1. Ku ta yini emiehleketweni ya wena loko u ehleketa hi Yehovha?

 XANA u tshame u tivutisa leswaku Yehovha u njhani? Loko u vulavula na yena hi xikhongelo, u ehleketa hi yini? Hambileswi hi nga swi kotiki ku vona Yehovha, Bibele yi n’wi hlamusela hi tindlela to hambanahambana. U vitaniwa “dyambu ni xitlhangu” ni “ndzilo lowu lovisaka.” (Ps. 84:11; Hev. 12:29) Exivon’weni xakwe, Ezekiyele u hlamusele Yehovha a fana ni ribye ra safiri, nchumu lowu hatimaka ku fana ni nsuku lowu hlanganisiweke na silivhere ni nkwangulatilo lowu vangamaka. (Ezek. 1:​26-28) Swi nga hi hlamarisa kumbe hi khomiwa hi ku chava loko hi twa hi ndlela leyi Yehovha a hlamuseriwaka hayona.

2. I yini leswi nga endlaka van’wana swi va tikela ku tshinela eka Yehovha?

² Leswi hi nga kotiki ku vona Yehovha, swi nga hi tikela ku tshemba leswaku wa hi rhandza. Van’wana va ehleketa leswaku Yehovha a nge pfuki a va rhandzile hikwalaho ka leswi nga tshama swi va endlekela evuton’wini bya vona. Kumbexana hileswi a va nga ri na tatana loyi a va rhandzeke. Yehovha wa yi twisisa ndlela leyi hi titwaka hayona ni ndlela leyi swi hi khumbaka hayona. Leswaku a hi pfuna, eRitweni rakwe u hi hlamusela leswaku i Xikwembu xa njhani.

3. Hikwalahokayini hi fanele hi dyondza hi ndlela leyi Yehovha a hi rhandzaka hayona?

³ Rirhandzu i rito rin’we leri n’wi hlamuselaka kahle Yehovha. (1 Yoh. 4:8) Yena hi yexe i rirhandzu. Ri lawula xin’wana ni xin’wana lexi a xi endlaka. Xikwembu xi ni rirhandzu lerikulu lerova xi rhandza ni lava nga xi rhandziki. (Mat. 5:​44, 45) Eka nhlokomhaka leyi, hi ta bula swinene hi Yehovha ni hi rirhandzu rakwe. Loko hi ya hi dyondza hi Xikwembu xa hina, hi ta ya hi xi rhandza.

 YEHOVHA WA HI RHANDZA SWINENE

4. Ndlela leyi Yehovha a ku rhandzaka hayona yi ku endla u titwa njhani? (Nakambe vona xifaniso.)

⁴ “Yehovha u ni ntwelavusiwana lowukulu.” (Yak. 5:11) EBibeleni, u ti fanisa ni manana la nga ni rirhandzu. (Esa. 66:​12, 13) Ehleketa hi manana loyi a khathalelaka n’wana wakwe hi rirhandzu. Wa n’wi tlakula ivi a n’wi tlangatlangisa a tlhela a vulavula na yena hi rito ro rhula. Loko a rila kumbe a twa ku vava, manana yoloye wa tiyiseka leswaku u n’wi nyika leswi a swi lavaka. Loko hi twisiwe ku vava, hi nga tiyiseka leswaku Yehovha a nge tshiki ku hi rhandza. Mupisalema u tsale a ku: “Loko ndzi karhateka swinene, u ndzi chavelerile u tlhela u ndzi endla ndzi tsaka.”—Ps. 94:19.

5. Xana ndlela leyi Yehovha a tshembekaka hayona yi vula yini eka wena?

⁵ Yehovha u tshembekile. (Ps. 103:8) A nga tshiki ku hi rhandza loko hi dyoha. Tiko ra Israyele ri khomise Yehovha tingana hi ku phindhaphindha kambe loko ri hundzuka, u ye emahlweni a ri rhandza naswona u ri tiyisekise leswi: “U wa nkoka swinene eka mina, wa xiximeka naswona ndzi ku rhandzile.” (Esa. 43:​4, 5) Rirhandzu ra Xikwembu a ri cincanga. Mikarhi hinkwayo hi nga tiyiseka leswaku Xikwembu a xi nge tshiki ku hi rhandza. Hambiloko hi endla swihoxo leswikulu, Yehovha a nga hi fularheli. Loko hi hundzuka ivi hi tlhelela eka yena, hi ta swi vona leswaku wa ha hi rhandza. U hi tshembisa leswaku u ta hi “rivalela hi ndlela leyikulu.” (Esa. 55:7) Bibele yi hlamusela leswaku loko a hi rivalerile hi ta tiphina hi “tinguva ta ku phyuphyisiwa [leti humaka] eka Yehovha.”—Mit. 3:19.

