1. Hi wihi nkateko lowu hi nga na wona?

 MAYANA nkateko wonghasi lowu hi nga na wona wo va evandlheni ra Yehovha! Hi le paradeyisini yo fanekisela leyi nga ni ku rhula ni vanhu lava tsakeke. Hi wihi ntirho lowu u wu endlaka evandlheni?

2. Hi xihi xifaniso lexi muapostola Pawulo a xi tirhiseke ngopfu eka mapapila yakwe lama huhuteriweke?

² Hi ta dyondza swo tala hi mhaka leyi eka xifaniso lexi muapostola Pawulo a xi tirhiseke ngopfu eka mapapila yakwe lama huhuteriweke. Eka mapapila wolawo, Pawulo u fanise vandlha ni miri wa munhu. U tlhele a fanisa vanhu hinkwavo lava nga evandlheni ni swirho swa miri wa munhu.—Rhom. 12:4-8; 1 Kor. 12:12-27; Efe. 4:16.

3. Hi tihi tidyondzo tinharhu leti hi nga ta bula hatona eka nhlokomhaka leyi?

³ Eka nhlokomhaka leyi, hi ta bula hi tidyondzo tinharhu ta nkoka leti hi nga ti dyondzaka eka xifaniso xa Pawulo. Xo sungula, hi ta dyondza hileswaku hinkwerhu hi va risima * evandlheni ra Yehovha. Xa vumbirhi, hi ta dyondza hileswi hi nga swi endlaka loko hi titwa onge a ho va nchumu evandlheni. Xa vunharhu, hi ta dyondza leswaku hikwalahokayini hi fanele hi tshama hi khomekile hi ku endla mitirho ya hina evandlheni ra Xikwembu.

4. Hi dyondza yini eka Varhoma 12:4, 5?

⁴ Xo sungula lexi hi xi dyondzaka eka xifaniso xa Pawulo hileswaku hinkwerhu hi va nkoka endyangwini wa Yehovha. Loko Pawulo u sungula xifaniso xakwe u te: “Hambi leswi hi nga ni swirho swo tala eka miri wun’we kambe swirho sweswo hinkwaswo a swi na ntirho lowu fanaka, hikwalaho, hambileswi hi nga tala, hi miri wun’we hikuva hi hlanganisiwa hi Kreste, un’wana ni un’wana wa hina i xirho xa un’wana.” (Rhom. 12:4, 5) Pawulo a a vula yini hi marito lawa? Hambileswi hi endlaka mitirho leyi hambaneke kambe hinkwerhu hi va nkoka swinene evandlheni.

5. Hi tihi “tinyiko” leti Yehovha a ti nyikeke vandlha?

⁵ Loko u ehleketa hi vanhu va risima evandlheni, swi nga endleka leswaku u ehleketa hi vamakwerhu lava rhangelaka. (1 Tes. 5:12; Hev. 13:17) Hi ku tirhisa Kreste, Yehovha u nyike vandlha “tinyiko leti ku nga vavanuna.” (Efe. 4:8) “Tinyiko” leti ti katsa Huvo leyi Fumaka, vapfuni va Huvo leyi Fumaka, swirho swa Komiti ya Rhavi, valanguteri va muganga, valeteri eka swikolo swa nhlangano, vakulu ni malandza ya vutirheli. Vamakwerhu lava hinkwavo va hlawuriwe hi moya wo kwetsima leswaku va khathalela tinyimpfu ta risima ta Yehovha ni ku seketela vandlha.—1 Pet. 5:2, 3.

6. Hi ku ya hi 1 Vatesalonika 2:6-8, i yini leswi vamakwerhu lava hlawuriweke hi moya wo kwetsima va tikarhatelaka ku swi endla?

