1. Yehovha u pfumelele nandza un’wana ni un’wana wakwe wo tshembeka leswaku a endla yini?

 YEHOVHA u pfumelele nandza un’wana ni un’wana wakwe wo tshembeka leswaku a va xiphemu xa vandlha rakwe. Hambileswi hi endlaka mitirho yo hambanahambana, hinkwerhu hi va nkoka naswona ha lavana. Muapostola Pawulo u hi pfuna ku twisisa mhaka leyi ya nkoka. Njhani?

2. Hi ku ya hi Vaefesa 4:16, hikwalahokayini hi fanele hi tekana hi ri va nkoka hi tlhela hi tirha swin’we?

² Hilaha tsalwa leri nhlokomhaka ya hina yi sekeriweke eka rona ri vulaka hakona, Pawulo u vule leswaku a nga kona ni un’we wa hina loyi a nga byelaka nandza un’wana wa Yehovha a ku, “A ndzi na mhaka na [wena].” (1 Kor. 12:21) Leswaku swilo swi famba kahle evandlheni, hi fanele hi tekana hi ri va nkoka hi tlhela hi tirhisana kahle. (Hlaya Vaefesa 4:16.) Loko hi tirhisana kahle hi vun’we, moya wa rirhandzu wu ta khapakhapa evandlheni.

3. Hi ta bula hi yini eka nhlokomhaka leyi?

³ Hi tihi tindlela tin’wana leti hi nga swi kombisaka hatona leswaku hi xixima Vakrestekulorhi evandlheni? Eka nhlokomhaka leyi, hi ta bula hi ndlela leyi vakulu va nga swi kombisaka hayona leswaku va xixima vakulukulobye. Hi ta tlhela hi bula hi ndlela leyi hinkwerhu hi nga swi kombisaka hayona leswaku hi xixima vamakwerhu lava nga nghenelangiki vukati. Eku heteleleni, hi ta bula hi ndlela leyi hi nga swi kombisaka  hayona leswaku hi xixima vanhu lava dyondzaka ririmi ra hina.

4. Hi xihi xitsundzuxo lexi Pawulo a xi tsaleke eka Varhoma 12:10, lexi vakulu va faneleke va xi yingisa?

⁴ Vakulu hinkwavo evandlheni va hlawuriwe hi moya wo kwetsima wa Yehovha. Hambiswiritano, va ni tinyiko ni vuswikoti lebyi nga faniki. (1 Kor. 12:17, 18) Van’wana va ha ku hlawuriwa naswona a va na ntokoto. Van’wana a va ha koti ku endla swo tala hikwalaho ka mavabyi ni ku dyuhala. Kambe nkulu a nga fanelanga a languta vakulukulobye kutani a ku, “A ndzi na mhaka na n’wina.” Kurinasweswo, nkulu ha un’we u fanele a yingisa xitsundzuxo xa Pawulo lexi tsariweke eka Varhoma 12:10.—Yi hlaye.

5. Vakulu va swi kombisa njhani leswaku va xixima vakulukulobye naswona hikwalahokayini swi ri swa nkoka ku endla tano?

⁵ Vakulu va kombisa leswaku va xixima vakulukulobye hi ku va yingisa loko va vulavula. Mhaka leyi i ya nkoka ngopfungopfu loko vakulu va hlanganile leswaku va kanerisana hi timhaka ta nkoka swinene. Hikwalahokayini? Twana leswi Xihondzo xo Rindza xa October 1, 1988, xi swi vuleke: “Vakulu va swi tiva leswaku Kreste, hi ku tirhisa moya wo kwetsima, a nga kongomisa mianakanyo ya nkulu un’wana ni un’wana loyi a nga eka huvo ya vakulu leswaku a vula nsinya wa nawu wa Bibele lowu nga va pfunaka va fikelela xiboho xo karhi xa nkoka. (Mit. 15:6-15) Moya wo kwetsima wu pfuna huvo ya vakulu hinkwayo, ku nga ri nkulu un’we ntsena.”

