1. Yehovha u lava hi endla yini?

 YIN’WANA ya mikarhi yo tsakisa eka vatekani, hiloko ku tswariwa n’wana wa vona. Hambileswi va n’wi rhandzaka swinene n’wana wa vona, a va lavi a tshama a ri xihlangi. Entiyisweni va nga karhateka swinene loko o tshama a nga kuli. Hilaha ku fanaka, Yehovha wa tsaka loko hi va valandzeri va Yesu kambe A nga lavi swi helela kwalaho. (1 Kor. 3:1) Ku ri na sweswo, u hi khutaza leswaku hi va Vakreste “lava kuleke hi ku helela.”—1 Kor. 14:20.

2. Hi ta bula hi yini eka nhlokomhaka leyi?

² Swi vula yini ku va Mukreste la kuleke? I yini leswi nga hi pfunaka hi va Vakreste lava wupfeke? Swakudya leswi tiyeke leswi humaka eRitweni ra Xikwembu swi hi pfuna njhani leswaku hi kula? Nakambe, hikwalahokayini hi fanele hi papalata ku titshemba ku tlula mpimo? Eka nhlokomhaka leyi, hi ta bula hi tinhlamulo ta swivutiso leswi.

SWI VULA YINI KU VA MUKRESTE LA WUPFEKE?

3. Swi vula yini ku va Mukreste la kuleke hilaha ku heleleke?

³ EBibeleni, rito ra Xigriki leri hundzuluxeriweke ri va “kuleke hi ku helela” ri nga tlhela ri vula “ku va la wupfeke.” a (1 Kor. 2:6) Hi sungula ku va Vakreste lava wupfeke loko vuxaka bya hina na Yehovha byi sungula ku kula. Kambe, a hi fanelanga hi tshika ku va Vakreste lava wupfeke hambiloko hi swi fikelerile sweswo. (1 Tim. 4:15) Hinkwerhu ka hina, ku katsa ni vantshwa, hi nga  swi kota ku va Vakreste lava wupfeke. Kambe i yini lexi kombisaka leswaku se hi Vakreste lava wupfeke?

4. U nga n’wi hlamusela njhani Mukreste la wupfeke?

⁴ Mukreste la wupfeke i munhu loyi a hanyaka hi milawu hinkwayo ya Xikwembu naswona a ku na milawu yo karhi eka yona leyi a hlawulaka ku nga yi yingisi. I ntiyiso leswaku u ta swi endla swihoxo hikuva u velekiwe ni xidyoho. Nilokoswiritano, ndlela leyi a hanyaka hi yona siku ni siku yi kombisa leswaku u ehleketa ni ku endla swilo leswi fambisanaka ni ku rhandza ka Xikwembu. U ambale vumunhu lebyintshwa naswona mikarhi hinkwayo u tikarhatela ku anakanya ku fana ni Xikwembu. (Efe. 4:​22-24) A swi kali swi lava a nyikiwa milawu yo tala leswaku yi lawula ndlela leyi a hanyaka hayona hikuva u ti letele ku endla swiboho swa vutlhari leswi fambisanaka ni milawu ya Yehovha. Loko a endla xiboho, wa tiyiseka leswaku u hanya hi xona.—1 Kor. 9:​26, 27.

5. Ku nga endleka yini eka Mukreste la nga wupfangiki? (Vaefesa 4:​14, 15)

⁵ Hi hala tlhelo, Mukreste la nga wupfangiki a nga ha hambukisiwa hi ku olova hi “tidyondzo ta mavunwa” ni hi “vanhu lava kanganyisaka van’wana” ni ku yisiwa hala ni hala hi tidyondzo ta mavunwa ta vagwinehi. b (Hlaya Vaefesa 4:​14, 15.) A nga ha va ni mavondzo, a pfuxa timholovo, a hatla a kwata kumbe a wela endzingweni loko a ringiwa.—1 Kor. 3:3.

