NHLOKOMHAKA LEYI DYONDZIWAKA 4
Leswi Endlaka Hi Va Kona eXitsundzuxweni
“Tshamani mi ri karhi mi endla leswi leswaku mi ndzi tsundzuka.”—LUKA 22:19.
RISIMU 20 U Nyikele Hi N’wana La Rhandzekaka
LESWI HI NGA TA SWI DYONDZA *
1-2. (a) Hi rini laha hi tsundzukaka maxaka ya hina lama feke? (b) Yesu u endle yini hi vusiku byo hetelela a nga si dlayiwa?
SWI NGA ri na mhaka leswaku maxaka ya hina ma fe rini kambe ha ma tsundzuka swinene. Hi va tsundzuka ngopfu loko siku leri va feke ha rona ri fika.
2 Lembe ni lembe, hi va exikarhi ka vanhu va timiliyoni lava hlengeletanaka emisaveni hinkwayo ku tsundzukaka rifu ra munhu loyi a rhandzekaka swinene, ku nga Yesu Kreste. (1 Pet. 1:8) Ha hlengeletana leswaku hi ta tsundzuka ndlela leyi a hi kutsuleke hayona eka xidyoho ni rifu. (Mat. 20:28) Kahlekahle, Yesu a a lava leswaku valandzeri vakwe hinkwavo va tsundzuka rifu rakwe. Hi vusiku byo hetelela a nga si dlayiwa, Yesu u dye xilalelo ni vadyondzisiwa vakwe kutani a ku: “Tshamani mi ri karhi mi endla leswi leswaku mi ndzi tsundzuka.” *—Luka 22:19.
3. Hi ta kambisisa yini eka nhlokomhaka leyi?
3 I nhlayo yitsongo leyi vaka kona eXitsundzuxweni ya vanhu lava nga ni ntshembo wo ya hanya etilweni. Kambe vanhu va timiliyoni lava nga ni ntshembo wo hanya laha misaveni na vona va va kona. Eka nhlokomhaka leyi, hi ta bula hi swivangelo leswi endlaka hinkwerhu hi va kona eXitsundzuxweni lembe ni lembe. Hi ta tlhela hi bula hi ndlela leyi hi vuyeriwaka hayona loko hi va kona. A hi rhangeni hi kambisisa swivangelo leswi endlaka vahlawuriwa va va kona.
LESWI ENDLAKA VAHLAWURIWA VA VA KONA EXITSUNDZUXWENI
4. Hikwalahokayini vahlawuriwa va dya xinkwa ni ku nwa vhinyo eXitsundzuxweni?
4 Lembe ni lembe, vahlawuriwa lava vaka kona eXitsundzuxweni va dya xinkwa ni ku nwa vhinyo. Hikwalahokayini va dya xinkwa ni ku nwa vhinyo? Ku hlamula xivutiso lexi, xiya leswi endlekeke hi vusiku byo hetelela Yesu a nga si dlayiwa. Endzhaku ko tlangela Paseka, Yesu u sungule ku endla swin’wana leswi vuriwaka Xilalelo xa Hosi. U hundzisele xinkwa ni vhinyo eka vadyondzisiwa vakwe vo tshembeka va 11 kutani a va byela leswaku va dya ni ku nwa. Yesu u vulavule na vona hi mintwanano yimbirhi, ku nga ntwanano lowuntshwa ni ntwanano wa Mfumo. * (Luka 22:19, 20, 28-30) Mintwanano leyi yi pfulele vaapostola ni nhlayo yitsongo ya lava hlawuriweke leswaku va ya va tihosi ni vaprista etilweni. (Nhlav. 5:10; 14:1) I vahlawuriwa lava saleke laha misaveni ntsena, * nga xiphemu xa mintwanano leyimbirhi lava lava dyaka xinkwa ni ku nwa vhinyo eXitsundzuxweni.
