1-2. Malandza yo tshembeka ya Yehovha ma nga langutana ni mitlhontlho yihi?

 MAKHOMBO lama tsemaka nhlana ma nga cinca vutomi bya hina hi ku copeta ka tihlo. Hi xikombiso, makwerhu wo tshembeka loyi a vuriwaka Luis a u byeriwe leswaku u ni vuvabyi bya khensa leyi nga tolovelekangiki. Dokodela u n’wi byele leswaku u saleriwe hi tin’hweti ti nga ri tingani to hanya. Monika ni nuna wakwe a va khomekile hi ku tirhela Yehovha. Hiloko siku rin’wana Monika a kuma leswaku nuna wakwe loyi a nga nkulu, a a hanya vutomi bya lumpfana ku ringana malembe yo tala. Olivia, loyi a nga makwerhu waxisati loyi a nga tekiwangiki, u boheke ku rhurha ekaya rakwe hikwalaho ka xihangu xa matimba lexi a xi ri eku teni. Loko a tlhelela ekaya u kume leswaku xihangu xi onhe yindlu yakwe. Vutomi bya vamakwerhu lava byi cince hi xitshuketa. Xana na wena u tshame u va eka xiyimo xa vona? Xana u tshame u va eka xiyimo lexi hi xinkarhana xi cinceke vutomi bya wena hi ku helela?

² Tanihi malandza yo tshembeka ya Yehovha, hi langutana ni swiyimo swo tika leswi welaka vanhu hinkwavo. Hi nga tlhela hi kanetiwa kumbe hi xanisiwa hi vanhu lava vengaka vanhu va Xikwembu. Hambileswi Yehovha a nga hi sirheleliki eka makhombo wolawo, u tshembisa ku hi pfuna. (Esa. 41:10) Hi ku pfuniwa hi yena, hi nga swi kota ku tshama hi tsakile, hi endla swiboho leswinene ni ku tshembeka eka yena hambiloko hi ri eka swiyimo swo tika swinene. Eka nhlokomhaka leyi, hi ta kambisisa tindlela ta mune leti Yehovha a hi pfunaka ha tona loko hi ri eka swiyimo swo tika. Hi ta tlhela hi kambisisa leswi hi faneleke hi swi endla leswaku mpfuno wakwe wu hi vuyerisa.

 YEHOVHA U TA KU RINDZA

3. Loko hi weriwe hi khombo, i yini leswi nga hi tikelaka ku swi endla?

³ Lexi endlaka swi tika. Loko hi weriwe hi khombo, swi nga hi tikela ku ehleketa kahle ni ku endla swiboho. Hikwalahokayini? Hi nga ha twa ku vava swinene. Hi nga ha tshikileleka. Hi nga ha titwa onge hi ngungumela exinyameni naswona a hi swi tivi leswaku hi fanele hi teka ndlela yihi. Xiya ndlela leyi vamakwerhu vambirhi vaxisati lava hi buleke ha vona eku sunguleni va titweke hayona loko va weriwe hi khombo. Olivia u ri: “Endzhaku ka loko xidzedze xi onhe kaya ra mina, ndzi twe ku vava swinene.” Monika u vula ndlela leyi a titweke hayona loko a tiva leswaku nuna wa yena a a nga tshembekanga, u ri: “Swi ndzi dyise mbitsi. A swi fana ni loko mbilu leyi yi tlhaviwe hi mukwana. A swi ndzi tikela hambi ku ri ku endla mitirho leyi tolovelekeke ya siku ni siku. A ndzi nga ehleketi leswaku leswi swi nga pfuka swi ndzi endlekerile.” Xana Yehovha u tshembisa ku hi pfuna hi ndlela yihi loko hi tshikilelekile?   

