1. Hikwalahokayini Yesu a kombele Yehovha leswaku a sirhelela valandzeri vakwe?

 HI VUSIKU byo hetelela Yesu a nga si fa, u endle xikombelo xa nkoka eka Tata wakwe wa le tilweni. U kombele Yehovha leswaku a sirhelela valandzeri vakwe. (Yoh. 17:15, 20) I ntiyiso leswaku i khale Yehovha a languta, a khathalela ni ku sirhelela vanhu vakwe. Hambiswiritano, Yesu a a swi tiva leswaku Sathana a a ta kaneta valandzeri vakwe hi ndlela ya tihanyi. Yesu u tlhele a swi xiya leswaku a va ta lava mpfuno wa Yehovha leswaku va hlula minhlaselo yo homboloka ya Diyavulosi.

2. Hi ku ya hi Pisalema 33:18-20 hikwalahokayini hi nga fanelanga hi chava ku langutana ni miringo?

² Misava leyi ya Sathana yi vangela Vakreste swiphiqo swo tala namuntlha. Hi langutana ni swiphiqo leswi nga hi hetaka matimba ni ku tlhela swi ringa ku tshembeka ka hina eka Yehovha. Kambe hilaha hi nga ta swi vona hakona eka nhlokomhaka leyi, a hi fanelanga hi chava. Yehovha wa hi sirhelela, wa yi vona mitlhontlho leyi hi langutanaka na yona naswona u tshama a lunghekele ku hi pfuna hi langutana na yona. A hi kambisise swikombiso swimbirhi swa le Bibeleni leswi kombisaka ndlela leyi Yehovha a “languta[ka] lava n’wi chavaka.”—Hlaya Pisalema 33:18-20.

3. Hi rini laha hi nga titwaka hi ri ni xivundza?

³ Hambileswi hi nga ni vamakwerhu vo tala evandlheni, mikarhi yin’wana hi nga ha titwa hi ri ni xivundza. Hi xikombiso, vantshwa va nga ha titwa va ri voxe loko va hlamusela lava nghenaka na vona xikolo leswi va pfumelaka eka swona loko va ri exikolweni kumbe loko va rhurhela evandlheni rin’wana. Van’wana  va hina hi nga titwa hi nga tsakanga kumbe hi karhatiwa hi ntshikilelo, hi tibyela leswaku hi fanele hi tiyisela xiyimo xexo hi ri hexe. Hi nga ha kanakana ku byela van’wana ndlela leyi hi titwaka hayona hikuva hi vona onge a va nge swi twisisi. Nakambe mikarhi yin’wana hi nga ha tivutisa loko ku ri ni loyi a khathalaka ha hina. Xivundza xi nga endla hi vilela hi tlhela hi titwa hi ri swikangalafula. Yehovha a nga swi lavi leswaku hi titwa hi ndlela yoleyo. Hikwalahokayini hi vula tano?

4. Hikwalahokayini muprofeta Eliya a vule a ku: “Ku lo sala mina ntsena”?

⁴ Xiya xikombiso xa wanuna wo tshembeka Eliya. A a ri ni masiku yo tlula 40 a ri karhi a baleka hileswi Yezabele a a tshembise ku n’wi dlaya. (1 Tih. 19:1-9) Eku heteleleni, loko a ri yexe ebakweni u byele Yehovha a ku: “Ku lo sala mina ntsena.” (1 Tih. 19:10) A ku ri ni vaprofeta van’wana etikweni; Obadiya a a tumbete vaprofeta va 100 leswaku Yezabele a nga va dlayi. (1 Tih. 18:7, 13) Kambe hikwalahokayini Eliya a a titwa a ri yexe? Xana a a ehleketa leswaku vaprofeta lava Obadiya a va tumbeteke se a va dlayiwile? Xana a a titwa a ri yexe hileswi kumbexana van’wana va nga n’wi joyinangiki ku gandzela Yehovha endzhaku ka loko Bali a paluxiwile leswaku i xikwembu xa mavunwa eNtshaveni ya Karimeli? Xana a nga ha va a titwe hi ndlela yoleyo hileswi a a ehleketa leswaku vanhu a va nga swi voni leswaku u le khombyeni kumbe hileswi a a ehleketa leswaku a ku na loyi a khathalaka? Bibele a yi swi hlamuseli hi ku helela swivangelo leswi endleke Eliya a titwa hi ndlela yoleyo. Kambe ha tiyiseka leswaku Yehovha a a swi twisisa leswaku hikwalahokayini Eliya a a titwa a ri yexe naswona A A swi tiva leswaku Eliya u ta n’wi pfuna njhani.

