1. Mbulavulo lowu nyikeriweke enhlengeletanweni ya xifundzha hi 1935 wu ri khumbe njhani jaha rin’wana?

JAHA rin’wana a ri ri ni malembe ya 18 loko ri khuvuriwa hi 1926. Vatswari va rona a va ri Swichudeni swa Bibele, hilaha Timbhoni ta Yehovha a ti vitaniwa hakona hi nkarhi wolowo. A va ri ni vana va ntlhanu, ku nga majaha manharhu ni tintombhi timbirhi, va kurise vana va vona leswaku va tirhela Yehovha Xikwembu ni ku tekelela Yesu Kreste. Ku fana ni Swichudeni swa Bibele swa le nkarhini wolowo, jaha leri a a ri dya xinkwa ni ku nwa vhinyo lembe ni lembe hi siku ra Xilalelo xa Hosi. Kambe endzhaku ko twa mbulavulo lowu nga rivalekiki lowu a wu ri ni nhlokomhaka leyi nge “Ntshungu Lowukulu Swinene,” ri cince ndlela leyi a ri languta vutomi hayona. Mbulavulo wolowo a wu nyikeriwa hi J.  F.  Rutherford enhlengeletanweni ya xifundzha leyi a yi khomeriwe eWashington, D.C., eU.S.A hi 1935. Hi yihi mhaka leyi paluxiweke enhlengeletanweni yoleyo?

2. Hi wihi ntiyiso lowu paluxiweke eka mbulavulo lowu a wu nyikeriwa hi Makwerhu Rutherford?

² Eka mbulavulo wakwe, Makwerhu Rutherford u vulavule hi vanhu lava a va ta vumba “ntshungu lowukulu swinene” (King James Version), kumbe “ntshungu lowukulu,” lowu ku vulavuriwaka ha wona eka Nhlavutelo 7:9. Ku ta fikela hi nkarhi wolowo, a ku vuriwa leswaku ntlawa lowu wu ta ya hanya etilweni kambe a wu nga tshembekanga ngopfu ku fana ni Vakreste lava hlawuriweke. Makwerhu Rutherford u tirhise Matsalwa a hlamusela leswaku ntshungu lowukulu a wu nge yi etilweni  kambe i tinyimpfu tin’wana * ta Kreste leti nga ta pona “nhlomulo lowukulu” naswona ti ta hanya laha misaveni hilaha ku nga heriki. (Nhlav. 7:14) Yesu u te: “Ndzi ni tinyimpfu tin’wana, leti nga riki ta tshanga leri; na tona ndzi fanele ndzi ti tisa, ti ta yingisa rito ra mina, ti va ntlhambi wun’we ni murisi a va un’we.” (Yoh. 10:16) Lava tinyimpfu tin’wana i Timbhoni ta Yehovha to tshembeka leti nga ni ntshembo wo hanya hilaha ku nga heriki emisaveni leyi nga Paradeyisi. (Mat. 25:31-33, 46) A hi voneni ndlela leyi matwisiselo lawa lamantshwa ma byi cinceke hayona vutomi bya vanhu vo tala va Yehovha, ku katsa ni jaha leriya ra malembe ya 18.—Ps. 97:11; Swiv. 4:18.

3-4. Enhlengeletanweni ya xifundzha ya 1935, vanhu va magidi va twisise yini mayelana ni ntshembo wa vona naswona hikwalahokayini?

³ Ndhawu leyi nhlengeletano a yi khomeriwe eka yona yi sungule ku duma, loko xivulavuri xi kombele vayingiseri xi ku: “Ndzi kombela hinkwavo lava nga ni ntshembo wo hanya laha misaveni hilaha ku nga heriki va yima!” Makwerhu un’wana loyi a ri kona enhlengeletanweni yoleyo, u vula leswaku vanhu vo tlula hafu eka va 20 000 lava a va ri kona va yimile. Kutani Makwerhu Rutherford u te: “Vonani! Ntshungu lowukulu swinene!” Endzhaku ka sweswo vanhu va sungule ku ba mikulungwana. Lava yimeke va swi xiyile leswaku moya wo kwetsima wa Xikwembu a wu va hlawulanga leswaku va ya hanya etilweni. Hi siku leri landzeleke, enhlengeletanweni yoleyo ku khuvuriwe vanhu va 840 leswaku va va Timbhoni ta Yehovha naswona vo tala a ku ri va tinyimpfu tin’wana.