6. Vakulu va nga tirhisana njhani hi vun’we naswona vandlha ri vuyeriwa njhani loko va endla tano?

⁶ Nkulu loyi a xiximaka vakulukulobye a nga tshameli ku rhangelela ku vulavula loko va ri etinhlengeletanweni ta vakulu. A nga vulavuli ngopfu loko va ri karhi va tlhuvutsa timhaka naswona a nga lavi leswaku swilo swi endliwa hi ndlela yakwe. Kurinasweswo, u vula vonelo rakwe hi ndlela yo titsongahata. U rhiya ndleve loko vakulu van’wana va vulavula. Xa nkoka swinene, u seketela leswi a swi vulaka  hi Matsalwa naswona u yingisa nkongomiso lowu humaka eka “nandza wo tshembeka ni wo tlhariha.” (Mat. 24:45-47) Loko vakulu va tlhuvutsa timhaka hi ndlela ya rirhandzu naswona va xiximana, moya wo kwetsima wa Xikwembu wu ta va na vona naswona wu ta va pfuna va endla xiboho lexi nga ta vuyerisa vandlha.—Yak. 3:17, 18.

7. Yesu a a swi teka njhani ku nga ngheneli vukati?

⁷ Emavandlheni namuntlha ku ni vatekani lava nga riki na vana ni lava nga ni vana. Nakambe ku ni vamakwerhu va xinuna ni va xisati lava nga nghenelangiki vukati. Hi fanele hi va teka njhani lava nga nghenelangiki vukati? Xiya ndlela leyi Yesu a a swi teka hayona ku nga ngheneli vukati. Loko Yesu a ri laha misaveni a a nga tekanga. U tshame a nga tekanga leswaku a ta kota ku endla ntirho wakwe kahle. Yesu a nga kalanga a vula leswaku swa boha ku nghenela vukati kumbe ku nga byi ngheneli. Kambe, u vule leswaku Vakreste van’wana a va ta hlawula ku nga ngheneli vukati. (Mat. 19:11, 12, 12) Yesu a a va xixima vanhu lava nga nghenelangiki vukati naswona a a nga va tekeli hansi.

8. Hi ku ya hi 1 Vakorinto 7:7-9, Pawulo u va byele yini Vakreste?

⁸ Ku fana na Yesu, muapostola Pawulo u tirhele Xikwembu a nga tekanga. Pawulo a nga kalanga a vula leswaku swi ta va swi hoxile loko Mukreste a nghenela vukati. A a swi tiva leswaku leyi i mhaka ya munhu hi yexe. Hambiswiritano, u byele Vakreste leswaku va ehleketisisa hi ku tirhela Yehovha va nga nghenelanga vukati. (Hlaya 1 Vakorinto 7:7-9.) Pawulo a a nga va tekeli hansi Vakreste lava nga nghenelangiki vukati. U hlawule Timotiya loyi a ri muntshwa naswona a a nga tekanga leswaku a endla ntirho wa nkoka entirhweni wa Yehovha. * (Filp. 2:19-22) Swi ta va swi hoxile ku ehleketa leswaku makwerhu wa faneleka kumbe a nga faneleki ku endla ntirho wo karhi hi ku ya hi leswaku u tekile kumbe a nga tekanga.—1 Kor. 7:32-35, 38.

9. I yini leswi hi nga swi vulaka hi ku nghenela vukati ni ku nga byi ngheneli?

⁹ Yesu na Pawulo a va vulanga leswaku Vakreste va fanele va nghenela vukati kumbe va nga byi ngheneli. Se i yini leswi hi nga swi vulaka mayelana ni ku nghenela vukati ni ku nga byi ngheneli? Xihondzo xo Rindza xa October 1,  2012, xi ri: “Entiyisweni, [ku nghenela vukati ni ku nga byi ngheneli] swi nga hlamuseriwa tanihi tinyiko leti humaka eka Xikwembu. . . . Yehovha a nga swi teki tanihi leswi khomisaka tingana kumbe gome [ku nga ngheneli vukati].” Hikwalaho, hi fanele hi xixima vamakwerhu lava nga nghenelangiki vukati evandlheni.

