. Hambiswiritano ximumu xi ta fika. Hilaha ku fanaka, loko hi hele matimba hi nga vona onge misava leyintshwa a yi nge pfuki yi fikile. Kambe loko ripfumelo ra hina ri tiyile, ha swi tiva leswaku leswi Xikwembu xi hi tshembisaka swona swi ta endleka. (Ps. 94:3, 14, 15; Hev. 6:17-19) Loko hi tiyiseka hi sweswo, hi nga ya emahlweni hi rhangisa ku gandzela Yehovha evuton’wini bya hina.

7. Hi rihi langutelo leri hi faneleke hi ri papalata?

⁷ Leswaku hi kota ku chumayela, swi lava hi va ni ripfumelo leri tiyeke. Vanhu vo tala lava hi va chumayelaka a va ma tshembi “mahungu . . . lamanene” ya ku ta ka misava leyintshwa ya Xikwembu. (Mat. 24:14; Ezek. 33:32) A hi swi lavi ku tekelela langutelo ra vona. Leswaku hi papalata sweswo, hi fanele hi tshama hi ri karhi hi tiyisa ripfumelo ra hina. A hi xiyeni tindlela tinharhu leti hi nga endlaka sweswo ha tona.

ANAKANYISISA HI NKUTSULO

8-9. Xana ku anakanyisisa hi nkutsulo swi nga ri tiyisa njhani ripfumelo ra hina?

⁸ Ndlela yo sungula leyi hi nga tiyisaka ripfumelo ra hina hayona i ku anakanyisisa hi nkutsulo. Nkutsulo wu hi tiyisekisa leswaku switshembiso swa Xikwembu swi ta endleka. Loko hi ehleketisisa kahle hi leswi katsekeke nileswaku hikwalahokayini nkutsulo a wu boha, hi tiyisa ripfumelo ra hina ra leswaku xitshembiso xa Xikwembu xa leswaku vanhu va hanya hilaha ku nga heriki emisaveni leyinene xi ta endleka. Hikwalahokayini hi vula tano?

⁹ I yini leswi katsekeke leswaku ku va ni nkutsulo? Yehovha u rhumele N’wana wakwe wa mativula la n’wi rhandzaka tlhelo munghana wakwe lonkulu leswaku a suka etilweni a ta laha misaveni a ta tswariwa a ri munhu la nga riki na xidyoho. Loko Yesu a ri laha misaveni, u tiyisele maxangu ya mixaka hinkwayo. U xanisiwile naswona u fe ku vava. Yehovha swi n’wi koxe swo tala! Xikwembu xa hina lexi nga ni rirhandzu a xi ta va xi nga pfumelanga leswaku N’wana wa xona a xaniseka ni ku  dlayiwa leswaku hina hi hanya vutomi byo tsakisa ntsena kambe byo koma swinene. (Yoh. 3:16; 1 Pet. 1:18, 19) Leswi Yehovha a nyikeleke hi N’wana wakwe la n’wi rhandzaka hikwalaho ka hina, u ta tiyiseka leswaku hi kuma vutomi lebyi nga heriki emisaveni leyintshwa.

EHLEKETISISA HI MATIMBA YA YEHOVHA

10. Hi ku ya hi Vaefesa 3:20, Yehovha u kota ku endla yini?

¹⁰ Ndlela ya vumbirhi leyi hi nga tiyisaka ripfumelo ra hina hayona i ku ehleketisisa hi matimba ya Yehovha. U ni matimba yo endla hinkwaswo leswi a hi tshembiseke swona. I ntiyiso leswaku eka vanhu xitshembiso xa ku va hi hanya hilaha ku nga heriki emisaveni leyintshwa xi nga ha vonaka xi nga koteki. Mikarhi yo tala Yehovha u tshembisa ku endla swilo leswi vanhu va nga taka va nga swi koti ku swi endla. Sweswo swa twisiseka hikuva i Xikwembu xa Matimba Hinkwawo. (Yobo 42:2; Mar. 10:27) Xana a hi ta langutela leswaku a endla switshembiso leswi tolovelekeke?—Hlaya Vaefesa 3:20.

11. Vula xikombiso xin’we xa switshembiso swo hlamarisa swa Xikwembu. (Vona bokisi leri nge, “ Switshembiso Swin’wana Swo Hlamarisa Leswi Hetisekeke.”)