⁶ Vamakwerhu va hlawuriwe hi moya wo kwetsima leswaku va endla mitirho yo hambanahambana. Tanihi leswi swirho swo hambanahambana swa miri, swo tanihi mavoko ni milenge, swi endlaka leswaku miri hinkwawo wu tirha kahle, vamakwerhu lava hlawuriweke hi moya wo kwetsima va tirha hi matimba leswaku ku vuyeriwa vandlha hinkwaro. A va lavi ku dzunisiwa hi vanhu. Kurinasweswo, va wa va pfuka leswaku va tiyisa vamakwavo. (Hlaya 1 Vatesalonika 2:6-8.) Ha n’wi khensa Yehovha hikwalaho ka leswi a hi nyikeke vavanuna lava rhangisaka swilaveko swa vamakwavo!

7. Hi yihi mikateko leyi lava nga eka ntirho wa nkarhi hinkwawo va tiphinaka hayona?

⁷ Van’wana evandlheni i varhumiwa, maphayona yo hlawuleka kumbe maphayona. Vamakwerhu vo tala emisaveni hinkwayo va teka ntirho wo chumayela ni wo endla vadyondzisiwa wu ri wa nkoka swinene. Hi ku endla tano, va pfune vanhu vo tala leswaku va va vadyondzisiwa va Kreste Yesu. Hambileswi vamakwerhu lava hi ntolovelo va nga riki na nchumu, Yehovha wa va katekisa swinene. (Mar. 10:29, 30) Ha va tlangela vamakwerhu lava naswona ha tinyungubyisa leswi hi nga na vona evandlheni!

8. Hikwalahokayini vahuweleri hinkwavo va mahungu lamanene va ri va risima eka Yehovha?

⁸ Xana i vamakwerhu lava hlawuriweke ni lava nga eka ntirho wa nkarhi hinkwawo ntsena lava nga va risima evandlheni? Doo! Vahuweleri hinkwavo va mahungu lamanene i va risima eka Xikwembu ni le vandlheni. (Rhom. 10:15; 1 Kor. 3:6-9) Xikongomelonkulu xa vandlha i ku endla vanhu va va vadyondzisiwa va Hosi ya hina Yesu Kreste. (Mat. 28:19, 20; 1 Tim. 2:4) Vahuweleri hinkwavo evandlheni swi nga ri na mhaka leswaku va khuvuriwile kumbe a va khuvuriwanga, va fanele va rhangisa ntirho lowu evuton’wini bya vona.—Mat. 24:14.

9. I yini lexi endlaka hi teka vamakwerhu va xisati va ri va risima?

⁹ Yehovha u kombise leswaku u teka vamakwerhu va xisati va ri va risima hi ku va nyika ntirho wo karhi evandlheni. U teka vavasati lava, lava n’wi tirhelaka hi ku tshembeka  va ri va risima, swi nga ri na mhaka leswaku va tekiwile, i vamanana, i tinoni kumbe a va tekiwanga. Bibele yi boxa vavasati vo tala lava tsakiseke Xikwembu. Va hlamuseriwa tanihi vavasati vo tlhariha, va ripfumelo, lava gingiritekaka, lava nga ni xivindzi, lava hananaka ni lava endlaka mitirho leyinene. (Luka 8:2, 3; Mit. 16:14, 15; Rhom. 16:3, 6; Filp. 4:3; Hev. 11:11, 31, 35) Hi khensa Yehovha hikwalaho ka leswi emavandlheni hi nga ni vamakwerhu va xisati lava chivirikaka ku fana ni vavasati lava boxiweke eBibeleni!

10. I yini lexi endlaka hi teka vadyuhari va ri va risima?

¹⁰ Ha tsaka leswi hi nga ni vadyuhari vo tala emavandlheni. Mavandlha man’wana ma ni vamakwerhu lava dyuhaleke lava ku nga khale swinene va ri karhi va tirhela Yehovha hi ku tshembeka. Swi nga endleka leswaku van’wana va vadyuhari lava va ha ku kuma ntiyiso. Leswi ti dyaka ti ya emagoveni, van’wana va karhatiwa hi mavabyi yo hambanahambana. Mavabyi wolawo ma nga endla leswaku va nga swi koti ku tirhela Yehovha hilaha va lavaka hakona. Hambiswiritano, vadyuhari lava va endla leswi va nga swi kotaka entirhweni wa nsimu naswona va tikarhatela ku tiyisa ni ku letela van’wana. Ha vuyeriwa swinene eka ntokoto lowu va nga na wona. Hakunene va sasekile eka Yehovha ni le ka hina!—Swiv. 16:31.