⁴ Endzhaku ka mbulavulo wolowo, jaha leri hi vulavuleke ha rona eku sunguleni swin’we ni magidi ya vanhu van’wana va nambe va tshika ku dya xinkwa ni ku nwa vhinyo eXilalelweni xa Hosi. Hi ku titsongahata makwerhu un’wana u vule ndlela leyi a titweke hayona swin’we ni vanhu van’wana vo tala, u te: “Ndzi hetelele ku dya swifanekiselo eXitsundzuxweni hi 1935. Ndzi swi xiyile leswaku Yehovha a nga ndzi hlawulanga hi ku tirhisa moya wakwe lowo kwetsima leswaku ndzi ya hanya etilweni kambe ndzi ni ntshembo wo hanya laha misaveni ni ku hoxa xandla eku endleni ka misava yi va paradeyisi.” (Rhom. 8:16, 17; 2 Kor. 1:21, 22) Ku sukela kwalaho, ntshungu lowukulu wu andzile swinene naswona wu tirha swin’we ni masalela lama hlawuriweke. *

5. Yehovha u va languta njhani vanhu lava tshikeke ku dya swifanekiselo eXitsundzuxweni?

⁵ Yehovha u va languta njhani vanhu lava tshikeke ku dya swifanekiselo eXitsundzuxweni endzhaku ka 1935? Ku vuriwa yini namuntlha loko Mbhoni leyi khuvuriweke yi dya xinkwa ni ku nwa vhinyo eXilalelweni xa Hosi kambe hi ku famba ka nkarhi yi swi lemuka leswaku a yi hlawuriwanga ku ya hanya etilweni? (1 Kor. 11:28) Van’wana a va dya swifanekiselo hikuva a va nga swi twisisi kahle leswaku ntshembo wa vona hi wihi. Loko va swi xiya leswaku va endle xihoxo naswona va tshika ku dya swifanekiselo kutani va ya emahlweni va tirhela Yehovha hi ku tshembeka, Yehovha u ta va amukela tanihi xiphemu xa tinyimpfu tin’wana. Hambileswi va nga ha dyiki xinkwa ni ku nwa vhinyo eXitsundzuxweni kambe lembe ni lembe va tshama va ri kona hikuva va swi  tlangela swinene leswi Yehovha na Yesu va va endleleke swona.

6. Yesu u byele tintsumi leswaku ti endla yini?

⁶ Leswi nhlomulo lowukulu wu nga kwala nyongeni, swi ta hi tiyisa swinene ku kambisisa leswi Nhlavutelo ndzima 7 yi swi vulaka mayelana ni Vakreste lava hlawuriweke swin’we ni ntshungu lowukulu wa tinyimpfu tin’wana. Yesu u byele tintsumi leswaku ti ya emahlweni ti khoma mimoya ya mune leswaku yi nga vangi khombo. A ti nge yi tshiki mimoya yoleyo ku fikela loko Vakreste hinkwavo lava hlawuriweke va funghiwile, leswi vulaka ku amukeriwa hi Yehovha. (Nhlav. 7:1-4) Vakreste lava hlawuriweke, va ta kuma hakelo yo ya fuma na Kreste etilweni tanihi tihosi ni vaprista hikwalaho ka leswi va tshameke va tshembekile. (Nhlav. 20:6) Ndyangu wa Xikwembu wa le tilweni wu ta tsaka swinene loko wu vona Vakreste lava hlawuriweke va 144 000 va kuma hakelo ya vona yo hanya etilweni.