6. Xana Zakariya 2:8 yi hi dyondzisa yini hi Yehovha?

⁶ Hlaya Zakariya 2:8. Leswi Yehovha a hi rhandzaka, wa khathala hi ndlela leyi hi titwaka hayona naswona u tiyimisele ku hi sirhelela. U twa ku vava loko hi twa ku vava. Hikwalaho ka sweswo, hi nga khongela hi ku: “Ndzi sirhelele ku fana ni ndzololo ya tihlo ra wena.” (Ps. 17:8) Tihlo ra nyenyela naswona i xirho xa nkoka swinene emirini. Kutani loko Yehovha a hi fanisa ni ndzololo ya tihlo rakwe, swi fana ni loko a ku, ‘Loyi a mi twisaka ku vava vanhu va mina, u twisa mina ku vava.’

7. I yini leswi nga hi tiyisekisa leswaku Yehovha wa hi rhandza?

⁷ Yehovha u lava hi tiyiseka leswaku wa hi rhandza. Kambe wa swi tiva leswaku hikwalaho  ka swilo leswi nga tshama swi hi endlekela, hi nga ha tivutisa loko a hi rhandza. Kumbexana sweswi hi langutane ni swiyimo leswi endlaka hi kanakana ndlela leyi Yehovha a hi rhandzaka hayona. I yini leswi nga hi tiyisekisaka leswaku Yehovha wa hi rhandza? I ku va hi dyondza hi ndlela leyi a swi kombiseke hayona leswaku u rhandza Yesu, vahlawuriwa na hina hinkwerhu.

NDLELA LEYI YEHOVHA A RI KOMBISAKA HAYONA RIRHANDZU RAKWE

8. I yini leswi a swi tiyisekisa Yesu leswaku Tata wakwe wa n’wi rhandza?

⁸ Se swi ni malembe yo tala Yehovha na Yesu va rhandzana swinene. I khale swinene va ri ni vuxaka lebyikulu. Yehovha u swi veke erivaleni leswaku wa n’wi rhandza Yesu hilaha hi hlayaka hakona eka Matewu 17:5. Yehovha a a ta va a vule a ku, ‘Loyi hi yena ndzi n’wi amukeleke.’ Hambiswiritano, a a lava leswaku hi tiva ndlela leyi a rhandzaka Yesu hayona kutani u n’wi vitane “N’wananga, loyi ndzi n’wi rhandzaka.” Yehovha a a tinyungubyisa hi Yesu ni leswi a a ta swi endla. (Efe. 1:7) Kasi Yesu a a nga kanakani leswaku Tata wakwe wa n’wi rhandza. A a tiyiseka leswaku Yehovha u n’wi rhandza swinene. U swi vule ko tala leswaku Tatana wa n’wi rhandza.—Yoh. 3:35; 10:17; 17:24.

9. I rito rihi leri hlamuselaka ndlela leyi Yehovha a rhandzaka vahlawuriwa hayona? Hlamusela. (Varhoma 5:5)

⁹ Yehovha u tlhela a kombisa vahlawuriwa leswaku wa va rhandza. (Hlaya Varhoma 5:5.) Xiya rito leri nge, “chululele.” Dikixinari yin’wana ya Bibele yi hlamusela rirhandzu leri tanihi leri “khulukelaka eka hina ku fana ni nambu.” Xikombiso lexi xi kombisa rirhandzu lerikulu leri Xikwembu xi nga na rona eka vahlawuriwa! Vahlawuriwa va swi tiva leswaku va “[rhandziwa] hi Xikwembu.” (Yuda 1) Muapostola Yohane u hlamusele ndlela leyi va titwaka hayona loko a tsala a ku: “Vonani ndlela leyi Tatana a hi rhandzaka ha yona, lerova hi vuriwa vana va Xikwembu!” (1 Yoh. 3:1) Xana Yehovha u rhandza vahlawuriwa ntsena? Doo, Yehovha u kombise leswaku wa hi rhandza hinkwerhu.

