1-2. Hikwalahokayini hi va kona eXitsundzuxweni lembe ni lembe?

 SWI ENDLA malembe ya kwalomu ka 2 000, Yesu a nyikele hi vutomi byakwe hikwalaho ka hina leswaku hi kota ku kuma vutomi lebyi nga heriki. Hi vusiku byakwe byo hetelela a nga si fa, u lerise valandzeri vakwe leswaku va tshama va ri karhi va tsundzuka leswi a a ta va endlela swona hi ku va va endla nkhuvo wo olova va tirhisa xinkwa ni vhinyo.—1 Kor. 11:23-26.

² Hi yingisa xileriso xa Yesu hikuva ha n’wi rhandza swinene. (Yoh. 14:15) Lembe ni lembe hi nkarhi wa Xitsundzuxo, hi khensa leswi Yesu a hi endleleke swona hi ku khongela ni ku anakanyisisa hi ndlela leyi rifu rakwe ri vulaka swona eka hina. Nakambe hi tirha hilaha hi nga kotaka ha kona entirhweni wo chumayela, hi khutaza vo tala hilaha hi nga kotaka ha kona leswaku va va na hina eka xiendlakalo lexi xo hlawuleka. Nakambe hi tiyimisele ku nga pfumeleli nchumu wu hi sivela ku va kona eXitsundzuxweni.

3. Hi ta kambisisa yini eka nhlokomhaka leyi?

³ Eka nhlokomhaka leyi, hi ta kambisisa tindlela tinharhu leti vanhu va Yehovha va endleke matshalatshala lamakulu leswaku va tsundzuka rifu ra Yesu: (1) hi ku landzelerisisa ndlela leyi  Yesu a xi endleke hayona Xitsundzuxo, (2) hi ku rhamba van’wana eXitsundzuxweni na (3) ku va kona eXitsundzuxweni hambiloko swiyimo swi tika.

4. I yini leswi hi swi dyondzaka eXitsundzuxweni lembe ni lembe naswona hikwalahokayini hi nga fanelanga hi swi tekela ehansi? (Luka 22:19, 20)

⁴ Lembe ni lembe eXitsundzuxweni hi yingisela mbulavulo wa le Bibeleni lowu hlamulaka swivutiso swo hlayanyana. Hi dyondza leswaku hikwalahokayini vanhu va lava nkutsulo ni ndlela leyi rifu ra munhu un’we ri endlaka leswaku vanhu vo tala va rivaleriwa swidyoho. Hi tsundzuxiwa leswi xinkwa ni vhinyo swi yimelaka swona ni leswaku i vamani lava faneleke va dya ni ku nwa. (Hlaya Luka 22:19, 20.) Hi tlhela hi anakanyisisa hi mikateko leyi nga ta kumiwa hi lava nga ni ntshembo wo hanya laha misaveni. (Esa. 35:5, 6; 65:17, 21-23) Leswi a hi fanelanga hi swi tekela ehansi. Vanhu va tibiliyoni a va swi tivi leswi naswona a va na mhaka ni ndlela leyi rifu ra Yesu ri nga ra nkoka hayona. A va endli Xitsundzuxo hilaha Yesu a xi endleke hakona. Hikwalahokayini swi ri tano?

5. Endzhaku ka loko vaapostola vo tala va file, ku endleke yini loko swi ta eka ndlela leyi Yesu a xi endleke hayona Xitsundzuxo?

⁵ Endzhaku ka loko vaapostola vo tala va Yesu va file, evandlheni ku sungule ku va ni Vakreste va mavunwa. (Mat. 13:24-27, 37-39) Va “dyondzis[e] tidyondzo leti nga riki ntiyiso leswaku va tikokela vadyondzisiwa.” (Mit. 20:29, 30) Yin’wana ya ‘tidyondzo teto leti nga riki ntiyiso’ leyi Vakreste va mavunwa va sunguleke ku yi dyondzisa hi ku famba ka nkarhi, i ya leswaku Yesu a nga wu nyikelanga miri wakwe “kan’we swi helela kwalaho leswaku a rhwala swidyoho swa vo tala” hilaha Bibele yi vulaka hakona. Kambe va dyondzise leswaku gandzelo rakwe ri fanele ri nyikeriwa hi ku phindhaphindha. (Hev. 9:27, 28) Namuntlha vanhu vo tala va yi tshemba dyondzo leyi ya mavunwa. Nkarhi ni nkarhi va hlengeletana etikerekeni, mikarhi yin’wana masiku hinkwawo leswaku va tlangela leswi va swi vitanaka “Gandzelo ra Masa.” b Tikereke tin’wana a ti ri tlangeli mikarhi hinkwayo rifu ra Yesu kambe swirho swo tala swa tona a swi swi twisisi leswi gandzelo ra Yesu ri vulaka swona. Van’wana va nga ha tivutisa leswi, ‘Xana rifu ra Yesu ri nga endla leswaku ndzi rivaleriwa swidyoho?’ Hikwalahokayini va vutisa xivutiso lexi? Mikarhi yin’wana, hileswi va kuceteriweke hi vanhu lava nga swi tshembiki leswaku gandzelo ra Yesu ri endla swi koteka leswaku hi rivaleriwa swidyoho. Xana valandzeri va Yesu va ntiyiso va yi tamele njhani mhaka leyi?

