1. Van’wana va titwa njhani hi ku chumayela vanhu van’wana? (Nakambe vona xifaniso.)

 LESWI hi nga vanhu va Yehovha, hi chumayela vanhu hileswi hi rhandzaka Tata wa hina wa le matilweni naswona hi lava ku pfuna vaakelani va hina leswaku va n’wi tiva. Vahuweleri vo tala va tiphina hi ntirho wo chumayela. Kambe van’wana swa va tikela ku endla tano. Hikwalahokayini? Hileswi van’wana va nga ni tingana ni ku ka va nga titshembi. Kasi van’wana a va tshunxeki ku ya emakaya ya vanhu va nga rhambiwanga. Van’wana va chava ku kanetiwa. Kasi van’wana va dyondzisiwe ku papalata ku tlulana milenge ni van’wana. Hambileswi va n’wi rhandzaka swinene Yehovha, swa va tikela ku chumayela vanhu lava va nga va tiviki. Kambe vamakwerhu lava, va swi xiya leswaku ntirho lowu i wa nkoka naswona va katseka hi xitalo eka wona. Yehovha wa tinyungubyisa hi vona!

2. Hikwalahokayini u nga fanelanga u hela matimba loko swi ku tikela ku kuma ntsako entirhweni wo chumayela?

² Xana na wena swa ku tikela ku kuma ntsako entirhweni wo chumayela hileswi u titwaka tano? Loko swi ri tano, u nga heli matimba. Loko u nga titshembi swi nga ha kombisa leswaku wa titsongahata, a wu lavi ku tikokela matihlo naswona a wu lavi ku kanetana ni vanhu van’wana. A nga kona loyi a lavaka ku kanetiwa, ngopfungopfu loko a ringeta ku endlela van’wana leswinene. Tata wa wena wa le matilweni wa yi tiva mitlhontlho leyi u langutanaka na yona naswona u lava ku ku seketela. (Esa. 41:13) Eka nhlokomhaka leyi, hi ta bula hi swiringanyeto swa ntlhanu leswi nga ku pfunaka u lwisana ni ku titwa tano ni ndlela yo kuma ntsako entirhweni wo chumayela.

 PFUMELELA RITO RA XIKWEMBU RI KU TIYISA

3. I yini leswi pfuneke muprofeta Yeremiya leswaku a chumayela van’wana?

³ Ku sukela enkarhini lowu nga hundza, mahungu lama humaka eka Xikwembu ma tiyise malandza ya xona loko ma langutane ni ntirho wo tika lowu a swi ma tikela ku wu endla. Xiya xikombiso xa muprofeta Yeremiya. A a chava swinene loko Yehovha a n’wi nyika ntirho wo chumayela. Yeremiya u te: “A ndzi swi koti ku vulavula hikuva ndza ha ri mufana.” (Yer. 1:6) Xana u ku hlule njhani ku chava kakwe? Leswi Yehovha a n’wi byeleke swona swi n’wi tiyisile. Yeremiya u te: “[Rito ra Xikwembu] a ri fana ni ndzilo lowu pfurhaka lowu pfaleriweke emarhambyini ya mina, a ndzi karhele ku tshama hi rona.” (Yer. 20:​8, 9) Hambileswi Yeremiya a swi n’wi tikela ku chumayela endhawini leyi a a rhumiwe eka yona, rungula leri a a lerisiwe ku ri chumayela ri n’wi nyike matimba ya ku endla ntirho wolowo.

4. Ku ta endleka yini loko hi hlaya Rito ra Xikwembu ni ku anakanyisisa hi rona? (Vakolosa 1:​9, 10)

⁴ Vakreste va kuma matimba eka Rito ra Yehovha leri kumekaka eBibeleni. Loko muapostola Pawulo a tsalela vandlha ra le Kolosa, u vule leswaku ku va ni vutivi bya ntiyiso a swi ta pfuna vamakwavo va “famba hi mukhuva lowu fanelaka eka Yehovha” loko va ya emahlweni va “endla leswinene.” (Hlaya Vakolosa 1:​9, 10.) Ku endla leswinene swi katsa ku chumayela mahungu lamanene. Hikwalaho, loko hi hlaya Rito ra Xikwembu ni ku tlhela hi anakanyisisa hi rona, ripfumelo ra hina eka Yehovha ra tiya naswona hi kota ku vona nkoka wo chumayela mahungu lamanene ya Mfumo.

