Xana wa ha swi tsundzuka leswi u swi hlayeke eka timagazini ta Xihondzo xo Rindza ta lembe leri? A hi vone loko u ta swi kota ku hlamula swivutiso leswi landzelaka:

I yini leswi katsekaka eka ku ‘cinca ndlela leyi hi anakanyaka ha yona’? (Rhom. 12:2)

Swi katsa swo tala ku tlula ku va vutomi bya wena byi tele hi mitirho leyinene. Swi katsa ku kambisisa leswi hi nga swona endzeni ni ku cinca vutomi bya hina leswaku byi fambisana ni ku rhandza ka Xikwembu.—w23.01, matl. 8-9.

Hi nga swi kombisa njhani leswaku ha ringanisela loko hi langutisa swiendlakalo leswi nga kona emisaveni leyi?

Swa hi tsakisa ku vona ndlela leyi swiendlakalo swa misava leyi swi hetisisaka vuprofeta bya le Bibeleni hayona. Ku ri ni ku kumbetela leswi nga ha vangaka ku avana, hi endla kahle loko hi seketela mabulo ya hina eka leswi vuriweke hi nhlangano wa Yehovha. (1 Kor. 1:10)—w23.02, tl. 16.

Xana nkhuvulo wa Yesu wu hambana njhani ni wa valandzeri vakwe?

Yesu a a nga boheki ku tinyiketela eka Yehovha ku fana na hina hikuva a a tswaleriwe etikweni leri a ri tinyiketele eka Xikwembu. A a nga ri na xidyoho. Hikwalaho ka sweswo, a a nga boheki ku hundzuka eka swidyoho swakwe.—w23.03, tl. 5.

Xana hi nga va pfuna njhani van’wana leswaku va hlamula etinhlengeletanweni ta vandlha?

Hi nga komisa tinhlamulo ta hina leswaku hi nyika van’wana nkarhi wo hlamula. Hi nga tlhela hi papalata ku teka tinhlamulo hinkwato. Sweswo swi ta endla leswaku van’wana va kota ku hlamula.—w23.04, tl. 23.

Xana “Ndlela yo Kwetsima” leyi vuriwaka eka Esaya 35:8 yi kombetela eka yini?

Ndlela leyi leyikulu yo fanekisela eku sunguleni a yi kombetela eka ndlela leyi Vayuda va fambeke hayona ku suka eBabilona va tlhelela etikweni ra rikwavo. Ku vuriwa yini hi nkarhi wa sweswi? Loko malembe ya va-1919 ma ri karhi ma tshinela, ntirho wo lunghiselela wu sunguriwile lowu katsaka ku hundzuluxeriwa ni ku kandziyisiwa ka Bibele swin’we ni swilo swin’wana. Vanhu va Xikwembu a va famba eka “Ndlela yo Kwetsima” va ya eparadeyisini yo fanekisela leyi yisaka eka mikateko leyi tisiwaka hi Mfumo.—w23.05, matl. 15-19.

Swivuriso ndzima 9, yi nyikela xitsundzuxo xihi lexi katsaka vavasati vambirhi vo fanekisela?

Buku ya Swivuriso yi vulavula hi “wansati wa xiphukuphuku” loyi xirhambo xakwe xi yisaka ‘eSirheni’ naswona “vutlhari bya ntiyiso” byi fanekisela wansati loyi xirhambo xakwe xi yisaka eka “ndlela ya ku twisisa” ni vutomi. (Swiv. 9:​1, 6, 13, 18)—w23.06, matl. 22-24.

Xana ku titsongahata ni ku anakanyela ka Xikwembu ku vonake njhani loko xi tirhisana na Lota?

Yehovha u byele Lota leswaku a baleka eSodoma a ya endhawini ya tintshava. Loko Lota a kombela ku balekela eSowara ku ri ni ku balekela endhawini ya tintshava, Xikwembu xi pfumerile.—w23.07, tl. 21.

I yini leswi wansati a nga swi endlaka loko nuna wakwe a hlalela pornography?

Wansati u fanele a tsundzuka leswaku a hi xihoxo xa yena. U fanele a khomeka hi ku tiyisa vuxaka bya yena ni Xikwembu ni ku anakanyisisa hi vavasati va le Bibeleni lava a va karhatekile naswona va kumeke nchavelelo eka Xikwembu. A nga pfuna nuna wakwe leswaku a papalata swiyimo leswi nga n’wi endlaka a hlalela pornography.—w23.08, matl. 14-17.

Loko hi tlhontlhiwa hikwalaho ka leswi hi swi pfumelaka, xana ku twisisa ku nga hi pfuna njhani leswaku hi va vo rhula?

Hi nga teka xivutiso kumbe ntlhontlho wolowo ku ri ndlela yo hi pfuna ku tiva leswi munhu loyi a hi tlhontlhaka a swi ehleketaka kumbe ku khathala hi swona. Sweswo swi ta hi pfuna hi lunghekela ku n’wi hlamula hi ndlela yo rhula.—w23.09, tl. 17.

Hi nga dyondza yini eka Mariya mayelana ni ndlela leyi a kumeke matimba hayona?

Loko a tiva leswaku u ta va manana wa Mesiya, Mariya u kume matimba eka van’wana. Gabriyele na Elizabeta va khutaze Mariya hi Matsalwa. Hilaha ku fanaka, na hina hi nga kuma matimba eka vagandzeri kulobye.—w23.10, tl. 15.

Xana Yehovha a nga swi hlamula njhani swikhongelo swa hina?

U tshembisa ku yingisela swikhongelo swa hina ni ku vona ndlela leyi swi fambisanaka hayona ni ku rhandza kakwe. (Yer. 29:12) A nga ha hlamula swikhongelo swa hina hi tindlela leti hambaneke kambe u ta tshama a ri karhi a hi seketela mikarhi hinkwawo.—w23.11, matl. 21-22.

Varhoma 5:2 yi vulavula hi “ntshembo,” kutani hikwalahokayini ku tlhela ku buriwa hi wona eka ndzimana 4?

Loko munhu a twa mahungu lamanene ya Mfumo, a nga ha tsakela ntshembo wo tiphina hi vutomi eparadeyisini laha misaveni. Kambe loko hi ku famba ka nkarhi a langutana ni mitlhontlho ivi a yi tiyisela ni ku amukeriwa hi Xikwembu, ntshembo wakwe wu ta ya wu kula ni ku va wa xiviri eka yena.—w23.12, matl. 12-13