7. Hi ku ya hi Nhlavutelo 7:9, 10, Yohane u vone yini naswona a wu endla yini? (Vona xifaniso lexi nga eka xifunengeto.)

⁷ Endzhaku ko vona lava 144 000 lava nga ta va tihosi ni vaprista, Yohane u vone nchumu wun’wana wo tsakisa swinene, ku nga “ntshungu lowukulu” lowu poneke Armagedoni. Ku hambana ni ntlawa wo sungula, ntlawa lowu wa vumbirhi a wu ri wukulu swinene lerova a wu nga hlayeki. (Hlaya Nhlavutelo 7:9, 10.) A wu “ambale swiambalo swo leha swo basa,” leswi vulaka leswaku a wu nga ri na “xivati xa misava” leyi lawuriwaka hi Sathana naswona wu tshame wu tshembekile eka Xikwembu na Kreste. (Yak. 1:27) A wu huwelela wu vula leswaku wu ponisiwile hikwalaho ka leswi Yehovha na Yesu, loyi a nga Xinyimpfana xa Xikwembu va wu endleleke swona. Nakambe a wu khome marhavi ya mincindzu, leswi kombisaka leswaku a wu amukela Yesu hi ntsako tanihi Hosi leyi hlawuriweke hi Yehovha.—Ringanisa na Yohane 12:12, 13.

8. Nhlavutelo 7:11, 12, yi hi byela yini mayelana ni ndyangu wa Yehovha wa le tilweni?

⁸ Hlaya Nhlavutelo 7:11, 12. A ku ri njhani etilweni? Yohane u vone ndyangu hinkwawo wa Yehovha wa le tilweni wu tsakile swinene loko wu vona ntshungu lowukulu wu dzunisa Xikwembu. Ndyangu wa Yehovha wa le tilweni wu ta tsaka ngopfu loko xivono lexi xi hetiseka loko ntshungu lowukulu wu pona nhlomulo lowukulu.

9. Hi ku ya hi Nhlavutelo 7:13-15, i yini leswi lava ntshungu lowukulu va swi endlaka sweswi?

⁹ Hlaya Nhlavutelo 7:13-15. Yohane u vula leswaku ntshungu lowukulu wu “hlantswe swiambalo swa [wona] swo leha [wu] swi endla swo basa hi ngati ya Xinyimpfana.” Leswi swi vula leswaku wu ni ripfalo leri baseke naswona Yehovha wa wu amukela. (Esa. 1:18) Lava ntshungu lowukulu va tinyiketerile, i Vakreste lava khuvuriweke lava nga ni ripfumelo eka gandzelo ra Yesu naswona va ni vuxaka lebyinene na Yehovha. (Yoh. 3:36; 1 Pet. 3:21) Hikwalaho, va faneleka ku yima emahlweni ka xiluvelo xa Xikwembu va xi endlela “ntirho wo kwetsima vusiku ni nhlikanhi” laha misaveni. Hambi ku ri sweswi, va hoxa xandla swinene entirhweni wo chumayela ni ku endla vadyondzisiwa naswona va rhangisa Mfumo wa Xikwembu evuton’wini bya vona ku tlula swilo hinkwaswo.—Mat. 6:33; 24:14; 28:19, 20.

10. I yini leswi lava ntshungu lowukulu va tiyisekaka ha swona naswona va langutele ku hetiseka ka xitshembiso xihi?

¹⁰ Lava ntshungu lowukulu lava nga ta pona nhlomulo lowukulu va tiyiseka leswaku Xikwembu xi ta va khathalela hikuva “Loyi a tshameke exiluvelweni u ta vamba tende rakwe leswaku va va ehansi ka rona.” Xitshembiso lexi lava tinyimpfu tin’wana va xi languteleke hi mahlongati  xi ta hetiseka: “[Xikwembu] xi ta sula mihloti hinkwayo ematihlweni ya vona, rifu a ri nge he vi kona, hambi ku ri nkosi, ku rila ni switlhavi a swi nge he vi kona.”—Nhlav. 21:3, 4.

11-12. (a) Hi ku ya hi Nhlavutelo 7:16, 17, hi yihi mikateko leyi nga ta kumiwa hi lava ntshungu lowukulu? (b) I yini leswi lava tinyimpfu tin’wana va nga swi endlaka eXitsundzuxweni naswona hikwalahokayini?

