1. Hi wihi nchumu wo tika lowu hinkwerhu hi langutanaka na wona?

 SIKU NI SIKU hi fanele hi endla swiboho. Swin’wana swa olova ku swi endla, swo fana ni leswaku hi ta dya yini kumbe hi ta etlela nkarhi muni kasi swin’wana swa tika swinene. Swiboho swin’wana swi nga khumba rihanyo, ntsako wa hina, ndyangu wa hina kumbe ndlela leyi hi gandzelaka Yehovha hayona. Hi lava ku endla swiboho leswi nga ta hi pfuna swi tlhela swi vuyerisa ni ndyangu wa hina. Xa nkoka swinene, hi lava ku endla swiboho leswi nga ta tsakisa Yehovha.—Rhom. 12:​1, 2.

 2. Hi swihi swilo swinharhu leswi nga ta ku pfuna leswaku u endla swiboho swa vutlhari?

² Hakanyingi u endla swiboho swa vutlhari loko u (1) rhanga u kumisisa ntiyiso, (2) anakanyisisa hi ndlela leyi Yehovha a titwaka hayona hi xiboho lexi u lavaka ku xi teka ni (3) ku hlawula ku endla leswinene. Eka nhlokomhaka leyi hi ta bula hi swilo swinharhu leswi hi faneleke hi swi endla ni ndlela leyi swi nga hi pfunaka hayona leswaku hi letela matimba ya hina yo twisisa.—Swiv. 2:11.

RHANGA U KUMISISA NTIYISO

 3. Hikwalahokayini swi ri swa nkoka ku rhanga u kuma ntiyiso u nga si endla xiboho? Kombisa.

³ Nchumu wa nkoka lowu nga ku pfunaka leswaku u endla xiboho lexinene i ku rhanga u kumisisa ntiyiso. Hikwalahokayini sweswo swi ri swa nkoka? Ehleketa hi munhu loyi a yaka eka dokodela hileswi a vabyaka swinene. Xana dokodela a nga endla xiboho xo n’wi tshungula handle ko n’wi kambela kumbe ku n’wi vutisa swivutiso? Nikatsongo. Na wena u ta endla swiboho swa vutlhari loko u rhanga u kuma ntiyiso. U nga swi endla njhani sweswo?

 4. Hilaha Swivuriso 18:13 yi vulaka hakona, u nga endla yini leswaku u kuma ntiyiso? (Nakambe vona xifaniso.)

⁴ Ku vutisa swivutiso swi ta ku pfuna leswaku u kuma ntiyiso. Hi xikombiso, a hi nge u rhambiwe ephatini. Xana u fanele u ya?  Loko u nga n’wi tolovelanga loyi a hleleke phati yoleyo kumbe u nga tiyiseki hileswi nga ta endleka, swi ta lava u vutisa swivutiso swo fana ni leswi: “Xana yi ta khomeriwa kwihi phati naswona rini? Ku ta va ku ri ni vanhu vangani? I mani mulanguteri wa phati yoleyo? Ku ta va ku endliwa yini? Xana ku ta va ni byala?” Tinhlamulo ta swivutiso leswi ti ta ku pfuna leswaku u endla xiboho xa vutlhari.—Hlaya Swivuriso 18:13.

 5. U fanele u endla yini endzhaku ko kuma ntiyiso?

⁵ Loko u kume ntiyiso, anakanyisisa hi vukheta hi mhaka yoleyo. Hi xikombiso, u ta endla yini loko u tiva leswaku vanhu lava rhambiweke a va yi xiximi milawu ya Bibele ya mahanyelo kumbe ku hava loyi a nga ta tiyiseka leswaku vanhu a va kukutleli byala? Xana u ehleketa leswaku swi nga endleka phati yoleyo yi nga lawuleki? (1 Pet. 4:3) Hi hala tlhelo, ku vuriwa yini loko phati yoleyo yi ta endla leswaku u nga vi kona etinhlengeletanweni ta vandlha kumbe ensin’wini? Loko u ehleketisise hi swilo leswi hinkwaswo u ta endla xiboho xa vutlhari. Kambe ku ni swin’wana leswi u faneleke u swi endla. Rhanga u kambisisa ndlela leyi Yehovha a titwaka hayona hi xiboho lexi u lavaka ku xi endla.—Swiv. 2:6.

