1. Hi nga wu heta njhani nkarhi na Yehovha?

 HA SWI rhandza ku heta nkarhi ni vanhu lava hi va rhandzaka. Vatekani lava rhandzanaka va swi rhandza ku xuxa swin’we nimadyambu va ri karhi va teka leti na letiya. Vantshwa va swi rhandza ku dzumba ni vanghana va vona. Nakambe hinkwerhu ha swi rhandza ku va ni vamakwerhu. Kambe xa nkoka ku tlula hinkwaswo, hi wu rhandza ngopfu nkarhi lowu hi wu hetaka na Yehovha. Hi endla tano hi ku khongela eka yena, hi hlaya Rito rakwe, hi anakanyisisa hi swikongomelo swakwe ni hi vumunhu byakwe. Hakunene nkarhi lowu hi wu hetaka na Yehovha i wa risima!—Ps. 139:17.

2. Hi wihi ntlhontlho lowu hi langutanaka na wona?

² Hambileswi swi hi tsakisaka ku khongela ni ku hlaya Bibele kambe ku vula ntiyiso a swi olovi. Hi ni migingiriko yo tala ya siku ni siku, leyi endlaka swi nga olovi ku ti vekela nkarhi wo tiyisa vuxaka bya hina na Yehovha. Nakambe mitirho, vutihlamuleri bya ndyangu ni swin’wana swi nga hi tekela nkarhi wo tala wo khongela, wo dyondza ni ku anakanyisisa.

3. Hi swihi swin’wana leswi nga hi dyelaka nkarhi?

³ Ku ni swin’wana leswi nga hi dyelaka nkarhi loko hi nga swi xiyi. A swi hoxanga ku endla mitirho yin’wana kambe loko hi nga tivoneli, hi nga ti kuma hi hete nkarhi tala eka yona, lowu a hi ta wu tirhisa ku tiyisa vuxaka bya hina na Yehovha. Vuhungasi a byi bihanga naswona ha vuyeriwa swinene eka byona. Kambe loko hi nga tivoneli, hambiloko vuhungasi byi ri byinene byi nga hi dyela nkarhi wo tiyisa vuxaka bya hina na Yehovha.  A hi fanelanga hi rhangisa vuhungasi evuton’wini bya hina.—Swiv. 25:27; 1 Tim. 4:8.

4. Hi ta kambisisa yini sweswi?

⁴ Eka nhlokomhaka leyi, hi ta kambisisa xivangelo lexi endlaka hi rhangisa swilo swa nkoka. Hi ta tlhela hi kambisisa ndlela leyi hi nga wu tirhisaka hayona nkarhi lowu hi wu hetaka na Yehovha ni ndlela leyi hi nga vuyeriwaka hayona.

5. Vaefesa 5:15-17 yi nga va pfuna njhani vantshwa leswaku va swi hlawula kahle leswi va swi lavaka evuton’wini?

⁵ Hlawula kahle evuton’wini. Vantshwa va karhateka hileswaku va ta endla yini evuton’wini bya vona loko va kula. Hi hala tlhelo, mathicara ni maxaka lama nga gandzeriki Yehovha ma nga ha va hlohlotela ku hlongorisa dyondzo leyi tlakukeke, ku va kuma mitirho leyi mali ya kona va nga to nusa kunene. Kambe sweswo swi ta va dyela nkarhi. Lexi tsakisaka, vatswari ni vanghana evandlheni va nga ha khutaza vantshwa leswaku va tirhela Yehovha evuton’wini bya vona. I yini lexi nga pfunaka muntshwa loyi a rhandzaka Yehovha ku teka xiboho xa vutlhari? U ta vuyeriwa swinene loko a hlaya Vaefesa 5:15-17 a tlhela a anakanyisisa hi yona. (Yi Hlaye.) Endzhaku ko hlaya tindzimana leti, muntshwa a nga tivutisa swivutiso leswi: “I yini ‘leswi Yehovha a swi rhandzaka’? Hi swihi swiboho leswi n’wi tsakisaka? Hi swihi swiboho leswi nga ndzi pfunaka ndzi wu tirhisa kahle nkarhi wa mina?” Tsundzuka “masiku ma hombolokile” naswona ku nga ri khale misava leyi lawuriwaka hi Sathana yi ta herisiwa. Hi ta va hi endla kahle loko hi hlawula ku tirhela Yehovha evuton’wini bya hina.

