1-2. (a) Xana Yehovha u titwa njhani hi vanhu lava endlaka xidyoho hi vomu? (b) I yini leswi Yehovha a swi languteleke eka vadyohi?

 YEHOVHA a hi Xikwembu lexi pfumelelaka vanhu va tiendlela ku rhandza, wa xi venga xidyoho. (Ps. 5:​4-6) U lava leswaku hinkwerhu hi xixima milawu yakwe yo lulama leyi a hi vekeleke yona eRitweni rakwe. I ntiyiso leswaku Yehovha wa swi tiva leswaku vanhu lava velekiweke ni xidyoho va ta swi endla swihoxo. (Ps. 130:​3, 4) Kambe a nga tsaki loko ‘vanhu lava nga n’wi xiximiki va tirhisa musa wakwe lowukulu ku endla manyala.’ (Yuda 4) Entiyisweni, Bibele yi vulavula hi ku “lovisiwa ka vanhu lava nga xiximiki Xikwembu” enyimpini ya xona ya Armagedoni.—2 Pet. 3:7; Nhlav. 16:16.

² Hambiswiritano, Yehovha a nga lavi leswaku ku lova ni un’we. Hilaha hi buleke hakona eka tinhlokomhaka leti hundzeke, Bibele yi swi veka erivaleni leswaku u “lava leswaku vanhu hinkwavo va hundzuka.” (2 Pet. 3:9) Vakulu va tekelela Yehovha loko va ri karhi va lehisa mbilu va pfuna vadyohi va cinca tindlela ta vona ni ku tlhela va amukeriwa hi Yehovha. Kambe a hi vadyohi hinkwavo lava hundzukaka. (Esa. 6:9) Van’wana va ya emahlweni va endla xidyoho hambiloko vakulu  va va pfune hi ku phindhaphindha leswaku va hundzuka. Ku fanele ku endliwa yini eka xiyimo xo tano?

“SUSANI MUNHU WO HOMBOLOKA”

3. (a) Bibele yi vula leswaku ku fanele ku endliwa yini hi vadyohi lava nga hundzukiki? (b) Hikwalahokayini hi vula leswaku mudyohi u lo tihlawulela ku susiwa evandlheni?

³ Loko mudyohi a nga hundzuki, vakulu va ta landzelela nkongomiso lowu nga eka 1 Vakorinto 5:13 lowu nge: “Susani munhu wo homboloka exikarhi ka n’wina.” Hi ndlela yin’wana, yoleyo i mhangu ku tilavela; u tshovela leswi a swi byaleke. (Gal. 6:7) Hikwalahokayini hi vula tano? Hileswi a aleke loko vakulu va ringeta hi phindhaphindha ku n’wi pfuna leswaku a hundzuka. (2 Tih. 17:​12-15) Swiendlo swa yena swi kombisa leswaku u hlawule ku nga hanyi hi milawu ya Yehovha.—Det. 30:​19, 20.

4. Hikwalahokayini ku endliwa xitiviso loko mudyohi langa hundzukiki a susiwa evandlheni?

⁴ Loko mudyohi la nga hundzukiki a susiwa, ku endliwa xitiviso evandlheni xa leswaku a nga ha ri Mbhoni ya Yehovha. Xikongomelo xa xitiviso xexo a hi ku khomisa mudyohi tingana. Ku ri na sweswo, xi endliwa leswaku vandlha ri landzela xileriso xa Matsalwa xo “tshika ku tihlanganisa” ni munhu yoloye “hambi ku ri ku dya” na yena. (1 Kor. 5:​9-11) Nkongomiso lowu wa twala. Muapostola Pawulo u tsale a ku: “Comela xitsongo xi kukumuxa mbila hinkwayo.” (1 Kor. 5:6) Vadyohi lava nga hundzukiki va nga endla leswaku lava tiyimiseleke ku hanya hi milawu ya Yehovha yo lulama va hela matimba.—Swiv. 13:20; 1 Kor. 15:33.