5. I yini leswi vahlawuriwa va swi tivaka hi ntshembo lowu va nga na wona?
5 Hi lexi xivangelo lexi endlaka vahlawuriwa va swi langutela hi mahlongati ku va kona eXitsundzuxweni: Xi va nyika nkarhi wo anakanyisisa hi ntshembo lowu va nga na wona. Yehovha u va nyike ntshembo wo hlawuleka ku nga ku hanya hilaha ku nga heriki ematilweni, ku tirha swin’we na Yesu Kreste swin’we ni lava 144 000 kambe xa nkoka ngopfu, va ta vona Xikwembu hi xiviri! (1 Kor. 15:51-53; 1 Yoh. 3:2) Vahlawuriwa va swi tiva leswaku va ta tiphina hi lunghelo leri ro hlawuleka etilweni. Kambe leswaku va ri kuma, va fanele va tshembeka ku fikela ekufeni. (2 Tim. 4:7, 8) Va khapakhapa swinene hi ntsako loko va ehleketa hi ntshembo lowu, wo hanya etilweni. (Tito 2:13) Ku vuriwa yini hi lava “tinyimpfu tin’wana”? (Yoh. 10:16) Hi swihi swivangelo leswi endlaka va va kona eXitsundzuxweni?
LESWI ENDLAKA LAVA TINYIMPFU TIN’WANA VA VA KONA EXITSUNDZUXWENI
6. Hikwalahokayini lava tinyimpfu tin’wana va va kona eXitsundzuxweni lembe ni lembe?
6 Lava tinyimpfu tin’wana va va kona eXitsundzuxweni, ku nga ri leswaku va ya dya xinkwa ni ku nwa vhinyo kambe leswaku va seketela vahlawuriwa. Lava nga ni ntshembo wo hanya laha misaveni va rhambiwe ro sungula hi 1938 leswaku va va kona eXitsundzuxweni. Xihondzo xo Rindza xa March 1, 1938, xi vule leswi: “Swi ta va swi ri swinene leswaku lava tinyimpfu tin’wana lava vaka kona eka tinhlengeletano leti va va vahlaleri. . . . Lowu ku fanele ku va nkarhi wo tsaka.” Ku fana ni vanhu lava rhambiweke emucatweni ku ta hlalela vatekani, lava tinyimpfu tin’wana na vona va va kona leswaku va va vahlaleri eXitsundzuxweni.
7. Hikwalahokayini lava tinyimpfu tin’wana va wu langutela hi mahlongati mbulavulo wa Xitsundzuxo?
7 Lava tinyimpfu tin’wana na vona va anakanyisisa hi ntshembo wa vona. Va wu langutela hi mahlongati mbulavulo wa Xitsundzuxo hikuva wu vulavula ngopfu hileswi Kreste ni lava 144 000, lava a nga ta fuma na vona va nga ta swi endlela vanhu hi nkarhi wa Mfumo wa Gidi ra Malembe. Ehansi ka Mfumo wa Hosi Yesu Kreste, lava a nga ta fuma na vona va ta pfuneta eku pfuxeteni ka misava yi va paradeyisi ni ku pfuna vanhu leswaku va tlhela va nga ha vi na xidyoho. Mayana ku tsakisa ka swona loko vahlaleri va timiliyoni lava vaka kona eXitsundzuxweni, va swi vona hi mahlo ya mianakanyo ku hetiseka ka vuprofeta bya le Bibeleni, byo tanihi lebyi nga eka Esaya 35:5, 6; 65:21-23 na Nhlavutelo 21:3, 4. Loko va tivona va ri emisaveni leyintshwa ni maxaka ya vona, ntshembo lowu va nga na wona wo hanya eparadeyisini wa tiya naswona hambi ko ba lexi dumaka, a va nge tshiki ku tirhela Yehovha.—Mat. 24:13; Gal. 6:9.
8. Hi xihi xivangelo xin’wana lexi endlaka lava tinyimpfu tin’wana va va kona eXitsundzuxweni?
8 Xiya xivangelo xin’wana lexi endlaka lava tinyimpfu tin’wana va va kona eXitsundzuxweni. Va lava ku kombisa vahlawuriwa rirhandzu ni nseketelo. Rito ra Xikwembu ri vula leswaku vahlawuriwa va ta tirhisana swin’we hi vun’we ni lava tinyimpfu tin’wana. Njhani? A hi xiyeni swikombiso swi nga ri swingani.