6. Hi xihi xiboho lexi Mariya a xi tekeke naswona hikwalahokayini a xi ri xa vutlhari?

⁶ Rhangisa swilo swa nkoka. Leswaku hi wu tirhisa kahle nkarhi wa hina, mikarhi yin’wana hi ta boheka ku hlawula eka swilo swimbirhi leswi nga hoxangiki ku swi endla. Sweswo hi swi vona eka leswi humeleleke loko Yesu a endzele Mariya na Marta. Leswi Marta a a tsakile ku va a endzeriwe hi Yesu, u lunghiselele swakudya swo tala. Kambe ku hambana ni sweswo, Mariya makwavo a a tshame etlhelo ka Yesu a ri ka ri a rhiye ndleve eka leswi a swi dyondzisa. Leswi a swi endliwa hi Marta a swi nga hoxanga nikatsongo kambe Mariya “u hlawule leswinene.” (Luka 10:38-42) Swi nga endleka Mariya a swi rivarile swakudya leswi a swi dyeke siku rero kambe leswi a swi dyondzeke eka Yesu a nga swi rivalanga. Hilaha Mariya a xi tlangeleke hakona xinkadyana xo va ni Yesu, na hina ha wu tlangela nkarhi wo dyondza hi Yehovha. Hi nga wu tirhisa njhani nkarhi wa hina hi vutlhari?

7. Hikwalahokayini swi ri swa nkoka ku khongela, ku dyondza Bibele ni ku anakanyisisa?

⁷ Twisisa leswaku ku khongela, ku dyondza Bibele ni ku anakanyisisa i xiphemu xa vugandzeri bya hina. Loko hi khongela, hi va hi vulavula ni Tata wa hina wa le matilweni loyi a hi rhandzaka swinene. (Ps. 5:7) Loko hi dyondza Bibele, hi “ta va ni vutivi hi Xikwembu” lexi ku nga Xihlovo xa vutlhari hinkwabyo. (Swiv. 2:1-5) Loko hi anakanyisisa hi leswi hi swi dyondzaka hi vumunhu bya Yehovha, ntumbuluko ni swikongomelo swakwe swi endla hi tsaka hi mikateko leyi hi nga ta yi kuma. Leyi i ndlela leyinene yo tirhisa nkarhi wa wena. Kambe i yini lexi nga hi pfunaka loko hi ri ni nkarhi wutsongo?

8. Hi dyondza yini eka ndlela leyi Yesu a tirhiseke nkarhi wakwe loko a ri emananga?

 ⁸ Hlawula ndhawu leyi nga lo tititi! Xiya xikombiso xa Yesu. Loko a nga se sungula ntirho wakwe wa laha misaveni, u hete masiku ya 40 a ri emananga. (Luka 4:1, 2) Loko a ri emananga wolawo lawa a ya lo tititi, Yesu a kota ku khongela ni ku anakanyisisa hileswi Tata wakwe a a lava a swi endla. Sweswo swi n’wi pfune leswaku a tshama a vambe ngoma eka ndzingo lowu a ta langutana na wona ku nga ri khale. U nga vuyeriwa njhani eka xikombiso xa Yesu? Loko ekaya mi tshama mi tele, swi nga ha tika ku kuma ndhawu yo pfumala huwa. Loko ku ri ni huwa endlwini, humela ehandle. Julie u endla tano loko a lava ku khongela eka Yehovha. Leswi yena ni nuna wakwe va tshamaka eka yindlu yitsongo eFurwa, swa olova ku va va kavanyetana. Julie u ri: “Ndzi huma ndzi ya beriwa hi moya ephakeni masiku hinkwawo. Kwalaho ndzi kota ku va ndzexe, ndzi anakanyisisa ni ku tlhela ndzi khongela eka Yehovha.”