5. Hi fanele hi n’wi languta njhani munhu la susiweke evandlheni naswona hikwalahokayini?

⁵ Hikwalaho, hi fanele hi n’wi languta njhani makwerhu loyi a susiweke evandlheni? Hambileswi hi nga taka hi nga hungasi na yena, hi fanele hi n’wi languta tanihi nyimpfu leyi lahlekeke, hi nga n’wi lahleli mavoko. Nyimpfu leyi hambukeke entlhambini yi nga tlhela yi vuya. Tsundzuka leswaku nyimpfu yoleyo leyi lahlekeke yi tinyiketerile eka Yehovha. Lexi twisaka ku vava, sweswi mahanyelo yakwe a ma fambisani ni ku tinyiketela kakwe naswona sweswo swi n’wi veka ekhombyeni. (Ezek. 18:31) Nilokoswiritano, loko Yehovha a ha n’wi komba musa, ku ni ntshembo wa leswaku munhu yoloye u ta tlhela a vuya. Xana vakulu va nga ri kombisa njhani langutelo rero eka mudyohi la susiweke evandlheni?

NDLELA LEYI VAKULU VA VA PFUNAKA HAYONA LAVA SUSIWEKE

6. Hi wahi magoza lawa vakulu va nga ta ma teka ku pfuna munhu loyi a susiweke evandlheni?

⁶ Xana munhu la susiweke evandlheni u tshikiwa hi ku helela leswaku a tivuyela hi yexe eka Yehovha? Nikatsongo! Loko komiti ya vakulu yi tivisa mudyohi la nga hundzukiki leswaku wa susiwa evandlheni, yi n’wi hlamusela ni leswi a faneleke a swi endla leswaku a vuyiseriwa. Kambe vakulu va ta tlhela va endla leswi engetelekeke. Hi ntolovelo, va ta byela mudyohi yoloye leswaku va ta tsakela ku tlhela va hlangana na yena endzhaku ka tin’hweti ti nga ri tingani, ku vona loko se a hundzukile. Loko a swi tsakela ku hlangana na vona nakambe, vakulu va ta n’wi khutaza leswaku a hundzuka ni ku vuyela evandlheni. Hambiloko hi nkarhi wolowo a nga si hundzuka, vakulu va ta endla matshalatshala ya leswaku va tihlanganisa na yena enkarhini lowu taka.

7. Vakulu va wu kombisa njhani ntwelavusiwana wa Yehovha loko va pfuna munhu la susiweke evandlheni? (Yeremiya 3:12)

 ⁷ Vakulu va tikarhatela ku kombisa ntwelavusiwana wa Yehovha loko va ri karhi va pfuna la susiweke evandlheni. Hi xikombiso, Yehovha a nga yimelanga leswaku vanhu vakwe lava nga yingisiki va le Israyele wa khale ku va vona vo sungula ku teka goza ro tlhelela eka yena. Ku ri na sweswo, hi yena a rhangeke a ya eka vona, hambiloko va nga si kombisa ku hundzuka. Hilaha hi swi xiyeke hakona eka nhlokomhaka ya vumbirhi ya tinhlokomhaka leti ta ntlhandlamano, Yehovha u kombise ntwelavusiwana wakwe hi ku byela muprofeta Hosiya leswaku a vuyelelana ni nsati wakwe loyi a ha dyoha. (Hos. 3:1; Mal. 3:7) Leswi va tekelelaka Yehovha, vakulu va swi lava hi mbilu hinkwayo leswaku mudyohi a vuyiseriwa naswona va endla leswaku swi n’wi olovela ku endla tano.—Hlaya Yeremiya 3:12.

8. Xana xifaniso xa Yesu xa n’wana la lahlekeke xi hi pfuna njhani ku twisisa ntwelavusiwana ni tintswalo ta Yehovha? (Luka 15:7)

⁸ Tsundzuka xifaniso xa Yesu xa n’wana la lahlekeke, lexi hi buleke ha xona eka nhlokomhaka ya vumbirhi ya nkandziyiso lowu. Loko tata wakwe a n’wi vona a ri karhi a vuya ekaya, u ‘tsutsume a n’wi hlanganisa a fika a n’wi angarha, a n’wi tswontswa.’ (Luka 15:20) Xiya leswaku tatana yoloye a nga yimelanga leswaku n’wana wakwe a kombela ku rivaleriwa. Ku ri na sweswo, hi yena a rhangeke a ya eka yena tanihi tatana la nga ni rirhandzu. Vakulu va tikarhatela ku endla leswi fanaka eka lava hambukeke. Va lava leswaku tinyimpfu toleto leti lahlekeke ti vuya ekaya. (Luka 15:​22-24, 32) Loko mudyohi a hundzuka, ku va ni ntsako etilweni ni laha misaveni!—Hlaya Luka 15:7.

