1. Swi hi vuyerisa njhani ku vulavula hi ndlela leyi hi kumeke ‘ntiyiso’ hayona?

 A SWI kanakanisi leswaku u xi hlamule ko tala xivutiso lexi nge, “U wu kume njhani ntiyiso?” Lexi hi xin’wana xa swivutiso swo sungula leswi Vakreste va xi vutisaka loko va lava ku tivana. Ha swi rhandza ku twa ndlela leyi vamakwerhu va kumeke ntiyiso ni ku rhandza Yehovha hayona naswona ha swi tsakela ku va byela leswaku hikwalahokayini hi swi rhandza ku va Timbhoni ta Yehovha. (Rhom. 1:11) Mabulo yo tano ma hi tsundzuxa ndlela leyi ntiyiso wu nga wa nkoka hayona. Nakambe hi tiyimisele ku “ya emahlweni [hi] famba entiyisweni” ku nga ku hanya hi ndlela leyi nga ta endla Yehovha a hi amukela ni ku hi katekisa.—3 Yoh. 4.

2. Hi ta kambisisa yini eka nhlokomhaka leyi?

² Eka nhlokomhaka leyi, hi ta kambisisa swivangelo swin’wana leswi endlaka hi rhandza ntiyiso. Hi ta tlhela hi kambisisa ndlela leyi hi nga yaka emahlweni hi kombisa ndlela leyi hi yi rhandzaka hayona nyiko leyi ya risima. Handle ko kanakana leswi swi ta hi pfuna leswaku hi swi tlangela swinene leswi Yehovha a hi endleleke swona hi ku hi kokela entiyisweni. (Yoh. 6:44) Swi ta tlhela swi hi pfuna hi navela ku byela van’wana ntiyiso.

3. Hi xihi xivangelo xa nkoka swinene lexi endlaka hi rhandza ntiyiso?

³ Ku ni swivangelo swo tala leswi endlaka hi rhandza ntiyiso. Xa nkoka swinene, hi rhandza Yehovha Xikwembu Xihlovo xa ntiyiso. Rito rakwe ku nga Bibele ri hi byela leswaku i Mutumbuluxi wa tilo ni misava loyi a nga ni matimba hinkwawo tlhelo Tatana  la nga ni rirhandzu loyi a khathalaka swinene ha hina. (1 Pet. 5:7) Ha swi tiva leswaku Yehovha Xikwembu xa hina u ni “tintswalo ni ntwelavusiwana, loyi a hlwelaka ku hlundzuka naswona a nga ni rirhandzu ni ntiyiso.” (Eks. 34:6) Yehovha u rhandza vululami. (Esa. 61:8) U twa ku vava loko a vona hi xaniseka naswona u lunghekele ku herisa ku xaniseka hinkwako hi nkarhi lowu a wu vekeke. (Yer. 29:11) Hi wu langutele hi mahlongati nkarhi wolowo. Lexi i xin’wana xa swivangelo lexi endlaka hi rhandza Yehovha swinene!

4-5. Hikwalahokayini muapostola Pawulo a fanise ntshembo wa hina ni nsoma?

⁴ Hi xihi xivangelo xin’wana lexi endlaka hi rhandza ntiyiso? Ntiyiso wa hi vuyerisa hi ndlela leyikulu. Xiya xikombiso lexi landzelaka. Ntiyiso wa le Bibeleni wu katsa ntshembo lowu hi nga na wona wa leswi nga ta endleka enkarhini lowu taka. Muapostola Pawulo u hlamusele ndlela leyi ntshembo lowu wu nga wa nkoka hayona. U te: “Hi ni ntshembo lowu tanihi nsoma wa vutomi bya hina, wu tiyile naswona wa tshembeka.” (Hev. 6:19) Ku fana ni leswi nsoma wu endlaka leswaku xikepe xi nga ndlengandlengisiwi, ntshembo wa hina wa le Bibeleni wu nga endla leswaku hi yima hi tiyile loko hi ri emiringweni.

⁵ Emhakeni leyi, Pawulo a a vulavula hi ntshembo lowu Vakreste lava hlawuriweke va nga na wona wo ya etilweni. Kambe marito lawa ma tirha ni le ka Vakreste lava swi languteleke emahlweni ku hanya hilaha ku nga heriki emisaveni leyi nga paradeyisi. (Yoh. 3:16) A swi kanakanisi leswaku ku dyondza hi ntshembo wo hanya hilaha ku nga heriki swi endla hi tiva leswaku hi hanyela yini.

