1. Hikwalahokayini siku ra Xitsundzuxo ri ri ra nkoka swinene elembeni? (Luka 22:​19, 20)

 SIKU ra Xitsundzuxo xa rifu ra Kreste i siku ra nkoka swinene elembeni eka vanhu va Yehovha. Hi xona xiendlakalo xi ri xin’we lexi hi ku kongoma Yesu a leriseke valandzeri vakwe leswaku va xi endla. (Hlaya Luka 22:​19, 20.) Ku ni swivangelo swo hlaya leswi endlaka hi xi langutela hi mahlongati Xitsundzuxo. A hi kambisiseni swin’wana swa swona.

2. I swivangelo swihi leswi endlaka hi swi langutela hi mahlongati ku ya eXitsundzuxweni?

² Xitsundzuxo xi hi pfuna ku anakanyisisa hi nkoka wa nkutsulo. Xi hi pfuna hi kota ku vona tindlela leti nga hi pfunaka hi tlangela xitlhavelo xa Yesu. (2 Kor. 5:​14, 15) Xi tlhela xi hi pfuna leswaku hi tiphina hi ku “khutazana” ni vamakwerhu. (Rhom. 1:12) Lembe ni lembe, ku ta vanhu vo tala lava tshikeke ku ya etinhlengeletanweni ta vandlha. Van’wana va susumeteleka ku tlhelela eka Yehovha hileswi va amukeriwaka hi mandlamambirhi. Kasi vanhu vo tala va susumeteleka ku famba endleleni leyi yisaka evuton’wini lebyi nga heriki hileswi va tsakisiwaka hi leswi va swi vonaka ni ku swi twa. Hinkwaswo leswi, swi endla Xitsundzuxo xi va xo hlawuleka eka hina!

3. Xitsundzuxo xi hi pfuna njhani leswaku hi va ni vun’we ni vamakwerhu emisaveni hinkwayo? (Nakambe vona xifaniso.)

³ Ehleketa ndlela leyi Xitsundzuxo xi endlaka vamakwerhu emisaveni hinkwayo va va ni vun’we hayona. Timbhoni ta Yehovha emisaveni hinkwayo ti hlengeletana swin’we loko dyambu ri pela. Hinkwerhu hi yingisela mbulavulo lowu hlamuselaka ndlela leyi nkutsulo wu nga wa nkoka hayona. Hi yimbelela tinsimu  timbirhi to dzunisa ivi ku fambisiwa xinkwa ni vhinyo ni ku tlhela hinkwerhu hi vula hi ku, “amen” emakumu ka swikhongelo swa mune. Hi tiawara ta 24 ntsena, mavandlha hinkwawo ma endla nchumu lowu fanaka. Ehleketa ntsako lowu Yehovha na Yesu va vaka na wona loko va hi vona hinkwerhu hi va dzunisa hi ndlela leyi, loko hi endla Xitsundzuxo.

4. Hi ta bula hi yini eka nhlokomhaka leyi?

⁴ Eka nhlokomhaka leyi, hi ta bula hi swivutiso leswi: Hi nga endla yini leswaku timbilu ta hina ti lunghekela Xitsundzuxo? Hi nga va pfuna njhani van’wana leswaku Xitsundzuxo xi va vuyerisa? Hi nga va pfuna njhani lava tshikeke ku ta etinhlengeletanweni ta vandlha? Tinhlamulo ta swivutiso leswi ti ta hi pfuna ku lunghekela xiendlakalo lexi xo kwetsima.

HI NGA ENDLA YINI LESWAKU TIMBILU TA HINA TI LUNGHEKELA XITSUNDZUXO?

5. (a) Hikwalahokayini hi fanele hi anakanyisisa hi nkoka wa nkutsulo? (Pisalema 49:​7, 8) (b) U dyondze yini eka vhidiyo leyi nge, Hikwalaho Ka Yini Yesu A File?

