NAWU a wu pfumelela Vaisrayele ku nyika Yehovha magandzelo ya magugurhwana ni matuva. Mixaka leyimbirhi ya swinyenyana mikarhi hinkwayo yi boxiwa swin’we loko ku vulavuriwa hi milawu ya magandzelo naswona munhu a a kota ku nyikela hi xin’we xa swona. (Lev. 1:14; 12:8; 14:30) Vanhu a swi va pfuna njhani leswi? Xivangelo xin’wana hileswaku magugurhwana a ma nga kumeki mikarhi hinkwayo. Sweswo a swi vangiwa hi yini?

Magugurhwana i swinyenyana leswi nga tshamiki endhawini yin’we naswona a swi kumeka etikweni hinkwaro ra Israyele hi ximumu ntsena. Lembe ni lembe hi October, ma ya ematikweni ya le dzongeni lama hisaka ivi ma tlhelela eIsrayele hi ximun’wana. (Risim. 2:11, 12; Yer. 8:7) Hikwalaho ka sweswo, Vaisrayele emikarhini ya khale a swi va tikela ku nyikela hi magugurhwana hi xixika.

Loko swi ta eka matuva, a ma kumeka mikarhi hinkwayo hikuva hi ntolovelo a ma rhurhi. Kasi xin’wana, vanhu a va fuwa matuva. (Ringanisa Yohane 2:14, 16.) Buku leyi nge Bible Plants and Animals yi vula leswaku “ematikoxikaya ni le madorobeni ya le Palestina vanhu a va fuwa matuva. Muti wun’wana ni wun’wana a wu ri ni ndhawu kumbe mimbhovo emakhumbini leyi ku tshamaka matuva.”—Ringanisa Esaya 60:8.

Hi ku va Yehovha a pfumelela Vaisrayele leswaku va nyikela hi swinyenyana leswi a swi kumeka hi nkarhi wolowo, sweswo a swi kombisa leswaku wa va rhandza naswona wa va anakanyela.