10. Hi nga swi kombisa njhani leswaku ha va xixima vamakwerhu lava nga nghenelangiki vukati?

¹⁰ Hi nga swi kombisa njhani leswaku ha va xixima vamakwerhu lava nga nghenelangiki vukati? Hi fanele hi tsundzuka leswaku Vakreste van’wana va lo tiendlela xiboho xa leswaku a va lavi ku nghenela vukati. Van’wana va swi lava ku nghenela vukati kambe a va n’wi kumi munhu loyi va nga tekanaka na yena. Kasi van’wana, va lo loveriwa. Xana swi fanerile leswaku vamakwerhu evandlheni va vutisa Vakreste lava nga nghenelangiki vukati leswaku hikwalahokayini va nga cati kumbe va ringeta ku va pfuna va kuma munhu loyi va nga tekanaka na yena? I ntiyiso leswaku Vakreste van’wana lava nga nghenelangiki vukati, va nga kombela ku pfuniwa emhakeni leyi. Kambe loko va nga kombelanga, va nga titwa njhani loko hi vula leswaku hi lava ku va pfuna? (1 Tes. 4:11; 1 Tim. 5:13) A hi tweni leswi vamakwerhu van’wana lava nga nghenelangiki vukati va swi vulaka.

11-12. Hi nga va heta matimba hi ndlela yihi vamakwerhu lava nga nghenelangiki vukati?

¹¹ Mulanguteri un’wana wa muganga loyi a nga tekangiki naswona a gingiritekaka entirhweni wakwe, u vula leswaku swa pfuna ku nga ngheneli vukati. Kambe, u ri swi heta matimba loko vamakwerhu va n’wi vutisa va ku: “Hikwalahokayini u nga tekanga?” Makwerhu un’wana loyi a nga tekangiki naswona a tirhaka erhavini u ri: “Mikarhi yin’wana vamakwerhu va endla ndzi vona onge ku nga ngheneli vukati swi twerisa vusiwana. Leswi swi endla swi vonaka onge ku nga ngheneli vukati i ndzhwalo ku nga ri nyiko.”

¹² Makwerhu un’wana wa xisati loyi a nga tekiwangiki naswona a tirhaka eBethele u ri: “Vamakwerhu van’wana va ehleketa leswaku vanhu hinkwavo lava nga nghenelangiki vukati, va le ku laveni ka munhu loyi va nga tekanaka na yena kumbe loko va ya exinkhubyanini, va lava munhu loyi va nga tekanaka na yena. Siku rin’wana loko ndzi ya etikweni rin’wana hi ntirho, ndzi fike nimadyambu hi siku ra nhlengeletano ya vandlha. Makwerhu wa xisati loyi ndzi fikeleke eka yena, u ndzi byele leswaku evandlheni ku ni vamakwerhu vambirhi va xinuna lava ringanaka na mina. U ndzi byele leswaku a a nga ringeti ku ndzi hlanganisela. Kambe loko hi nghena eHolweni, u ndzi kokele etlhelo a ndzi hlanganisa ni vamakwerhu lavaya vambirhi. Ku vula ntiyiso, mhaka yoleyo yi hi khomise tingana havunharhu bya hina.”

13. I yini lexi tiyiseke makwerhu un’wana wa xisati?

¹³ Makwerhu un’wana wa xisati loyi a tirhaka eBethele u ri: “Ndzi tiva maphayona lama kuleke naswona ma nga nghenelangiki vukati, ma eneriseka hi ntirho wa wona naswona ma pfuna ngopfu evandlheni. Ma tsakile naswona a ma titeki ma antswa ku tlula van’wana hikwalaho ka leswi ma nga nghenelangiki vukati.” Swa tsakisa ku va evandlheni leri u xiximiwaka ni ku tekiwa u ri wa nkoka. A wu titwi u twerisa vusiwana, u vondzokiwa kumbe ku tekiwa u antswa ku tlula van’wana. U titwa u ri ekaya.

