1. Ku fana na Hosi Davhida, i yini leswi van’wana va hina hi nga tivutisaka swona?

HINKWERHU ha swi lava ku hanya hi ku rhula. A nga kona loyi a tsakelaka ku tshamela ku karhateka. Hambiswiritano, mikarhi yin’wana hi pfa hi karhateka. Hikwalaho, malandza man’wana ya Yehovha ma nga tivutisa xivutiso xo fana ni lexi Hosi Davhida a xi vutiseke Yehovha lexi nge: “Xana ndzi ta tshamela ku karhateka, ni ku va ni gome embilwini ya mina ku fikela rini?”—Ps. 13:2.

2. Hi ta bula hi yini eka nhlokomhaka leyi?

² Hambileswi ku karhateka hi nga swi kotiki ku ku balekela hi ku helela kambe hi nga swi kota ku ku lawula. Eka nhlokomhaka leyi hi ta bula hi swilo swin’wana leswi nga endlaka hi karhateka. Endzhaku hi ta bula hi swilo swa tsevu leswi nga hi pfunaka hi tshama hi ri ni ku rhula loko hi langutana ni swiphiqo.

3. Hi swihi swilo swin’wana leswi nga hi karhataka naswona xana hi nga swi kota ku swi papalata?

³ Swilo swin’wana leswi endlaka hi karhateka a hi nge swi koti ku swi papalata. Hi xikombiso, a hi nge swi koti ku sivela ku durha ka swakudya, swiambalo ni ndhawu yo tshama leswi  tlakukaka lembe ni lembe; kumbe ku sivela vatirhikulorhi kumbe vadyondzikulorhi ku hi ringa hi tshika ku tshembeka kumbe hi tikhoma ku biha hi swa masangu. Nakambe, a hi nge swi koti ku sivela ku andza ka vugevenga laha hi tshamaka kona. Hi langutana ni swiphiqo leswi hikuva vanhu vo tala lava hi hanyaka na vona a va hanyi hi Matsalwa. Sathana, xikwembu xa misava leyi, wa swi tiva leswaku vanhu van’wana va ta tshika ku tirhela Yehovha hikwalaho ko “vilela hi swilo swa misava leyi.” (Mat. 13:22; 1 Yoh. 5:19) Hikwalaho, a swi hlamarisi leswi misava leyi yi teleke swiphiqo leswi dyisaka vanhu mbitsi!

4. Hi endla yini loko hi langutana ni swiphiqo?

⁴ Hakanyingi loko hi langutana ni swiphiqo ha karhateka. Hi xikombiso, ha karhateka hikwalaho ko ehleketa leswaku a hi nge vi na mali leyi eneleke yo xava swilo leswi hi swi lavaka kumbe hi nga vabya ivi hi xwa entirhweni kumbe hi lahlekeriwa hi ntirho. Hi nga tlhela hi karhateka hi ku ehleketa leswaku hi nga tikuma hi tlule nawu wa Xikwembu loko hi langutana ni ndzingo. Ku nga ri khale Sathana u ta kucetela vanhu lava a va lawulaka leswaku va hlasela vanhu va Xikwembu, sweswo swi nga hi karhata loko hi tivutisa leswaku hi ta endlisa ku yini loko hi hlaseriwa. Hi nga tivutisa, ‘Xana swi bihile ku vilela hi timhaka to fana ni leti?’

5. Yesu a a vula yini loko a ku: “Tshikani ku vilela”?

⁵ Yesu u byele valandzeri vakwe a ku: “Tshikani ku vilela.” (Mat. 6:25) Xana a vula leswaku a hi fanelanga hi vilela nikatsongo? Doo! Enkarhini lowu hundzeke, malandza man’wana ya Yehovha ma tshame ma vilela kambe Yehovha a nga ma fularhelanga. * (1 Tih. 19:4; Ps. 6:3) Kahlekahle Yesu a ri eku hi tiyiseni. A a nga lavi leswaku hi vilela ngopfu hi swiphiqo swa vutomi lerova hi kavanyeteka entirhweni wa Xikwembu. Hi tihi tindlela leti nga hi pfunaka leswaku hi nga vileli ngopfu?—Vona bokisi leri nge, “ Leswi U Nga Swi Endlaka.”

6. Hi ku ya hi Vafilipiya 4:6, 7, loko hi vilela i yini leswi nga hi pfunaka leswaku hi va ni ku rhula?

⁶ (1) Khongela nkarhi ni nkarhi. Vakreste lava karhatiwaka hi swiphiqo swo karhi, va nga kuma ku rhula loko va khongela va kombela Yehovha a va pfuna. (1 Pet. 5:7) Yehovha u ta hlamula swikhongelo swa wena hi ku endla leswaku u va ni ‘ku rhula loku tlulaka ku twisisa ka vanhu hinkwavo.’ (Hlaya Vafilipiya 4:6, 7.) Yehovha u endla leswaku hi va ni ku rhula hi ku tirhisa moya wakwe wo kwetsima.—Gal. 5:22.