5. I yini leswi nga hi pfunaka leswaku hi vuyeriwa loko hi ri karhi hi hlaya ni ku dyondza Bibele?

⁵ Leswaku hi vuyeriwa eka Rito ra Xikwembu, hi fanele hi anakanyisisa ni ku papalata ku ri hlaya hi ku tsutsuma. U nga hlayi hi ku jaha. Loko u hlaya tsalwa leri swi ku tikelaka ku ri twisisa, u nga ri tluli ivi u ya hlaya rin’wana. Ku ri na sweswo, tirhisa Watch Tower Publications Index kumbe Nkongomiso Wo Endla Ndzavisiso Wa Timbhoni Ta Yehovha leswaku u kuma nhlamuselo ya tsalwa rolero. Loko u hlaya u nga jahanga, u ta ya u tiyiseka leswaku leswi u swi hlayaka eBibeleni i ntiyiso. (1 Tes. 5:21) Loko u ya u tiyiseka, swi ta ku pfuna leswaku u byela van’wana leswi u swi dyondzeke.

LUNGHISELELA KAHLE NTIRHO WO CHUMAYELA

6. Hikwalahokayini hi fanele hi wu lunghiselela kahle ntirho wo chumayela?

⁶ Loko u wu lunghiselela kahle ntirho wo chumayela, a wu nge chuhi loko u lava ku chumayela van’wana. Yesu u pfune vadyondzisiwa  vakwe leswaku va lunghiselela loko a nga se va rhuma entirhweni wo chumayela. (Luka 10:​1-11) Leswi va tirhiseke leswi Yesu a va dyondziseke swona, vadyondzisiwa va kume ntsako lowukulu hikwalaho ka leswi va koteke ku swi fikelela entirhweni wo chumayela.—Luka 10:17.

7. Hi nga wu lunghiselela njhani ntirho wo chumayela? (Nakambe vona xifaniso.)

⁷ Hi nga wu lunghiselela njhani ntirho wo chumayela? Swi lava hi ehleketa hi leswi hi nga ta swi vula naswona hi swi vula hi ndlela ya ntumbuluko ni hi marito ya hina. Swa pfuna ku ehleketa hi tindlela leti vanhu lava hi va chumayelaka va nga angulaka ha tona ni ku tiva leswaku hi ta endla yini eka swiyimo sweswo. Kutani loko hi vulavula ni vanhu, hi fanele hi ringeta ku tshunxeka, hi n’wayitela ni ku va ni xinghana.

8. Vakreste va fana njhani ni swibya swa vumba leswi muapostola Pawulo a vulavuleke ha swona?

⁸ Muapostola Pawulo u kombise xiphemu lexi hi nga na xona entirhweni wo chumayela loko a ku: “Hi ni xuma lexi eswibyeni swa vumba.” (2 Kor. 4:7) I yini xuma xexo? I ntirho wo ponisa vanhu, ku nga ku chumayela mahungu ya Mfumo. (2 Kor. 4:1) I yini swibya swa vumba? Swibya swa vumba swi yimela malandza ya Xikwembu lawa ma chumayelaka vanhu van’wana. Enkarhini wa Pawulo, vaxavisi a va tirhisa makhuwana ya vumba leswaku va yisela vaxavi mindzhwalo ya nkoka, yo tanihi swakudya, vhinyo ni mali. Hilaha ku fanaka, Yehovha wa hi tshemba hi rungula ra nkoka swinene, ku nga ku chumayela mahungu lamanene. Hi mpfuno wakwe, hi nga va ni matimba lawa hi ma lavaka leswaku hi ya emahlweni hi chumayela.

KHONGELELA XIVINDZI

9. Hi nga ku hlula njhani ku chava vanhu kumbe ku chava ku kanetiwa? (Nakambe vona xifaniso.)

⁹ Mikarhi yin’wana hi nga chava vanhu kumbe hi chava ku kanetiwa entirhweni wo chumayela. Hi nga wu hlula njhani ntlhontlho lowu? Xiya xikhongelo xa vaapostola loko va lerisiwe ku tshika ku chumayela. Ematshan’weni yo chava, va kombele mpfuno eka Yehovha leswaku va “vulavula rito [rakwe] hi vurhena lebyikulu.” Yehovha u hlamule xikhongelo xa vona hi xihatla. (Mit. 4:​18, 29, 31) Loko mikarhi yin’wana hi pfa hi chava vanhu, na hina hi fanele hi kombela mpfuno eka Yehovha hi xikhongelo. Kombela Yehovha a ku pfuna u ya emahlweni u rhandza vanhu leswaku u nga chavi ku va chumayela mahungu lamanene.