9. Xana Yehovha u lava leswaku vadyohi va endla yini?

⁹ Hi ku ya hi leswi se hi swi kambisiseke ku fikela sweswi, swi le rivaleni leswaku Yehovha a nga va lavi vadyohi lava nga hundzukiki. Hambiswiritano, a nga va lahleli mavoko vadyohi. U lava leswaku va vuya. Ndlela leyi Yehovha a titwaka hayona hi vadyohi lava hundzukaka yi hlamuseriwe eka Hosiya 14:​4, leyi nge: “Ndzi ta herisa ku nga tshembeki ka vona. Ndzi ta va rhandza swi huma embilwini, hikuva a ndza ha n’wi hlundzukelanga.” Vakulu va khutaziwa ku xiyisisa ku cinca loku munhu a ku endlaka ku kombisa leswaku u sungula ku hundzuka. Lava tshikeke Yehovha, na vona va khutaziwa ku vuya hi ku hatlisa.

10-11. Vakulu va ta ringeta njhani ku pfuna lava ku nga khale va susiwile evandlheni?

¹⁰ Ku vuriwa yini hi lava se ku hundzeke malembe yo tala va susiwile evandlheni? Vanhu volavo va nga ha va va tshikile xidyoho lexi a va suseriwa xona. Van’wana swi nga endleka va nga ha swi tsundzuki ni leswi a va suseriwe swona. Hambiloko ku ri khale va susiwile, vakulu va ta ringeta ku lava vanhu volavo ni ku va endzela. Eka maendzo wolawo, va ta kombela ku khongela na vona ni ku va khutaza leswaku va vuya evandlheni. I ntiyiso leswaku loko munhu a ri ni malembe yo tala a susiwile swi le rivaleni leswaku a nga ha ri na vuxaka lebyinene na Yehovha. Hikwalaho, loko a kombisa leswaku wa swi lava ku vuya evandlheni, vakulu va ta hlela leswaku un’wana a dyondza na yena Bibele hambiloko a nga si vuyiseriwa. Eka swiyimo hinkwaswo, vakulu hi vona lava nga ta hlela leswaku a dyondzeriwa Bibele.

¹¹ Leswi vakulu va tekelelaka ntwelavusiwana wa Yehovha, va lava ku pfuna vo tala hilaha va nga kotaka hakona va swi tiva leswaku  tinyangwa to vuya ekaya ti pfulekile. Loko mudyohi a kombisa leswaku u hundzukile ni ku tshika xidyoho xakwe, a nga vuyiseriwa hi ku hatlisa.—2 Kor. 2:​6-8.

12. (a) Hi le ka swiyimo swihi laha vakulu va faneleke va va ni vuxiyaxiya swinene? (b) Hikwalahokayini hi nga fanelanga hi tibyela leswaku Yehovha a nge pfuki a va kombe tintswalo vadyohi van’wana? (Nakambe vona nhlamuselo ya le hansi.)

¹² Eka swiyimo swin’wana, vakulu va ta va ni vuxiyaxiya swinene loko va nga si vuyisela munhu. Hi xikombiso, loko munhu a tshame a xanisa n’wana, a va mugwinehi, a dlaya vukati hi vukanganyisi, vakulu va fanele va tiyiseka leswaku munhu yoloye u hundzukile hakunene. (Mal. 2:14; 2 Tim. 3:6) Va fanele va sirhelela ntlhambi. Hi hala tlhelo, hi fanele hi tsundzuka leswaku Yehovha u ta amukela un’wana ni un’wana la swi kombisaka hi mbilu  hinkwayo leswaku u hundzukile ni ku tlhela a tshika ku endla xidyoho. Kutani hambileswi vakulu va vaka ni vuxiyaxiya loko va pfuna munhu la kanganyiseke van’wana, a va fanelanga va tibyela leswaku Yehovha a nge pfuki a va kombe tintswalo vanhu vo tano. a—1 Pet. 2:10.

LESWI VANDLHA RI NGA SWI ENDLAKA

13. Xana ndlela leyi hi n’wi khomaka hayona munhu loyi a soriweke hi vakulu yi hambana njhani ni ya loyi a susiweke evandlheni?