4. Hi ku ya hi Vafilipiya 4:​6, 7, Yehovha u hi tshembisa ku hi nyika yini?

⁴ Leswi Yehovha a swi endlaka. U tshembisa ku hi nyika leswi Bibele yi swi vulaka “ku rhula ka Xikwembu.” (Hlaya Vafilipiya 4:​6, 7.) Ku rhula loku ku kombetela eka ku rhula loku hi nga na kona emiehleketweni ni le mbilwini loko ntsena hi ri ni vuxaka lebyinene na yena. Ku rhula “loku tlulaka ku twisisa hinkwako”; ku tsakisa swinene ku tlula ndlela leyi hi ehleketaka hayona. Xana u tshame u titwa u ri ni ku rhula endzhaku ko khongela eka Yehovha hi mbilu hinkwayo? Koloko i “ku rhula ka Xikwembu.”

5. Xana ku rhula ka Xikwembu ku rindza mianakanyo ni timbilu ta hina hi ndlela yihi?

⁵ Vafilipiya 4:7 yi tlhela yi vula leswaku ku rhula ka Xikwembu ku ta “rindza” kumbe ku sirhelela “timbilu ta n’wina ni mianakanyo ya n’wina.” Rito leri nge “rindza,” a ku ri xiga lexi a xi tirhisiwa hi masocha naswona a xi vula ku va masocha ma rindza muti ni ku wu sirhelela eka vahlaseri. Vanhu lava a va tshama emutini wolowo a va etlela bya n’wantenyani hileswi a va swi tiva leswaku masocha ma va sirhelerile. Hilaha ku fanaka, loko ku rhula ka Xikwembu ku rindza timbilu ni miehleketo ya hina, hi va ni ku rhula hi ku tiva leswaku hi sirhelelekile. (Ps. 4:8) Hilaha swi veke hakona eka Hana, hi nga swi kota ku va ni ku rhula hambiloko swiyimo swa hina swi nga cinci hi ku hatlisa. (1 Sam. 1:​16-18) Loko hi va ni ku rhula, swa olova ku ehleketa kahle ni ku endla swiboho.

6. Hi fanele hi endla yini leswaku ku rhula ka Xikwembu ku hi vuyerisa? (Nakambe vona xifaniso.)

⁶ Leswi hi faneleke hi swi endla. Ku fana ni vaakatiko lava nga vitanaka murindzi leswaku a  va sirhelela, na hina hi nga vitana Yehovha leswaku a hi rindza. Njhani? Khongela kukondza u va ni ku rhula ka Xikwembu. (Luka 11:9; 1 Tes. 5:17) Luis loyi hi buleke ha yena eku sunguleni, u hlamusele leswi pfuneke yena ni nsati wakwe Ana va kota ku tiyisela loko va byeriwa leswaku u salele hi tin’hweti titsongo leswaku a fa. U ri: “Eka xiyimo xo fana ni lexi, swa tika swinene ku endla xiboho etimhakeni ta swa rihanyo ni le ka timhaka tin’wana. Kambe hi kote ku va ni ku rhula hi nkarhi lowu wo tika hileswi a hi khongela.” Luis ni nsati wakwe va vula leswaku va khongele hi mbilu hinkwayo hi ku phindhaphindha, va kombela Yehovha a va nyika ku rhula ka miehleketo, mbilu yo rhula ni vutlhari bya ku endla swiboho leswinene. Va wu vonile mpfuno wakwe. Loko u langutane ni maxangu, phikelela eswikhongelweni kutani u ta vona ndlela leyi ku rhula ka Yehovha ku nga ta rindza miehleketo ni mbilu ya wena hayona.—Rhom. 12:12.

YEHOVHA U TA KU TIYISA

7. Hi nga ha titwa njhani loko hi ri endzingweni wo tika?

⁷ Lexi endlaka swi tika. Loko hi langutane ni swiyimo swo tika, ndlela leyi hi ehleketaka, hi titwaka ni ku endla swilo hayona a yi nge fani ni loko swilo swi famba kahle. Ku fana ni xikepe lexi yisiwaka hala ni hala hi magandlati, na hina hi nga yisiwa hala ni hala hi ndlela leyi hi titwaka hayona lerova hi nga ha tivi ta hina. Ana loyi hi buleke ha yena eku sunguleni, u vula leswaku a a titwa hi tindlela to hambanahambana endzhaku ka rifu ra Luis. U te: “Mikarhi yin’wana a ndzi titwa ndzi tshikilelekile ni ku tiputa vusiwana. A ndzi tlhela ndzi kwata hileswi a nga ha riki kona.” Ana a a titwa a ri ni xivundza ni ku tlhela a hlundzuka swinene loko a fanele a endla swiboho leswi Luis a a swi endla kahle. Mikarhi yin’wana a a titwa onge u le xikarhi ka lwandle leri nga ni xidzedze. Xana Yehovha u hi pfuna njhani loko hi tshikilelekile?