⁵ Yin’wana ya tindlela ta nkoka leyi nga hi pfunaka hi lunghekela Xitsundzuxo, i ku anakanyisisa hi nkoka wa gandzelo ra nkutsulo ra Yesu Kreste. Hina hi hexe, a hi nga ta pfuka hi swi kotile ku tikutsula eka xidyoho ni rifu. (Hlaya Pisalema 49:​7, 8; nakambe vona vhidiyo leyi nge, Hikwalaho Ka Yini Yesu A File?) a Hambileswi a swi ta lava leswaku Yehovha ni N’wana wakwe va titsona swo tala, U nyikele hi N’wana wakwe leswaku a hi ponisa. (Rhom. 6:23) Loko hi ya hi anakanyisisa hi leswi Yehovha na Yesu va titsoneke swona hikwalaho ka hina, hi ta ya hi wu tlangela swinene nkutsulo. Hi ta bula hi swilo swi nga ri swingani leswi Yehovha na Yesu va hi endleleke swona leswaku hi kuma nkutsulo. Kambe xo sungula, i yini leswi katsekeke leswaku hi kutsuriwa?

6. I yini leswi katsekeke leswaku hi kuma nkutsulo?

⁶ Nkutsulo i mali leyi hakeriwaka leswaku ku tlhela ku xaviwa nchumu wo karhi. Munhu wo sungula Adamu u vumbiwe a nga ri na xidyoho. Loko a dyoha, yena ni vana vakwe va lahlekeriwe hi njombo ya ku hanya hilaha ku nga heriki. Yesu u nyikele hi vutomi byakwe lebyi nga riki na xidyoho leswaku a xava leswi lahlekeleke Adamu. Loko Yesu a ri laha misaveni, “a nga xi endlanga xidyoho hambi ku ri vukanganyisi a byi kumekanga enon’wini wakwe.” (1 Pet. 2:22) Loko a fa, a a nga ri na xidyoho ku fana na Adamu loko a nga si dyoha kutani hi ku va a nyikela hi vutomi byakwe, Yesu u kote ku xava vutomi lebyi lahlekeleke Adamu.—1 Kor. 15:45; 1 Tim. 2:6.

7. Hi yihi miringo leyi Yesu a langutaneke na yona loko a ri laha misaveni?

⁷ Yesu u yingise Tata wakwe wa le tilweni hi ku helela hambiloko a langutane ni miringo yo tala laha misaveni. Loko a ha ri n’wana, Yesu u boheke ku tiveka ehansi ka vatswari vakwe lava a va endla swihoxo, hambiloko yena a nga swi endli. (Luka 2:51) Kasi loko a ri muntshwa, kumbexana u boheke ku langutana ni swilo leswi a swi ta n’wi endla a nga yingisi kumbe ku tshembeka. Loko Yesu a kurile, u boheke ku lwisana ni miringo ya Sathana Diyavulosi, ku katsa ni leyi Sathana a n’wi byeleke hi ku kongoma leswaku a tshika ku tshembeka eka Xikwembu. (Mat. 4:​1-11) Sathana a a tiyimisele ku dyohisa Yesu leswaku a tsandzeka ku humesa nkutsulo.

8. Hi yihi miringo yin’wana leyi Yesu a yi tiyiseleke?

⁸ Loko Yesu a ri eka ntirho wakwe wo chumayela laha misaveni, u tiyisele miringo yo tala. Valala vakwe va n’wi xanisile ni ku tlhela va ringeta ku n’wi dlaya. (Luka 4:​28, 29; 13:31) A a boheka ku tiyisela swihoxo swa valandzeri vakwe. (Mar. 9:​33, 34) Loko a ri karhi a konanisiwa leswaku a gweviwa, u xanisiwile ni ku hlekuriwa. Kutani u dlayiwe hi ndlela yo vava ni leyi nyumisaka. (Hev. 12:​1-3) U boheke ku tiyisela  ndzingo wo hetelela a ri yexe, a nga sirheleriwi hi Yehovha. b—Mat. 27:46.