¹¹ Hlaya Nhlavutelo 7:16, 17. Namuntlha, vanhu van’wana va Yehovha va sika hi ndlala hikwalaho ka swiphiqo swa ikhonomi kumbe hikwalaho ka tinyimpi leti vangaka vusweti. Van’wana va le jele hikwalaho ka ripfumelo ra vona. Hambiswiritano, lava ntshungu lowukulu va tsaka ku tiva leswaku loko vo pona loko ku lovisiwa misava leyi yo homboloka, va ta tiphina hi swakudya swa nyama ni swa moya. Loko misava leyi, leyi lawuriwaka hi Sathana yi lovisiwa, lava ntshungu lowukulu va ta sirheleriwa eka vukarhi bya Yehovha lebyi fanaka ni ‘mumu lowu vavulaka.’ Endzhaku ka nhlomulo lowukulu, Yesu u ta endla leswaku lava poneke va kuma “mati ya vutomi [lebyi nga heriki].” Ehleketa hi mhaka leyi: Lava ntshungu lowukulu va ni ntshembo wo hlawuleka. Vanhu va tibiliyoni lava tshameke va hanya, a va nge he fi!—Yoh. 11:26.

¹² Lava tinyimpfu tin’wana va khensa Yehovha na Yesu hikwalaho ka ntshembo wo hlawuleka lowu va va tshembiseke wona! A va hlawuriwanga leswaku va ya hanya etilweni kambe sweswo a swi vuli swona leswaku a hi va risima eka Yehovha. Mitlawa leyi hayimbirhi yi dzunisa Xikwembu na Kreste. Ndlela yin’wana leyi yi endlaka leswi hayona i ku va kona eXilalelweni xa Hosi.

13-14. Hikwalahokayini vanhu hinkwavo va fanele va va kona eXitsundzuxweni xa rifu ra Kreste?

¹³ Masiku lawa, i munhu un’we eka va 1 000 loyi a dyaka ni ku nwa vhinyo eXitsundzuxweni. Emavandlheni yo tala, a va kona lava dyaka xinkwa ni ku nwa vhinyo eXitsundzuxweni. Vunyingi bya vanhu lava va vaka kona eXitsundzuxweni va ni ntshembo wo hanya laha misaveni. Hikwalahokayini va va kona eXilalelweni xa Hosi? Va va kona ku fana ni vanhu lava yaka enkhubyeni wa vukati wa vanghana va vona. Va va kona hi xikongomelo xo seketela vatekani ni ku va komba leswaku va va rhandza. Hilaha ku fanaka, lava tinyimpfu tin’wana va va kona eXitsundzuxweni hi  xikongomelo xo seketela Kreste ni Vakreste lava hlawuriweke ni ku va komba leswaku va va rhandza. Nakambe va va kona hi xikongomelo xo kombisa ku tlangela gandzelo ra Yesu leri endleke leswaku va va ni ntshembo wo hanya hilaha ku nga heriki laha misaveni.

¹⁴ Xin’wana lexi endlaka va va kona eXitsundzuxweni hileswi va yingisaka xileriso lexi Yesu a va nyikeke xona. Loko Yesu a simeka Xilalelo xa Hosi ni vaapostola vakwe vo tshembeka, u va byele leswi: “Tshamani mi ri karhi mi endla leswi leswaku mi ndzi tsundzuka.” (1 Kor. 11:23-26) Hikwalaho, va ta ya emahlweni va va kona eXitsundzuxweni ntsena loko Vakreste lava hlawuriweke va ha ri kona laha misaveni. Nakambe va rhamba vanhu hinkwavo leswaku va va kona eXitsundzuxweni.

15. Hi nga xi dzunisa njhani Xikwembu na Kreste eXitsundzuxweni?

¹⁵ Loko hi ri eXitsundzuxweni, hi pfulekeriwa hi nkarhi wo dzunisa Xikwembu na Kreste hi ku yimbelela ni hi xikhongelo. Mbulavulo wa lembe leri wu ni nhlokomhaka leyi nge “Khensa Leswi Xikwembu Na Kreste Va Ku Endleleke Swona!” Wu ta kurisa ndlela leyi hi xi tlangelaka hayona Xikwembu swin’we na Kreste. Loko swifanekiselo swi ri karhi swi fambisiwa, hinkwerhu hi nga ta va hi ri kona hi ta tsundzuxiwa leswi swi fanekiselaka swona, ku nga miri ni ngati ya Yesu. Hi ta tlhela hi tsundzuka rirhandzu leri Yehovha a hi kombeke rona hi ku pfumelela N’wana wakwe a dlayiwa leswaku hi ta kuma vutomi. (Mat. 20:28) Hinkwavo lava rhandzaka Tata wa hina wa le tilweni swin’we ni N’wana wakwe va ta tikarhatela ku va kona eXitsundzuxweni.