¹¹ Xiya swilo swin’wana leswi Yehovha a swi tshembiseke vanhu vakwe enkarhini lowu nga hundza leswi a swi vonaka swi nga koteki hi ku ya hi vanhu. U tiyisekise Abrahama na Sara leswaku a va ta kuma n’wana va dyuharile. (Gen. 17:15-17) U tlhele a byela Abrahama leswaku vatukulu vakwe a va ta nyikiwa tiko ra Kanana. Eka malembe yo tala lama vatukulu va Abrahama ku nga Vaisrayele va ma heteke va ri mahlonga eEgipta, swi fanele swi vonake onge xitshembiso xexo a xi nga ta endleka. Kambe xi endlekile. Hi ku famba ka nkarhi, loko Yesu a nga si tswariwa, Yehovha u vule leswaku Elizabeta loyi se a a khegurile a ta kuma n’wana. Xitshembiso xin’wana xi hetisekile loko Yehovha a byela Mariya loyi a a ri nhwana leswaku a ta veleka N’wana wakwe loyi Yehovha a vuleke ka ha sale malembe ya magidi entangeni wa Edeni leswaku a a ta fika!—Gen. 3:15.

12. Tsalwa ra Yoxuwa 23:14 na Esaya 55:10, 11 ma hi tiyisekisa yini hi matimba ya Yehovha?

¹² Loko hi anakanyisisa hi switshembiso hinkwaswo leswi Yehovha a swi vuleke ni ndlela leyi swi hetisekeke hayona, hi tiyisa ripfumelo ra hina ra leswaku Yehovha u ni matimba yo tisa misava leyintshwa. (Hlaya Yoxuwa 23:14; Esaya 55:10, 11.) Sweswo swi endla leswaku hi tshama hi lunghekele ku pfuna van’wana va twisisa leswaku xitshembiso xa ku ta ka misava leyintshwa, a hi norho kumbe xitori. Yehovha u vule leswi hi matilo ni misava leyintshwa: “Marito lawa ma tshembeka naswona i ya ntiyiso.”—Nhlav. 21:1, 5.

ENDLA LESWI NGA TA KU TSHINETA EKUSUHI NA YEHOVHA

13. Tinhlengeletano ta vandlha ti nga ri tiyisa njhani ripfumelo ra hina? Hlamusela.

¹³ Ndlela ya vunharhu leyi hi nga tiyisaka ripfumelo ra hina hayona i ku va hi tinyika nkarhi hi endla leswi nga ta hi tshineta ekusuhi na Yehovha. Hi xikombiso, xiya ndlela leyi swi hi vuyerisaka hayona ku va kona etinhlengeletanweni ta vandlha. Anna, loyi a heteke malembe yo tala a ri eka swiyenge swo hambanahambana eka ntirho wa nkarhi hinkwawo, u ri: “Tinhlengeletano ta vandlha ti ndzi pfuna leswaku ndzi tshama ndzi ri ni ripfumelo leri tiyeke. Hambiloko xivulavuri xi nga swi koti kahle ku dyondzisa kumbe xi nga vuli nchumu lowuntshwa, mikarhi yo tala ndzi kuma xo karhi lexi endlaka ndzi ya ndzi twisisa ntiyiso wa le Bibeleni ni ku tiyisa ripfumelo ra mina.” b A swi kanakanisi leswaku hi tlhela hi tlangela tinhlamulo leti tiyisaka ripfumelo leti humaka eka vamakwerhu.—Rhom. 1:11, 12; 10:17.

14. Ntirho wo chumayela wu ri tiyisa njhani ripfumelo ra hina?

¹⁴ Ripfumelo ra hina ra tiya loko hi chumayela. (Hev. 10:23) Barbara loyi a nga ni malembe yo tlula 70 a ri karhi a tirhela Yehovha u ri: “Ntirho wo chumayela wu ndzi tiyisa ripfumelo mikarhi hinkwayo. Loko ndzi ya ndzi vulavula ni vanhu hi switshembiso swo tsakisa swa Yehovha ripfumelo ra mina ri ya ri tiya.”

15. Dyondzo ya munhu hi yexe yi ri tiyisa njhani ripfumelo ra hina? (Nakambe vona swifaniso.)

¹⁵ Xiya xin’wana lexi hi pfunaka hi tiyisa ripfumelo ra hina ku nga: dyondzo ya munhu hi yexe. Susan swa n’wi pfuna ku va ni xiyimiso xo dyondza. U ri: “Hi Sonto ndzi lunghiselela Xihondzo xo Rindza lexi dyondziwaka evandlheni xa vhiki leri landzelaka. Hi Musumbhunuku ni hi Ravumbirhi, ndzi lunghiselela leswi dyondziwaka enhlengeletanweni ya le xikarhi ka vhiki. Hi masiku laman’wana ndzi endla dyondzo ya munhu hi yexe.” Susan u ya emahlweni a tiyisa ripfumelo rakwe hi ku va mikarhi hinkwayo a namarhela xiyimiso xakwe xo dyondza. Irene loyi a tirheke malembe yo tala entsindza wa misava hinkwayo, swi n’wi tiyise ripfumelo ku dyondza hi vuprofeta bya Bibele. U ri: “Swa ndzi hlamarisa ku tiva leswaku vuprofeta bya Yehovha byi hetiseka hi ku helela.” c