10. Yehovha u hi pfuna njhani leswaku hi va Timbhoni takwe? (Esaya 43:​10-12)

 ¹⁰ Yehovha u hi hlawule leswaku hi va Timbhoni takwe naswona u hi tshembise ku hi pfuna hi va ni xivindzi. (Hlaya Esaya 43:​10-12.) Xiya tindlela ta mune leti a endlaka sweswo ha tona. Xo sungula, Yesu u na hina mikarhi hinkwayo loko hi chumayela mahungu lamanene. (Mat. 28:​18-20) Xa vumbirhi, Yehovha u veke tintsumi leswaku ti hi pfuna. (Nhlav. 14:6) Xa vunharhu, Yehovha u hi nyike moya lowo kwetsima tanihi mupfuni leswaku wu hi tsundzuxa swilo leswi hi swi dyondzeke. (Yoh. 14:​25, 26) Xo hetelela, Yehovha u hi nyike vamakwerhu lava hi nga fambaka na vona entirhweni wo chumayela. Hi ku pfuniwa hi Yehovha ni nseketelo wa vamakwerhu lava hi rhandzaka, hi kota ku va ni xivindzi ni ku ya emahlweni hi chumayela.

FAMBISANA NI SWIYIMO NI KU VA NI LANGUTELO LERINENE

11. U nga va kuma njhani vanhu vo tala loko u ri karhi u chumayela? (Nakambe vona xifaniso.)

¹¹ Xana u hela matimba loko u kuma vanhu vatsongo emakaya ya vona? Swi nga va njhani u tivutisa swivutiso swo tanihi leswi: ‘Xana vanhu va laha ndzi chumayelaka kona va kwihi sweswi?’ (Mit. 16:13) ‘Xana va le mitirhweni kumbe va le mavhengeleni?’ Loko swi ri tano, xana u nga swi kota ku kuma vanhu vo tala hi ku chumayela etindhawini ta mani na mani? Makwerhu loyi a vuriwaka Joshua, u ri: “Ndzi kume tindlela tin’wana to chumayela, ku nga ku chumayela loko ndzi ya emavhengeleni kumbe etindhawini tin’wana ta mani na mani.” Yena ni nsati wakwe Bridget va tlhele va kuma vanhu vo tala emakaya loko va chumayela nimadyambu kumbe hi Sonto ninhlikanhi.—Efe. 5:​15, 16.

12. Hi nga swi tiva njhani leswi karhataka vanhu ni leswi va pfumelaka eka swona?

¹² Loko vanhu lava hi va chumayelaka va kombisa ku nga tsakeli, ringeta ku kuma leswi va pfumelaka eka swona kumbe leswi va karhataka. Loko va sungula xingheniso, Joshua na Bridget va tirhisa xivutiso lexi kumekaka eka xiphephana lexi va sungulaka mabulo ha xona. Hi xikombiso, loko va tirhisa xiphephana lexi nge, Xana U Yi Teka Njhani Bibele? va ri: “Vanhu van’wana va teka Bibele tanihi buku ya Xikwembu, kasi van’wana a va yi teki tano. Wena u ehleketa yini?” Hakanyingi leswi swi sungula mabulo.

13. Hikwalahokayini hi teka ntirho wa hina wo chumayela wu ri lowu humelelaka hambiloko vanhu va nga hi yingisi? (Swivuriso 27:11)

 ¹³ Ku humelela entirhweni wo chumayela a swi titsheganga hi mbuyelo lowu hi wu kumaka. Hikwalahokayini? Hikuva hi endle leswi Yehovha ni N’wana wakwe va swi lavaka, ku nga ku nyikela vumbhoni. (Mit. 10:42) Hambiloko hi nga kumi munhu wo vulavula na yena kumbe rungula ra hina ri kanetiwa, hi nga tsaka hikuva ha swi tiva leswaku hi tsakisa Tata wa hina la nge matilweni.—Hlaya Swivuriso 27:11.

14. Hikwalahokayini hi fanele hi tsaka loko makwerhu un’wana a kume munhu loyi a tsakelaka entirhweni wo chumayela?

¹⁴ Hi nga tlhela hi tsaka loko makwerhu un’wana a kume munhu loyi a tsakelaka entirhweni wo chumayela. Xihondzo xo Rindza xi fanise ntirho wa hina ni ku lavetela n’wana loyi a lahlekeke. Vanhu vo tala va ta katseka eku laveni ka n’wana yoleyo ni ku tlhela va sechasecha etindhawini to hambanahambana. Loko n’wana a kumeka, a ku tsaki loyi a n’wi kumeke ntsena kambe ku tsaka vanhu hinkwavo. Hilaha ku fanaka, vanhu hinkwavo evandlheni va pfuneta eku laveni ka vadyondzisiwa lavantshwa va Yesu. Hinkwavo va laveka leswaku va chumayela etindhawini to hambanahambana naswona hinkwavo va tsaka loko mudyondzisiwa un’we lontshwa a sungula ku va kona etinhlengeletanweni ta vandlha.