6-7. Swi n’wi vuyerise njhani Yvonne ku dyondza ntiyiso hi vumundzuku?

⁶ Xiya ntokoto wa makwerhu waxisati la vuriwaka Yvonne. A nga kulelanga entiyisweni kutani loko a ha ri ntsongo a a chava ku fa. A a nga xi rivali xivulwa xin’wana lexi a tshameke a xi hlaya lexi nge: “Siku rin’wana hi ta etlela hi nga ha pfuki.” U ri: “Marito wolawo ma ndzi tsone vurhongo lerova ndzi hete vusiku hinkwabyo ndzi ri karhi ndzi anakanyisisa hi vumundzuku. Ndzi gimete hi ku vula leswaku ‘vutomi byi ni xikongomelo.’ Ndzi tlhele ndzi tivutisa ndzi ku, ‘Xana ndzi hanyela yini?’ A ndzi chava ku fa!”

⁷ Hi ku famba ka nkarhi loko Yvonne se a ri muntshwa u hlangane na Timbhoni ta Yehovha. U ri: “Ndzi sungule ku tshemba leswaku na mina ndzi nga va na wona ntshembo wo hanya hilaha ku nga heriki emisaveni leyi nga Paradeyisi.” Swi n’wi vuyerise njhani Yvonne ku dyondza ntiyiso? U ri: “Nivusiku a ndza ha karhateki hi ku vilela hi vumundzuku kumbe hi ku chava ku fa.” Hilaha hi swi voneke hakona, ntiyiso i wa nkoka eka Yvonne naswona wa tsaka ni ku tlhela a eneriseka hi ku byela van’wana ntshembo lowu a nga na wona.—1 Tim. 4:16.

8-9. (a) Eka xin’wana xa swikombiso swa Yesu, wanuna un’wana u swi kombise njhani leswaku xuma lexi a xi kumeke i xa nkoka? (b) Ntiyiso i wa nkoka ku fikela kwihi eka wena?

⁸ Ntiyiso lowu nga eBibeleni wu tlhela wu katsa mahungu lamanene ya Mfumo wa Xikwembu. Yesu u fanise ntiyiso lowu vulavulaka hi Mfumo ni xuma lexi fihliweke. Hilaha swi tsariweke ha kona eka Matewu 13:44, Yesu u te: “Mfumo wa matilo wu fana ni xuma lexi fihliweke ensin’wini, lexi munhu a xi kumeke kutani a xi fihla; naswona hikwalaho ka ntsako lowu a nga na wona, a famba a ya xavisa swilo hinkwaswo leswi a nga na swona kutani a xava nsimu yoleyo.” Xiya leswaku wanuna loyi a a nga ri eku laveni ka xuma. Kambe endzhaku ka loko a xi kumile, u endle matshalatshala ya leswaku xi va xa yena. Kahlekahle u xavise swilo hinkwaswo leswi a a ri na swona. Hikwalahokayini? Hikuva a a swi tiva leswaku xuma xexo i xa  nkoka. A xi ta n’wi vuyerisa ku tlula swilo hinkwaswo leswi a swi xaviseke.

⁹ Xana ntiyiso i wa nkoka hi ndlela yoleyo eka wena? A swi kanakanisi leswaku swi tano! Ha swi tiva leswaku a ku na nchumu lowu misava leyi yi nga hi nyikaka wona lowu nga pimanisiwaka ni ntsako lowu hi wu kumaka sweswi hikwalaho ko tirhela Yehovha, ni ntshembo wo hanya hilaha ku heriki enkarhini lowu taka loko ku fuma Mfumo wa Xikwembu. Vuxaka lebyi hi tiphinaka ha byona na Yehovha i bya nkoka ku tlula nchumu wun’wana ni wun’wana lowu hi nga titsonaka wona. Lexi hi tiselaka ntsako lowukulu i ku “n’wi tsakisa hilaha ku heleleke.”—Kol. 1:10.

10-11. I yini lexi pfuneke Michael leswaku a cinca vutomi byakwe?