10. Hi yihi ndlela leyikulu leyi Yehovha a swi kombiseke hayona leswaku wa ku rhandza?

¹⁰ Hi yihi ndlela leyikulu leyi Yehovha a kombiseke rirhandzu rakwe? Nkutsulo i ndlela leyikulu leyi Yehovha a swi kombiseke hayona leswaku wa hi rhandza! (Yoh. 3:16; Rhom. 5:8) U nyikele hi N’wana wakwe wo hlawuleka hi ku n’wi pfumelela a ta a hi fela leswaku hi kota ku rivaleriwa swidyoho ni ku va vanghana Vakwe. (1 Yoh. 4:10) Loko hi ya hi anakanyisisa hi nxavo lowu Yehovha na Yesu wu va koxeke wona, hi ta ya hi twisisa ndlela leyi va hi rhandzaka hayona. (Gal. 2:20) Nkutsulo a wu humesiwanga hileswi Yehovha a swi n’wi boha ku endla tano. I nyiko ya rirhandzu. Yehovha u kombise ndlela leyi a hi rhandzaka hayona hi ku nyikela hi nchumu wa nkoka swinene eka yena, ku nga Yesu. Yehovha u pfumelele N’wana wakwe leswaku a xaniseka ni ku tlhela a hi fela.

11. U dyondza yini eka Yeremiya 31:3?

¹¹ Hilaha hi swi voneke hakona, Yehovha a ngo hi komba ntsena leswaku wa hi rhandza kambe u tlhela a hi byela. (Hlaya Yeremiya 31:3.) U hi kokele eka yena hikuva wa hi rhandza. (Ringanisa Deteronoma 7:​7, 8.) A ku na munhu kumbe nchumu wo karhi lowu nga hi hambanisaka ni rirhandzu rero. (Rhom. 8:​38, 39) Xana rirhandzu leri, ri ku endla u titwa njhani? Hlaya Pisalema 23 leswaku u vona ndlela leyi Davhida a titweke hayona hi rirhandzu ra Yehovha, a n’wi khathaleleke hayona ni ku vona ndlela leyi ri nga endlaka hi titwa hayona.

RIRHANDZU RA YEHOVHA RI KU ENDLA U TITWA NJHANI?

12. U nga yi katsakanya njhani Pisalema 23?

¹² Hlaya Pisalema 23:​1-6. Eka Pisalema 23, Davhida u hlamusele ndlela leyi a a tiyiseka hayona leswaku Yehovha wa n’wi rhandza ni ku  n’wi khathalela. U hlamusele vuxaka lebyikulu lebyi a nga na byona na Yehovha loyi a n’wi vitaneke Murisi wakwe. Davhida a a titwa a sirhelelekile loko a pfumelela Yehovha a n’wi kongomisa ni ku tlhela a titshega hi Yena hi ku helela. Davhida a a swi tiva leswaku Yehovha u ta n’wi rhandza vutomi byakwe hinkwabyo. I yini leswi a swi n’wi endla a tiyiseka hi ndlela leyi?

13. Hikwalahokayini Davhida a a tiyiseka leswaku Yehovha wa n’wi khathalela?

¹³ “A ndzi nge pfumali nchumu.” Davhida u titwe a khathaleriwe swinene hikuva Yehovha a a n’wi nyika hinkwaswo leswi a a swi pfumala. Davhida u tlhele a tiphina hi ku va munghana wa Yehovha ni ku tlhela a tsakeriwa hi yena. Hi yona mhaka a a tiyiseka leswaku hambi ko endleka yini enkarhini lowu taka, Yehovha a a ta ya emahlweni a n’wi khathalela. Leswi Davhida a a tiyiseka leswaku Yehovha wa n’wi rhandza naswona a a ta n’wi khathalela, swi n’wi pfunile leswaku a nga vileli kambe a tsaka ni ku tlhela a eneriseka.—Ps. 16:11.

