1. Hi xihi xivangelo xin’wana lexi endleke Yesu a fanisa vadyondzisiwa vakwe ni tinyimpfu?

VUXAKA lebyi Yesu a ri na byona ni vadyondzisiwa, u byi fanise ni lebyi murisi a nga na byona ni tinyimpfu. (Yoh. 10:14) Sweswo a swi twala. Tinyimpfu ta n’wi tiva murisi wa tona naswona ti yingisa rito rakwe. Muvalangi un’wana u pfumelelana na yona mhaka leyi. U te: “A hi lava tinyimpfu ti tshinela eka hina leswaku hi ta kota ku ti teka swinepe. Kambe leswi a ti nga ri tivi rito ra hina, a ti tshinelanga. Endzhakunyana ku te xifanyetana lexi a xi ri murisi kutani xi ti vitana, hiloko ti ya eka xona.”

2-3. (a) Xana valandzeri va Yesu va swi kombisa njhani leswaku va yingisa rito rakwe? (b) Hi ta bula hi yini eka nhlokomhaka leyi ni leyi landzelaka?

² Ntokoto lowu wa muvalangi wu hi tsundzuxa marito ya Yesu mayelana ni tinyimpfu takwe, ku nga vadyondzisiwa vakwe. U te: “Ti ta yingisa rito ra mina.” (Yoh. 10:16) Kambe sweswi Yesu u le tilweni. Hikwalaho, hi n’wi yingisa njhani? Ndlela yin’wana leyi hi nga swi kombisaka hayona leswaku hi yingisa rito ra N’wini wa hina, i ku tirhisa tidyondzo takwe evuton’wini bya hina.—Mat. 7:24, 25.

³ Eka nhlokomhaka leyi ni leyi landzelaka, hi ta bula hi tidyondzo tin’wana ta Yesu. Hilaha hi nga ta swi vona hakona, Yesu u vule leswaku ku ni leswi hi nga fanelangiki hi swi endla ni leswi hi faneleke hi swi endla. Hi ta rhanga hi bula hi swilo swimbirhi leswi murisi lonene a hi byeleke leswaku hi fanele hi tshika ku swi endla.

4. Hi ku ya hi Luka 12:29, i yini leswi nga hi endlaka hi ‘tshama hi ri karhi hi vilela’?

⁴ Hlaya Luka 12:29. Yesu u tsundzuxe valandzeri vakwe leswaku va fanele va ‘tshika ku tshama va ri karhi va vilela’ hileswi a va swi pfumala. Ha swi tiva leswaku switsundzuxo swa Yesu i swinene mikarhi hinkwayo. Hi lava ku swi tirhisa evuton’wini bya hina kambe mikarhi yin’wana swa tika ku endla tano. Hikwalahokayini?

5. Hikwalahokayini van’wana va nga ha vilelaka hi swilo leswi va swi lavaka?

 ⁵ Van’wana va nga ha vilela hileswi va swi lavaka, ku nga ha va swakudya, swiambalo kumbe ndhawu yo tshama. Kumbexana va tshama etikweni leri nga ni vusweti laha swi tikaka ku kuma mitirho. Swi nga ha tika swinene ku kuma mali yo khathalela mindyangu ya vona. Kumbexana nhloko ya ndyangu leyi a yi va khathalela yi file naswona se va koka exilogweni. Nakambe ntungu wa COVID-19, swi nga endleka wu endle vo tala va lahlekeriwa hi mitirho. (Ekl. 9:11) Loko na hina hi langutane ni swiphiqo leswi, hi nga xi yingisa njhani xitsundzuxo xa Yesu lexi hi khutazaka ku tshika ku vilela?

6. Hlamusela leswi endlekeleke Petro siku rin’wana.

⁶ Siku rin’wana loko muapostola Petro ni vadyondzisiwa lavan’wana va ri endzeni ka xikepe eLwandle ra Galeliya, ku ve ni xidzedze naswona va vone Yesu a famba ehenhla ka mati. Petro u te: “Hosi, loko ku ri wena, ndzi pfumelele ndzi famba ehenhla ka mati ndzi ta eka wena.” Yesu u n’wi vitanile leswaku a ‘ta’ naswona hi ku copeta ka tihlo, Petro a ku xikepe sala endzhaku ivi “a famba ehenhla ka mati a ya eka Yesu.” Twana leswi endlekeke endzhaku ka sweswo. “Loko a languta xidzedze, a  sungula ku chava. Kutani loko a sungula ku mbombomela, a huwelela a ku: ‘Hosi, ndzi ponise!’” Yesu u n’wi khome hi voko kutani a n’wi ponisa. I swa nkoka ku tsundzuka leswaku Petro u swi kotile ku famba ehenhla ka mati hileswi mahlo yakwe a ya lo nwhii, eka Yesu. Kambe loko Petro a ku tlaa eka xidzedze, u sungule ku chava kutani a mbombomela.—Mat. 14:24-31.

