NHLOKOMHAKA LEYI DYONDZIWAKA YA VU 5
RISIMU 108 Rirhandzu Ra Xikwembu Ro Tshembeka
Rirhandzu Ra Yehovha Ra Hi Vuyerisa
“Kreste Yesu u tile emisaveni a ta ponisa vadyohi.”—1 TIM. 1:15.
LESWI HI NGA TA SWI DYONDZA
Hi ta dyondza hi ndlela leyi nkutsulo wu hi vuyerisaka hayona ni ndlela leyi hi nga kombaka Yehovha leswaku ha n’wi khensa.
1. Hi nga endla yini leswaku Yehovha a tsaka?
A WU ta titwa njhani loko a wu nyike munhu nyiko yo hlawuleka ivi a teka a yi veka? A swi kanakanisi leswaku sweswo a swi nga ta ku tsakisa. Kambe a hi nge wa yi tirhisa a tlhela a ku khensa, sweswo swi ta ku tsakisa. Hilaha ku fanaka, Yehovha u hi nyike nyiko yo hlawuleka ku nga N’wana wakwe. Kutani Yehovha wa tsaka loko hi kombisa ku tlangela nyiko yoleyo ni rirhandzu rakwe leri endleke leswaku a hi nyika nkutsulo.—Yoh. 3:16; Rhom. 5:7, 8.
2. Hi ta bula hi yini eka nhlokomhaka leyi?
2 Hi ku famba ka nkarhi hi nga sungula ku yi teka yi nga ha ri ya nkoka nyiko yoleyo ya nkutsulo. Loko hi endla tano, swi ta fana ni loko hi yi teka hi yi veka ekule. I ntiyiso leswaku ha yi rhandza kambe a ha ha ehleketi hi yona. Kutani leswaku sweswo swi nga endleki, hi fanele hi tshama hi ri karhi hi ehleketa hileswi Xikwembu na Kreste va hi endleleke swona. Nhlokomhaka leyi yi ta hi pfuna leswaku hi tshama hi ri karhi hi tlangela nkutsulo. Hi ta bula hi ndlela leyi wu hi vuyerisaka hayona sweswi ni le nkarhini lowu taka. Hi ta tlhela hi dyondza hi ndlela leyi hi nga swi kombisaka hayona leswaku ha ri tlangela rirhandzu ra Yehovha, ngopfungopfu hi nkarhi lowu wa Xitsundzuxo.
NDLELA LEYI NKUTSULO WU HI VUYERISAKA HAYONA SWESWI
3. Nkutsulo wu hi vuyerisa njhani sweswi?
3 Hi le ku vuyeriweni hikwalaho ka nkutsulo. Hi xikombiso, Yehovha wa hi rivalela hikwalaho ka wona. Hambileswi a nga bohekiki ku endla tano, wa hi rivalela hikuva wa swi lava. Mupisalema u yimbelerile a kombisa ndlela leyi a ku tlangelaka hayona ku rivalela ka Yehovha loko a ku: “Hikuva u lulamile, wena Yehovha, naswona u lunghekele ku rivalela.”—Ps. 86:5; 103:3, 10-13.
4. Yehovha u wu endlele vamani nkutsulo? (Luka 5:32; 1 Timotiya 1:15)
4 Van’wana va nga ha vona onge a swi va faneli ku rivaleriwa hi Yehovha. Entiyisweni, hinkwerhu a swi hi faneli. Muapostola Pawulo a a vona swi nga “n’wi faneli ku vuriwa muapostola.” Kambe u te: “Ndzi leswi ndzi nga swona hikwalaho ka musa lowukulu wa Xikwembu.” (1 Kor. 15:9, 10) Yehovha wa hi rivalela loko hi hundzuka. A nga endli tano hileswi swi hi fanelaka kambe hileswi a hi rhandzaka. Loko u vona swi nga ku faneli ku rivaleriwa hi Yehovha, tsundzuka leswaku nkutsulo u wu endlele vadyohi lava hundzukaka ku nga ri vanhu lava nga dyohiki.—Hlaya Luka 5:32; 1 Timotiya 1:15.
5. Xana swa boha leswaku Yehovha a hi komba tintswalo? Hlamusela.
5 A hi fanelanga hi tibyela ku swa boha leswaku hi kombiwa tintswalo hileswi hi tirheleke Yehovha malembe yo tala. I ntiyiso leswaku Yehovha wa swi tlangela leswi hi n’wi tirheleke hi ku tshembeka. (Hev. 6:10) U hi nyike N’wana wakwe tanihi nyiko ku nga ri hileswi a lavaka ku hi hakela hikwalaho ka leswi hi n’wi endleke swona. Swi ta va swi hoxile ku tibyela leswaku leswi hi tirheleke Yehovha malembe yo tala, hi faneriwa hi ku rivaleriwa. Loko hi tshemba sweswo, swi ta fana ni loko hi vula leswaku a swi nga bohi ku Yesu a hi fela.—Ringanisa Vagalatiya 2:21.
