Loko Yehovha a lerisa vanhu leswaku va ‘andza va tata misava’ u kombise leswaku misava hinkwayo yi ta hetelela yi ve paradeyisi. (Gen. 1:28) Xileriso xexo xi ta endleka eka lava nga ta dya ndzhaka ya misava. A va nge nambi va nghena eparadeyisini hikuva ntanga wa Edeni a wa ha ri kona. Ntirho wo basisa tindhawu leti onhiweke wu ta va wu lo vuya to ho suka. Ku ta va ku ri ntirho wo tika!

Leswi swi hi tsundzuxa ntirho lowu Vaisrayele a va fanele va wu endla loko va vuya hi le Babilona. Tiko ra vona a ri ri rhumbi ku ringana malembe ya 70. Kambe Esaya u profete leswaku hi ku pfuniwa hi Yehovha, a va ta swi kota ku tlhela va ri pfuxa. U profete leswi: “Mananga yakwe u ta ma hundzula ma fana na Edeni ma ta fana ni ntanga wa Yehovha.” (Esa. 51:3) Vaisrayele va wu pfuxetile muti. Hilaha ku fanaka, hi ku pfuniwa hi Yehovha, lava nga ta dya ndzhaka ya misava va ta swi  kota ku endla misava yi va paradeyisi. Na wena u nga swi kombisa sweswi leswaku wa swi navela ku katseka.

Ndlela yin’wana yo endla sweswo i ku va hi basisa makaya ya hina ma hleleka. U nga basisa kaya ra wena hambiloko vaakelani va wena va nga ma basisi makaya ya vona. U nga tlhela u pfuneta ku basisa Holo ya n’wina ya Mfumo ni Holo ya Tinhlengeletano. Loko swiyimo swi ku pfumelela, u nga endla xikombelo xa leswaku u pfuneta loko ku ve ni mhangu. U ta swi kombisa leswaku u lunghekele ku pfuneta loko ku ri ni xilaveko. Tivutise, ‘Xana ku ni mitirho leyi ndzi nga tikarhatelaka ku yi dyondza sweswi, leswaku ndzi ta kota ku yi tirhisa loko Yehovha a ndzi pfumelela ku hanya emisaveni hilaha ku nga heriki?’

Endzhaku ka loko Yesu a pfuxe n’wana wa Yayiro, u vule leswaku n’wana yoloye u fanele a nyikiwa swo khomisa nyoka. (Mar. 5:42, 43) A swi olova ku phamela xinhwanyetana xolexo xa malembe ya 12. Kambe ehleketa hi leswi nga ta katseka loko Yesu a endla leswi a swi tshembiseke loko a ku, “hinkwavo lava nga emasirheni va . . . ta twa rito ra yena kutani va huma.” (Yoh. 5:28, 29) Hambileswi Bibele yi nga hi byeliki swo tala leswi nga ta endleka loko vanhu va pfuxiwa, kambe a swi kanakanisi leswaku lava pfuxiweke va ta lava ku pfuniwa hi swakudya, ndhawu yo tshama ni swiambalo. Xana u nga swi kombisa sweswi leswaku u lunghekele ku pfuna? Tivutise leswi.

Loko evandlheni ku tivisiwa leswaku mi ta endzeriwa hi mulanguteri wa muganga, xana wa n’wi rhamba eswakudyeni? Loko vamakwerhu lava nga eka ntirho wo hlawuleka wa nkarhi hinkwawo va averiwa ku ya tirha ensin’wini va suka eBethele kumbe loko xiavelo xa mulanguteri wa muganga xi hela, xana u nga pfuneta hi ku va kumela ndhawu yo tshama? Loko emugangeni wa ka n’wina ku ta va ni nhlengeletano ya xifundzha kumbe yo hlawuleka, xana u nga pfuneta hi malunghiselelo ya nhlengeletano loko yi nga si sungula kumbe loko yi herile kumbe u pfuneta ku amukela vapfhumba?

Hi ku ya hi Mitirho 24:15, hi langutele leswaku ku ta pfuxiwa vanhu va tibiliyoni. Vo tala va vona ku ta va vanhu lava feke va nga n’wi tivi Yehovha. Va ta kuma nkarhi wo dyondza hi Yehovha endzhaku ka loko va pfuxiwile. a Ntirho wolowo wo dyondzisa vanhu wu ta endliwa hi malandza yo tshembeka ya Xikwembu lama nga ni ntokoto. (Esa. 11:9) Charlotte loyi a chumayeleke vanhu eYuropa, Amerika Dzonga ni le Afrika u swi langutele emahlweni ku dyondzisa vanhu. U ri: “Ndzi swi rindzerile ku dyondzisa vanhu lava pfuxiweke. Loko ndzi hlaya hi munhu loyi a hanyeke khale ndzi tala ku tibyela leswi: ‘Loko ntsena munhu loyi a a dyondze hi Yehovha vutomi byakwe a byi nga ta va byi ve hi ndlela leyi.’ Ndzi hela mbilu ku byela vanhu lava pfuxiweke leswi va swi kayeleke.”

Hambi ku ri malandza yo tshembeka ya Yehovha lama hanyeke khale Yesu a nga si ta laha misaveni ma ta va ni swo tala swo swi dyondza. Ehleketa ndlela leyi swi nga ta hi tsakisa hayona loko hi hlamusela Daniyele ndlela leyi byi hetisekeke hayona vuprofeta lebyi a byi tsaleke kambe a nga byi twisisi. (Dan. 12:8) Kumbe ehleketa hi pfuna Rhuti na Nawomi va twisisa ndlela leyi ndyangu wa vona wu veke wona lowu Mesiya a humeke eka wona? Mawaku ndlela leyi swi nga ta tsakisa hayona ku katseka eka tsima ro dyondzisa leri nga ta endliwa emisaveni hinkwayo, ku nga ri na swikavanyeto leswi vangiwaka hi misava leyi yo homboloka!

U nga swi kombisa njhani sweswi leswaku u swi lunghekerile ku katseka eka tsima rero? Ndlela yin’wana ya le rivaleni, i ku tikarhatela ku antswisa ndlela leyi u dyondzisaka hayona ni ku katseka nkarhi ni nkarhi eka ntirho wo chumayela lowu endliwaka emisaveni hinkwayo. (Mat. 24:14) Hambiloko sweswi malembe kumbe swiyimo swa wena swi ku sivela ku endla swo tala, matshalatshala ya wena ma nga kombisa ndlela leyi u lunghekeke hayona ku dyondzisa lava pfuxiweke.

Xivutiso xa nkoka hileswaku, Xana u swi langutele hi mahlongati ku dya ndzhaka ya misava? Xana mhaka ya ku endla misava yi va paradeyisi, ku pfuna ni ku dyondzisa lava pfuxiweke ya ku tsakisa? U nga kombisa leswaku u lunghekile hi ku tirhisa nkarhi wun’wana ni wun’wana lowu u wu kumaka namuntlha leswaku u katseka eka mitirho leyi yelanaka ni leyi nga ta endliwa hi lava nga ta dya ndzhaka ya misava!