5. Yehovha u n’wi tiyisekise njhani Eliya leswaku a a nga ri yexe?

⁵ Yehovha u pfune Eliya hi tindlela to tala. U n’wi pfune leswaku a kota ku tiphofula. U vutise Eliya kambirhi a ku: “Xana u endla yini laha?” (1 Tih. 19:9, 13) Mikarhi hinkwayo Yehovha a a rhiye ndleve loko Eliya a tiphofula. Yehovha u hlamule Eliya hi ku n’wi komba matimba Yakwe ni leswaku u na yena. U tlhele a tiyisekisa Eliya leswaku u ni vagandzeri van’wana vo tala.  (1 Tih. 19:11, 12, 18) A swi kanakanisi leswaku Eliya u titwe a rhuliwe ndzhwalo endzhaku ka loko a phofulele Yehovha ta le mbilwini ni ku twa nhlamulo Yakwe. Yehovha u nyike Eliya swiavelo swo hlayanyana swa nkoka. U n’wi rhume leswaku a hlawula Hazayele leswaku a va hosi ya Siriya, Yehu a va hosi ya Israyele na Elixa leswaku a va muprofeta. (1 Tih. 19:15, 16) Swiavelo leswi Yehovha a nyikeke Eliya, swi n’wi pfune leswaku a tshika ku ehleketa hi swiphiqo swakwe. Xikwembu xi n’wi nyike Elixa leswaku a va munghana wakwe. U nga endla yini leswaku Yehovha a ku pfuna loko u titwa u ri wexe?

6. U nga khongelela yini loko u titwa u ri wexe? (Pisalema 62:8)

⁶ Yehovha u lava u khongela eka yena. Wa swi vona leswi ku karhataka naswona wa ku tiyisekisa leswaku u ta yingisela swikhongelo swa wena nkarhi wun’wana ni wun’wana. (1 Tes. 5:17) Swa n’wi tsakisa ku yingisela swikhongelo swa vagandzeri vakwe. (Swiv. 15:8) U nga khongelela yini loko u titwa u ri wexe? Chululela Yehovha ta le mbilwini ku fana na Eliya. (Hlaya Pisalema 62:8.) N’wi byele leswi nga ku dyisiki byi rhelela ni leswaku u titwa njhani hi swona. Kombela Yehovha a ku pfuna u kota ku swi tiyisela. Hi xikombiso, loko u titwa u ri wexe ni ku chava ku chumayela exikolweni, kombela Yehovha a ku pfuna u kota ku chumayela. U nga ha tlhela u n’wi kombela vutlhari leswaku u kota ku hlamusela van’wana leswi u pfumelaka eka swona. (Luka 21:14, 15) Loko nkarhi ni nkarhi ku ri ni leswi ku karhataka emoyeni, kombela Yehovha a ku pfuna leswaku u vulavula ni Mukreste loyi a nga ni ntokoto. U nga kombela Yehovha a pfuna Mukreste loyi u n’wi chululelaka ta le mbilwini leswaku a kota ku ku twisisa. Phofulela Yehovha ta le mbilwini, vona ndlela leyi a swi hlamulaka hayona swikhongelo swa wena naswona pfumela loko van’wana va ku pfuna; kutani u ta titwa u nga ri wexe.