9. Hambileswi Yesu a ri ni swo tala swo swi endla, u swi kombise njhani leswaku u teka vuxaka byakwe na Yehovha byi ri bya nkoka?

⁹ Yesu a a tshama a khomekile. Loko a ri laha misaveni ntshungu a wu n’wi namarhela hinkwako laha a ya kona. Siku rin’wana, ‘vanhu hinkwavo va le mutini a va hlengeletane enyangweni ya yindlu’ va lava ku n’wi vona kambe hambiswiritano, Yesu u tinyike nkarhi wo khongela. Hi siku leri tlhandlamaka hi vurhonga, u ye “endhawini leyi nga riki na vanhu” leswaku a ya vulavula ni Tata wakwe a ri swakwe.—Mar. 1:32-35.

10-11. Eka Matewu 26:40, 41, Yesu u va nyike xitsundzuxo xihi vadyondzisiwa vakwe entangeni wa Getsemani naswona ku endleke yini?

¹⁰ Evusikwini byakwe byo hetelela a ri laha misaveni, Yesu u ye endhawini leyi nga lo tititi, leswaku a ya khongela ni ku anakanyisisa. Ndhawu yoleyo a yi ri entangeni wa Getsemani. (Mat. 26:36) Siku rero, u nyike vadyondzisiwa vakwe xitsundzuxo xa nkoka mayelana ni xikhongelo.

¹¹ Xiya leswi endlekeke. Loko va fika entangeni wa Getsemani, ana se dyambu a ri te lava ra wena, kumbexana a ku ri matakuxa. Yesu u va byele leswaku va ‘tshama va rindzile’ kutani a va siya a ya khongela. (Mat. 26:37-39) Leswi vurhongo byi nga riki na vusiwana, byi va tekile loko a ri eku khongeleni. Loko a va kuma va etlele, Yesu u tlhele a va khutaza leswaku ‘va tshama va rindzile ni ku ya emahlweni va khongela.’ (Hlaya Matewu 26:40, 41.) U swi xiyile leswaku a va tshikilelekile naswona a va karhele. Nakambe a a swi twisisa leswaku “nyama yi tsanile.” Hambiswiritano, u tlhele a va siya a ya khongela kambe loko a vuya, u kume va etlele.—Mat. 26:42-45.

12. Loko hi titwa hi karhele kumbe hi tshikilelekile, hi nga endla yini?

 ¹² Hlawula nkarhi lowunene. Mikarhi yin’wana u nga ha titwa u tshikilelekile kumbe u karhele loko u lava ku khongela. Loko sweswo swi ku endlekerile, swi tive ku a wu wexe. U nga endla yini? Van’wana lava toloveleke ku khongela madyambu man’wana ni man’wana, va vona swi va pfuna ku khongela ri nga si pela ngopfu va nga se khudzehela. Nakambe van’wana va kota ku khongela va lo tshama kumbe loko va khinsamile. Loko u lava ku khongela kambe u titwa u hele matimba, xana u nga endla yini? Phofulela Yehovha. U nga tiyiseka leswaku Tata wa hina loyi a nga ni ntwelavusiwana u ta yi twisisa ndlela leyi u titwaka hayona.—Ps. 139:4.

13. Xana switirhisiwa swa elektroniki swi nga hi kavanyeta njhani loko hi lava ku khongela, ku dyondza Bibele kumbe ku ya etinhlengeletanweni ta vandlha?

