Eka nhlokomhaka yoleyo, hi dyondze leswaku ku ni mhaka yin’we ya nkoka leyi khumbaka vanhu hinkwavo ni tintsumi: ku nga ku kwetsimisiwa ka vito lerikulu ra Yehovha. Mhaka ya leswaku Yehovha u fuma hi ndlela leyinene kumbe doo, yi fambisana ni ku kwetsimisiwa ka vito rakwe. Hilaha ku fanaka, mhaka ya leswaku vanhu va tshembeka eka Yehovha kumbe doo, ya ha wela kona eka mhaka ya ku kwetsimisiwa ka vito ra Yehovha.

Hikwalahokayini sweswi hi vula leswaku nchumu wa nkoka ngopfu i vito ra Yehovha ni ku kwetsimisiwa ka rona? A hi kambisiseni swivangelo swinharhu.

Xo sungula, Sathana u thyakise vito ra Yehovha kumbe ku onha ndhuma yakwe entangeni wa Edeni. Xivutiso xo kanganyisa lexi Sathana a xi vutiseke Evha a xi kombisa leswaku Yehovha i Xikwembu lexi tsonanaka, lexi vekelaka vanhu swipimelo swo tika. Entiyisweni Sathana u kombise leswaku Xikwembu xa hemba hi ku va a kaneta leswi xi swi vuleke. U thyakise vito ra Yehovha. Sathana u ve “Diyavulosi” leswi vulaka “mulumbeti.” (Yoh. 8:44) Evha u tshembe mavunwa ya Sathana ivi a nga xi yingisi Xikwembu, leswi kombiseke leswaku a a nga lavi ku fumiwa hi xona. (Gen. 3:1-6) Ninamuntlha Sathana wa ha ya emahlweni a thyakisa vito ra Xikwembu, u hangalasa mavunwa hi Yehovha. Lava tshembaka mavunwa wolawo hakanyingi a va n’wi yingisi Yehovha. Eka vanhu va Xikwembu, ku thyakisiwa ka vito ro kwetsima ra Yehovha i nchumu lowu va twisaka ku vava ngopfu. Leswi hi swona swi vangaka vubihi ni ku xaniseka emisaveni.

Xa vumbirhi, Yehovha u tiyimisele ku kwetsimisa vito rakwe ni ku ri susa swisandzu hinkwaswo leswaku ku vuyeriwa ntumbuluko hinkwawo. Sweswo i swa nkoka swinene eka yena. Hi yona mhaka a vulaka leswi: “Ndzi ta kwetsimisa vito ra mina lerikulu.” (Ezek. 36:23) Yesu u swi veke erivaleni leswi malandza hinkwawo ya Yehovha yo tshembeka ma faneleke ma swi rhangisa eswikhongelweni swa wona loko a ku: “Vito ra wena a ri kwetsimisiwe.” (Mat. 6:9) Hi ku phindhaphindha Bibele yi kandziyisa nkoka wa ku dzunisa vito ra Yehovha. Xiya swikombiso swi nga ri swingani: “Dzunisani Yehovha hikwalaho ka vito rakwe leri vangamaka.” (1 Tikr. 16:29; Ps. 96:8) “Yimbelelani mi dzunisa vito ra [yena] leri vangamaka.” (Ps. 66:2) “Ndzi ta vangamisa vito ra wena hilaha ku nga heriki.” (Ps. 86:12) Siku rin’wana Yesu a a ri etempeleni ya le Yerusalema loko a vulavula na Yehovha a ri etilweni a ku: “Tatana, vangamisa vito ra wena.” Yehovha u hlamule a ku: “Ndzi ri vangamisile naswona ndzi ta tlhela ndzi ri vangamisa.”—Yoh. 12:28. a

Xa vunharhu, xikongomelo xa Yehovha ku sukela eku sunguleni xi fambisana ni vito rakwe kumbe ndhuma yakwe. Xiya leswi: Xana ku ta endleka yini endzhaku ka ndzingo wo hetelela lowu nga ta va kona loko Mfumo wa Kreste wa Gidi ra Malembe wu hela? Xana ku ta tshama ku nga ri na  vun’we exikarhi ka tintsumi na vanhu hikwalaho ka mhaka ya nkoka ya ku kwetsimisiwa ka vito ra Yehovha? Leswaku hi kota ku hlamula xivutiso lexi, a hi buleni hi swilo swimbirhi swa nkoka, ku nga ku tshembeka ka vanhu ni vuhosi bya Yehovha. Xana vanhu lava kombiseke leswaku va tshembekile va ta ya emahlweni va ringiwa? Doo! Va ta va va ringiwe hilaha ku heleleke naswona va nga ha ri na xidyoho. Va ta kuma vutomi lebyi nga heriki. Xana mhaka ya vuhosi bya Yehovha yi ta ya emahlweni yi tlhontlhiwa hambi ku ri ku hambanisa vanhu ni tintsumi? Doo! Swi ta va swi ri erivaleni leswaku Yehovha hi yena a nga ni mfanelo yo fuma naswona u fuma hi ndlela leyinene. Kambe ku vuriwa yini hi vito ra Yehovha?

Hi nkarhi wolowo vito ra Yehovha ri ta va ri kwetsimisiwile naswona ri basisiwile eka swihehlo hinkwaswo. Hambiswiritano, vito ra Yehovha ri ta tshama ri ri ra nkoka swinene eka malandza hinkwawo ya laha misaveni ni le tilweni. Hikwalahokayini? Hikuva ma ta vona Yehovha a ya emahlweni a endla swilo swo hlamarisa. Xiya: Xikwembu xi ta va “swilo hinkwaswo eka vanhu hinkwavo” loko Yesu a tlherisela vuhosi eka Yehovha. (1 Kor. 15:28) Endzhaku ka sweswo, vanhu va ta tiphina hi “tshunxeko lowu vangamaka wa vana va Xikwembu.” (Rhom. 8:21) Yehovha u ta hetisisa xikongomelo xakwe xa le ku sunguleni xa leswaku tintsumi etilweni ni vanhu emisaveni va va ndyangu wun’we lowukulu lowu nga ni vun’we.—Efe. 1:10.

Xana tintsumi ni vanhu va ta titwa njhani hikwalaho ka sweswo? Swa twala ku vula leswaku hi ta swi navela hi mbilu hinkwayo ku dzunisa vito ra Yehovha ro xonga hilaha ku nga heriki. Mupisalema Davhida u huhuteriwe ku tsala leswi: “A ku dzunisiwe Yehovha Xikwembu . . . A ku dzunisiwe vito rakwe hilaha ku nga heriki.” (Ps. 72:18, 19) Hi ta ya emahlweni hi kuma tindlela letintshwa naswona to tsakisa to endla sweswo hilaha ku nga heriki.

Phela, vito ra Yehovha ri yimela leswi a nga swona. Xa nkoka swinene, vito rakwe ri hi tsundzuxa rirhandzu rakwe. (1 Yoh. 4:8) Hi ta tshama hi ri karhi hi tsundzuka leswaku Yehovha hikwalaho ka rirhandzu u hi vumbile, a hi nyika nkutsulo ni ku hi kombisa leswaku u fuma hi ndlela leyinene. Kambe hi ta ya emahlweni hi vona ndlela leyi Yehovha a hi rhandzaka hayona. Hi ta lava ku tshinela eka yena tanihi Tata wa hina ni ku yimbelela tinsimu to dzunisa vito rakwe leri vangamaka hilaha ku nga heriki.—Ps. 73:28.