7. I yini leswi hi faneleke hi swi tsundzuka loko hi khongela eka Xikwembu?

⁷ Loko u khongela, phofulela Yehovha hinkwaswo leswi ku karhataka. Swi boxe hi ku kongoma. N’wi byele xiphiqo xa kona ni ndlela leyi u titwaka hayona hi xiphiqo xexo. Loko yi ri kona ndlela yo xi tlhantlha, kombela vutlhari ni matimba yo endla tano. Loko xiphiqo xa kona xi nga koteki ku xi herisa, kombela Yehovha a ku pfuna, u nga tshameli ku vilela hi xona. Loko u boxa swilo leswi ku vilerisaka hi ku kongoma, u ta kota ku vona ndlela leyi Yehovha a swi hlamulaka hayona swikhongelo swa wena. Loko xikhongelo xa wena xi nga hlamuriwi hi ku hatlisa, u nga wi mapa. Yehovha u lava u n’wi byela leswi ku vilerisaka hi ku kongoma, u tlhela u khongela hi ku phikelela.—Luka 11:8-10.

8. I yini leswi hi nga fanelangiki hi swi rivala loko hi khongela?

⁸ Loko u ri karhi u lahlela ku vilela ka wena  eka Yehovha hi xikhongelo, u nga rivali ku khensa. Hi fanele hi ehleketa hi mikateko leyi Yehovha a hi nyikeke yona hambiloko swiyimo swi tika. Loko mikarhi yin’wana u nga swi tivi leswaku u ta tiphofula njhani eka Yehovha, n’wi kombele u ku, ‘Ndzi kombela u ndzi pfuna,’ Yehovha u ta xi hlamula xikhongelo xa wena!—2 Tikr. 18:31; Rhom. 8:26.

9. Hi nga wu kuma njhani nsirhelelo?

⁹ (2) Titshege hi vutlhari bya Yehovha, ku nga ri bya wena n’wini. Enkarhini wa muprofeta Esaya, vanhu va le Yuda a va khomiwa hi rhumbyana hikwalaho ko chava ku hlaseriwa hi Vaasiriya. Leswi a va nga swi lavi nikatsongo ku tikuma va ri ehansi ka Vaasiriya, va kombele Vaegipta leswaku va va pfuna. (Esa. 30:1, 2) Yehovha u va lemukisile leswaku leswi va swi endlaka swi ta va khela matluka. (Esa. 30:7, 12, 13) Hi ku tirhisa Esaya, u va byele ndlela leyi va nga kumaka nsirhelelo hayona. U te: “Mi ta va ni matimba loko mi tshamiseka mi tlhela mi . . . tshemba” Yehovha.—Esa. 30:15b.

10. Hi swihi swiyimo swin’wana leswi eka swona hi nga kombisaka leswaku hi tshemba Yehovha?

¹⁰ Hi nga swi kombisa njhani leswaku hi tshemba Yehovha? Twana swikombiso swin’wana. A hi nge u nyikiwa ntirho lowu holelaka swi nyawula naswona ntirho wolowo wu ta endla leswaku u nga ha wu kumi kahle nkarhi wo tirhela Yehovha. Kumbe munhu wo karhi loyi u tirhaka na yena loyi a nga riki Mbhoni wa ku gangisa. Kumbexana xirho xa ndyangu lexi u xi rhandzaka xi ku byela leswi: “Hlawula exikarhi ka mina ni Xikwembu xa wena.” Eka swiyimo leswi hinkwaswo, a swi olovi ku endla xiboho kambe Yehovha u ta ku nyika nkongomiso lowu nga ta ku pfuna. (Mat. 6:33; 10:37; 1 Kor. 7:39) Xivutiso hi leswaku, Xana u ta wu tshemba u tlhela u wu yingisa nkongomiso wolowo?

11. Hi rihi rungula ra le Bibeleni leri hi faneleke hi ri dyondza leswaku ri ta hi pfuna hi kota ku tshama hi ri vanhu vo rhula loko hi kanetiwa?