“XI TA HETISEKA”

16. Hikwalahokayini ndlela leyi Yehovha a tiyisekiseke Habakuku yi hi khumba namuntlha? (Vaheveru 10:36, 37)

¹⁶ Se i khale malandza man’wana ya Yehovha ma rindzele leswaku makumu ya misava leyi ma fika. Hi ku ya hi langutelo ra vanhu, ku hetiseka ka xitshembiso xa Xikwembu ku nga ha vonaka ku hlwela. Yehovha u vulavule hi mhaka yoleyo loko a tiyisekisa muprofeta Habakuku loko a vula a ku: “Xivono lexi i xa nkarhi lowu taka naswona xi hatlisela ku hetiseka, a xi nge hembi. Hambiloko xo hlwela, tshama u xi rindzerile! Hikuva xi ta hetiseka. A xi nge hlweli!”  (Hab. 2:3) Xana Xikwembu xi tiyisekise Habakuku ntsena? Kumbe xana marito ya xona ma hi khumba namuntlha? Hi ku pfuniwa hi moya lowo kwetsima, muapostola Pawulo u tirhise marito wolawo eka Vakreste lava rindzeleke misava leyintshwa. (Hlaya Vaheveru 10:36, 37.) Hi nga tiyiseka leswaku hambiloko xitshembiso xa ku ponisiwa ka hina xi vonaka xi hlwela, “xi ta hetiseka. A xi nge hlweli!”

17. Makwerhu un’wana wa xisati u xi tirhise njhani xitsundzuxo lexi Yehovha a xi nyikeke Habakuku?

¹⁷ Malandza yo tala ya Yehovha ma tirhise xitsundzuxo xakwe xo ‘tshama ma rindzile’ ku ringana malembe yo tala. Hi xikombiso, Louise u sungule ku tirhela Yehovha hi 1939. U ri: “Hi nkarhi wolowo a ndzi ehleketa leswaku Armagedoni a yi ta fika ndzi nga si heta xikolo. Sweswo a swi endlekanga. Emalembeni lama hundzeke, swi ndzi pfunile ku hlaya hi vanhu va le Bibeleni vo fana na Nowa, Abrahama, Yosefa ni van’wana lava rindzeke nkarhi wo leha va nga si vona ku hetiseka ka leswi Yehovha a va tshembiseke swona. Ku tshama ndzi rindzile swi pfune mina ni van’wana leswaku hi tshama hi ri karhi hi tiyiseka leswaku misava leyintshwa yi kwala nyongeni.” Vo tala lava tirheleke Yehovha nkarhi wo leha va pfumelelana na yona mhaka leyi!

18. Ku xiyisisa ntumbuluko swi nga ri tiyisa njhani ripfumelo ra hina leswaku misava leyintshwa yi ta fika?

¹⁸ I ntiyiso leswaku misava leyintshwa a yi si fika. Hambiswiritano, ehleketa hi swilo leswi nga kona, ku nga tinyeleti, misinya, swiharhi ni vanhu. Hinkwerhu ha pfumela leswaku swilo leswi hinkwaswo i swa xiviri hambileswi ku veke ni nkarhi lowu a swi nga ri kona. Swi kona namuntlha ntsena hileswi Yehovha a swi endleke. (Gen. 1:1, 26, 27) Xikwembu xa hina xi tlhele xi tshembisa ku endla misava leyintshwa. Xi ta xi hetisisa xitshembiso lexi. Emisaveni leyintshwa, vanhu va ta tiphina hi ku hanya hilaha ku nga heriki va ri ni rihanyo lerinene. Hi nkarhi lowu Xikwembu xi wu vekeke, misava leyintshwa yi ta va ya xiviri ku fana ni vuako lebyi hi byi vonaka namuntlha.—Esa. 65:17; Nhlav. 21:3, 4.

19. U nga ri tiyisa njhani ripfumelo ra wena?

¹⁹ Loko ha ha rindzele xitshembiso xa Yehovha, tirhisa nkarhi wun’wana ni wun’wana lowu u wu kumaka leswaku u tiyisa ripfumelo ra wena. Tshama u ri karhi u tlangela nyiko ya nkutsulo. Ehleketisisa hi matimba ya Yehovha. Endla leswi nga ta ku tshineta ekusuhi na yena. Loko u endla tano, u ta va un’wana wa “lava dyaka ndzhaka ya switshembiso hikwalaho ka ripfumelo ni ku lehisa mbilu.”—Hev. 6:11, 12; Rhom. 5:5.