14. Hi nga swi kombisa njhani leswaku hi xixima vanhu lava nga nghenelangiki vukati?

¹⁴ Vamakwerhu lava nga nghenelangiki vukati va ta tsaka loko hi va xixima hikwalaho ka vumunhu bya vona lebyinene, ku nga ri ku va twela vusiwana hikwalaho ka xiyimo xa vona. Ematshan’weni yo va twela vusiwana, a hi  tlangeleni matshalatshala ya vona yo tshama va tshembekile. Sweswo swi ta endla leswaku vamakwerhu lava nga nghenelangiki vukati, va nga titwi onge hi ri eka vona: “A [hi] na mhaka na n’wina.” (1 Kor. 12:21) Kurinasweswo, va ta swi vona leswaku ha va xixima naswona hi va teka va ri va nkoka evandlheni.

15. Van’wana va wu ndlandlamuxe njhani ntirho wa vona wo chumayela?

¹⁵ Vamakwerhu vo tala namuntlha, va hlele ku dyondza ririmi rin’wana leswaku va ta ndlandlamuxa ntirho wa vona wo chumayela. Leswaku va kota ku endla tano, a va fanele va hlela swiyimo swa vona. Vamakwerhu lava, va rhurhe evandlheni leri tirhisaka ririmi ra vona hi xikongomelo xo ya pfuneta evandlheni ra ririmi rin’wana leri nga ni xilaveko lexikulu xa vachumayeri. (Mit. 16:9) Va endle xiboho lexi hikwalaho ka leswi va lavaka ku tirhela Yehovha hilaha ku engetelekeke. Hambileswi va nga ha tekaka malembe va nga si ri tiva kahle ririmi lerintshwa kambe va pfuna swinene evandlheni. Vumunhu bya vona lebyinene ni ntokoto lowu va nga na wona swi tiyisa vandlha. Ha va xixima vamakwerhu lava hikwalaho ka moya wa vona wo tinyiketela!

16. Vakulu va n’wi kambela njhani makwerhu ku vona loko a faneleka ku va nkulu kumbe nandza wa vutirheli?

¹⁶ Vakulu a va nge tshiki ku bumabumela makwerhu leswaku a va nkulu kumbe nandza wa vutirheli hikwalaho ka leswi a nga ri tiviki kahle ririmi leri tirhisiwaka evandlheni. Vakulu va ta kambela makwerhu hi ku tirhisa Matsalwa ku vona loko a faneleka ku va nkulu kumbe nandza wa vutirheli, ku nga ri hi ku tiva ririmi leri tirhisiwaka evandlheni.—1 Tim. 3:1-10, 12, 13; Tito 1:5-9.

17. Hi swihi swivutiso leswi mindyangu yin’wana yi tivutisaka swona loko yi rhurhela etikweni rin’wana?

¹⁷ Mindyangu yin’wana ya Vakreste yi rhurhele etikweni rin’wana leswaku yi kuma vutumbelo kumbe ntirho. Eka swiyimo swo tano, swi nga endleka vana se va tiva ngopfu ririmi leri tirhisiwaka etikweni leri va rhurheleke eka rona. Leswaku vatswari va kuma ntirho swi nga lava va dyondza ririmi ra le tikweni rero. Va ta endla yini loko etikweni rero ku ri ni vandlha kumbe ntlawa lowu tirhisaka ririmi ra vona? Xana ndyangu wu fanele wu ya evandlheni rihi? Xana va fanele va ya evandlheni leri tirhisaka ririmi ra le tikweni rero kumbe eka leri tirhisaka ririmi ra vona?

18. Hi ku ya hi Vagalatiya 6:5, hi nga swi kombisa njhani leswaku ha xi xixima xiboho lexi nhloko ya ndyangu yi xi tekeke?