¹³ Hilaha hi buleke hakona eka nhlokomhaka leyi hundzeke, mikarhi yin’wana ku va ni xitiviso xa leswaku makwerhu wo karhi u soriwile. Eka xiyimo xo tano, hi nga ya emahlweni hi tihlanganisa na yena hi karhi hi swi tiva leswaku u hundzukile naswona u tshike mikhuva yakwe yo biha. (1 Tim. 5:20) Wa ha ri xirho xa vandlha naswona u lava xikhutazo lexi humaka eka vamakwerhu. (Hev. 10:​24, 25) Hambiswiritano, swa hambana loko swi ta eka loyi a susiweke evandlheni. Hi “tshika ku tihlanganisa” ni munhu yoloye, ‘hambi ku ri ku dya hi nga dyi na yena munhu wo tano.’—1 Kor. 5:11.

14. Vakreste va nga ri tirhisa njhani ripfalo ra vona leri leteriweke hi Bibele loko swi ta eka munhu loyi a susiweke evandlheni? (Nakambe vona xifaniso.)

¹⁴ Xana leswi hi buleke ha swona swi vula leswaku hi fanele hi n’wi papalata hi ku helela munhu loyi a susiweke evandlheni? A swi tano. I ntiyiso leswaku a hi nge tihlanganisi na yena. Kambe Vakreste va nga tirhisa ripfalo ra vona leri leteriweke hi Bibele loko va endla xiboho xo rhamba munhu la susiweke evandlheni, ku nga ha va xaka kumbe khale ka munghana leswaku a ta etinhlengeletanweni ta vandlha. Hi fanele hi n’wi khoma njhani loko a ta? Khale a hi nga n’wi xeweti munhu yoloye. Kambe sweswi Mukreste un’wana ni un’wana u fanele a tirhisa ripfalo rakwe leri leteriweke hi Bibele emhakeni leyi. Van’wana va nga ha titwa va tshunxekile ku n’wi xeweta kumbe ku n’wi amukela etinhlengeletanwini ta vandlha. Nilokoswiritano, a hi nge dyi mabulo kumbe hi hungasa na yena.

15. Xana 2 Yohane 9-11 yi vulavula hi vadyohi va njhani? (Nakambe vona bokisi leri nge, “ Xana Yohane Na Pawulo A Va Vulavula Hi Xidyoho Lexi Fanaka?”)

 ¹⁵ Van’wana va nga ha tivutisa va ku, ‘kasi Bibele a yi vuli swona leswaku Mukreste la xewetaka munhu wo tano u seketela mitirho yakwe yo homboloka?’ (Hlaya 2 Yohane 9-11.) Mongo wa tsalwa leri wu kombisa leswaku nkongomiso lowu wu vulavula hi vagwinehi ni lava hlohlotelaka van’wana ku endla swo biha. (Nhlav. 2:20) Hikokwalaho, loko munhu a hlohlotela tidyondzo ta vugwinehi kumbe a kucetela van’wana ku endla swilo swo biha, vakulu a va nge n’wi endzeli. Kambe swi nga koteka leswaku munhu yoloye a hundzuka. Hambiswiritano, loko a nga si hundzuka, a hi nge n’wi xeweti hambi ku ri ku n’wi rhamba etinhlengeletanwini ta vandlha.

TEKELELA NTWELAVUSIWANA NI TINTSWALO TA YEHOVHA

16-17. (a) Yehovha u lava leswaku vadyohi va endla yini? (Ezekiyele 18:32) (b) Vakulu va swi kombisa njhani leswaku i vatirhikulobye na Yehovha loko va ringeta ku pfuna vadyohi?

¹⁶ Hi dyondze yini eka tinhlokomhaka leta ntlhanu? Yehovha a nga lavi leswaku ku lovisiwa ni un’we! (Hlaya Ezekiyele 18:32.) U lava leswaku vadyohi va vuyelelana na yena. (2 Kor. 5:20) Sweswo hi swona swi endleke leswaku enkarhini lowu nga hundza, Yehovha a tshamela ku khutaza vanhu vakwe lava hambukeke leswaku va hundzuka va vuyela eka yena. Vakulu va ni njombo yo va vatirhikulobye na Yehovha loko va ri karhi va tikarhatela ku pfuna vadyohi leswaku va hundzuka.—Rhom. 2:4; 1 Kor. 3:9.

¹⁷ Anakanya ntsako lowu vaka kona etilweni loko vadyohi va hundzuka! Nkarhi hinkwawo loko nyimpfu leyi lahlekeke yi vuyela evandlheni, Tata wa hina wa le tilweni ku nga Yehovha, wa tsaka. Hi ya hi n’wi rhandza swinene Yehovha, loko hi anakanyisisa hi tintswalo takwe, ntwelavusiwana ni musa wakwe lowukulu.—Luka 1:78.