11-12. Vantshwa va le vandlheni ra ka n’wina va ku tiyise njhani?

¹¹ Ehleketa hi vantshwa va le vandlheni ra ka n’wina. Va hlangavetana ni mitlhontlho yo tala emisaveni leyi, leyi lawuriwaka hi Sathana Diyavulosi ni tidyondzo takwe ta mavunwa. (1 Yoh. 5:19) Ha tiya eripfumelweni loko hi vona vantshwa va hlamula etinhlengeletanweni ta vandlha, va ya ensin’wini ni loko va yimela ripfumelo ra vona hi xivindzi. Hakunene vantshwa i va risima evandlheni ra Yehovha!—Ps. 8:2.

¹² Vamakwerhu van’wana swa va tikela ku tshemba leswaku i va risima evandlheni. I yini lexi nga hi pfunaka hi swi xiya leswaku hinkwerhu hi va risima evandlheni? A hi voneni.

13-14. I yini lexi nga endlaka van’wana va titwa va nga ri nchumu?

¹³ Xiya dyondzo ya vumbirhi leyi hi yi dyondzaka eka xifaniso xa Pawulo. U vulavule hi xiphiqo lexi karhataka vanhu vo tala namuntlha; vo tala swa va tikela ku tshemba leswaku i va risima evandlheni. Pawulo u te: “Loko nenge wo tshuka wu ku, ‘Leswi ndzi nga riki voko, a ndzi xirho xa miri,’ sweswo a swi endli leswaku wu nga vi xirho xa miri. Niloko ndleve yo tshuka yi ku, ‘Leswi ndzi nga riki tihlo, a ndzi xirho xa miri,’ sweswo a swi endli leswaku yi nga vi xirho xa miri.” (1 Kor. 12:15, 16) Xana Pawulo a a vula yini?

¹⁴ Loko u tipimanisa ni van’wana evandlheni, u nga tivona u nga pfuni nchumu. Swi nga endleka van’wana evandlheni va ni vuswikoti byo dyondzisa, va kota ku hlela swilo kumbe i varisi lava nga ni vuswikoti loko swi ta emhakeni yo chavelela ni ku tiyisa van’wana. Kumbexana wa swi twisisa leswaku a wu na byona vuswikoti byo fana na bya vona. Sweswo swi kombisa leswaku wa titsongahata. (Filp. 2:3) Kambe, u fanele u tivonela. Loko wo tshamela ku tipimanisa ni vanhu lava nga ni vuswikoti byo karhi, u ta hela matimba. Kutani u nga sungula ku titwa u nga pfuni nchumu evandlheni hilaha Pawulo a hlamuseleke hakona. I yini lexi nga ku pfunaka u hlula ku titwa hi ndlela yoleyo?

15. Hi ku ya hi 1 Vakorinto 12:4-11, i yini leswi hi faneleke hi swi tiva mayelana ni tinyiko leti hi nga na tona?

¹⁵ Ehleketa hi mhaka leyi: Hi singita Yehovha u nyike Vakreste van’wana va le nkarhini wa vaapostola tinyiko ta moya wo kwetsima kambe a hi Vakreste hinkwavo lava kumeke tinyiko teto. (Hlaya 1 Vakorinto 12:4-11.) Yehovha u va nyike tinyiko ni vuswikoti byo hambanahambana kambe hinkwavo a va ri va risima eka yena. Namuntlha, a hi nyikiwi tinyiko ta moya wo kwetsima hi singita. Kambe mhaka leyi ku vulavuriwaka hayona laha ya tirha ni le ka hina. Hambileswi hi nga riki na vuswikoti lebyi fanaka kambe hinkwerhu hi va risima eka Yehovha.