6. I yini leswi ntlawa wa swichudeni swa Bibele wu swi twisiseke hi 1872?

⁶ Hi va-1870, ntlawa wa swichudeni swa Bibele lowu a wu rhangeriwa hi Charles Taze Russell wu sungule ku kambisisa Matsalwa hi vukheta. A wu lava ku tiva ntiyiso hi nkoka wa xitlhavelo xa Yesu ni ndlela leyi rifu rakwe ri faneleke ri tsundzukiwa hayona. Hi 1872, se a wu swi twisisa leswi Bibele yi swi vulaka leswaku Yesu u ve nkutsulo wa vanhu hinkwavo. A wu tshamanga hi yona mhaka leyi. Wu byele vanhu hi ku tirhisa tibuku, maphephahungu ni timagazini. Hi ku hatlisa, ntlawa lowu wu tekelele Vakreste vo sungula hi ku hlengeletana kan’we hi lembe leswaku wu khoma Xitsundzuxo.

7. Ndzavisiso lowu endliweke hi swichudeni swa Bibele wu hi vuyerisa njhani?

 ⁷ Namuntlha ha vuyeriwa hikwalaho ka ndzavisiso lowu endliweke hi Vakreste vo tshembeka emalembeni yo tala lama hundzeke. Njhani? Hi ku pfuniwa hi Yehovha, hi kota ku twisisa ntiyiso mayelana ni gandzelo ra Yesu ni leswi ri swi hetisisaka. (1 Yoh. 2:1, 2) Hi tlhele hi dyondza leswaku Bibele yi vulavula hi mitlawa yimbirhi ya vanhu lava tsakisaka Xikwembu ni ndlela leyi va nga ta vuyeriwa hayona, ku nga lava nga ta hanya etilweni va nga fi ni van’wana va timiliyoni lava nga ta hanya hilaha ku nga heriki laha misaveni. Hi ya hi rhandza Yehovha loko hi kambisisa ndlela leyi a hi rhandzaka hayona ni ndlela leyi hi vuyeriwaka hayona eka xitlhavelo xa Yesu. (1 Pet. 3:18; 1 Yoh. 4:9) Ku fana ni vamakwerhu vo tshembeka enkarhini lowu hundzeke, hi rhamba van’wana leswaku va va na hina loko hi endla Xitsundzuxo hi ndlela leyi Yesu a xi endleke hayona.

8. I yini leswi vanhu va Yehovha va swi endleke leswaku va rhamba vanhu eXitsundzuxweni? (Vona xifaniso.)

⁸ I khale vanhu va Yehovha va ri karhi va rhamba vanhu eXitsundzuxweni. Eku sunguleni ka 1881, vamakwerhu va le United States va rhambiwile eka xiendlakalo xexo xo hlawuleka ekaya ra makwerhu eAllegheny, Pennsylvania. Hi ku famba ka nkarhi, vandlha rin’wana ni rin’wana a ri khoma Xitsundzuxo. Hi March 1940, vahuweleri va byeriwe leswaku va nga rhamba vanhu hinkwavo lava tsakelaka ensin’wini ya ka vona. Hi 1960, a ku ri ro sungula loko Bethele yi nyika mavandlha swirhambo leswi kandziyisiweke. Ku sukela nkarhi wolowo, ku fambisiwe swirhambo swa Xitsundzuxo swa tibiliyoni. Hikwalahokayini hi  endla matshalatshala leswaku hi rhamba van’wana?