¹¹ (3) Dyondza eka vanhu lava nga swikombiso leswinene ni lava nga swikombiso swo biha. Bibele yi ni rungula ro tala leri kombisaka ndlela leyi swi nga swa nkoka hayona ku va vanhu vo rhula ni ku tshemba Yehovha. Loko u ri karhi u dyondza rungula rero, xiya leswi pfuneke malandza ya Xikwembu leswaku ma tshama ma ri ni ku rhula hambiloko ma kanetiwa. Hi xikombiso, loko huvo leyi tlakukeke ya Vayuda yi lerise vaapostola ku tshika ku chumayela, a va khomiwanga hi rhumbyana. Hi xivindzi va te: “Hi fanele hi yingisa Xikwembu tanihi mufumi ku tlula vanhu.” (Mit. 5:29) Hambiloko va bukuteriwa, a va tshikanga ku chumayela. Hikwalahokayini? Hikuva a va swi tiva leswaku Yehovha wa va seketela. A a tinyungubyisa hi vona. Hikwalaho, va ye emahlweni va chumayela mahungu lamanene. (Mit. 5:40-42) Hilaha ku fanaka, loko mudyondzisiwa Stefano a langutane ni rifu, u tshame a rhulile naswona xikandza xakwe a xi vangama ku fana ni “xikandza xa ntsumi.” (Mit. 6:12-15) Hikwalahokayini? A a swi tiva leswaku Yehovha wa tinyungubyisa hi yena.

12. Hi ku ya hi 1 Petro 3:14 na 4:14, i yini lexi endlaka hi tsaka hambiloko hi xanisiwa?

¹² Vaapostola a va tiyiseka leswaku Yehovha wa va seketela. U va nyike matimba yo endla masingita. (Mit. 5:12-16; 6:8) Kambe hina a nga hi nyikanga. Hambiswiritano, Yehovha wa hi tiyisekisa hi ku tirhisa Rito rakwe leswaku wa tinyungubyisa hi hina loko hi xaniseka hikwalaho ka leswo lulama naswona wa hi seketela hi ku tirhisa moya wakwe wo kwetsima. (Hlaya 1 Petro 3:14; 4:14.) Ematshan’weni yo karhateka hi leswaku hi ta endlisa ku yini loko hi xanisiwa enkarhini lowu taka, a hi tiyiseni ripfumelo ra hina sweswi  eka Yehovha ni ku tshemba leswaku u ta hi ponisa. Ku fana ni vadyondzisiwa va le nkarhini wa vaapostola, hi fanele hi tshemba xitshembiso xa Yesu lexi nge: “Ndzi ta mi nyika vutlhari naswona ndzi ta mi byela leswi mi faneleke ku swi vula, valala va n’wina hinkwavo a va nge swi koti ku mi kaneta kumbe ku mi hlamula.” U tlhele a hi tiyisekisa a ku: “Loko mi tiyisela mi ta ponisiwa.” (Luka 21:12-19) Tsundzuka, Yehovha a nge ma rivali malandza yakwe lama feke ma tshembekile. Hikwalaho, u ta ma pfuxa eku feni.

13. Hi dyondza yini eka vanhu lava a va nga ri na ku rhula naswona a va nga n’wi tshembi Yehovha?

¹³ Hi nga tlhela hi dyondza swo karhi eka vanhu lava a va nga ri na ku rhula naswona a va nga n’wi tshembi Yehovha. Ku dyondza hi vanhu lava swi ta hi pfuna hi papalata ku endla swihoxo swo fana ni leswi va swi endleke. Hi xikombiso, loko Hosi Asa wa le Yuda a ha ku sungula ku fuma, u titshege hi Yehovha loko a hlaseriwa hi vuthu lerikulu naswona Yehovha u n’wi pfunile leswaku a hlula. (2 Tikr. 14:9-12) Kambe, loko a hlaseriwa hi Hosi Baxa wa le Israyele loyi a a ri ni vuthu leritsongo, u hakele mavuthu ya Vaasiriya leswaku ma ta n’wi pfuna ematshan’weni yo kombela Yehovha leswaku a n’wi ponisa hilaha a endleke hakona eku sunguleni. (2 Tikr. 16:1-3) Nakambe, loko a vabyela ku fa, a nga n’wi kombelanga Yehovha leswaku a n’wi pfuna.—2 Tikr. 16:12.

14. Hi dyondza yini eka swihoxo swa Asa?

¹⁴ Eku sunguleni loko Asa a langutane ni swiphiqo, u kombele Yehovha a n’wi pfuna. Kambe hi ku famba ka nkarhi, u tshike ku kombela Xikwembu xi n‘wi pfuna kutani a tiendlela swilo hi ndlela yakwe. Swi nga endleka leswaku mhaka ya ku va Asa a kombele Vaasiriya va n’wi pfuna loko a hlaseriwa hi Vaisrayele a yi vonaka yi ri kahle. Kambe sweswo a swi tlhaveriwanga hi dyambu. Hi ku tirhisa muprofeta, Yehovha u n’wi byele leswi: “Leswi u tshembeke hosi ya Siriya, u nga tshembangiki Yehovha Xikwembu xa wena, masocha ya hosi ya Siriya ma ku balekerile.” (2 Tikr. 16:7) Hi fanele hi tivonela leswaku hi nga titshembi ku tlula mpimo lerova hi tilulamisela timhaka hi hexe ematshan’weni yo kombela Yehovha a hi kongomisa hi ku tirhisa Rito rakwe. Hambiloko hi fanele hi endla xiboho hi ku hatlisa, hi fanele hi kombela Yehovha a hi pfuna hi endla swiboho swa vutlhari.