7. I yini leswi u swi dyondzaka eka Mauricio?

⁷ Hinkwerhu ka hina Yehovha u hi nyike ntirho wa nkoka. U nga tiyiseka leswaku Yehovha wa yi vona ni ku yi tlangela mitirho hinkwayo leyi u yi endlaka evandlheni ni le nsin’wini. (Ps. 110:3) Ku endla mitirho leyi swi nga ku pfuna njhani leswaku u nga titwi u ri wexe? Twana ntokoto wa makwerhu la ha riki muntshwa loyi a vuriwaka Mauricio. * Endzhakunyana ka loko Mauricio a khuvuriwile, un’wana wa vanghana vakwe u sungule ku hambuka entiyisweni hakatsongotsongo. Mauricio u ri: “Loko ndzi n’wi vona a hambuka entiyisweni swi ndzi khumbile swinene. A ndzi tivutisa loko ndzi ta khomelela entiyisweni ni ku tshama ndzi ri xiphemu xa ndyangu wa Yehovha. A ndzi titwa ndzi ri ndzexe naswona a ndzi tibyela leswaku a ku na loyi a twisisaka ndlela leyi a ndzi titwa hayona.” U pfuniwe hi yini Mauricio? U ri: “Ndzi hete nkarhi wo tala ensin’wini. Sweswo swi ndzi pfunile leswaku ndzi nga tshameli ku ehleketa hi swiphiqo  swa mina. A ndzi tsakile naswona loko ndzi tirha ni van’wana a ndzi nga ri na xivundza.” Hambiloko hi nga koti ku chumayela ni van’wana hi ku kongoma swa hi tiyisa ku chumayela ni van’wana hi ku tirhisa foni kumbe hi ku tsala mapapila. I yini swin’wana leswi pfuneke Mauricio? U ri: “A ndzi tshama ndzi ri na swo swi endla evandlheni. A ndzi tinyiketela loko ndzi lunghiselela ni loko ndzi nyikela mimbulavulo. Swiavelo leswi a swi endla ndzi titwa ndzi ri wa nkoka eka Yehovha ni le ka van’wana.”

8. Miringo leyikulu yi nga hi khumba njhani?

⁸ Hi langutele ku weriwa hi miringo leyikulu emasikwini lawa yo hetelela. (2 Tim. 3:1) Kambe miringo yin’wana yi nga hi wela hi nga swi langutelanga. Hi xitshuketa hi nga weriwa hi swiphiqo swa timali, hi khomiwa hi vuvabyi lebyi nga ni khombo kumbe hi loveriwa hi munhu loyi hi n’wi rhandzaka. Eka swiyimo swo tano, hi nga ha titwa hi tshikilelekile, ngopfungopfu loko miringo ya kona yi welana kunene kumbe yi hi wela hi nkarhi wun’we. Tsundzuka leswaku Yehovha u na hina naswona u ta hi pfuna hi kota ku langutana ni miringo yin’wana ni yin’wana.

9. Hlamusela yin’wana ya miringo leyi weleke Yobo.

⁹ Ehleketa ndlela leyi Yehovha a pfuneke Yobo wanuna wo tshembeka. U weriwe hi maxangu yo tala hi xinkarhana. Hi siku rin’we, Yobo u twe leswaku malandza, swifuwo ni vana vakwe lava a va rhandzaka va dlayiwe hi ndlela yo vava. (Yobo 1:13-19) Loko a ha ku sweswo i switsongo, u biwe hi vuvabyi byo vava swinene lebyi n’wi chicheke ni xindzhuti. (Yobo 2:7) A swi vava swa Yobo lerova u kale a ku: “Ndzi venga vutomi bya mina; a ndza ha swi lavi ku ya emahlweni ndzi hanya.”—Yobo 7:16.

10. Yehovha u endle yini leswaku a pfuna Yobo a tiyisela miringo yakwe? (Vona xifaniso lexi nga eka xifunengeto.)

¹⁰ Yehovha a a langute Yobo. Leswi a a rhandza Yobo, U n’wi pfunile leswaku a tiyisela miringo yakwe. Yehovha u vulavule na Yobo, a n’wi tsundzuxa hi vutlhari Byakwe lebyikulu ni ndlela leyi A swi khathalelaka hayona swiharhi. U n’wi byele na hi swiharhi swo tala swo hlamarisa. (Yobo 38:1, 2; 39:9, 13, 19, 27; 40:15; 41:1, 2) Yehovha u tlhele a tirhisa jaha ro tshembeka Elihu leswaku ri tiyisa ni ku chavelela Yobo. Elihu u n’wi tiyisekisile leswaku mikarhi hinkwayo Yehovha u katekisa vagandzeri Vakwe lava tiyiselaka. Kambe Yehovha u tlhele a tirhisa Elihu leswaku a tshinya Yobo hi ndlela ya rirhandzu. Elihu u pfune Yobo leswaku a languta swilo hi tihlo rin’wana, hi ku n’wi tsundzuxa leswaku hi vatsongo ngopfu loko hi pimanisiwa na Yehovha Mutumbuluxi wa swilo hinkwaswo. (Yobo 37:14) Yehovha u tlhele a byela Yobo leswaku a endla swin’wana; a a fanele a khongelela vanghana vakwe vanharhu lava dyoheke. (Yobo 42:8-10) Yehovha u hi seketela njhani namuntlha loko hi ri emiringweni yo tika?

