Muapostola Pawulo u tsalele nkulukulobye Timotiya a ku: “Ndzi ku lerisa emahlweni ka Xikwembu, eka Kreste Yesu ni le ka tintsumi leti hlawuriweke leswaku u yingisa swileriso leswi hi ku kambisisa swilo hinkwaswo hi vukheta, u nga vi ni xihlawuhlawu loko u endla xiboho.”—1 Tim. 5:21.

Xo sungula, hi ta bula hi lava nga riki xiphemu xa tintsumi leti. Swi le rivaleni leswaku lava 144 000 a va weli kona. Loko Pawulo a tsalela Timotiya, vatotiwa a va nga si sungula ku pfuxeriwa ku ya hanya etilweni. Vaapostola ni vatotiwa van’wana a va nga si va swivumbiwa swa moya kutani a hi vona “tintsumi leti hlawuriweke.”—1 Kor. 15:​50-54; 1 Tes. 4:​13-17; 1 Yoh. 3:2.

Nakambe “tintsumi leti hlawuriweke” a ku nge vi tona tintsumi leti nga yingisangiki hi nkarhi wa Ndhambi. Tintsumi teto ti yime na Sathana naswona ti hundzuke madimona lama veke valala va Yesu. (Gen. 6:2; Luka 8:​30, 31; 2 Pet. 2:4) Enkarhini lowu taka ti ta pfaleriwa ekheleni ro enta ku ringana malembe ya 1 000 naswona endzhaku ti ta lovisiwa swin’we na Diyavulosi.—Yuda 6; Nhlav. 20:​1-3, 10.

“Tintsumi leti hlawuriweke” leti Pawulo a vulavuleke hatona ku fanele ku ri tintsumi leti seketeleke “Xikwembu na Yesu Kreste” lava na vona va boxiwaka eka tsalwa rolero.

Ku ni magidigidi ya tintsumi to tshembeka. (Hev. 12:​22, 23) A hi fanelanga hi ehleketa leswaku tintsumi teto ti nyikiwa xiavelo lexi fanaka naswona ti xi endla hi nkarhi wun’we. (Nhlav. 14:​17, 18) Tsundzuka leswaku siku rin’wana ntsumi yin’we yi nyikiwe ntirho wo dlaya masocha ya Vaasiriya lama hlomeke ya 185 000. (2 Tih. 19:35) Swi nga endleka tintsumi tin’wana to hlaya ti nyikiwe xiavelo xo “humesa hinkwavo lava dyohisaka van’wana eMfun’weni [wa Yesu] ni hinkwavo lava tlulaka nawu.” (Mat. 13:​39-41) Tin’wana ti “hlengeleta vahlawuriwa va yena” leswaku va ya etilweni. (Mat. 24:31) Tin’wana ti lerisiwe ku hi ‘rindza etindleleni ta hina hinkwato.’—Ps. 91:11; Mat. 18:10; ringanisa Matewu 4:11; Luka 22:43.

“Tintsumi leti hlawuriweke” leti boxiweke eka 1 Timotiya 5:21 swi tikomba ku ri tintsumi leti nyikiweke swiavelo swo hlawuleka leswi fambisanaka ni ku khathalela vanhu va Xikwembu. Pawulo u nyike vakulu lava faneriwaka hi ku xiximiwa evandlheni switsundzuxo swa vutlhari. Vakulu va fanele va endla swiavelo swa vona va nga vi na “xihlawuhlawu” naswona a va fanelanga va va ni magugu loko va endla swiboho kumbe loko va avanyisa. Xivangelo xa nkoka lexi endlaka va landzela xitsundzuxo xa Pawulo hileswi va swi tivaka leswaku ‘Xikwembu, Kreste Yesu ni tintsumi leti hlawuriweke’ va swi vona leswaku va wu endla njhani ntirho wa vona. Swi le rivaleni leswaku tintsumi tin’wana ti averiwe ku khathalela vandlha, ku fana ni ku ri sirhelela, ku langutela ntirho wo chumayela ni ku tlhela ti vikela Yehovha leswi ti swi vonaka.—Mat. 18:10; Nhlav. 14:6.