15. Hi fanele hi endla yini loko hi hlaya Bibele?

¹⁵ (4) Tiva Matsalwa hi nhloko. Loko u hlangana ni tindzimana ta Bibele leti kombisaka ndlela leyi swi nga swa nkoka hayona ku va munhu wo rhula ni ku tshemba Yehovha, ringeta ku ti tiva hi nhloko. Swi ta ku pfuna ku ti hlaya hi rito ra le henhla kumbe u ti tsala ehansi kutani u ti hlaya hi ku phindhaphindha. Yoxuwa a a lerisiwe ku hlaya buku ya Nawu nkarhi ni nkarhi hi rito ra le hansi leswaku a ta endla swilo hi vutlhari. Leswi a a ta swi hlaya a swi ta n’wi pfuna a hlula ku chava loko a rhangela vanhu va Xikwembu. (Yox. 1:8, 9) Matsalwa yo tala lama nga eBibeleni ma ta endla leswaku u va ni ku rhula loko u langutana ni swiyimo swo tika kumbe leswi nga ku vilerisaka.—Ps. 27:1-3; Swiv. 3:25, 26.

16. Yehovha u hi pfuna njhani leswaku hi va ni ku rhula hi tlhela hi n’wi tshemba hi ku tirhisa vandlha?

¹⁶ (5) Tihlanganise ni vanhu va Xikwembu. Yehovha u hi pfuna hi ku tirhisa vamakwerhu leswaku hi va ni ku rhula hi tlhela hi n’wi tshemba. Etinhlengeletanweni ta vandlha, ha vuyeriwa eka mivulavulo, tinhlamulo ni le ka mabulo lawa hi vaka na wona ni vamakwerhu. (Hev. 10:24, 25) Nakambe, vanghana va hina evandlheni va ta hi khutaza loko hi va phofulela  timhaka leti hi karhataka. “Rito lerinene” leri humaka eka munghana ri nga hi chavelela hi tshika ku vilela.—Swiv. 12:25.

17. Hi ku ya hi Vaheveru 6:19, ntshembo lowu hi nga na wona wu nga endla hi va ni ku rhula hi ndlela yihi loko hi langutana ni swiyimo swo tika?

¹⁷ (6) Tiyisa ntshembo wa wena. Ntshembo lowu hi nga na wona wu fana ni “nsoma wa vutomi bya hina,” wa hi tiyisa hambiloko hi langutana ni swiyimo swo tika kumbe loko ku ri na leswi swi hi vilerisaka. (Hlaya Vaheveru 6:19.) Anakanyisisa hi xitshembiso lexi Yehovha a hi tshembisaka xona enkarhini lowu taka laha ku vilela hinkwako ku nga ta va ku nga ha ri kona. (Esa. 65:17) Tivone u ri emisaveni leyintshwa ya ku rhula, laha swilo hinkwaswo leswi hi vilerisaka swi nga ta va swi nga ha ri kona. (Mik. 4:4) Nakambe, ntshembo wa wena wu ta tiya loko u byela van’wana hi wona. Chivirikela ntirho wo chumayela ni wo endla vadyondzisiwa. Loko u endla tano, u ta va ni “ntshembo . . . lowu tiyeke ku ya fika emakumu.”—Hev. 6:11.

18. Hi yihi mitlhontlho leyi hi nga yi langutelaka enkarhini lowu taka naswona hi nga yi hlula njhani?

¹⁸ Leswi makumu ma nga kwala nyongeni, hi ta langutana ni mitlhontlho yo tala leyi nga ta endla leswaku hi vilela. Ndzimana ya hina ya lembe ya 2021, yi ta hi pfuna hi kota ku langutana ni mitlhontlho yoleyo hi ndlela yo rhula, ntsena loko hi tshemba Yehovha. Onge hi nga swi kombisa hi swiendlo lembe leri leswaku ha xi tshemba xitshembiso xa Yehovha lexi nge: “Mi ta va ni matimba loko mi tshamiseka mi tlhela mi ndzi tshemba.”—Esa. 30:15.