TWISISA NDLELA LEYI YEHOVHA A EHLEKETAKA HAYONA

 6. Hi ku ya Yakobo 1:​5, hikwalahokayini hi fanele hi khongelela mpfuno wa Yehovha?

⁶ Kombela Yehovha a ku pfuna u twisisa ndlela leyi a ehleketaka hayona. Yehovha u hi  tshembisa ku hi nyika vutlhari lebyi nga ta hi pfuna hi endla swiboho leswi nga ta n’wi tsakisa. U hi nyika vutlhari byebyo “hi mbilu yo basa handle ko xopaxopa swihoxo.”—Hlaya Yakobo 1:5.

 7. U nga yi tiva njhani ndlela leyi Yehovha a anakanyaka hayona emhakeni yo karhi? Kombisa.

⁷ Endzhaku ka loko u khongelele nkongomiso eka Yehovha, tlhela u languta ndlela leyi a hlamulaka swikhongelo swa wena hayona. Hi xikombiso, a hi nge u teke riendzo kutani u lahleka, u nga ha vutisa munhu loyi a tshamaka endhawini yoleyo leswaku a ku pfuna. Xana u nga famba a nga si ku pfuna? A wu nge swi endli sweswo kambe u ta yingisela hi vukheta loko a ri karhi a ku kongomisa. Hilaha ku fanaka, endzhaku ko khongelela vutlhari eka Yehovha, ringeta ku languta ndlela leyi a swi hlamulaka hayona swikhongelo swa wena hi ku va u kambisisa milawu ya le Bibeleni leyi tirhaka eka xiyimo xa wena. Hi xikombiso, loko wa ha ehleketisisa hi loko u ta ya ephatini leyi hi buleke ha yona eku sunguleni, u nga ha tlhela u kambisisa leswi Bibele yi swi vulaka hi tiphati leti nga lawulekiki, vanghana vo biha ni nkoka wo rhangisa Mfumo ematshan’wini yo rhangisa leswi laviwaka hi wena.—Mat. 6:33; Rhom. 13:13; 1 Kor. 15:33.

 8. U nga endla yini loko u lava rungula leri engetelekeke? (Nakambe vona xifaniso.)

⁸ Mikarhi yin’wana u nga ha lava mpfuno leswaku u kuma vuxokoxoko lebyi u byi lavaka. Vamakwerhu lava nga ni ntokoto va nga ku pfuna.  Hambiswiritano, u nga tlhela u vuyeriwa loko u endla ndzavisiso. U nga kuma rungula ro tala leri nga ku pfunaka eka switirhisiwa swa hina swo endla ndzavisiso swo tanihi Nkongomiso Wo Endla Ndzavisiso Wa Timbhoni Ta Yehovha ni Matsalwa Ya Mahanyelo Ya Vakreste. Tsundzuka leswaku xikongomelo xa wena i ku endla swiboho leswi nga ta tsakisa Yehovha.

 9. Hi nga tiyiseka njhani leswaku swiboho swa hina swi ta tsakisa Yehovha? (Vaefesa 5:17)

⁹ Hi nga tiyiseka njhani leswaku swiboho swa hina swi ta tsakisa Yehovha? Xo sungula, hi fanele hi n’wi tiva kahle. Bibele yi ri, “Ku twisisa i ku tiva Lowo Kwetsima Ngopfu.” (Swiv. 9:10) Hi nga kuma ku twisisa loko hi tiva vumunhu bya Yehovha, xikongomelo xakwe, leswi a swi rhandzaka ni swilo leswi a swi vengaka. Tivutise, ‘Leswi ndzi tivaka leswi Yehovha a swi rhandzaka, hi swihi swiboho leswi ndzi faneleke ndzi swi endla leswaku ndzi n’wi tsakisa?’—Hlaya Vaefesa 5:17.