14. Yehovha a nga hi khathalela njhani?

¹⁴ Yehovha u hi khathalela hi ndlela ya rirhandzu ngopfungopfu loko ku endleka swilo swo biha evuton’wini bya hina. Claire, a loyi a tirheke malembe ya 20 eBethele, u titwe a nga pfuni nchumu loko ndyangu wa ka vona wu weriwe hi swiphiqo hi ku landzelelana. Bava wakwe u khomiwe hi vuvabyi byo oma swirho (stroke), ndzisana yakwe ya xisati yi susiwile, ndyangu wa ka vona wu lahlekeriwe hi kaya ra vona naswona xibindzwana xa vona xi wile. Xana Yehovha u va kombise njhani leswaku wa khathala hi vona? Claire u ri: “Yehovha u tiyisekile leswaku mikarhi hinkwayo ndyangu wa ka hina wu na leswi wu swi pfumalaka. Mikarhi yo tala Yehovha a hi nyika swo tala ku tlula leswi a hi swi lava!  Hakanyingi ndzi ehleketa hi ndlela leyi a hi pfuneke hayona naswona a ndzi nge pfuki ndzi ri rivarile rirhandzu rakwe. Loko ndzi ehleketa hi sweswo, swi ndzi pfuna leswaku ndzi ya emahlweni ndzi n’wi tirhela hambiloko ndzi langutane ni swiphiqo.”

15. Hikwalahokayini Davhida a a titwa a phyuphyile? (Nakambe vona xifaniso.)

¹⁵ “U ndzi nyika matimba.” Mikarhi yin’wana Davhida a a titwa a tshikilelekile hikwalaho ka swiphiqo ni miringo leyi a a langutana na yona. (Ps. 18:​4-6) Hambiswiritano, u tiyisiwe hi rirhandzu ni ndlela leyi Yehovha a a n’wi khathalela hayona. Yehovha u kongomise munghana wakwe loyi a a karhele eka ‘madyelo lama nga ni byanyi byo tala’ ni ‘tindhawu to wisela leti kumaka mati kahle.’ Hikwalaho, Davhida u tlhele a va ni matimba naswona u kote ku ya emahlweni a gandzela Yehovha a tsakile.—Ps. 18:​28-32.

16. Xana rirhandzu ra Yehovha ri ku phyuphyise njhani?

¹⁶ Hilaha ku fanaka namuntlha, loko hi langutana ni swiphiqo evuton’wini bya hina “a hi herisiwanga hikwalaho ka rirhandzu ra Yehovha.” (Swir. 3:22; Kol. 1:11) Xiya xikombiso xa Rachel. U twe ku vava loko nuna wakwe a n’wi tshika ni ku tlhela a tshika ku tirhela Yehovha hi nkarhi wa ntungu wa COVID-19. Yehovha u n’wi endlele yini? U ri: “Yehovha u tiyisekise leswaku ndzi titwa ndzi rhandziwa. U ndzi nyike vanghana lava tinyikeke nkarhi wo va na mina, va ndzi tela ni swakudya, va ndzi rhumela marungula ni matsalwa lama khutazaka, va n’wayitela loko va ndzi vona ni ku tlhela va ndzi tsundzuxa leswaku Yehovha wa khathala hi mina. Mikarhi hinkwayo ndzi khensa Yehovha hikwalaho ka leswi a ndzi nyikeke ndyangu lowukulu lowu nga ni rirhandzu.”

17. Hikwalahokayini Davhida a a nga “chavi nchumu”?

¹⁷ “A ndzi chavi nchumu xo biha, hikuva wena u na mina.” Mikarhi yo tala vutomi bya Davhida a byi ri ekhombyeni naswona a a ri ni valala vo tala lava nga ni matimba. Hambiswiritano, rirhandzu ra Yehovha a ri n’wi endla a titwa a sirhelelekile. Davhida a a swi vona leswaku Yehovha a a ri na yena eswiyin’weni hinkwaswo naswona sweswo swi n’wi tiyisekisile. Hi yona mhaka a yimbeleleke a ku: “[Yehovha] u ndzi ponisile eku chaveni ka mina hinkwako.” (Ps. 34:4) Hambileswi mikarhi yin’wana Davhida a a chava, u kote ku hlula ku chava koloko hileswi a a swi tiva leswaku Yehovha wa n’wi rhandza.