¹⁰ Vo tala va hina hi titsone swo tala leswaku hi kota ku tsakeriwa hi Yehovha. Van’wana va tshike mitirho ya xiyimo xa le henhla swinene. Van’wana va tshike ku hlongorisa rifuwo. Kasi van’wana va cince mahanyelo ya vona hi ku helela loko va dyondza hi Yehovha. Sweswo hi leswi Michael a nga swi endla. A nga kulelanga entiyisweni. Loko a ha ri muntshwa, u dyondzisiwe ku lwa karati. U ri: “A ndzi tinyungubyisa hi ku endla vutiolori leswaku miri wa mina wu tshama wu ri ni matimba. Hi ku famba ka nkarhi, a ndzi vona ku ri hava munhu loyi a a ta ndzi hlula.” Kambe loko Michael a sungula ku dyondza Bibele, u dyondze ndlela leyi Yehovha a titwaka hayona hi madzolonga. (Ps. 11:5) Loko a vulavula hi vatekani lava nga Timbhoni lava a va dyondza na yena Bibele, Michael u ri: “A va nga si tshama va ndzi byela leswaku ndzi tshika karati; kambe va hambete va ndzi dyondzisa ntiyiso wa Bibele.”

¹¹ Loko Michael a ya emahlweni a dyondza hi Yehovha, u ye a N’wi rhandza swinene. U khumbiwe ngopfu hi ndlela leyi Yehovha a kombisaka vagandzeri Vakwe ntwelavusiwana. Hi ku famba ka nkarhi, Michael u swi xiyile leswaku a a fanele a cinca vutomi byakwe. U ri: “A ndzi swi tiva leswaku ku tshika karati a ku ta va nchumu wo tika lowu ndzi nga si tshamaka ndzi wu endla. Kambe a ndzi swi tiva leswaku a swi ta tsakisa Yehovha naswona a ndzi tiyiseka leswaku ku n’wi tirhela swi tlula xitlhavelo xin’wana ni xin’wana.” Michael u tlangele ndlela leyi ntiyiso lowu a wu kumeke wu nga wa nkoka hayona naswona sweswo swi endle leswaku a cinca swo tala evuton’wini byakwe.—Yak. 1:25.

12-13. Ntiyiso wa le Bibeleni wu n’wi pfune njhani Mayli?

¹² Bibele yi hlamusela ndlela leyi ntiyiso wu nga wa nkoka hayona hi ku wu fanisa ni rivoni leri voningaka emunyameni. (Ps. 119:105; Efe. 5:8) Mayli wa le Azerbaijan u wu tlangela swinene ntiyiso lowu a wu kumeke eRitweni ra Xikwembu. U kulele endyangwini lowu vatswari vakwe a va ri eka vukhongeri lebyi nga faniki. Bava wakwe a a ri Mumoslem kasi mhani wakwe a a ri Muyuda. U ri: “Hambileswi a ndzi nga si tshama ndzi kanakana leswaku Xikwembu xi kona, a ku ri ni swilo leswi a ndzi nga swi twisisi. A ndzi tivutisa leswaku ‘ha yini Xikwembu xi endle munhu naswona ha yini munhu a fanele a xaniseka vutomi byakwe hinkwabyo leswaku eku heteleleni a xanisiwa etiheleni?’ Leswi vanhu a va vula leswaku swilo hinkwaswo leswi endlekaka i ku rhandza ka Xikwembu, a ndzi tivutisa leswaku, ‘xana Xikwembu xi tsakisiwa hi ku vona vanhu va ri karhi va xaniseka?’”

¹³ Mayli u ye emahlweni a lava tinhlamulo ta swivutiso swakwe. Hi ku famba ka nkarhi, u pfumele ku dyondza Bibele naswona u ve un’wana wa Timbhoni ta Yehovha. U ri: “Rungula ra le Bibeleni leri khorwisaka, ri antswise vutomi bya mina. Tinhlamulo leti enerisaka leti ndzi tikumeke eRitweni ra Xikwembu ti ndzi tisele ku rhula embilwini.” Ku fana na Mayli, hinkwerhu hi dzunisa Yehovha ‘Loyi a hi  vitaneke hi huma emunyameni hi nghena eku vonakaleni kakwe loku hlamarisaka.’—1 Pet. 2:9.

14. I yini lexi nga hi pfunaka leswaku hi wu rhandza swinene ntiyiso? (Nakambe vona bokisi leri nge, “ Swilo Swin’wana Leswi Hi Nga Fanisaka Ntiyiso Wa Le Bibeleni Na Swona.”)