9. Hi titwa njhani hi xitlhavelo lexi Yesu a xi nyikeleke? (1 Petro 1:8)

⁹ Swi le rivaleni leswaku nkutsulo wu n’wi koxe swo tala Yesu. Xana leswi a swi endli hi n’wi rhandza swinene loko hi anakanyisisa hi leswi a hi endleleke swona hi ku swi rhandza?—Hlaya 1 Petro 1:8.

10. Xana nkutsulo wu n’wi koxe yini Yehovha?

¹⁰ Ku vuriwa yini hi Yehovha? I yini leswi a titsoneke swona leswaku Yesu a kota ku kutsula vanhu? A ku na tatana na n’wana lava rhandzanaka swinene ku tlula ndlela leyi Yehovha na Yesu va rhandzanaka hayona. (Swiv. 8:30) Ehleketa ndlela leyi Yehovha a titweke hayona loko a vona Yesu a langutana ni miringo yo tala loko a ri laha misaveni. A swi kanakanisi leswaku Yehovha swi n’wi twise ku vava loko a vona N’wana wakwe a khomiwa ku biha, a ringiwa ni ku kanetiwa.

11. Vula xikombiso xa ndlela leyi Yehovha a nga vaka a titwe hayona loko Yesu a dlayiwa.

¹¹ Mutswari loyi a loveriweke hi n’wana u ri tiva kahle gome lerikulu leri vangiwaka hi sweswo. Hi ni ripfumelo lerikulu ra leswaku vafi va ta pfuxiwa kambe ripfumelo rero a ri ku susi ku vava loku hi ku twaka loko hi loveriwile. Xikombiso lexi xi hi pfuna ku twisisa ndlela leyi Yehovha a nga vaka a titwe hayona loko a vona N’wana wakwe loyi a n’wi rhandzaka a xaniseka ni ku fa hi ximun’wana xa 33 C.E. c—Mat. 3:17.

12. Hi nga endla yini loko Xitsundzuxo xi ri karhi xi tshinela?

¹² Ku sukela sweswi ku ya fika hi nkarhi wa Xitsundzuxo, swi nga va njhani eka dyondzo ya wena ya munhu hi yexe kumbe eka Vugandzeri bya Ndyangu, mi dyondza leswi engetelekeke hi nkutsulo? Tirhisa buku ya Nkongomiso Wo Endla Ndzavisiso Wa Timbhoni Ta Yehovha (loko yi kumeka hi ririmi ra wena) kumbe mikandziyiso yin’wana ya le Bibeleni leswaku u dyondza swo tala hi nkutsulo. d Nakambe tiyiseka leswaku u fambisana ni Xiyimiso Xa Ku Hlaya Ka Bibele Ka Xitsundzuxo lexi kumekaka eka Mahanyelo Ni Ntirho Wa Hina Wo Chumayela—Xibukwana Xa Nhlengeletano. Hi siku ra Xitsundzuxo, u nga rivali ku hlalela Vugandzeri bya Nimixo byo hlawuleka. Loko hi lunghiselela timbilu ta hina leswaku ti vuyeriwa hi siku ra Xitsundzuxo, hi ta kota ku pfuna ni van’wana leswaku va vuyeriwa.—Ezra 7:10.

 PFUNA VAN’WANA LESWAKU VA VUYERIWA EXITSUNDZUXWENI

13. Hi wihi nchumu wo sungula lowu hi nga wu endlaka leswaku hi pfuna van’wana va vuyeriwa eXitsundzuxweni?

¹³ Hi nga va pfuna njhani van’wana leswaku Xitsundzuxo xi va vuyerisa? Leswi hi nga swi endlaka ku sungula i ku va rhamba. Ku engetela eka ku rhamba vanhu lava hi hlanganaka na vona loko hi chumayela, hi nga tlhela hi rhamba ni vanhu lava hi va tivaka. Va nga ha katsa maxaka, vatirhikulorhi, vadyondzikulorhi ni van’wana. Hambiloko hi nga ri ni swirhambo leswi eneleke leswi kandziyisiweke, hi nga va rhumela swona hi tifoni. Swi nga hi hlamarisa ku vona nhlayo ya vanhu lava nga ta hlawula ku ta!—Ekl. 11:6.