6. Ndlela leyi Mukreste a kulaka hayona hi nga yi fanisa na yini? (Nakambe vona xifaniso.)

⁶ Hilaha hi buleke hakona, Matsalwa ma fanisa ku kula ka n’wana ni ndlela leyi Mukreste a endlaka nhluvuko hayona. N’wana a nga na vutivi, hi yona mhaka a lavaka ku sirheleriwa ni ku kongomisiwa hi munhu lonkulu. Hi xikombiso, manana a nga byela xinhwanyetana xakwe leswaku xi n’wi khoma hi voko loko va tsemakanya xitarata. Loko xi ya xi kula, mhani wa xona a nga ha xi tshika xi tsemakanya xitarata xi ri xoxe kambe u ta xi tsundzuxa ku languta hala ni hala xi nga si tsemakanya. Loko se xi kurile, xa swi tiva leswi xi faneleke xi swi endla leswaku xi papalata khombo. Tanihi leswi vana lavatsongo va lavaka mpfuno wa lava kuleke leswaku va papalata khombo, Vakreste lava nga wupfangiki na vona va lava ku pfuniwa hi Vakreste lava wupfeke leswaku va endla swiboho swa vutlhari ni ku papalata makhombo lama nga dlayaka  vuxaka bya vona na Yehovha. Hi hala tlhelo, loko Vakreste lava wupfeke va fanele va endla xiboho, va anakanyisisa swinene hileswi Bibele yi swi vulaka leswaku va kota ku tiva leswi Yehovha a swi ehleketaka ivi va endla swiboho leswinene.

7. Xana Vakreste lava wupfeke va wu lava mpfuno wa van’wana?

⁷ Xana leswi swi vula leswaku Mukreste la wupfeke a nge pfuki a lave mpfuno wa van’wana? Doo! Mikarhi yin’wana va wu lava mpfuno wa van’wana. Kambe munhu loyi a nga wupfangiki a nga ha lava leswaku van’wana va n’wi byela leswi a faneleke a swi endla kumbe va n’wi endlela swiboho leswi a a fanele a tiendlela swona hi yexe. Hi hala tlhelo, Mukreste la wupfeke u ta kombela mpfuno eka lava n’wi tlulaka hi ntokoto ni vutlhari, a ri karhi a swi tiva leswaku Yehovha u n’wi nyike vutihlamuleri bya ku “rhwala ndzhwalo wakwe.”—Gal. 6:5.

8. Vakreste lava wupfeke va hambana njhani?

⁸ Ku fana ni leswi vanhu va nga langutekiki ku fana, Vakreste lava wupfeke na vona va ni vumunhu lebyi nga faniki byo tanihi vutlhari, xivindzi, malwandla ni ntwelavusiwana. Nakambe loko Vakreste vambirhi lava wupfeke va ri exiyin’weni lexi fanaka, va nga ha endla swiboho leswi nga faniki kambe leswi amukelekaka hi ku ya hi Matsalwa. Leswi swa endleka, ngopfungopfu eka timhaka leti khumbaka ripfalo ra munhu. Leswi va yi tekelaka enhlokweni mhaka leyi, va papalata ku solana loko swiboho swa vona swi nga fani. Ku ri na sweswo, va tshama va ri ni vun’we.—Rhom. 14:10; 1 Kor. 1:10.

HI FANELE HI ENDLA YINI LESWAKU HI VA VAKRESTE LAVA WUPFEKE?

9. Xana swo tiendlekela leswaku hi va Vakreste lava wupfeke? Hlamusela.

⁹ Hi ku famba ka nkarhi, n’wana wa kula ivi a va ntswatsi kambe loko swi ta eka ku va Mukreste la wupfeke, a swi tiendlekeli. Hi xikombiso, vamakwerhu va le Korinto va amukele mahungu lamanene, va khuvuriwa, va kuma moya lowo kwetsima ni ku tlhela va vuyeriwa eka tidyondzo leti muapostola Pawulo a va dyondziseke tona. (Mit. 18:​8-11) Kambe endzhaku ka malembe va khuvuriwile, vo tala a va nga se wupfa. (1 Kor. 3:2) I yini leswi nga hi pfunaka leswaku hi ya emahlweni hi kula tanihi Vakreste?