10. Hikwalahokayini milawu ya Bibele yi ri ya nkoka ku tlula ndlela leyi vanhu va toloveleke ku endla swilo hayona?

¹⁰ Mikarhi yin’wana leswaku hi tsakisa Yehovha hi fanele hi endla swilo leswi nga va tsakisiki lava nga ekusuhi na hina. Hi xikombiso, vatswari van’wana va nga ha sindzisa n’wana wa vona leswaku a tekana ni wanuna loyi a nga ni mali yo tala kumbe loyi a nga ta humesa xuma xo tala hambiloko a nga ri na vuxaka lebyinene na Yehovha. A swi kanakanisi leswaku va lava n’wana wa vona a khathaleriwa kambe xana wanuna yoloye u ta swi kota ku n’wi pfuna leswaku a va ni vuxaka lebyinene na Yehovha? Xana Yehovha u ri yini emhakeni leyi? Nhlamulo yi kumeka eka Matewu 6:33. Kwalaho Vakreste va khutaziwa ku “lava Mfumo . . . ku sungula.” Hambileswi hi xiximaka vatswari va hina ku katsa ni vanhu va le mugangeni wa hina, xa nkoka swinene eka hina i ku tsakisa Yehovha.

HLAWULA KU ENDLA LESWINENE

11. Hi wihi nchumu lowu boxiwaka eka Vafilipiya 1:​9, 10 lowu nga ta ku pfuna u ehleketisisa hi swiboho swa wena?

¹¹ Loko se u yi tiva kahle milawu ya Bibele leyi tirhaka eka xiyimo xa wena, ehleketisisa kahle hi xiboho lexi u lavaka ku xi endla. (Hlaya Vafilipiya 1:​9, 10.) Ku twisisa swi ta ku pfuna u ehleketisisa hileswi nga endlekaka loko wo teka xiboho xo karhi. Kambe a hi swiboho hinkwaswo swi olovaka. Ku twisisa swi ta ku pfuna u endla swiboho swa vutlhari hambiloko u ri eka swiyimo swo tika.

12-13. Ku twisisa ku ta ku pfuna njhani leswaku u endla xiboho xa vutlhari loko swi ta eka ku hlawula ntirho?

¹² Ehleketa hi mhaka leyi. A hi nge u le ku laveni ka ntirho leswaku u ta khathalela ndyangu wa wena. Ku ni mitirho yimbirhi leyi nga pfuleka naswona hinkwayo a yi lwisani ni milawu ya Bibele. A swi kanakanisi leswaku eka mitirho yoleyo u ta ehleketa hi muxaka wa ntirho lowu u nga ta wu tirha, tiawara leti u nga ta ti tirha, mpfhuka lowu u nga ta wu famba loko u ya entirhweni ku katsa ni swin’wana. A hi nge eka mitirho yoleyo u lava ku hlawula lowu ku tsakisaka kumbe lowu holelaka mali yo tala. Nilokoswiritano ka ha ri ni swilo swin’wana leswi u faneleke u ehleketa haswona u nga si endla xiboho.

¹³ Hi xikombiso, xana ntirho wolowo wu ta kavanyeta xiyimiso xa wena xo ya etinhlengeletanweni ta vandlha? Xana wu ta endla leswaku u nga ha kumi nkarhi wo tala wo va ni ndyangu wa wena ni ku wu pfuna leswaku wu va ni vuxaka lebyinene na Yehovha? Ku tivutisa swivutiso swo fana ni leswi, swi ta ku pfuna leswaku u rhangisa “swilo leswi nga swa nkoka swinene,” ku nga ku gandzela Yehovha ni swilaveko swa ndyangu wa wena ku nga ri ku endla mali yo tala. Sweswo swi ta ku pfuna leswaku u endla xiboho lexi Yehovha a nga ta xi katekisa.