8. Hilaha swi boxiweke hakona eka Esaya 33:​6, Yehovha u hi tiyisekisa yini?

⁸ Leswi Yehovha a swi endlaka. U hi tshembisa leswaku u ta hi tiyisa. (Hlaya Esaya 33:6.) Loko ku va ni xidzedze elwandle, xikepe xi nga ha biwa hi magandlati lama nga ni khombo xi ya hala ni hala. Leswaku swi nga ndlengandlengisiwi hi magandlati, swikepe swo tala swi ni swipapila (fins) ematlhelo ka swona, leswi humesiwaka hi nkarhi wa swidzedze. Swipapila leswi swi endla leswaku xikepe xi nga ha ndlengandlengisiwi ngopfu naswona vakhandziyi va titwa va sirhelelekile kukondza va fika laha va yaka kona. Hambiswiritano, swipapila swo tala swi tirha kahle loko xikepe xi ri eku fambeni. Hilaha ku fanaka, Yehovha u ta hi tiyisa loko hi ya emahlweni hi n’wi tirhela hi ku tshembeka loko hi langutana ni miringo.

9. Swilo swo endla ndzavisiso swi nga hi pfuna njhani leswaku hi tshama hi tiyile? (Nakambe vona xifaniso.)

 ⁹ Leswi hi faneleke hi swi endla. Loko u tshikilelekile, endla hinkwaswo leswi u nga swi kotaka leswaku u ya emahlweni u khongela, u va kona etinhlengeletanweni ta vandlha ni le ntirhweni wo chumayela. I ntiyiso leswaku a wu nge koti ku endla swilo ku fana ni le ku sunguleni kambe tsundzuka leswaku Yehovha wa anakanyela. (Ringanisa Luka 21:​1-4.) Ku engetela eka ku khongela, ku ya etidyondzweni ni ku chumayela, tinyike nkarhi wo dyondza ni ku anakanyisisa. Hikwalahokayini? Hi ku tirhisa nhlangano wakwe, Yehovha u hi nyika tinhlokomhaka ni tivhidiyo to tala leti nga hi pfunaka leswaku hi lawula ndlela leyi hi titwaka hayona hi mikarhi yo tika. Leswaku u kuma leswi u swi lavaka, u nga tirhisa swilo leswi hi pfunaka ku endla ndzavisiso leswi nga kona hi ririmi ra wena, swo tanihi JW Library^® app, Watch Tower Publications Index ni Nkongomiso Wo Endla Ndzavisiso Wa Timbhoni Ta Yehovha. Monika loyi hi buleke ha yena eku sunguleni, u vula leswaku u sungule ku tirhisa switirhisiwa leswi ku endla ndzavisiso loko a tshikilelekile. Hi xikombiso, u seche rito leri nge, “ku hlundzuka.” Mikarhi yin’wana a a secha “ku kanganyisiwa” kumbe “ku tshembeka.” Kutani a a ta hlaya kukondza a titwa a antswa. U ri: “Loko ndzi sungula ku endla ndzavisiso a ndzi vilela kambe loko ndzi ya emahlweni ndzi hlaya, ndzi twe onge Yehovha wa ndzi angarha. Loko ndzi ri karhi ndzi hlaya, ndzi xiye leswaku Yehovha u twisisa tindlela to hambanahambana leti ndzi titwaka ha tona naswona a ri karhi a ndzi pfuna.” Mpfuno wo tano lowu humaka eka Yehovha, wu nga ku pfuna u lawula ndlela leyi u titwaka hayona kukondza u va ni ku rhula.—Ps. 119:​143, 144.