10. Hi fanele hi endla yini leswaku hi va Vakreste lava wupfeke? (Yuda 20)

¹⁰ Leswaku hi va Vakreste lava wupfeke, hi fanele hi rhanga hi swi navela ku kula. Lava “rhandza[ka] ku pfumala ntokoto,” va tsakisiwa hi ku tshama va ri Vakreste lava nga swihlangi naswona a va endli nhluvuko. (Swiv. 1:22) A hi swi lavi ku fana ni ntswatsi loyi a nga laviki ku va ni vutihlamuleri naswona a titshegaka hi vatswari vakwe leswaku va n’wi endlela swiboho. Ku ri na sweswo, hi byi tekela enhlokweni vutihlamuleri bya ku va Vakreste lava wupfeke ni ku tiyiseka leswaku ripfumelo ra hina ri ya ri tiya. (Hlaya Yuda 20.) Loko wa ha tikarhatela ku va Mukreste la wupfeke, khongela eka Yehovha leswaku a ku nyika “matimba yo navela ni ku endla swilo hinkwaswo leswi [a] swi lavaka.”—Filp. 2:13.

11. Yehovha u hi nyike yini leswaku hi va Vakreste lava wupfeke? (Vaefesa 4:​11-13)

¹¹ Yehovha a nga langutelanga leswaku hi va Vakreste lava wupfeke hi hexe. Lava nga varisi ni vadyondzisi evandlheni ra Vukreste, va lunghekele ku hi pfuna hi va “vanhu lava wupfeke” loko swi ta eka vuxaka bya hina na Yehovha naswona hi “wupfa hi ku helela ku fana na Kreste.” (Hlaya Vaefesa 4:​11-13.) Yehovha u tlhela a hi nyika moya wakwe lowo kwetsima leswaku “hi anakanya ku fana na Kreste.” (1 Kor. 2:​14-16) Ku engetela kwalaho, Xikwembu xi huhutele leswaku ku tsariwa Tievhangeli ta mune leti hlamuselaka ndlela leyi Yesu a a ehleketa, a vulavula ni ku endla swilo hayona loko a endla  ntirho wakwe laha misaveni. Loko u tekelela ndlela leyi Yesu a a anakanya ni ku endla swilo hayona, u nga swi kota ku va Mukreste la wupfeke.

NDLELA LEYI SWAKUDYA LESWI TIYEKE LESWI HUMAKA ERITWENI RA XIKWEMBU SWI HI PFUNAKA HAYONA

12. I yini “dyondzo ya masungulo ya Kreste”?

¹² Hi fanele hi dyondza swo tala ku tlula tidyondzo to sungula leti hi ti dyondzeke hi Kreste. Tin’wana ta tidyondzo toleto ti katsa ku hundzuka, ripfumelo, nkhuvulo ni ku pfuxiwa ka vafi. (Hev. 6:​1, 2) Leti hi tin’wana ta tidyondzo ta masungulo leti Vakreste hinkwavo va pfumelaka eka tona. Sweswo hi swona swi endleke muapostola Petro a vulavula hi tidyondzo leti loko a chumayela vanhu hi Pentekosta. (Mit. 2:​32-35, 38) Hi fanele hi pfumela eka tidyondzo leti leswaku hi kota ku va vadyondzisiwa va Kreste. Hi xikombiso, Pawulo u lemukise leswaku lava nga pfumeliki eka dyondzo ya leswaku vafi va ta pfuxiwa, a swi nge koteki leswaku va va vadyondzisiwa va Kreste. (1 Kor. 15:​12-14) Hambiswiritano, a hi fanelanga hi tsakisiwa hi ku tiva tidyondzo leti ta masungulo ntsena.

