Xana u ti hlaye hi vukheta tinhlokomhaka ta Xihondzo xo Rindza ta lembe leri? Loko swi ri tano, vona loko u ta kota ku hlamula swivutiso leswi landzelaka:

Xana Yehovha u hi vekele xikombiso xihi loko swi ta eka ku khoma vavasati?

Yehovha a nga na xihlawuhlawu, u khoma vavanuna ni vavasati ku fana. Xikwembu xi yingisa vavasati naswona xa khathala hi ndlela leyi va titwaka hayona ni swilaveko swa vona. Xa tiyiseka leswaku va ta swi kota ku endla ntirho wa xona.—w24.01, matl. 15-16.

Hi nga yi tirhisa njhani Vaefesa 5:​7, leyi nge: “Mi nga tikhomi ku fana na vona”?

Muapostola Pawulo a hi lemukisa leswaku hi nga tihlanganisi ni vanhu lava nga ta endla swi hi tikela ku hanya hi milawu ya Xikwembu. Vanhu volavo va katsa lava hi hungasaka na vona hi xiviri ni lava hi bulaka na vona eka social media.—w24.03, matl. 22-23.

Hi fanele hi tivonela eka switori swihi swa mavunwa?

Hi fanele hi tivonela eka switori leswi nga kambisisiwangiki leswi hi byeriwaka swona hi vanghana va hina, ti-email leti humaka eka vanhu lava hi nga va tiviki ni swilo leswi humaka eka vagwinehi lava tiendlaka onge va tsakela ntiyiso.—w24.04, tl. 12.

Hi swihi leswi hi swi tivaka ni leswi hi nga swi tiviki hi ndlela leyi Yehovha a nga ta avanyisa Hosi Solomoni ku katsa ni lava feke eSodoma na Gomora ni le ka Ndhambi?

A hi swi tivi loko Yehovha a va lovisele makumu. Kambe ha swi tiva leswaku u tiva swilo hinkwaswo naswona u ni tintswalo letikulu.—w24.05, matl. 3-4.

Leswi Xikwembu xi nga “Ribye” swi hi tiyisekisa yini? (Det. 32:4)

Hi nga titumbeta eka Yehovha. Wa tshembeka naswona wa swi hetisisa switshembiso swakwe mikarhi hinkwayo. A nga cincacinci naswona vumunhu ni swikongomelo swakwe na swona a swi cincacinci.—w24.06, matl. 26-28.

I yini leswi nga ku pfunaka u tolovela vandlha lerintshwa?

Tshemba Yehovha, u ta ku pfuna hilaha a pfuneke malandza yakwe yo tshembeka enkarhini lowu nga hundza. Papalata ku ringanisa vandlha ra wena ra khale ni leri sweswi u nga eka rona. Katseka eka mitirho leyi endliwaka evandlheni lerintshwa ni ku tlhela u tikarhatela ku kuma vanghana.—w24.07, matl. 26-28.

Hi dyondza yini eka swifaniso swinharhu leswi kumekaka eka Matewu 25?

Xikombiso xa tinyimpfu ni timbuti xi kombisa ndlela leyi swi nga swa nkoka hayona ku tshama hi tshembekile. Xikombiso xa vanhwana vo tlhariha ni va swiphukuphuku xi kombisa ndlela leyi swi nga swa nkoka hayona ku lungheka ni ku xalamuka. Xifaniso xa titalenta xi kombisa ndlela leyi swi nga swa nkoka hayona ku gingiriteka ni ku tiyimisela.—w24.09, matl. 20-24.

Vhurhandi ya tempele ya Solomoni a yi lehe ku fikela kwihi?

Eka 2 Tikronika 3:​4, matsalwa man’wana ya khale ma vulavula hi “swisungunu swa 120” leswi endlaka vhurhandi yi leha timitara ta 53. Kambe matsalwa man’wana lama tshembekaka ma vulavula hi “swisungunu swa 20” leswi endlaka yi leha 9 wa timitara. Swi vonaka matsalwa lama vulavulaka hi “20 wa swisungunu” ma tiyisile hikuva mpimo lowu wu fambisana ni ku bumbula ka makhumbi ya tempele.—w24.10, tl. 31.

Swi vula yini ku va nandza wa vutirheli a ‘va ni nsati un’we’? (1 Tim. 3:12)

Swi vula leswaku u fanele a va ni nsati un’we naswona a nga fanelanga a oswa. Ku engetela kwalaho, a nga fanelanga a va ni vutlhomamahlo.—w24.11, tl. 19.

Hikwalahokayini hi vula leswaku Yohane 6:53 a yi nga hi vekeli xikombiso xa leswi swi faneleke swi endliwa eka Xilalelo xa Hosi?

Yohane 6:53 yi vula leswaku hi fanele hi dya “nyama ni ku n’wa ngati” ya Yesu. Yesu u vule marito lawa hi 32 C.E., eGaleliya, eka Vayuda lava a va ha fanele va kombisa ripfumelo eka yena. Hambiswiritano, Xilalelo xa Hosi xi sunguriwe endzhaku ka lembe eYerusalema. Hikwalaho, Yesu a a vulavula ni lava a nga ta fuma na vona etilweni.—w24.12, matl. 10-11.