YEHOVHA U TA KU SEKETELA

10. Hi nga ha titwa njhani endzhaku ko weriwa hi khombo?

¹⁰ Lexi endlaka swi tika. Endzhaku ko humeleriwa hi swilo swo biha, ku nga ha va ni masiku lawa hi titwaka hi hele matimba emirini ni le miehleketweni. Hi nga ha titwa ku fana ni xitsutsumi lexi sweswi xi khwitaka hileswi xi vavisekeke. Swi nga hi tikela ku endla swilo leswi a hi swi endla hi ku olova kumbe hi nga ha loloha ku endla swilo leswi khale a hi swi tsakela. Ku fana na Eliya, hi nga ha titwa swi hi tikela ku pfuka. Ho lava ku tietlelela ntsena. (1 Tih. 19:​5-7) Yehovha u tshembisa ku endla yini loko hi titwa hi hele matimba?

11. Hi yihi ndlela yin’wana leyi Yehovha a hi pfunaka hayona? (Pisalema 94:18)

¹¹ Leswi Yehovha a swi endlaka. U tshembisa  ku hi seketela. (Hlaya Pisalema 94:18.) Ku fana nileswi xitsutsumi lexi vavisekeke xi nga lavaka ku pfuniwa leswaku xi kota ku famba, na hina hi nga lava mpfuno leswaku hi ya emahlweni hi tirhela Yehovha. Eka xiyimo xexo, Yehovha u hi tiyisekisa leswi: “Mina Yehovha Xikwembu xa wena, ndzi khoma voko ra wena ra xinene Loyi a ku byelaka a ku, ‘U nga chavi. Ndzi ta ku pfuna.’” (Esa. 41:13) Hosi Davhida u wu vonile mpfuno wolowo. Loko a langutane ni ndzingo ni valala, u byele Yehovha a ku: “Voko ra wena ra xinene ra ndzi seketela.” (Ps. 18:35) Kambe Yehovha u hi seketela njhani?

12. Yehovha a nga tirhisa vamani leswaku a hi pfuna loko hi hele matimba?

¹² Mikarhi yo tala Yehovha u hi seketela hi ku tirhisa vanhu lava navelaka ku hi pfuna. Hi xikombiso, siku rin’wana Davhida loko a hele matimba, munghana wakwe Yonathani u n’wi endzerile leswaku a n’wi tiyisa ni ku n’wi khutaza. (1 Sam. 23:​16, 17) Hilaha ku fanaka, Yehovha u hlawule Elixa leswaku a pfuna Eliya. (1 Tih. 19:​16, 21; 2 Tih. 2:2) Namuntlha, Yehovha a nga ha tirhisa mindyangu ya hina, vanghana kumbe vakulu leswaku va hi seketela. Hambiswiritano, loko hi twisiwe ku vava hi nga ha lava ku tihambanisa ni vanhu naswona hi nga lavi ku karhatiwa. Sweswo swi tolovelekile. Xana hi nga endla yini leswaku Yehovha a hi seketela?

13. Hi fanele hi endla yini leswaku ndlela leyi Yehovha a hi seketelaka hayona yi hi vuyerisa? (Nakambe vona xifaniso.)

¹³ Leswi hi faneleke hi swi endla. Papalata ku tihambanisa ni van’wana. Loko hi nga lavi munhu ekusuhi na hina, hi nga ha sungula ku ehleketa hi ndlela leyi hoxeke, hi anakanya ntsena hi hina vini ni swiphiqo swa hina. Ku ehleketa hi ndlela yoleyo swi nga khumba ni swiboho swa hina. (Swiv. 18:1) I ntiyiso leswaku hinkwerhu ha swi lava ku tikuma hi ri hexe, ngopfungopfu loko hi weriwe hi khombo. Hambiswiritano, loko hi tihambanisa ni vanhu nkarhi wo leha, hi nga ha bakanya vanhu lava Yehovha a va tirhisaka leswaku a hi seketela. Hambiloko swi tika, pfumela loko ndyangu, vanghana ni vakulu va ku pfuna. Va teke ku ri vanhu lava Yehovha a va tirhisaka leswaku a ku seketela.—Swiv. 17:17; Esa. 32:​1, 2.