9-10. Matshalatshala lawa hi ma endlaka yo rhamba vanhu eXitsundzuxweni ma vuyerisa vamani? (Yohane 3:16)

⁹ Xivangelo xin’wana lexi endlaka hi rhamba vanhu eXitsundzuxweni hileswi hi lavaka vanhu lava taka ro sungula va dyondza ntiyiso mayelana ni leswi Yehovha na Yesu va hi endleleke swona. (Hlaya Yohane 3:16.) Hi tshemba leswaku leswi va nga ta swi twa ni ku swi vona eXitsundzuxweni, swi ta endla va lava ku dyondza leswi engetelekeke ni ku va malandza ya Yehovha. Kambe ni van’wana va vuyeriwa.

¹⁰ Hi tlhela hi rhamba ni lava nga ha n’wi tirheliki Yehovha. Hi endla tano leswaku hi va tsundzuxa leswaku Xikwembu xa ha va rhandza. Vo tala va va kona naswona ha tsaka loko hi va vona. Loko va va kona eXitsundzuxweni, swi va tsundzuxa ndlela leyi a va tiphina hayona loko va ha tirhela Yehovha. Xiya ntokoto wa Monica. c U tlhele a va muhuweleri hi nkarhi wa ntungu wa COVID-19. Endzhaku ka loko a ve kona eXitsundzuxweni xa 2021, u te: “Lexi i Xitsundzuxo xo hlawuleka eka mina. A ku ri ro sungula ndzi chumayela vanhu ni ku va rhambela eXitsundzuxweni endzhaku ka malembe ya 20. Ndzi tirhe hi matimba leswaku ndzi rhamba vanhu hikuva ndzi swi tlangela swinene leswi Yehovha na Yesu va ndzi endleleke swona.” (Ps. 103:1-4) Swi nga ri na mhaka leswaku vanhu va swi amukela swirhambo swa hina kumbe doo, hi endla leswi hi nga swi kotaka leswaku hi rhamba vanhu eXitsundzuxweni hi ku tiva leswaku Yehovha wa ma tlangela matshalatshala ya hina.

11. Yehovha u ma katekise njhani matshalatshala ya hina yo rhambela vanhu eXitsundzuxweni? (Hagayi 2:7)

¹¹ Yehovha u ma katekisile swinene matshalatshala ya hina yo rhambela vanhu eXitsundzuxweni. Hi 2021, hambileswi a ku ri ni swipimelo hikwalaho ka ntungu wa COVID-19, ku ve ni vanhu va 21 367 603 eXitsundzuxweni. Yoleyo i nhlayo leyi andzisiweke kambirhi ni hafu ya Timbhoni ta Yehovha emisaveni hinkwayo! I ntiyiso leswaku Yehovha a ngo tsakisiwa hi nhlayo ntsena. Wa khathala hi un’wana ni un’wana la vaka kona. (Luka 15:7; 1 Tim. 2:3, 4) Ha tiyiseka leswaku hi ku rhamba vanhu eXitsundzuxweni, Yehovha wa hi pfuna leswaku hi kuma vanhu va timbilu letinene.—Hlaya Hagayi 2:7.

12. Hi swihi swiyimo leswi nga endlaka swi tika leswaku hi va kona eXitsundzuxweni? (Vona xifaniso.)

¹² Yesu u vule leswaku emasikwini yo hetelela a hi ta langutana ni mixaka hinkwayo ya swiyimo swo tika ku nga ku kanetiwa hi ndyangu, ku xanisiwa, tinyimpi, mintungu ni swin’wana swo tala. (Mat. 10:36; Mar. 13:9; Luka 21:10, 11) Mikarhi yin’wana swiyimo leswi swi endla swi nga olovi leswaku hi tsundzuka rifu ra Yesu. I yini leswi vamakwerhu va swi endleke leswaku va hlula swihinga sweswo naswona Yehovha u va pfune njhani?

13. Yehovha u n’wi katekise njhani Artem hikwalaho ka xivindzi ni ku tiyimisela kakwe ku khoma Xitsundzuxo loko a ri ejele?