14. Xana ku twisisa ni rirhandzu swi ta hi pfuna njhani leswaku hi papalata ku khunguvanyisa van’wana?

 ¹⁴ Ku twisisa ku tlhela ku hi pfuna hi ehleketisisa hi ndlela leyi swiboho swa hina swi nga ta va khumba hayona van’wana leswaku hi papalata ku va ‘khunguvanyisa.’ (Filp. 1:10) Leswi i swa nkoka loko hi endla xiboho xa leswi hi nga ta swi ambala kumbe ndlela leyi hi nga ta tilunghisa hayona. Hi xikombiso, hi nga ha tsakisiwa hi fexeni yo karhi ya maambalelo kumbe yo tilunghisa. Kambe ku vuriwa yini loko yi ta khunguvanyisa vamakwerhu evandlheni kumbe vanhu lava nga riki Timbhoni? Ku twisisa ku ta hi pfuna leswaku hi xixima ndlela leyi va titwaka hayona. Rirhandzu ri ta hi pfuna leswaku hi endla swilo leswi pfunaka ni “van’wana” ni ku papalata swilo leswi nga va khunguvanyisaka. (1 Kor. 10:​23, 24, 32; 1 Tim. 2:​9, 10) Loko hi endla tano, hi ta endla swiboho leswi kombisaka leswaku hi rhandza vanhu ni ku va xixima.

15. I yini leswi u faneleke u swi endla u nga si endla xiboho xa nkoka?

 ¹⁵ Loko u fanele u endla xiboho xa nkoka swinene, ehleketa hi swilo leswi u faneleke u swi endla leswaku u teka xiboho lexinene. Yesu u hi dyondzise ku “hlayela swilo hinkwaswo leswi lavekaka.” (Luka 14:28) Hikwalaho, ehleketisisa hi nkarhi, switirhisiwa ni matshalatshala lawa u faneleke u ma endla leswaku u endla xiboho. Eka swiyimo swin’wana, u nga vulavula ni ndyangu wa wena leswaku u tiva leswi xirho ha xin’we xi faneleke xi swi endla leswaku xi seketela xiboho xexo. Hikwalahokayini sweswo swi ri swa nkoka? Swi nga ku pfuna u vona loko xiboho xa wena xi lava ku antswisiwa kumbe loko ku ri ni ndlela yin’wana leyi nga ta ku pfuna u endla xiboho lexinene. Loko u rhanga u vulavula ni ndyangu wa wena ni ku yingisela mavonelo ya vona, va ta ku pfuna leswaku u endla xiboho lexinene.—Swiv. 15:22.

ENDLA XIBOHO LEXINENE

16. Hi swihi swilo leswi nga ta ku pfuna u endla xiboho lexinene? (Nakambe vona bokisi leri nge, “ Leswi Nga Ku Pfunaka Leswaku U Endla Swiboho Swa Vutlhari.”)

¹⁶ Loko u tirhisa swilo hinkwaswo leswi hi buleke haswona u ta endla swiboho leswinene. Ku kambisisa milawu ya le Bibeleni ni ku tlhela u kuma vuxokoxoko hinkwabyo, swi ta ku pfuna u endla xiboho lexi nga ta tsakisa Yehovha. Kutani sweswi kombela Yehovha leswaku a ku pfuna u endla xiboho lexinene.

17. Hi wihi nchumu wa nkoka lowu nga ku pfunaka leswaku u endla swiboho leswinene?

¹⁷ Hambiloko u tshame u endla swiboho swo tala leswinene enkarhini lowu hundzeke, tsundzuka leswaku swi lava u titshega hi vutlhari lebyi humaka eka Yehovha ku nga ri ntokoto kumbe vutlhari lebyi u nga na byona leswaku u kota ku endla swiboho leswinene. I Yehovha ntsena loyi a nga ta ku nyika ku twisisa, vutivi ni vutlhari. (Swiv. 2:​1-5) Yehovha u ta ku pfuna u endla swiboho leswi n’wi tsakisaka.—Ps. 23:​2, 3.