¹⁴ Leswi ko va swikombiso swi nga ri swingani leswi kombisaka ndlela leyi ntiyiso wu nga wa nkoka hayona. Handle ko kanakana ka ha ri ni swikombiso swin’wana swo tala leswi u nga ehleketaka ha swona. Swi nga va njhani leswaku loko u endla dyondzo ya munhu hi yexe u kambisisa swin’wana swivangelo leswi endlaka hi rhandza ntiyiso. Loko hi ya hi rhandza ntiyiso, hi ta ya emahlweni hi kuma tindlela to swi kombisa leswaku ha wu rhandza.

15. Hi yihi ndlela leyi hi nga kombisaka hayona leswaku ha wu rhandza ntiyiso?

¹⁵ Hi nga kombisa leswaku ha wu rhandza ntiyiso, hi ku dyondza Bibele nkarhi ni nkarhi swin’we ni tibuku ta hina leti hi pfunaka ku twisisa Bibele. Hambi se ku ri khale hi ri entiyisweni, ku dyondza a swi heli. Nkandziyiso wo sungula wa magazini lowu wu te: “Ntiyiso wu fana ni xiluva lexitsongo xo saseka lexi rhendzeriweke hi khwati. Loko u lava ku kuma xona u fanele u xi lavisisa  hi vurhon’wana. . . . Kambe loko u xi kumile a wu fanelanga u tshika ku lavisisa swin’wana.” Ku dyondza swa tika kambe swa vuyerisa.

16. Hi yihi ndlela yo dyondza leyi u vonaka yi ku tirhela? (Swivuriso 2:4-6)

¹⁶ Vo tala va hina a hi swi rhandzi ku hlaya ni ku dyondza. Kambe Yehovha u lava hi “ya emahlweni [hi] lava” ni ku “lavisisa” leswaku hi nga wu keli henhla ntiyiso. (Hlaya Swivuriso 2:4-6.) Loko hi tikarhata, mikarhi hinkwayo hi ta vuyeriwa. Corey loko a hlamusela ndlela leyi a hlayaka Bibele hayona, u vula leswaku u hlaya ndzimana yin’we ivi a yima. U ri: “Ndzi hlaya nhlamuselo yin’wana ni yin’wana ya le hansi, ndzi languta swikombo hinkwaswo swa matsalwa leswi nga etlhelo ndzi tlhela ndzi endla ndzavisiso lowu engetelekeke. . . . Ndlela leyi ndzi hlayaka ha yona yi endla leswaku ndzi kuma rungula ro tala swinene!” Hambi hi tirhisa endlelo leri kumbe rin’wana, hi kombisa leswaku ha wu khensa ntiyiso loko hi tinyika nkarhi ni ku endla matshalatshala yo wu dyondza.—Ps. 1:1-3.

17. Swi vula yini ku hanya hi ntiyiso? (Yakobo 1:25)

¹⁷ Ha swi tiva leswaku a swi enelanga ku dyondza ntiyiso ntsena. Leswaku hi vuyeriwa swinene, hi fanele hi hanya ha wona naswona hi wu tirhisa evuton’wini bya hina, hi kona hi nga ta kuma ntsako wa ntiyiso. (Hlaya Yakobo 1:25.) Hi nga tiyiseka njhani leswaku hi hanya hi ntiyiso? Makwerhu un’wana u ringanyeta leswaku i swinene ku tikambisisa leswaku hi vona laha hi faneleke hi antswisa kona ni laha hi endlaka kahle kona. Muapostola Pawulo u te: “Eka leswi se hi swi fikeleleke, a hi yeni emahlweni hi endla hi ndlela yoleyo.”—Filp. 3:16.

18. Hikwalahokayini hi endla leswi hi nga swi kotaka leswaku hi “ya emahlweni [hi] famba entiyisweni”?

¹⁸ Ehleketa hi mikateko leyi hi yi kumaka loko hi endla leswi hi nga swi kotaka leswaku hi “ya emahlweni [hi] famba entiyisweni”! A ho antswisa vutomi bya hina ntsena kambe hi tlhela hi tsakisa Yehovha ni vamakwerhu. (Swiv. 27:11; 3 Yoh. 4) Entiyisweni, sweswo hi swona swivangelo swa nkoka leswi endlaka hi rhandza ntiyiso ni ku tlhela hi hanya ha wona.