¹³ Ejele. Vamakwerhu lava pfaleriweke hikwalaho ka ripfumelo ra vona va endla leswi va nga swi kotaka leswaku va tsundzuka rifu ra Yesu. Xiya ntokoto wa Artem. Hi Xitsundzuxo xa 2020, a a pfaleriwe exitokisini lexitsongo lexi kotaka ku teka vanhu va ntlhanu ntsena. Hambileswi a a pfaleriwile, u swi kotile ku kuma swilo leswi a a ta swi tirhisa tanihi swifanekiselo swa Xitsundzuxo naswona a a hlele ku tinyikelela mbulavulo wa Xitsundzuxo. Kambe lava a a pfaleriwe na vona a va dzaha ni ku phyandlasela nhlambha. Xana u endle yini? U va kombele leswaku va  nga dzahi ni ku rhuketela ku ringana awara. Artem u hlamarile loko va pfumela ku nga dzahi kumbe ku rhuketela hi nkarhi wa Xitsundzuxo. U ri: “Ndzi kombele ku va hlamusela hi Xitsundzuxo.” Hambileswi va vuleke leswaku a va nga lavi ku twa nchumu hi Xitsundzuxo kambe endzhaku ko twa ni ku vona Artem a ri karhi a fambisa Xitsundzuxo, va n’wi vutise hi swona.

14. Vanhu va Xikwembu va endle matshalatshala wahi hambileswi a ku ri ni ntungu wa COVID-19?

¹⁴ Ntungu wa COVID-19. Loko ku sungula ntungu lowu, vanhu va Yehovha a va nga swi koti ku va kona hi xiviri eXitsundzuxweni. Kambe sweswo a swi va sivelanga ku khoma Xitsundzuxo. d Mavandlha lama nga na Inthanete ma khome Xitsundzuxo hi vhidiyo. Kambe ku vuriwa yini hi vanhu va timiliyoni lava nga riki na yona Inthanete? Ematikweni man’wana, ku endliwe malunghiselelo ya leswaku mbulavulo wu haxiwa eka thelevhixini kumbe eka rhadiyo. Nakambe, marhavi ma rhekhode mbulavulo wolowo hi tindzimi to tlula 500 leswaku hambi ku ri lava nga ekule va nga lahlekeriwi  hi Xitsundzuxo. Vamakwerhu va hlele leswaku mivulavulo leyi yi nyikiwa lava a va yi lava.

15. U dyondza yini eka xichudeni xa Bibele lexi vuriwaka Sue?

¹⁵ Ku kanetiwa endyangwini. Eka van’wana, ntlhontlho lowukulu lowu va sivelaka ku va kona eXitsundzuxweni i ku kanetiwa hi vandyangu. Xiya ntokoto wa xichudeni xa Bibele lexi vuriwaka Sue. Hi 2021, hi siku ra le mahlweni ka Xitsundzuxo, Sue u byele mudyondzisi wakwe wa Bibele leswaku a nge vi kona eXitsundzuxweni hikuva ekaya va n’wi kaneta. Mudyondzisi wakwe u hlaye Luka 22:44. Endzhaku ka sweswo, u n’wi hlamusele leswaku loko hi hlangana ni swiphiqo hi fanele hi tekelela Yesu hi ku khongela eka Yehovha ni ku N’wi tshemba hi ku helela. Hi siku leri landzeleke, Sue u lunghiselele swifanekiselo ni ku hlalela Ndzimana ya Siku yo hlawuleka eka jw.org. Nimadyambu loko a ri yexe ekamareni rakwe, u ve kona eXitsundzuxweni hi ku tirhisa foni. Endzhaku ka sweswo, Sue u tsalele mudyondzisi wakwe a ku: “Tolo u ndzi khutazile swinene. Ndzi endle leswi ndzi nga swi kotaka leswaku ndzi va kona eXitsundzuxweni naswona Yehovha u ndzi pfunile. Ndzi tsake ngopfu naswona ndzi pfumala ni marito yo khensa!” Xana u ehleketa leswaku Yehovha a nga ku pfuna loko wo va exiyin’weni lexi fanaka?

16. Hikwalahokayini hi tshemba leswaku Yehovha u ta katekisa matshalatshala ya hina ya leswaku hi va kona eXitsundzuxweni? (Varhoma 8:31, 32)

¹⁶ Yehovha wa tsaka swinene loko hi endla matshalatshala leswaku hi tsundzuka rifu ra Yesu. Hi nga tiyiseka leswaku u ta hi katekisa loko hi kombisa leswaku ha swi khensa leswi a hi endleleke swona. (Hlaya Varhoma 8:31, 32.) A hi tiyimiseleni ku va kona eXitsundzuxweni lembe leri ni ku endla leswi hi nga swi kotaka leswaku hi katseka hi xitalo entirhweni wo chumayela hi nkarhi wa Xitsundzuxo.