¹⁸ Nhloko ya ndyangu yi fanele yi endla xiboho xa leswaku hi rihi vandlha leri ndyangu wu nga ta hlanganyela eka rona. Lexi i xiboho xa munhu hi yexe, yi fanele yi teka xiboho lexi nga ta vuyerisa ndyangu wa yona. (Hlaya Vagalatiya 6:5.) Hi fanele hi xixima xiboho lexi tekiweke hi nhloko ya ndyangu. A hi amukeleni xiboho xin’wana ni xin’wana lexi yi xi tekaka,  hi tlhela hi amukela ndyangu wolowo hi mandla mambirhi evandlheni.—Rhom. 15:7.

19. I yini leswi tinhloko ta mindyangu ti faneleke ti anakanyisisa ha swona hi xikhongelo?

¹⁹ Mikarhi yin’wana, mindyangu yi hlanganyela evandlheni leri tirhisaka ririmi ra vatswari kambe u kuma leswaku vana a va ri tivi kahle ririmi rero. Loko vandlha rero ri kumeka endhawini leyi ku vulavuriwaka ngopfu ririmi ra tiko rero, swi nga endleka vana va nga vuyeriwi loko va ri etinhlengeletanweni ta vandlha kumbe va nga endli nhluvuko. Hikwalahokayini? Hikuva swi nga endleka leswaku vana loko va ri exikolweni va dyondza ririmi ra tiko rero, ku nga ri ririmi ra vatswari va vona. Eka swiyimo swo tano, tinhloko ta mindyangu ti fanele ti anakanyisisa kahle ti tlhela ti khongela mayelana ni ndlela leyi ti nga pfunaka vana hayona leswaku va va ni vuxaka lebyinene na Yehovha swin’we ni vanhu vakwe. Swi nga lava leswaku va dyondzisa vana ririmi ra manana kumbe va rhurhela evandlheni leri tirhisaka ririmi leri vana va ri twisisaka kahle. Ku nga khathariseki xiboho lexi nhloko ya ndyangu yi xi tekeke, vandlha leri yi ri hlawuleke, ri fanele ri endla ndyangu wolowo wu titwa wu amukelekile.

20. Hi nga swi kombisa njhani leswaku hi xixima vamakwerhu lava dyondzaka ririmi rin’wana?

²⁰ Lexi endleke hi bula hi mhaka leyi, hileswaku emavandlheni yo tala, ku ni vamakwerhu lava waka va pfuka leswaku va dyondza ririmi rin’wana. Swi nga endleka swa va tikela ku veka timhaka hilaha va lavaka hakona. Kambe loko hi nga dziki ngopfu eka ndlela leyi va vulavulaka hayona, hi ta swi xiya leswaku va n’wi rhandza Yehovha naswona va tiyimisele ku n’wi tirhela. Loko hi xiya swilo leswinene leswi va swi endlaka, hi ta va rhandza hi tlhela hi va xixima vamakwerhu lava. A hi nge vuli hi ku, “A [hi] na mhaka na n’wina” hikwalaho ka leswi va nga ri tiviki kahle ririmi ra hina.

21-22. Hi wihi nkateko lowu hi nga na wona?

²¹ Hi titwa hi ri va nkateko leswi Yehovha a hi pfumeleleke hi n’wi tirhela hi ri evandlheni rakwe. Swi nga ri na mhaka leswaku hi vavanuna kumbe vavasati, hi nghenele vukati kumbe a hi byi nghenelanga, hi vantshwa kumbe se hi kurile, hi ri tiva kahle ririmi ro karhi kumbe a hi ri tivi, hi va risima eka Yehovha swin’we ni le ka vamakwerhu.—Rhom. 12:4, 5; Kol. 3:10, 11.

²² Onge hi nga ya emahlweni hi tirhisa leswi hi swi dyondzeke eka xifaniso lexi Pawulo a xi tirhiseke xa miri wa munhu! Loko hi endla tano, hi ta swi tlangela swinene ku va evandlheni ra Yehovha naswona hi ta xixima vamakwerhu hinkwavo evandlheni.