7. Hi dyondza yini eka xikombiso xa Petro?

⁷ Hi nga dyondza swo tala eka xikombiso xa Petro. Loko Petro a huma exikepeni, a nga ehleketi leswaku u ta chava kutani a nwela. A a lava ku famba ehenhla ka mati kukondza a fika eka N’wini wakwe. Kambe u khomiwe hi rhumbyana hikwalaho ko languta xidzedze. Hambileswi hina namuntlha hi nga ta ka hi nga swi koti ku famba ehenhla ka mati kambe mitlhontlho yi lo vuya. Loko hi tshika ku tshemba Yehovha ni switshembiso swakwe, vuxaka bya hina na yena byi nga sungula ku mbombomela. Swi nga ri na mhaka leswaku hi langutana ni mitlhontlho ya njhani, a hi fanelanga hi tshika ku tshemba leswaku Yehovha u ta hi pfuna. Hi nga swi endla njhani?

8. I yini leswi nga ta hi pfuna leswaku hi nga vileli hi leswi hi swi pfumalaka?

⁸ Hi ta vuyeriwa swinene loko hi tshika ku vilela ivi hi tshemba Yehovha. Tsundzuka leswaku Tata wa hina Yehovha u hi tshembisa ku hi nyika leswi hi swi pfumalaka ntsena loko hi rhangisa Mfumo wakwe ku sungula. (Mat. 6:32, 33) Mikarhi hinkwayo U hetisisa switshembiso swakwe. (Det. 8:4, 15, 16; Ps. 37:25) Loko Yehovha a kota ku khathalela swinyenyana ni ku ambexa swiluva, a hi fanelanga hi vilela hileswaku hi ta dya yini kumbe ku ambala yini. (Mat. 6:26-30; Filp. 4:6, 7) Hilaha rirhandzu ri susumetaka vatswari ku khathalela vana va vona, rirhandzu ri susumeta Tata wa hina wa le matilweni leswaku a hi khathalela. Ina, ha tiyiseka leswaku Yehovha u ta hi khathalela!

9. U dyondza yini eka ntokoto wa va tekani van’wana?

⁹ Xiya ntokoto wun’wana lowu kombisaka leswaku Yehovha u ta hi khathalela eka leswi hi swi pfumalaka. Vatekani van’wana lava nga eka ntirho wa nkarhi hinkwawo, a va famba awara hi xikorokoro xa vona ku ya teka vamakwerhu vaxisati lava a va tshama ekampeni ya valuveri leswaku va ta famba na vona etinhlengeletanweni ta vandlha. Makwerhu wa xinuna wa hlamusela, u ri: “Endzhaku ka tinhlengeletano ta vandlha, hi rhambe vamakwerhu volavo leswaku hi ya kuma swo miyeta nyoka ekaya kambe endzhaku hi tsundzuke ku a hi ri hava swakudya swo va fihluta.” Xana a va ta endla yini? Makwerhu wa xinuna u ya emahlweni a ku: “Hi te loko hi fika ekaya, enyangweni hi hlanganisiwe hi tibege timbirhi leti a ti lo mphaa hi swakudya! A hi nga swi tivi leswaku ti vekiwe hi mani. Yehovha u hi khathalerile.” Hi ku famba ka nkarhi, movha wa vona wu onhakile. A va tirhisa wona entirhweni wo chumayela kambe macheleni yo wu lunghisa a ku ri hava. Loko ya ha ri eku lunghisiweni eka makhanikhi, ku te nkulukumba wun’wana ivi a ku: “I movha wa mani lowu?” Makwerhu wa xinuna u vule leswaku i wa yena naswona se wu swi twile. Nkulukumba yoloye u te: “A swi na mhaka. Nghamu ya mina ya wu lava movha lowu. U wu xavisa hi mali muni?” Makwerhu u xavise movha ivi a kuma mali yo xava wun’wana. U ri: “Siku rero, a hi khapakhapa swinene hi ntsako. A hi swi tiva leswaku leswi a swi lo endleka hi xiwelo. A ku ri mpfuno lowu humaka eka Yehovha.”