16. Vakreste lava hlawuriweke ni lava tinyimpfu tin’wana va fana njhani?

¹⁶ Ku ni tindlela to tala leti Vakreste lava hlawuriweke ni lava tinyimpfu tin’wana va fanaka hatona. Mitlawa leyi hayimbirhi i ya risima eka Xikwembu. Xi yi xave hi ntsengo wun’we, ku nga vutomi bya N’wana wa xona loyi xi n’wi rhandzaka. Mitlawa leyimbirhi yi hambana ntsena hi ntshembo lowu yi nga na wona. Hayimbirhi ka yona yi fanele yi tshama yi tshembekile eka Xikwembu na Kreste. (Ps. 31:23) Tsundzuka, moya wa Xikwembu wu tirha hi ndlela leyi fanaka eka hinkwerhu. Leswi swi vula leswaku Yehovha u nyika munhu un’wana ni un’wana moya wakwe lowo kwetsima hi ku ya hi xilaveko xakwe.

17. I yini leswi Vakreste lava hlawuriweke lava ha riki laha misaveni va swi languteleke hi mahlongati?

¹⁷ Vakreste lava hlawuriweke a va velekiwi va ri ni ntshembo wo ya hanya etilweni. I Xikwembu lexi va nyikaka ntshembo wolowo. Va ehleketa hi ntshembo wa vona, va khongela ha wona naswona va swi langutele hi mahlongati  ku kuma hakelo ya vona etilweni. A va swi tivi leswaku miri wa vona wu ta va wu ri njhani loko va ri etilweni. (Filp. 3:20, 21; 1 Yoh. 3:2) Hambiswiritano, va swi langutele hi mahlongati ku ya va na Yehovha, Yesu, tintsumi ni Vakreste van’wana lava hlawuriweke eMfun’weni wa le tilweni.

18. I yini leswi lava tinyimpfu tin’wana va swi languteleke hi mahlongati?

¹⁸ Lava tinyimpfu tin’wana va ni ntshembo lowu vanhu vo tala va nga na wona, ku nga ntshembo wo hanya hilaha ku nga heriki laha misaveni. (Ekl. 3:11) Va swi langutele hi mahlongati ku hoxa xandla eku endleni ka misava hinkwayo leswaku yi va paradeyisi. Va wu langutele hi mahlongati nkarhi lowu va nga ta tiakela tiyindlu, va tiphina hi ku rima ni ku va ni vana lava hanyeke kahle. (Esa. 65:21-23) Va swi langutele hi mahlongati ku rhendzeleka ni misava, va valanga tintshava, makhwati, lwandle ni ku dyondza swo tala hi swilo leswi Yehovha a swi tumbuluxeke. Kambe lexi va tsakisaka ngopfu, i ku tiva leswaku vuxaka bya vona na Yehovha byi ta tiya ku tlula rini na rini.

19. Xitsundzuxo xi hi nyika nkarhi wo endla yini naswona xi ta va rini lembe leri?

¹⁹ Yehovha u nyike malandza yakwe hinkwavo ntshembo wo tsakisa hi vumundzuku. (Yer. 29:11) Xitsundzuxo xa rifu ra Kreste xi hi nyika nkarhi wo dzunisa Xikwembu na Kreste hikwalaho ka swilo leswi va hi endleleke swona leswaku hi ta kuma vutomi lebyi nga heriki. Xitsundzuxo i nhlengeletano ya nkoka swinene leyi Vakreste va ntiyiso va vaka na yona lembe ni lembe. Xi ta khomiwa ni madyambu hi Mugqivela, March 27, 2021. Lembe leri vo tala va ta swi kota ku va kona eka nhlengeletano leyi ya nkoka tanihi leswi va nga ni tshunxeko wo gandzela. Van’wana va ta va kona hambileswi va kanetiwaka. Kasi van’wana va ta xi khomela ejele. Tanihi leswi Yehovha, Yesu ni xiphemu xa ndyangu wa Xikwembu wa le tilweni wu nga ta va wu langutile, onge mavandlha hinkwawo, mitlawa na n’wina hinkwenu mi nga tiphina hi siku ra Xitsundzuxo xa rifu ra Kreste!