VANHWANYANA vambirhi a va ri eku fambeni edorobeni ra Baguio, ePhilippine. Loko va ri karhi va famba, va vone xigolonyana lexi a xi ri ni mikandziyiso ya hina kambe a va yanga laha a xi ri kona. Makwerhu wa xisati Helen, loyi a yime ekusuhi ni xigolonyana xolexo, u va langutile kutani a n’wayitela. Vanhwanyana volavo va ye emahlweni ni ndlela ya vona kambe ku n’wayitela ka Helen ku va khumbe mbilu.

Loko vanhwanyana volavo va tlhelela ekaya hi bazi, va vone Holo leyi a yi ri ni bodo leyi tsariweke jw.org. Va nambe va tsundzuka marito lawa a ma tsariwe eka xigolonyana lexi va xi voneke lexi a xi ri ni mikandziyiso ya hina. Va chikile ebazini va ya langutisa leswaku mavandlha lama longoloxiweke ebodweni leyi nga egedeni ra Holo ma khoma rini tinhlengeletano ta wona.

Vanhwanyana volavo va yile eka nhlengeletano ya vandlha leyi landzeleke. Lexi tsakisaka, loko va nghena eHolweni va kotlane na Helen! Va nambe va tsundzuka ku n’wayitela ka yena. Helen u ri: “Loko va ta eka mina, a ndzi chuhile. A ndzi tibyela leswaku kumbexana ku na swilo swo karhi swo biha leswi ndzi swi endleke.” Kambe vanhwanyana volavo va byele Helen leswaku va n’wi vonile a yime etlhelo ka xigolonyana lexi a xi ri ni tibuku ta hina.

Vanhwanyana volavo va tiphinile enhlengeletanweni ya vandlha naswona va titwe va ri ekaya. Loko va vona van’wana va ri eku basiseni ka holo endzhaku ka nhlengeletano, va kombele ku pfuneta. Un’wana wa vanhwanyana volavo se u tlhelele eka rikwavo kambe lowun’wana u sungule ku ta etinhlengeletanweni ta vandlha naswona se u dyondzisiwa Bibele, hinkwaswo swi vangiwe hi ku n’wayitela!