9. Hi ku ya hi Zakariya 8:23, lava tinyimpfu tin’wana va titwa njhani hi vahlawuriwa?
9 Hlaya Zakariya 8:23. Vuprofeta lebyi, byi boxa ndlela yo tsakisa leyi lava tinyimpfu tin’wana va titwaka hayona hi vamakwavo va vona lava nga vahlawuriwa. Xiga lexi nge “Muyuda” ni lexi nge “n’wina,” xi vulavula hi vanhu van’we, ku nga vahlawuriwa lava saleke. (Rhom. 2:28, 29) Kasi lexi nge, “vanhu va khume lava humaka eka tindzimi hinkwato ta matiko,” xi vula lava tinyimpfu tin’wana. Nakambe lexi nge “va ta khomelela,” xi vula ku va ta namarhela vahlawuriwa eka vugandzeri lebyi tengeke. Hikwalaho, lava tinyimpfu tin’wana va kombisa nseketelo wa vona eka vahlawuriwa hi ku va kona eXitsundzuxweni.
10. Yehovha u endle yini leswaku ku hetiseka vuprofeta lebyi nga eka Ezekiyele 37:15-19, 24, 25?
10 Hlaya Ezekiyele 37:15-19, 24, 25. Vuprofeta lebyi byi hetiseke loko Yehovha a hlanganisa vahlawuriwa ni tinyimpfu letin’wana leswaku va tirhisana swin’we. Vuprofeta lebyi byi vula ku hlanganisiwa ka tinhonga timbirhi. Lava nga ni ntshembo wo hanya etilweni va fana ni nhonga “ya Yuda” (tinyimba leti tihosi ta Israyele a ti hlawuriwa eka tona), kasi lava nga ni ntshembo wo hanya laha misaveni va fana ni nhonga ya “Efrayimi.” * Yehovha a a ta hlanganisa mitlawa leyimbirhi leswaku yi va “nhonga yin’we.” Leswi swi vula leswaku va tirha swin’we hi vun’we ehansi ka Hosi yin’we, ku nga Yesu Kreste. Lembe ni lembe, vahlawuriwa ni lava tinyimpfu tin’wana va va swin’we eXitsundzuxweni va ri “ntlhambi wun’we” ehansi ka ‘murisi un’we.’—Yoh. 10:16.
11. Xana “tinyimpfu” leti ku vulavuriwaka hatona eka Matewu 25:31-36, 40, ti va seketela njhani vamakwavo va Kreste?
11 Hlaya Matewu 25:31-36, 40. “Tinyimpfu” leti Yesu a vulavuleke hatona, ti yimela vanhu vo lulama lava nga ni ntshembo wo hanya laha misaveni, ku nga lava tinyimpfu letin’wana. Hi ku tshembeka, va seketela vamakwavo va Kreste lava hlawuriweke hi ku va pfuna eka ntirho lowukulu wa ku chumayela mahungu lamanene ni ku endla vadyondzisiwa.—Mat. 24:14; 28:19, 20.
12-13. Hi tihi tindlela tin’wana leti lava tinyimpfu tin’wana va swi kombisaka hatona leswaku va seketela vamakwavo va Kreste?
12 Lembe ni lembe, loko mavhiki ma ri karhi ma voyamela eka siku ra Xitsundzuxo, lava tinyimpfu tin’wana va kombisa nseketelo wa vona eka vamakwavo va Kreste hi ku katseka hi xitalo eka tsima ra misava hinkwayo ro rhambela vanhu eXitsundzuxweni. (Vona bokisi leri nge, “ Xana U Wu Lunghiselela Ka Ha Ri eMahlweni Nkarhi Wa Xitsundzuxo?”) Va tlhela va wa va pfuka leswaku va endla malunghiselelo ya ku Xitsundzuxo xi va kona emavandlheni lama nga emisaveni hinkwayo, hambileswi mavandlha man’wana ma nga riki na vona lava dyaka xinkwa ni ku nwa vhinyo. Futhi a va kali va ehleketa kambirhi loko swi ta emhakeni yo pfuna vamakwavo va Kreste. Va swi tiva ku Yesu wa swi vona leswaku loko va seketela vamakwavo va Kreste, swi fana ni loko va seketela yena.—Mat. 25:37-40.