YEHOVHA U TA KU CHAVELELA

14. Hi nga weriwa hi swiyimo swihi leswi chavisaka?

¹⁴ Lexi endlaka swi tika. Mikarhi yin’wana hi nga ha titwa hi chuhile. EBibeleni malandza yo tshembeka ya Xikwembu ma vulavula hi mikarhi leyi a ma titwa ma karhatekile ni ku chuha hikwalaho ka valala va vona kumbe swiyimo  swin’wana swo tika. (Ps. 18:4; 55:​1, 5) Hilaha ku fanaka, hi nga ha kanetiwa exikolweni, entirhweni, emakaya kumbe hi mfumo. Hi nga ha chava ku fa hileswi hi vabyaka. Hi mikarhi yo tano hi nga ha titwa hi nga pfuni nchumu. Xana Yehovha u hi pfuna njhani hi mikarhi yoleyo?

15. Hi ku ya hi Pisalema 94:​19, xana Yehovha u ta hi endlela yini?

¹⁵ Leswi Yehovha a swi endlaka. Wa hi chavelela ni ku tlhela a hi thova. (Hlaya Pisalema 94:19.) Pisalema leyi yi hi endla hi ehleketa hi xinhwanyetana lexi nga eku chaveni naswona xi tsandzekaka ku etlela hikwalaho ka ku duma ka tilo loku chavisaka. Hi nga ha ehleketa hi tatana wa xona loyi a fikaka a xi tlakula, a xi khongotela kukondza xi etlela. Hambileswi tilo ra ha yaka emahlweni ri duma, xi titwa xi sirhelelekile emavokweni ya tata wa xona. Loko hi ri eka swiyimo swo chavisa, hi lava Tata wa hina wa le matilweni leswaku hi ndlela yo fanekisela, a hi khoma kukondza xiyimo xexo xi hundza. Yehovha a nga hi chavelela njhani?

16. Hi nga endla yini leswaku ndlela leyi Yehovha a hi chavelelaka hayona yi hi vuyerisa? (Nakambe vona xifaniso.)

¹⁶ Leswi hi faneleke hi swi endla. Tinyike nkarhi wa ku tshinela eka Yehovha hi ku khongela ni ku hlaya Rito rakwe nkarhi ni nkarhi. (Ps. 77:​1, 12-14) Kutani loko u tshikilelekile, nchumu wo sungula lowu u faneleke u wu endla i ku tsutsumela eka Tata wa wena wa le matilweni. Phofulela Yehovha leswi ku vilerisaka ni leswi ku chavisaka. N’wi pfumelele a vulavula na wena ni ku ku chavelela hi ku tirhisa Matsalwa. (Ps. 119:28) U nga ha kuma leswaku ku ni tindzimana tin’wana ta le Bibeleni leti nga ku chavelelaka loko u titwa u chava. Hi xikombiso, u nga ha chaveleriwa hi buku ya Yobo, Tipisalema, Swivuriso ni marito ya Yesu lama kumekaka eka Matewu ndzima 6. Loko u ri karhi u khongela eka Yehovha ni ku hlaya Rito rakwe, u ta swi vona leswaku wa ku chavelela.

17. I yini leswi hi nga tiyisekaka ha swona?

¹⁷ Hi nga tiyiseka hi ku helela leswaku Yehovha u ta hi khoma xikatla loko swilo swi hi fambela ximatsi. A nge pfuki a hi tshikile. (Ps. 23:4; 94:14) Yehovha u tshembisa ku hi rindza, ku hi tiyisa, ku hi seketela ni ku hi chavelela. Esaya 26:3 yi vula leswi hi Yehovha: “U ta sirhelela lava tshembelaka eka wena hi mbilu hinkwayo; u ta va nyika ku rhula hi masiku, hikuva va tshembe wena.” Kutani tshemba Yehovha, u nga swi bakanyi swilo leswi a swi tirhisaka leswaku a ku pfuna. Loko u endla tano, u ta kuma matimba hambiloko swiyimo swi tika.