¹³ Swi be hi makatla leswi nga ku kavanyetaka loko u lava ku dyondza. A hi Xikhongelo ntsena lexi tiyisaka vuxaka bya hina na Yehovha. Ku dyondza Rito ra Xikwembu ni ku va kona etinhlengeletanweni ta vandlha swi ta hi pfuna ku tshinela ekusuhi ni Xikwembu. Xana swi kona swin’wana leswi u nga swi endlaka leswaku u wu tirhisa kahle nkarhi wo dyondza ni wo ya etinhlengeletanweni ta vandlha? Tivutise, ‘Xana i yini leswi ndzi kavanyetaka loko ndzi ri etinhlengeletanweni ta vandlha kumbe ndzi lava ku dyondza Bibele?’ Xana i ku hlamula foni, ti-email kumbe marungula lawa u rhumeriwaka wona? Vo tala namuntlha va swi tirhisa switirhisiwa leswi. Valavisisi van’wana va vula leswaku hi kavanyeteka hi ku olova loko foni yi ri ekusuhi na hina. Xidyondzeki xin’wana xa psychology xi ri: “U kavanyeteka hi ku olova naswona u va u ri ekule ngopfu.” Loko hi ri etinhlengeletanweni ta muganga ni ta xifundzha, hakanyingi hi komberiwa ku titivata switirhisiwa swa hina swa elektroniki leswaku swi nga kavanyeti van’wana. Xana hi nga endla tano niloko hi ri hexe leswaku swi nga kavanyeti nkarhi wa hina na Yehovha?

14. Hi ku ya hi Vafilipiya 4:6, 7, Yehovha a nga hi pfuna njhani leswaku hi nga kavanyeteki?

¹⁴ Kombela Yehovha a ku pfuna u nga kavanyeteki. Loko u xiya leswaku u sungula ku ehleketa swin’wana loko u ri eku dyondzeni ka Bibele kumbe loko u ri etinhlengeletanweni ta vandlha, kombela Yehovha a ku pfuna. Loko ku ri ni leswi nga ku dyisiki byi rhelela,  swi nga ha ku tikela ku swi ba hi makatla kutani u hlaya Bibele kambe i swa nkoka ku u endla tano. Kombela ku rhula ka Xikwembu leswaku ku rindza mbilu ni ‘mianakanyo ya wena.’—Hlaya Vafilipiya 4:6, 7.

15. U ta vuyeriwa hi yini loko u hlaya Bibele, u khongela ni ku va kona etinhlengeletanweni ta vandlha?

¹⁵ Loko u tinyika nkarhi wo vulavula na Yehovha, u n’wi yingisela ni ku anakanyisisa hi yena u ta vuyeriwa swinene. Njhani? Xo sungula, u ta teka swiboho swa vutlhari. Bibele yi hi tsundzuxa leswaku “loyi a fambaka ni lavo tlhariha u ta tlhariha.” (Swiv. 13:20) Hikwalaho, loko u tinyika nkarhi wo va na Yehovha Xihlovo xa vutlhari, na wena u ta tlhariha. U ta tiva ndlela yo n’wi tsakisa ni ku papalata ku endla swilo leswi nga n’wi twisaka ku vava.

16. Ku tinyika nkarhi wo va na Yehovha swi ta yi antswisa njhani ndlela leyi hi dyondzisaka hayona?

¹⁶ Xa vumbirhi, u ta va mudyondzisi loyi a nga ni vuswikoti. Loko hi dyondza ni xichudeni xa hina xa Bibele, xikongomelo xa hina i ku xi pfuna xi tshinela eka Yehovha. Loko hi tshama hi ri karhi hi vulavula ni Tata wa hina wa le matilweni, ndlela leyi hi n’wi rhandzaka hayona yi ta kula naswona hi ta dyondzisa xichudeni xa hina ku endla tano. Yesu na yena u endle tano. Ndlela leyinene leyi a vulavuleke hi Tata wakwe hayona yi koke rinoko ra vadyondzisiwa vakwe lerova swi endle va rhandza Yehovha.—Yoh. 17:25, 26.