11. Bibele yi hi chavelela njhani loko hi ri emiringweni?

¹¹ Yehovha a nga vulavuli na hina hi ku kongoma hilaha a endleke hakona eka Yobo kambe u vulavula na hina hi ku tirhisa Rito Rakwe, ku nga Bibele. (Rhom. 15:4) U hi chavelela hi ku hi tshembisa vumundzuku lebyinene. Kambisisa Matsalwa ma nga ri mangani lama nga hi chavelelaka loko hi ri emiringweni. Hi ku tirhisa Matsalwa, Yehovha u hi tiyisekisa leswaku a ku na nchumu hambi ku ri miringo leyikulu leyi nga “[kotaka] ku hi hambanisa ni rirhandzu ra” yena. (Rhom. 8:38, 39) U tlhela a hi tiyisekisa leswaku “u le kusuhi ni hinkwavo lava n’wi vitanaka” hi xikhongelo. (Ps. 145:18) Yehovha u hi byela leswaku loko hi titshega hi yena, hi nga kota ku tiyisela ndzingo wun’wana ni wun’wana ni ku tlhela hi tsaka hambiloko hi xaniseka. (1 Kor. 10:13; Yak. 1:2, 12) Rito ra Xikwembu ri tlhela ri hi tsundzuxa leswaku miringo ya hina i ya xinkarhana loko yi pimanisiwa ni mikateko  ya hilaha ku nga heriki leyi a nga ta hi nyika yona. (2 Kor. 4:16-18) Yehovha wa hi tiyisekisa leswaku u ta herisa hinkwavo lava hi vangelaka maxangu, ku nga Sathana Diyavulosi ni hinkwavo lava n’wi tekelelaka. (Ps. 37:10) Xana ku ni Matsalwa lama u ma khomeke hi nhloko lama nga ta ku pfuna loko u ri emiringweni enkarhini lowu taka?

12. Yehovha u lava hi endla yini leswaku hi vuyeriwa swinene eRitweni rakwe?

¹² Yehovha u lava hi tinyika nkarhi wo hlaya Bibele nkarhi ni nkarhi ni ku anakanyisisa hileswi hi swi hlayaka. Loko hi tirhisa leswi hi swi dyondzaka, ripfumelo ra hina ra tiya swinene naswona hi ya hi tshinela eka Tata wa hina wa le tilweni. Hikwalaho ka sweswo, hi ta kota ku tiyisela miringo. Yehovha u tlhela a nyika lava titshegaka hi Rito rakwe moya lowo kwetsima. Nakambe moya lowo kwetsima wu nga hi nyika “matimba lama tlulaka lama tolovelekeke” leswaku hi kota ku tiyisela ndzingo wun’wana ni wun’wana.—2 Kor. 4:7-10.

13. Swakudya leswi “nandza wo tshembeka ni wo tlhariha” a hi nyikaka swona swi hi pfuna njhani leswaku hi tiyisela miringo?