16. Hi xihi xitsundzuxo xa muapostola Pawulo lexi hi faneleke hi xi yingisa?

 ¹⁶ Ematshan’weni yo tipimanisa ni Vakrestekulorhi, hi fanele hi yingisa xitsundzuxo lexi huhuteriweke xa muapostola Pawulo lexi nge: “Un’wana ni un’wana a a kambele swiendlo swakwe, kutani u ta va ni xivangelo xo tibuma naswona a nga tiringanisi ni munhu un’wana.”—Gal. 6:4.

17. Hi ta vuyeriwa njhani loko hi yingisa xitsundzuxo xa Pawulo?

¹⁷ Loko hi yingisa xitsundzuxo xa Pawulo lexi huhuteriweke, hi tlhela hi kambisisa swiendlo swa hina, hi ta swi xiya leswaku hi ni tinyiko ni vuswikoti lebyi nga faniki. Hi xikombiso, swi nga endleka nkulu a nga ri na yona nyiko yo dyondzisa epulatifomo kambe a ri ni vuswikoti byo endla vadyondzisiwa. Kumbe swi nga endleka a nga swi koti ku hlela swilo kahle ku fana ni vakulu lavan’wana kambe a ri ni vuswikoti byo chavelela ni ku tiyisa vahuweleri hi ku tirhisa Matsalwa naswona loko vamakwerhu va lava ku pfuniwa va titwa va ntshunxekile ku ya eka yena. Kumbexana u dume hi ku va ni malwandla. (Hev. 13:2, 16) Loko hi xiya tinyiko leti hi nga na tona, hi ta va ni xivangelo lexi twalaka xo tinyungubyisa hi leswi hi kotaka ku swi endla evandlheni. Sweswo swi ta endla leswaku hi nga va vondzoki vamakwerhu lava nga ni tinyiko leti hambaneke ni ta hina.

18. Hi nga byi antswisa njhani vuswikoti bya hina?

¹⁸ Ku nga khathariseki ntirho lowu hi wu endlaka evandlheni, hinkwerhu hi fanele hi tikarhatela ku antswisa vuswikoti bya hina. Leswaku Yehovha a hi pfuna hi antswisa vuswikoti bya hina, wa hi letela hi ku tirhisa nhlangano wa yena. Hi xikombiso, eka nhlengeletano ya vandlha ya le xikarhi ka vhiki, ha leteriwa mayelana ni ndlela yo chumayela. Xana wa wu tirhisa ndzetelo wolowo lowu u wu kumaka?

19. U nga xi fikelela njhani xikongomelo xa wena xo lava ku ya eXikolweni Xa Vachumayeri Va Mfumo?

¹⁹ Ndzetelo wun’wana wo hlawuleka wu kumeka eXikolweni Xa Vachumayeri Va Mfumo. Exikolweni lexi, ku ya vamakwerhu lava nga eka ntirho wa nkarhi hinkwawo naswona va nga ni malembe ya le xikarhi ka 23 na 65. Swi nga endlaka u tibyela leswaku a wu nge pfuki u swi kotile ku ya exikolweni lexi. Ematshan’weni yo ehleketisisa hi swivangelo leswi nga endlaka u nga swi koti ku ya exikolweni lexi, lavisisa swivangelo leswi endlaka u lava ku ya exikolweni lexi. Hikwalaho, hlela swiyimo swa wena leswaku u ta fikelela ku ya exikolweni lexi. Hi ku pfuniwa hi Yehovha ni hi ku tikarhata swinene, u ta swi kota ku endla swilo leswi a wu nga tshembi leswaku u nga pfuka u swi endlile.