13. Hi fanele hi endla yini leswaku hi vuyeriwa eka swakudya leswi tiyeke leswi humaka eRitweni ra Xikwembu leswi boxiweke eka Vaheveru 5:14? (Nakambe vona xifaniso.)

¹³ Ku hambana ni dyondzo ya masungulo ya Kreste, swakudya leswi tiyeke leswi humaka eRitweni ra Xikwembu a swi katsi milawu ya Yehovha ntsena kambe swi katsa ni misinya ya milawu yakwe leyi hi pfunaka hi twisisa ndlela leyi a ehleketaka hayona. Leswaku hi vuyeriwa eka swakudya swoleswo, hi fanele hi dyondza, hi anakanyisisa ni ku tirhisa leswi hi swi dyondzaka eRitweni ra Xikwembu. Loko hi endla tano, hi tidyondzisa ku endla swiboho leswi tsakisaka Yehovha. c—Hlaya Vaheveru 5:14.

14. Pawulo u va pfune njhani Vakorinto leswaku va va Vakreste lava wupfeke?

¹⁴ Vakreste lava nga wupfangiki swa va tikela ku endla xiboho lexinene loko eBibeleni ku nga ri na nawu lowu kongomeke eka xiyimo xa vona. Loko ku nga ri na nawu lowu kongomeke wa le Bibeleni, van’wana va tibyela leswaku va nga endla ku rhandza. Van’wana va nga ha lava ku vekeriwa nawu hambiloko wu nga ri kona. Hi  xikombiso, swi vonaka onge Vakreste va le Korinto va kombele Pawulo leswaku a va vekela nawu lowu a wu ta va pfumelela kumbe ku va sivela ku dya swakudya leswi nyikeriweke swikwembu. Ematshan’weni yo va byela leswi va faneleke va swi endla, Pawulo u swi veke erivaleni leswaku munhu un’wana ni un’wana u ni ripfalo ni ‘mfanelo yo tihlawulela.’ U va byele hi misinya yin’wana ya milawu ya le Bibeleni leyi a yi ta va pfuna va endla xiboho lexi a xi ta va siya va nga biwi hi ripfalo naswona xi nga khunguvanyisi van’wana. (1 Kor. 8:​4, 7-9) Hi ndlela yoleyo, Pawulo a a pfuna Vakorinto leswaku va va Vakreste lava wupfeke leswaku va kota ku tirhisa matimba ya vona ya ku twisisa ku ri ni ku titshega hi munhu kumbe va lava ku vekeriwa milawu.

15. Pawulo u va pfune njhani Vakreste va Vaheveru leswaku va ya emahlweni va endla nhluvuko tanihi Vakreste?

¹⁵ Hi dyondza dyondzo ya nkoka eka leswi Pawulo a swi tsaleleke Vakreste va Vaheveru. Van’wana va pfumelele vuxaka bya vona na Yehovha byi tsana hileswi a va “lava ntswamba ku nga ri swakudya leswi tiyeke.” (Hev. 5:12) Va tsandzeke ku fambisana ni tidyondzo ta ntiyiso leti a va paluxeriwa tona hakatsongotsongo evandlheni. (Swiv. 4:18) Hi xikombiso, Vayuda vo tala a va ha ya emahlweni va yingisa Nawu wa Muxe hambiloko se ku hundze malembe ya 30 wu nga ha tirhi hikwalaho ka leswi a wu siviwe hi gandzelo ra Kreste. (Rhom. 10:4; Tito 1:10) Vakreste volavo va pfulekeriwe hi nkarhi wo tala eka malembe wolawo ya 30 leswaku va twisisa ku a swi nga ha bohi ku landzela Nawu! Kutani Pawulo a a ringeta ku va pfuna leswaku va twisisa ntiyiso lowu dzikeke lowu kumekaka eRitweni ra Xikwembu. Papila rakwe ri va pfune va vona leswaku ndlela leyintshwa yo gandzela Yehovha leyi sunguriweke hi ku tirhisa Yesu, ya antswa swinene naswona ri tlhele ri va nyika xivindzi xo ya emahlweni va chumayela hambiloko va kanetiwa hi Vayuda.—Hev. 10:​19-23.