17. Xikhongelo ni ku dyondza Bibele swi nga ri tiyisa njhani ripfumelo ra hina?

¹⁷ Xa vunharhu, ripfumelo ra wena ri ta tiya. Xiya leswi endlekaka loko u kombela nkongomiso, nchavelelo ni nseketelo wa Xikwembu. Mikarhi hinkwayo loko Yehovha a hlamula swikhongelo swa wena, ripfumelo ra wena ri ya ri tiya swinene. (1 Yoh. 5:15) I yini swin’wana leswi nga ku pfunaka u tiyisa ripfumelo ra wena? I ku dyondza Bibele. Tsundzuka leswaku “ripfumelo ri va kona loko ku ri ni leswi twiweke.” (Rhom. 10:17) Kambe ku ni swin’wana leswi hi faneleke hi swi endla leswaku hi tiyisa ripfumelo ra hina. I yini swilo swa kona?

18. Hlamusela ndlela leyi hi nga anakanyisisaka hayona.

¹⁸ Hi fanele hi anakanyisisa hileswi hi swi dyondzaka. Xiya xikombiso xa mutsari wa Pisalema 77. A a tshikilelekile hileswi a ehleketa leswaku Yehovha u n’wi hlambele mavoko swin’we ni Vaisrayelekuloni. Vurhongo a byi nga phahi hileswi a karhateka hi mhaka leyi. (Tindzimana 2-8) U endle yini? U byele Yehovha a ku: ‘Ndzi ta anakanyisisa hi mitirho ya wena hinkwayo ni ku ehleketisisa hi swiendlo swa wena.’ (Ndzimana 12) Swi le rivaleni leswaku mupisalema a a swi tiva leswi Yehovha a swi endleleke vanhu Vakwe enkarhini lowu  nga hundza, hambiswiritano a a tivutisa leswi: “Xana Xikwembu xi rivale ku va ni musa, kumbe, xana ku hlundzuka ka xona ku endle leswaku xi nga ha vi na tintswalo?” (Ndzimana 9) Mupisalema u anakanyisise hi mitirho ya Yehovha ni musa lowu a wu kombeke vanhu vakwe enkarhini lowu nga hundza. (Ndzimana 11) Vuyelo byi ve byihi? Mupisalema u sungule ku swi tshemba hi ku helela leswaku Yehovha a nge va tshiki vanhu Vakwe. (Ndzimana 15) Hilaha ku fanaka, ripfumelo ra wena ri ta tiya loko u anakanyisisa hi ndlela leyi Yehovha a ma pfuneke hayona malandza yakwe ku katsa na wena.

19. I yini swin’wana leswi hi nga vuyeriwaka ha swona loko hi tinyika nkarhi wo va na Yehovha?

¹⁹ Xa vumune lexi nga xa nkoka, ndlela leyi u n’wi rhandzaka hayona Yehovha yi ta kula. Ku tlula swilo hinkwaswo, rirhandzu hi rona ra nkoka leri nga ku susumetelaka ku yingisa Yehovha hi mbilu hinkwayo, ku titsona swo karhi leswaku u n’wi tsakisa ni ku tiyisela miringo. (Mat. 22:37-39; 1 Kor. 13:4, 7; 1 Yoh. 5:3) A xi kona lexi nga xa nkoka ku tlula ku va ni vuxaka lebyinene na Yehovha!—Ps. 63:1-8.

20. U nga wu xava njhani nkarhi wo tiyisa vuxaka bya wena na Yehovha?

²⁰ Tsundzuka leswaku xikhongelo, ku dyondza Bibele ni ku anakanyisisa i xiphemu xa vugandzeri bya hina. Ku fana na Yesu, lava ndhawu leyi nga lo tititi, laha u nga ta va na Yehovha. U nga pfumeleli nchumu wo karhi wu ku kavanyeta. Nakambe kombela Yehovha a ku pfuna u nga kavanyeteki loko u ri karhi u dyondza Bibele, u anakanyisisa niloko u ri etinhlengeletanweni ta vandlha. Loko u wu tirhisa hi vutlhari nkarhi wa wena sweswi, Yehovha u ta ku katekisa hi vutomi lebyi nga heriki eparadeyisini.—Mar. 4:24.