13 Hi swihi swivangelo swin’wana leswi endlaka hi va kona eXitsundzuxweni, swi nga ri na mhaka leswaku hi ni ntshembo wo hanya kwihi?
LESWI ENDLAKA HI NGA XWI EXITSUNDZUXWENI
14. Yehovha na Yesu va hi kombise njhani rirhandzu lerikulu?
14 Hi ba mandla hi vuyelela eka rirhandzu leri Yehovha na Yesu va hi kombiseke rona. Rirhandzu ra Yehovha hi ri vonile hi tindlela to hambanahambana kambe ku ni ndlela yin’we ntsena ya nkoka leyi ri kombisaka kahle rirhandzu rakwe. Hikwalaho ka rirhandzu ra xona lerikulu, Xikwembu xi rhumele N’wana wa xona loyi a tswariweke a ri swakwe leswaku a ta hi fela. (Yoh. 3:16) Ha swi xiya leswaku Yesu na yena hilaha ku fanaka u kombise rirhandzu rakwe lerikulu hi ku ta a ta hi fela hi ku swi rhandza. (Yoh. 15:13) A hi nge swi koti ku tlherisela Yehovha na Yesu eka leswi va hi endleleke swona. Kambe hi nga kombisa ku tlangela hi ndlela leyi hi hanyaka hayona. (Kol. 3:15) Nakambe hi va kona eXitsundzuxweni leswaku hi tsundzuka rirhandzu leri va hi kombiseke rona ni ku tlhela hi va kombisa leswaku ha va rhandza.
15. Hikwalahokayini vahlawuriwa ni lava tinyimpfu tin’wana va yi tlangela swinene nyiko ya nkutsulo?
15 Ha yi tlangela swinene nyiko ya nkutsulo. (Mat. 20:28) Nkutsulo i wa nkoka swinene eka vahlawuriwa hikuva wu endla leswaku va va ni ntshembo. Hikwalaho ka ripfumelo ra vona eka gandzelo ra Kreste, Yehovha u va vula lava lulameke naswona u va endle vana vakwe. (Rhom. 5:1; 8:15-17, 23) Lava tinyimpfu tin’wana na vona va wu tlangela swinene nkutsulo. Hi ku kombisa ripfumelo eka gandzelo ra Kreste, Yehovha u va teka va ri lava baseke naswona va kota ku n’wi endlela ntirho wo hlawuleka, ku engetela kwalaho, va ni ntshembo wo pona ‘nhlomulo lowukulu.’ (Nhlav. 7:13-15) Ndlela yin’wana leyi vahlawuriwa ni lava tinyimpfu tin’wana va swi kombisaka hayona leswaku va wu tlangela nkutsulo, i ku va kona eXitsundzuxweni lembe ni lembe.
16. Hi xihi xivangelo xin’wana lexi endlaka hi va kona eXitsundzuxweni?
16 Xivangelo xin’wana lexi endlaka hi va kona eXitsundzuxweni hileswi hi lavaka ku yingisa Yesu. Swi nga ri na mhaka ku hi ni ntshembo wihi, hinkwerhu hi lava ku yingisa xileriso xa Yesu lexi a xi vuleke hi vusiku lebyi a sunguleke Xitsundzuxo, loko a ku: “Tshamani mi ri karhi mi endla leswi leswaku mi ndzi tsundzuka.”—1 Kor. 11:23, 24.
NDLELA LEYI HI VUYERIWAKA HAYONA HI KU VA KONA EXITSUNDZUXWENI
17. Xitsundzuxo xi hi pfuna njhani leswaku hi tshinela ekusuhi na Yehovha?
17 Hi tshinela eka Yehovha. (Yak. 4:8) Hilaha hi dyondzeke hakona, Xitsundzuxo xi endla hi ehleketa hi ntshembo lowu Yehovha a hi nyikeke wona ni ku anakanyisisa hi rirhandzu rakwe lerikulu. (Yer. 29:11; 1 Yoh. 4:8-10) Loko hi anakanyisisa hi ntshembo lowu hi nga na wona ni rirhandzu leri Xikwembu xi hi kombeke rona, swi endla hi xi rhandza swinene ni ku tiyisa vuxaka bya hina na xona.—Rhom. 8:38, 39.