PAPALATA KU TITSHEMBA KU TLULA MPIMO

16. I yini leswi hi faneleke hi swi endla loko hi ri karhi hi tikarhatela ku va Vakreste lava wupfeke?

¹⁶ Hi fanele hi tirha hi matimba leswaku hi va Vakreste lava wupfeke naswona hi nga tlheleli endzhaku. Leswi swi vula leswaku hi papalata ku titshemba ku tlula mpimo. (1 Kor. 10:12) Hi fanele hi ‘tshama hi ri karhi hi tikambela’ leswaku  hi tiyiseka loko hi ya emahlweni hi endla nhluvuko.—2 Kor. 13:5.

17. Papila leri Pawulo a ri tsaleleke Vakolosa ri swi kombisa njhani leswaku i swa nkoka ku tshama hi ri Vakreste lava wupfeke?

¹⁷ Eka papila leri Pawulo a ri tsaleleke Vakolosa, u tlhele a kandziyisa mhaka ya leswaku hi fanele hi tshama hi ri Vakreste lava wupfeke. Hambileswi se a va ri Vakreste lava wupfeke hilaha ku heleleke, Pawulo u va lemukise leswaku va nga sunguli ku ehleketa ku fana ni vanhu lava nga gandzeriki Yehovha. (Kol. 2:​6-10) Nakambe swi vonaka onge Epafrasi loyi a va tiva kahle vamakwerhu evandlheni, u va khongelele leswaku va va “lava wupfeke.” (Kol. 4:12) Xana hi dyondza yini? Pawulo na Epafrasi a va swi tiva leswaku munhu u lava ku seketeriwa hi Xikwembu ni ku tlhela a tikarhata leswaku a va Mukreste loyi a wupfeke. A va lava leswaku Vakolosa va tshama va ri Vakreste lava kuleke kumbe lava wupfeke hambiloko va langutana ni miringo.

18. I yini leswi nga endlekaka eka Mukreste loyi a wupfeke? (Nakambe vona xifaniso.)

¹⁸ Pawulo u lemukise Vaheveru leswaku swa koteka ku va Mukreste loyi a wupfeke a nga ha tsakeriwi hi Xikwembu hi ku helela. Mbilu ya Mukreste yi nga ha sihalala lerova a nga ha swi koti ku hundzuka ivi a rivaleriwa hi Xikwembu. Lexi tsakisaka, Vaheveru a va xi pfumelelanga xiyimo xi fika kwalaho. (Hev. 6:​4-9) Ku vuriwa yini hi lava vuxaka bya vona na Yehovha byi tsaneke kumbe lava nga susiwa ivi hi ku famba ka nkarhi va hundzuka? Ku hundzuka ka vona ku kombisa leswaku va hambane ekule ni lava Pawulo a tsaleke ha vona. Kutani loko va tlhelela eka Yehovha, swi kombisa leswaku va lava mpfuno lowu a va nyikaka wona. (Ezek. 34:​15, 16) Vakulu va nga ha hlela leswaku Mbhoni leyi nga ni ntokoto yi va pfuna va tlhela va tiyisa vuxaka bya vona na Yehovha.

19. Hi nga tiyimisela ku fikelela yini?

¹⁹ U nga swi kota ku va Mukreste la wupfeke loko u tikarhatela ku wa u pfuka leswaku u swi fikelela! Yana emahlweni u dyondza ntiyiso lowu enteke wa le Bibeleni ni ku tekelela ndlela leyi Yehovha a ehleketaka hayona. Loko ku ve u Mukreste loyi a wupfeke, yana emahlweni u yi khoma tano.