14. Vula xikombiso xa ndlela leyi swi nga swa nkoka hayona ku nyika munhu xirhambo hi ku kongoma.

¹⁴ Loko u rhamba munhu eXitsundzuxweni, swi nga n’wi susumetela leswaku a va kona. Siku rin’wana makwerhu wa xisati loyi a nga ni nuna loyi a nga riki Mbhoni, u hlamarile loko nuna wakwe a n’wi byela leswaku u lava ku famba na yena eXitsundzuxweni. Hikwalahokayini a hlamarile? Hikuva se a swi ri ni malembe a ri karhi a ringeta ku n’wi rhamba eXitsundzuxweni kambe a a nga si tshama a wu veka. A ku cince yini sweswi? Nuna wakwe u te: “Ndzi nyikiwe xirhambo hi ku kongoma.” Xirhambo xexo u nyikiwe hi nkulu loyi a va tolovelanile. Nuna wa makwerhu loyi u ve kona eXitsundzuxweni xa lembe rero ni man’wana lama landzeleke.

15. I yini leswi hi faneleke hi swi tsundzuka loko hi rhambela vanhu eXitsundzuxweni?

¹⁵ Tsundzuka leswaku lava hi va rhambaka va nga ha va ni swivutiso, ngopfungopfu loko va nga si tshama va ta etidyondzweni. Swi nga va kahle ku rindzela swivutiso swa vona ni ku lunghekela ku swi hlamula. (Kol. 4:6) Hi xikombiso, van’wana va nga ha tivutisa leswi: ‘Ku ta endleka yini kwale?’ ‘I xiendlakalo xo leha nkarhi wo tanihi kwihi?’ ‘Xana ku ambariwa njhani?’ ‘Xana ku ngheniwa hi mali?’ ‘Xana ku humesiwa nhlengo?’ Loko hi rhambe munhu wo karhi eXitsundzuxweni, hi nga ha n’wi vutisa leswi, “Xana u ni swivutiso swo karhi?” ivi hi n’wi hlamula loko a ri na swona. Leswaku hi n’wi  pfuna a twisisa ndlela leyi hi khomaka tinhlengeletano ta vandlha hayona, hi nga tlhela hi tirhisa vhidiyo leyi nge, Tsundzuka Rifu Ra Yesu ni leyi nge, Ku Endliwa Yini eHolweni Ya Mfumo? Nakambe dyondzo 28 ya buku leyi nge, Tiphine Hi Vutomi Hilaha Ku Nga Heriki! yi na tinhla to tala letinene leti hi nga bulaka na yena ha tona.

16. I swivutiso swihi leswi lava teke eXitsundzuxweni va nga hi vutisaka swona?

¹⁶ Endzhaku ka loko vanhu lava tsakelaka va tile eXitsundzuxweni, va nga ha va ni swivutiso swin’wana. Va nga ha tivutisa leswaku hikwalahokayini swifanekiselo swi dyiwe hi vanhu vatsongo kumbe swi nga dyiwanga hi munhu. Va nga ha tlhela va hi vutisa leswaku hi xi endla kangani Xitsundzuxo. Va nga ha lava ku tiva loko tinhlengeletano hinkwato ta Timbhoni ta Yehovha ti khomiwa hi ndlela leyi fanaka. Hambiloko mbulavulo wa Xitsundzuxo wu hlamule swivutiso swa vona swo tala, vanhu lava taka ro sungula eXitsundzuxweni va nga ha lava ku hlamuseriwa swo tala. Nhlokomhaka leyi kumekaka eka jw.org leyi nge, “Hikwalaho Ka Yini Timbhoni Ta Yehovha Ti Nga Endli Xilalelo Xa Hosi Ku Fana Ni Tikereke Tin’wana?” yi nga hi pfuna leswaku hi hlamula swin’wana swa swivutiso swa vona. Hi lava ku endla hinkwaswo leswi hi nga swi kotaka loko Xitsundzuxo xi nga si fika, hi nkarhi wa xona ni le ndzhaku ka xona ku pfuna ‘lava kombisaka leswaku va lava ku kuma vutomi lebyi nga heriki’ leswaku va vuyeriwa eka xiendlakalo lexi.—Mit. 13:48.