18. Ku anakanyisisa hi xikombiso xa Yesu swi hi susumetela ku endla yini?
18 Swi endla hi lava ku tekelela xikombiso xa Yesu. (1 Pet. 2:21) Loko masiku ya Xitsundzuxo ma ri karhi ma tshinela, hi hlaya tindzimana ta le Bibeleni leti vulavulaka hi mavhiki ya Yesu yo hetelela a ri laha misaveni, rifu rakwe ni ku pfuxiwa kakwe. Hi siku ra Xitsundzuxo, mbulavulo lowu vaka kona wu hi tsundzuxa rirhandzu ra Yesu. (Efe. 5:2; 1 Yoh. 3:16) Loko hi ri karhi hi hlaya hi xikombiso xa ku tinyiketela ka Yesu ni ku anakanyisisa hi xona, hi susumeteleka ku “famba hilaha yena a fambeke hakona.”—1 Yoh. 2:6.
19. Xana hi nga tshama hi ri karhi hi rhandziwa hi Xikwembu hi ndlela yihi?
19 Hi tiyimisele ku tshama hi ri karhi hi rhandziwa hi Xikwembu. (Yuda 20, 21) Hi rhandziwa hi Xikwembu loko xi yingisa, hi kwetsimisa vito ra xona hi tlhela hi xi tsakisa. (Swiv. 27:11; Mat. 6:9; 1 Yoh. 5:3) Ku va kona eXitsundzuxweni swi hi susumetela ku hanya hi ndlela leyi nga ta kombisa leswaku hi lava ku tshama hi ri karhi hi rhandziwa hi Yehovha!
20. Hi swihi swivangelo leswinene leswi hi endlaka hi va kona eXitsundzuxweni?
20 Swi nga ri na mhaka leswaku hi ni ntshembo wo hanya etilweni kumbe laha misaveni, hi ni swivangelo leswinene swo va kona eXitsundzuxweni. Lembe ni lembe loko hi va kona hi siku rero, hi va hi tsundzuka rifu ra Yesu Kreste loyi hi n’wi rhandzaka swinene. Xa nkoka swinene, hi va hi tsundzuka rirhandzu lerikulu leri Yehovha a hi kombiseke rona hi ku nyikela hi N’wana wakwe leswaku a va nkutsulo. Lembe leri, Xitsundzuxo xi ta va hi Ravuntlhanu, April 15, 2022 nimadyambu. Ha n’wi rhandza swinene Yehovha ni N’wana wakwe, hikwalaho hambi ko ba lexi dumaka, a hi nge xwi eXitsundzuxweni.
RISIMU 16 Dzunisani Yah Hikwalaho Ka N’wana Wakwe
^ Swi nga ri na mhaka leswaku hi ni ntshembo wo hanya etilweni kumbe eparadeyisini laha misaveni, hi swi langutela hi mahlongati ku va kona eXitsundzuxweni lembe ni lembe. Nhlokomhaka leyi, yi ta hlamusela swivangelo swa le Matsalweni leswi hi endlaka hi va kona ni ndlela leyi hi vuyeriwaka hayona.
^ Marito lawa ma hlamuseriwa hi ndlela leyi, “Endlani leswi leswaku mi ndzi tsundzuka” (Today’s English Version) ni hi ndlela leyi, “Swi endleni hi xikongomelo xo ndzi tsundzuka” (The Jerusalem Bible).
^ Leswaku u kuma vuxokoxoko lebyi engetelekeke mayelana ni ntwanano lowuntshwa ni ntwanano wa Mfumo, vona nhlokomhaka leyi nge “Mi Ta Va ‘Mfumo Wa Vaprista’” eka Xihondzo xo Rindza xa October 15, 2014, matl. 15-17.
^ NHLAMUSELO YA XIGA: Xiga lexi nge, vahlawuriwa lava saleke xi kombetela eka Vakreste lava hlawuriweke lava nga kona namuntlha laha misaveni.
^ Leswaku u kuma leswi engetelekeke hi vuprofeta bya tinhonga timbirhi lebyi nga eka Ezekiyele ndzima 37, vona buku leyi nge, Eku Heteleleni Yehovha U Pfuxete Vugandzeri Lebyi Tengeke!, matl. 130-135, ndzim. 3-17.