20. Hi dyondza yini eka Varhoma 12:6-8?

²⁰ Dyondzo ya vunharhu leyi hi yi dyondzaka eka xifaniso xa Pawulo yi kumeka eka Varhoma 12:6-8. (Yi hlaye.) Nakambe, laha Pawulo u vula leswaku un’wana ni un’wana evandlheni u ni tinyiko leti hambaneke ni ta van’wana. Kambe sweswi u vula leswaku hi fanele hi tirhisa nyiko yin’wana ni yin’wana leyi hi nga na yona leswaku hi tiyisa vamakwerhu evandlheni.

21-22. Hi dyondza yini eka Robert na Felice?

²¹ Ehleketa hi leswi humeleleke makwerhu Robert. A a tirha etikweni rimbe kambe hi ku famba ka nkarhi u komberiwe ku ya tirha eBethele ya le ka rikwavo. Hambileswi a byeriweke leswaku a nga endlanga nchumu xo biha kambe ko va ku cinca ka ntirho, u te: “Ndzi hete tin’hweti to tala ndzi ri ni gome, a a ndzi nga  dyi byi rhelela hi ku ehleketa leswaku ndzi tsandzekile ku endla ntirho lowu a ndzi rhumiwe wona. Mikarhi yin’wana a ndzi ehleketa ku muka ndzi tshika ku tirha eBethele.” U pfuniwe hi yini leswaku a tlhela a kuma ntsako? Nkulukulobye u n’wi byele leswaku Yehovha u hi leterile eka mitirho leyi a hi yi endla leswaku hi ta kota ku yi endla kahle mitirho leyi hi yi endlaka sweswi. Robert u swi xiyile leswaku u fanele a rivala hi leswi hundzeke kutani a ehleketa hi leswi a nga kotaka ku swi endla sweswi.

²² Makwerhu Felice Episcopo u tshame a langutana ni xiyimo lexi fanaka. Yena ni nghamu yakwe va thwase eXikolweni xa Giliyadi hi 1956 kutani va rhumeriwe eBolivia leswaku a ya va valanguteri va muganga. Hi 1964, va kume n’wana. Felice u ri: “A swi hi tikela swinene ku sukela ntirho wa hina lowu a hi wu rhandza. Ku vula ntiyiso, ndzi tlange hi nkarhi wa mina lembe hinkwaro ndzi ri karhi ndzi vilela. Kambe Yehovha u ndzi pfunile ndzi cinca langutelo ra mina kutani ndzi sungula ku tolovelana ni xiyimo lexintshwa xo va mutswari.” Xana u langutane ni xiyimo lexi fanaka ni xa Robert kumbe Felice? Xana u hele matimba hikwalaho ka leswi u nga ha riki na byona vutihlamuleri lebyi a wu ri na byona khale? Loko swi ri tano, rivala hi swilo swa khale kutani u ehleketisisa hi leswi u nga kotaka ku swi endla sweswi leswaku u tirhela Yehovha ni ku tiyisa vamakwenu evandlheni. Loko u tirhisa tinyiko ni vuswikoti bya wena leswaku u tiyisa van’wana evandlheni, u ta tsaka swinene.

23. Hi fanele hi tinyika nkarhi wo endla yini naswona hi ta bula hi yini eka nhlokomhaka leyi landzelaka?

²³ Hinkwerhu hi va risima eka Yehovha. U lava leswaku hi va xiphemu xa ndyangu wakwe. Loko hi tinyika nkarhi wo ehleketisisa hi ndlela leyi hi nga va pfunaka hayona vamakwerhu kutani hi tikarhatela ku va pfuna, hi ta titwa hi ri va risima evandlheni! Ku vuriwa yini hi ndlela leyi hi va tekaka hayona van’wana evandlheni? Hi nga swi kombisa njhani leswaku ha va xixima naswona ha va rhandza? Eka nhlokomhaka leyi landzelaka, hi ta bula hi mhaka leyi ya nkoka.