10. Xana Pisalema 37:5 yi hi khutaza njhani leswaku hi tshika ku vilela hileswi hi swi pfumalaka?

¹⁰ Loko hi yingisa murisi lonene hi ku tshika ku vilela ngopfu hi swilo leswi hi swi pfumalaka, hi nga tiyiseka hi ku helela leswaku Yehovha  u ta hi nyika swona. (Hlaya Pisalema 37:5; 1 Pet. 5:7) Tsundzuka mitlhontlho leyi ku buriweke hayona eka  ndzimana 5. Ku fikela sweswi, swi nga endleka Yehovha a hi khathalela hi ku tirhisa nhloko ya ndyangu kumbe lava hi tholeke. Loko nhloko ya ndyangu yi tsandzeka ku endla tano kumbe hi lahlekeriwa hi mitirho ya hina, Yehovha u ta hi khathalela hi tindlela tin’wana. Hi vula hi nga tipfinyingi leswaku u ta endla tano. A hi buleni hi swin’wana leswi murisi lonene a hi khutazaka ku hi tshika ku swi endla.

11. Hi ku ya hi Matewu 7:1, 2, i yini leswi Yesu a hi khutazaka ku tshika ku swi endla naswona ha yini ku ri ntlhontlho?

¹¹ Hlaya Matewu 7:1, 2. Yesu a a swi tiva leswaku vayingiseri vakwe lava velekiweke ni xidyoho va nga ha avanyisa van’wana. Hi yona mhaka a nga te: “Tshikani ku avanyisa van’wana.” Hi nga wa hi pfuka leswaku hi nga avanyisi vamakwerhu. Hambiswiritano, mikarhi yin’wana ha tsandzeka. Loko hi vona onge hi ni moya wo xopaxopa van’wana, hi fanele hi endla yini? Yingisela Yesu kutani u lwa hi matimba ku tshika ku avanyisa van’wana.

12-13. Ku anakanyisisa hi ndlela leyi Yehovha a n’wi khomeke hayona Hosi Davhida swi ta hi pfuna njhani leswaku hi tshika ku avanyisa van’wana?

¹² Hi ta vuyeriwa swinene loko hi anakanyisisa hi xikombiso xa Yehovha. U languta leswinene ntsena eka vanhu. Leswi hi swi vona eka ndlela leyi a n’wi khomeke hayona Davhida loko a endle swidyoho leswikulu. Hi xikombiso, u endle vuoswi na Bati-Xeba naswona u dlaye ni nuna wakwe. (2 Sam. 11:2-4, 14, 15, 24) Switandzhaku leswi veke kona swi vavise ndyangu hinkwawo. (2 Sam. 12:10, 11) Nakambe siku rin’wana, Davhida u kombise ku nga n’wi tshembi Yehovha loko a hlayela vuthu ra masocha ya Israyele, ku nga leswi Yehovha a a nga n’wi lerisanga. Swi nga endleka a endle tano hileswi a tinyungubyisa hi ku tala ka masocha yakwe naswona a ma tshemba ngopfu. Xana vuyelo byi ve byihi? Vaisrayele va kwalomu ka 70 000 va dlayiwe hi ntungu!—2 Sam. 24:1-4, 10-15.

¹³ Loko a wu tshama eIsrayele hi nkarhi wolowo, xana a wu ta n’wi languta njhani Davhida? Xana a wu ta n’wi avanyisa ivi u gimeta hi ku vula leswaku a nga faneriwi hi tintswalo ta Yehovha? Yehovha a nga endlanga tano. U langute ku tshembeka ka Davhida ni ku hundzuka kakwe loku sukaka embilwini. Sweswo hi swona leswi endleke Yehovha a rivalela Davhida. Yehovha a a swi tiva leswaku Davhida wa n’wi rhandza naswona u lava ku endla leswinene. Xana a wu swi tlangeli leswi Xikwembu xi langutaka leswinene eka hina?—1 Tih. 9:4; 1 Tikr. 29:10, 17.

14. I yini leswi pfunaka Vakreste leswaku va tshika ku avanyisa van’wana?

¹⁴ Yehovha wa swi tiva leswaku hi ta swi endla swihoxo hikuva hi velekiwe na xidyoho kutani na hina hi fanele hi langutela sweswo eka van’wana. Swa olova ku xopaxopa swihoxo swa van’wana ni ku va avanyisa. Kambe munhu loyi a nga ni vuxaka lebyinene na Yehovha u tirhisana kahle ni vanhu van’wana hambiloko va endla swihoxo. Dayimani leyi nga riki na xivumbeko a yi sasekanga kambe munhu wo tlhariha a nga languti leswi nga ehandle ka yona kambe u languta ngopfu ndlela leyi yi nga ta va ya risima hayona loko se yi hlantswiwile. Ku fana na Yehovha na Yesu, a hi fanelanga hi tshamela ku languta swihoxo swa van’wana kambe hi fanele hi languta ngopfu vumunhu bya vona lebyinene.