¹³ Hi ku pfuniwa hi Yehovha, “nandza wo tshembeka ni wo tlhariha” u humesa tinhlokomhaka, tivhidiyo ni vuyimbeleri byo tala lebyi nga hi pfunaka hi tiyisa ripfumelo ni ku va ni vuxaka lebyinene na Yehovha. (Mat. 24:45) Hi fanele hi tirhisa hinkwaswo leswi Yehovha a hi nyikaka swona. Makwerhu wa xisati wa le United States u tlangele swakudya hinkwaswo leswi hi tiyisaka ripfumelo. U ri: “Eka malembe ya 40 lawa ndzi ma heteke ndzi tirhela Yehovha, ndzi ringiwe ko tala swinene.” U weriwe hi miringo leyikulu, kokwa wakwe u dlayiwile eka mhangu leyi vangiweke hi muchayeri loyi a a dakwile, vatswari vakwe va dlayiwe hi mavabyi naswona yena u khomiwe hi vuvabyi bya khensa kambirhi. I yini lexi n’wi pfuneke ku tiyisela? U ri: “Mikarhi hinkwayo Yehovha u ndzi khathalerile. Swakudya leswi a hi nyikaka swona hi ku tirhisa nandza wo tshembeka ni wo tlhariha swi ndzi pfunile leswaku ndzi kota ku tiyisela. Hikwalaho ka swona, ndzi titwa ku fana na Yobo loyi a nga te: ‘Ndzi ta fa ndza ha tshembekile!’”—Yobo 27:5.

14. Yehovha u va tirhisa njhani vamakwerhu leswaku va hi seketela loko hi ri emiringweni? (1 Vatesalonika 4:9)

¹⁴ Yehovha u letele vanhu vakwe leswaku va rhandzana ni ku chavelelana hi mikarhi yo tika. (2 Kor. 1:3, 4; hlaya 1 Vatesalonika 4:9.) Ku fana na Elihu, vamakwerhu va tshama va lunghekele ku hi pfuna leswaku hi tshama hi tshembekile loko swilo swi hi tikela. (Mit. 14:22) Hi  xikombiso, xiya ndlela leyi vandlha leri Diane a nga eka rona ri n’wi khutazeke ni ku n’wi pfuna hayona leswaku a tiyisa vuxaka byakwe ni Xikwembu endzhaku ko vabyeriwa hi nuna. U ri: “A swi tika. Kambe hi vone ndlela leyi Yehovha a hi seketeleke hayona eka tin’hweti teto to tika. Vamakwerhu evandlheni va hi seketele hi tindlela to tala. A va hi endzela, va hi fonela ni ku tlhela va hi vukarha naswona sweswo swi endle leswaku hi tiyisela. Leswi ndzi nga chayeliki, vamakwerhu a va tiyiseka leswaku ndzi va kona etinhlengeletanweni ta vandlha ni le nsin’wini loko ndzi swi kota.” I nkateko ku va xiphemu xa ndyangu wa vamakwerhu lowu rhandzanaka!

15. Hikwalahokayini hi nga kanakani leswaku hi nga swi kota ku tiyisela miringo?

¹⁵ Hinkwerhu hi ta langutana ni miringo. Kambe hilaha hi nga dyondza hakona, a hi nge langutani ni miringo hi ri hexe. Ku fana ni tatana loyi a nga ni rirhandzu, Yehovha u tshama a ri karhi a hi sirhelela. U le kusuhi na hina naswona u lunghekele ku twa swirilo swa hina loko hi lava mpfuno ni ku hi seketela. (Esa. 43:2) A hi kanakani leswaku hi nga kota ku tiyisela miringo hikuva u hi nyika hinkwaswo leswi hi swi lavaka leswaku hi kota ku tiyisela. U hi nyike nyiko ya xikhongelo, Bibele, ndzalo ya swakudya leswi hi tiyisaka eripfumelweni ni vamakwerhu lava hi rhandzaka naswona va hi pfunaka loko swilo swi tika.

16. Hi nga endla yini ku hi tshama hi ri ni vuxaka lebyinene na Yehovha?

¹⁶ Ha swi khensa swinene leswi Tata wa hina la nge matilweni a hi khathalelaka! “Ha tsaka hikwalaho ka yena.” (Ps. 33:21) Hi nga komba Yehovha leswaku ha swi khensa leswi a hi khathalelaka hi ku tirhisa hinkwaswo leswi a hi nyikaka swona leswaku a hi pfuna. Nakambe hi fanele hi endla swo karhi leswaku hi tshama hi ri ni vuxaka lebyinene na Xikwembu. Hi marito man’wana, loko hi ya emahlweni hi endla leswi hi nga swi kotaka ku yingisa ni ku endla leswi n’wi tsakisaka, u ta hi sirhelela hilaha ku nga heriki!—1 Pet. 3:12.