18. Xana rirhandzu ra Yehovha ri nga ku tiyisa njhani loko u chava?

¹⁸ Ku tiva leswaku Yehovha wa hi rhandza, swi  hi tiyisa njhani loko hi ri eswiyin’weni leswi chavisaka? Susi loyi a nga phayona, u hlamusela ndlela leyi yena ni nuna wakwe va titweke hayona loko n’wana wa vona a tisunga, u ri: “Khombo leri ku welaka u nga swi langutelanga ri ku endla u titwa u nga pfuni nchumu ni ku tlhela u chava. Kambe rirhandzu ra Yehovha ri endle hi titwa hi sirhelelekile.” Rachel, loyi hi buleke ha yena eku sunguleni u ri: “Siku rin’wana ni vusiku loko mbilu ya mina yi vava ni ku tlhela ndzi karhateka swinene ni ku chuha, ndzi rilele Yehovha. Ku fana ni manana loko a khongotela n’wana wakwe, na mina a ndzi titwa a ndzi khongotela kukondza ndzi biwa hi vurhongo. A ndzi nge pfuki ndzi swi rivarile sweswo.” Nkulu loyi a vuriwaka Tasos u hete malembe ya mune a ri ejele hileswi a aleke ku ya evusocheni. Xana u swi vone njhani leswaku Yehovha wa n’wi rhandza ni ku n’wi khathalela? U ri: “A xi kona lexi a ndzi xi pfumala hikuva Yehovha u ndzi khathalerile. Leswi swi endle leswaku ndzi ya ndzi n’wi tshemba hilaha ku heleleke. Yehovha u tirhise moya wakwe wo kwetsima leswaku a ndzi nyika ntsako hambileswi jele ku nga ndhawu leyi tshikilelaka swinene. Leswi swi ndzi pfune ku vona leswaku loko ndzi ya ndzi tshemba Yehovha, ndzi ta swi vona leswaku wa ndzi rhandza. Kutani ndzi sungule ku va phayona ra nkarhi hinkwawo ejele.”

TSHINELA EKA XIKWEMBU LEXI KU RHANDZAKA

19. (a) Ku tiva leswaku Yehovha wa hi rhandza swi ta swi khumba njhani swikhongelo swa hina? (b) Hi yihi nhlamuselo ya rirhandzu ra Yehovha leyi u yi rhandzaka swinene? (Vona bokisi leri nge, “ Matsalwa Lawa Ma Hi Pfunaka Hi Titwa Hi Rhandziwa Hi Yehovha.”)

¹⁹ Mitokoto leyi hi buleke hayona yi kombisa leswaku Yehovha “Xikwembu xa rirhandzu” u na hina! (2 Kor. 13:11) Wa khathala hi hina. Ha tiyiseka leswaku wa hi “sirhelela hikuva Wa [hi] rhandza.” (Ps. 32:10) Loko hi ya hi anakanyisisa hi ndlela leyi a hi kombiseke rirhandzu rakwe hayona, u ta ya a va wa xiviri eka hina naswona hi ta ya hi tshinela eka yena. Hi nga khongela eka yena hi tshunxekile ni ku n’wi byela ndlela leyi hi lavaka rirhandzu rakwe hayona. Hi nga n’wi byela hinkwaswo leswi hi vilerisaka, hi tshemba leswaku wa hi twisisa ni leswaku u tiyimisele ku hi pfuna.—Ps. 145:​18, 19.

20. Rirhandzu ra Yehovha ri hi tshineta njhani eka yena?

²⁰ Ku fana ni leswi hi nga laviki ku suka endzilweni loko xirhami xi vuyisa ni n’wana evukatini, na hina a hi swi lavi ku hambana ni rirhandzu ra Yehovha. Hambileswi rirhandzu rakwe ri nga ni matimba swinene, wa khathala hi hina. Kutani tsaka hikuva Yehovha wa ku rhandza. Onge hinkwerhu hi nga amukela rirhandzu ra Yehovha hi ku vula hi ku: “Ndza n’wi rhandza Yehovha”!—Ps. 116:1.