15. Xana ku tiva swiyimo leswi van’wana va langutanaka na swona swi ta hi pfuna njhani leswaku hi nga vaavanyisi?

¹⁵ Ku engetela eka ku languta leswinene eka vanhu van’wana, i yini swin’wana leswi nga hi  pfunaka leswaku hi nga va avanyisi? Ringeta ku twisisa leswi va langutanaka na swona. Xiya xikombiso lexi landzelaka. Siku rin’wana loko Yesu a ri etempeleni u vone noni leyi a yi pfumala yi nyikela hi swimalana swimbirhi swa nsimbhi swa ntikelo wa le hansi swinene. A nga vutisanga a ku: “Hikwalahokayini yi nga nyikeli hi swo tlula leswi?” Ematshan’weni yo ehleketa ngopfu hi mali leyi yi nyikeleke hi yona, Yesu u anakanye hi xiyimo xa yona kutani a yi bumabumela.—Luka 21:1-4.

16. U dyondza yini eka xikombiso xa Veronica?

¹⁶ Xikombiso xa makwerhu wa xisati Veronica xi hi komba nkoka wo ehleketisisa hi swiyimo swa vanhu van’wana. Evandlheni leri a a ri eka rona, a ku ri ni manana loyi a kurisaka n’wana wakwe wa jaha a ri yexe. Veronica u ri: “Mikarhi yo tala a ndzi nga va voni etinhlengeletanweni ta vandlha ni le nsin’wini. A ndzi va languta hi tihlo rin’wana. Kambe siku rin’wana ndzi tirhe nsimu ni mhani wa kona. U ndzi byele ndlela leyi xiyimo xi n’wi tikelaka hayona hileswi n’wana wakwe a nga ni mavabyi ya miehleketo. A a wa a pfuka ku a kuma swo tihanyisa ni n’wana wakwe ni ku tiyisa vuxaka bya vona na Yehovha. Mikarhi yin’wana a ya etinhlengeletanweni ta vandlha rin’wana hikwalaho ka swiphiqo swa rihanyo swa n’wana wakwe.” Veronica u gimeta hi ku: “A ndzi nga swi ehleketi leswaku xiyimo a xi n’wi tikela hi ndlela leyi. Se ndza n’wi rhandza naswona ndza n’wi xixima hikwalaho ka ku tikarhata kakwe leswaku a tirhela Yehovha.”

17. Yakobo 2:8 yi hi khutaza ku endla yini naswona hi nga swi endla njhani?

 ¹⁷ Hi fanele hi endla yini loko hi xiya leswaku hi avanyise makwerhu? Hi fanele hi tsundzuka leswaku hi fanele hi rhandza vamakwerhu. (Hlaya Yakobo 2:8.) Nakambe hi fanele hi khongela hi timbilu ta hina hinkwato, hi kombela Yehovha a hi pfuna hi tshika mukhuva wo avanyisa van’wana. Hi nga ha tlhela hi hanya hi ku ya hi leswi hi swi khongeleleke hi ku hungasa ni loyi a hi n’wi avanyisa. Sweswo swi ta hi pfuna leswaku hi n’wi tiva ku antswa. Hi nga ha n’wi rhamba ensin’wini kumbe eka swakudya swo fihluta. Loko hi ya hi n’wi tiva, hi ta tekelela xikombiso xa Yesu na Yehovha hi ku languta leswinene. Loko hi endla tano, hi kombisa leswaku hi yingisa xitsundzuxo xa murisi lonene xo tshika ku avanyisa.

18. Hi nga swi kombisa njhani leswaku hi yingisa rito ra murisi lonene?

¹⁸ Hilaha tinyimpfu ti yingisaka rito ra murisi wa tona, valandzeri va Yesu na vona va yingisa rito rakwe. Loko hi wa hi pfuka leswaku hi tshika ku vilela hileswi hi nga riki na swona ni ku tshika ku avanyisa van’wana, Yehovha na Yesu va ta katekisa ku tikarhata ka hina. Onge hi nga ya emahlweni hi yingisa rito ra murisi lonene, swi nga ri na mhaka leswaku hi wela eka lava “ntlhambinyana” kumbe “tinyimpfu tin’wana.” (Luka 12:32; Yoh. 10:11, 14, 16) Eka nhlokomhaka leyi landzelaka, hi ta kambisisa swilo swimbirhi leswi Yesu a byeleke valandzeri vakwe leswaku va fanele va swi endla.