PFUNA LAVA TSHIKEKE KU YA ETINHLENGELETANWENI TA VANDLHA

17. Vakulu va nga va pfuna njhani lava tshikeke ku ta etidyondzweni? (Ezekiyele 34:​12, 16)

¹⁷ Hi nkarhi wa Xitsundzuxo, vakulu va nga va pfuna njhani lava tshikeke ku ya etidyondzweni? Hi ku va kombisa leswaku wa khathala ha vona. (Hlaya Ezekiyele 34:​12, 16.) Loko Xitsundzuxo xi nga si fika, tiyiseka leswaku u endzela vo tala hilaha swi nga kotekaka hakona. Va tiyisekise leswaku wa va rhandza ni leswaku u navela ku va pfuna hilaha u nga kotaka hakona. Va rhambe eXitsundzuxweni. Loko va ta, va amukele hi ndlela ya rirhandzu. Loko Xitsundzuxo xi hundzile, nkarhi ni nkarhi burisana ni vamakwerhu lava vo rhandzeka naswona u va  pfuna hi swin’wana ni swin’wana leswi lavekaka leswaku va kota ku tlhelela eka Yehovha.—1 Pet. 2:25.

18. Hinkwerhu hi nga va pfuna njhani lava tshikeke ku ta etidyondzweni? (Varhoma 12:10)

¹⁸ Loko lava tshikeke ku ta etidyondzweni va tile eXitsundzuxweni, vamakwerhu hinkwavo evandlheni va nga swi kota ku va pfuna. Njhani? Hi ku va kombisa rirhandzu, musa ni ku va xixima. (Hlaya Varhoma 12:10.) Tsundzuka leswaku vamakwerhu lava, lava nga tinyimpfu ta risima swi nga endleka a swi va tikela ku tlhelela evandlheni. Kumbexana a va chava leswaku a va nge amukeriwi. e Hikwalaho, papalata ku va endla va titwa va nga tshunxekanga hi ku va vutisa swivutiso leswi nga ta va khomisa tingana kumbe ku va tlhava hi marito. (1 Tes. 5:11) Vamakwerhu lava i va pfumerikulorhi. Ha tsaka ku tlhela hi gandzela Xikwembu swin’we na vona.—Ps. 119:176; Mit. 20:35.

19. Hi vuyeriwa njhani loko hi tsundzuka rifu ra Yesu?

¹⁹ Ha swi tlangela leswi Yesu a hi byeleke leswaku hi tsundzuka rifu rakwe lembe ni lembe naswona ha wu twisisa nkoka wa sweswo. Loko hi va kona eXitsundzuxweni, ha vuyeriwa hina ni van’wana hi tindlela to tala. (Esa. 48:​17, 18) Hi ya hi va rhandza swinene Yehovha na Yesu. Hi kombisa ndlela leyi hi swi tlangelaka hayona leswi va hi endleleke swona. Vuxaka bya hina ni vamakwerhu bya tiya. Hi nga tlhela hi pfuna van’wana leswaku va dyondza leswi va nga swi endlaka leswaku va tiphina hi mikateko leyi hi yi kumaka hikwalaho ka nkutsulo. A hi endleni hinkwaswo leswi hi nga swi kotaka leswaku hi lunghekela Xitsundzuxo xa lembe leri, ku nga siku ra nkoka swinene elembeni!