TSHAMA U RI KARHI U EHLEKETA HI RIRHANDZU LERI U NGA NA RONA HI YEHOVHA NI WARIKWENU

15. Xana ku tirhisa Matewu 22:​37-39 swi nga hi pfuna njhani leswaku hi ya hi hiseka entirhweni wo chumayela? (Nakambe vona xifunengeto.)

¹⁵ Leswi nga hi pfunaka leswaku hi wu hisekela swinene ntirho wo chumayela i ku rhandza Yehovha ni warikwenu. (Hlaya Matewu 22:​37-39.) Anakanya ndlela leyi Yehovha a tsakaka hayona loko a hi vona hi endla ntirho lowu ni ndlela leyi vanhu va nga ta tsaka hayona loko va sungula ku dyondza Bibele! Nakambe, tsundzuka leswaku lava yingisaka rungula ra hina ivi va hlawula ku tirhela Yehovha, va ta hanya hilaha ku nga heriki.—Yoh. 6:40; 1 Tim. 4:16.

16. Hi nga wu kuma njhani ntsako entirhweni wa hina wo chumayela loko hi pfalelekile emakaya? Nyika swikombiso.

¹⁶ Xana ku ni swivangelo swin’wana leswi ku endlaka u tsandzeka ku huma ekaya? Loko swi ri tano, anakanyisisa hileswi u nga swi endlaka leswaku u kombisa rirhandzu eka Yehovha ni warikwenu. Hi nkarhi wa ntungu wa COVID-19, Samuel na Dania a va pfalelekile ekaya ra  vona. Hi nkarhi wolowo wo tika, a va tshamela ku chumayela hi ku tirhisa riqingho, va tsala mapapila ni ku fambisa tidyondzo ta Bibele hi ku tirhisa Zoom. Samuel a chumayela vanhu lava a a hlangana na vona exibedlhele lexi a tshunguriwa vuvabyi bya khensa eka xona. U ri: “Loko hi langutana ni swiyimo swo tika hi nga karhateka, hi titwa hi karhele ni ku tlhela hi tsana eripfumelweni. Hi fanele hi kuma tindlela to tsaka loko hi ri karhi hi tirhela Yehovha.” Loko swi nga siya kwihi, Dania u wile naswona u hete tin’hweti tinharhu a ri emubedweni. Endzhaku ka sweswo u tirhise xitulu xa lava lamaleke ku ringana tin’hweti ta tsevu. U ri: “Ndzi ringete ku endla swilo hinkwaswo leswi swiyimo swa mina a swi ndzi pfumelela ku swi endla. Ndzi kote ku chumayela muongori loyi a a ndzi endzela naswona a ndzi vulavula ni vanhu lava a va tisa nhundzu ekaya. Hi ku tirhisa riqingho, ndzi tlhele ndzi va ni mabulo yo tsakisa ni wansati loyi a a tirha eka khamphani ya mirhi ya swa vutshunguri.” Swiyimo swa Samuel na Dania a swi nga va pfumeleli ku endla leswi a va kota ku swi endla eku sunguleni kambe va endle hinkwaswo leswi va nga swi kotaka naswona sweswo swi va tisele ntsako.

17. Xana u nga vuyeriwa njhani eka swiringanyeto leswi boxiweke eka nhlokomhaka leyi?

¹⁷ Swiringanyeto hinkwaswo leswi boxiweke eka nhlokomhaka leyi swi tirha kahle loko swi tirhisiwa hinkwaswo nkarhi wun’we. Xiringanyeto ha xin’we xi fana ni swilo leswi u swi hlanganisaka swin’we loko u lava ku sweka swakudya swo karhi. Loko u swi hlanganise kahle, ku ta huma swakudya swo nandziha. Hilaha ku fanaka, loko hi tirhisa swiringanyeto hinkwaswo leswi boxiweke eka nhlokomhaka leyi, hi ta kota ku lwisana ni miehleketo leyi nga riki yinene ivi hi kuma ntsako entirhweni wa hina wo chumayela.