6. Hikwalahokayini Pawulo a tirhele Yehovha hi ku hiseka?
6 Pawulo u tikarhatile a tirhela Xikwembu ku nga ri hileswi a a lava ku rivaleriwa kambe hileswi a a lava ku komba Yehovha leswaku wa n’wi khensa eka hinkwaswo leswi a n’wi endleleke swona. (Efe. 3:7) Ku fana na Pawulo, na hina hi fanele hi hiseka, ku nga ri hileswi hi lavaka ku vonaka onge swa hi fanela ku kombiwa tintswalo kambe hileswi hi lavaka ku khensa Yehovha eka hinkwaswo leswi a hi endlelaka swona.
7. Hi yihi ndlela yin’wana leyi nkutsulo wu hi vuyerisaka hayona? (Varhoma 5:1; Yakobo 2:23)
7 Eka nhlokomhaka leyi hundzeke, hi dyondze leswaku a hi tswariwanga hi ri ni vuxaka na Xikwembu kambe nkutsulo wu endle leswaku hi va ni vuxaka lebyinene na xona. a Nakambe hikwalaho ka wona, hi kota ku tiphina hi “ku rhula ni Xikwembu” ni ku tlhela hi tshinela eka xona.—Hlaya Varhoma 5:1; Yakobo 2:23.
8. Hikwalahokayini hi fanele hi khensa Yehovha hikwalaho ka nyiko ya xikhongelo leyi a hi nyikeke yona?
8 Yehovha u hi nyike nyiko ya nkoka ku nga xikhongelo. A nga yingiseli swikhongelo swa malandza yakwe loko ma hlengeletanile ntsena, u tlhela a yingisela ni swikhongelo leswi ma swi endlaka loko ma ri woxe. Phela xikhongelo xi endla leswaku hi va ni vuxaka lebyinene ni Xikwembu hi tlhela hi va ni ku rhula. (Ps. 65:2; Yak. 4:8; 1 Yoh. 5:14) Loko Yesu a ri laha misaveni a a khongela mikarhi hinkwayo hileswi a a swi tiva leswaku Yehovha wa n’wi twa ni leswi xikhongelo a xi n’wi tshineta ekusuhi ni Tata wakwe. (Luka 5:16) Hakunene ha wu tlangela nkutsulo hikuva wu endla leswaku hi kota ku va vanghana va Yehovha ni ku tlhela hi vulavula na yena hi xikhongelo.
NDLELA LEYI NKUTSULO WU NGA TA HI VUYERISA HAYONA ENKARHINI LOWU TAKA
9. Xana nkutsulo wu ta ma vuyerisa njhani malandza yo tshembeka enkarhini lowu taka?
9 Enkarhini lowu taka, malandza yo tshembeka ma ta vuyeriwa hikwalaho ka nkutsulo hikuva Yehovha u ta ma nyika vutomi lebyi nga heriki. Vanhu vo tala va ehleketa leswaku sweswo a swi koteki hileswi ku nga khale vanhu va ri karhi va fa. Loko Adamu a a nga dyohanga, a nga kona loyi a a ta ehleketa ku a swi nge koteki ku hanya hilaha ku nga heriki. Hambileswi sweswi swi nga ha vonakaka swi nga koteki ku hanya hilaha ku nga heriki, enkarhini lowu taka hi ta swi kota hikwalaho ka leswi Yehovha a nyikeleke hi N’wana wakwe leswaku hi kuma vutomi lebyi nga heriki. (Rhom. 8:32) Phela xikongomelo xa Yehovha a ku ri leswaku vanhu va hanya hilaha ku nga heriki.
10. Xana vatotiwa ni tinyimpfu tin’wana va langutele yini enkarhini lowu taka?
10 Yehovha u tshembisa vatotiwa ni tinyimpfu tin’wana mikateko leyi tsakisaka enkarhini lowu taka. Vatotiwa va ta fuma na Yesu Kreste etilweni. (Nhlav. 20:6) Kasi lava tinyimpfu tin’wana va ta tiphina hi vutomi eparadeyisini laha misaveni. Va ta hanya va nga vabyi kumbe ku xaniseka. (Nhlav. 21:3, 4) Hambileswi ku hanya hilaha ku nga heriki ku nga nchumu lowu nga ta endleka enkarhini lowu taka, Yehovha u lava leswaku sweswi hi tivona hi ri kwale. Loko u ri ni ntshembo wa ku hanya laha misaveni hileswi u nga un’wana wa tinyimpfu tin’wana, u nga ehleketi leswaku u kayela swo karhi hileswi u nga ta hanya kwala misaveni, u ta tiphina hikuva sweswo hileswi vanhu a va vumberiwe swona nga ku hanya kwala misaveni.
11-12. Hi yihi mikateko yin’wana leyi hi nga ta tiphina hayona eParadeyisini? (Nakambe vona swifaniso.)
11 Ehleketa ndlela leyi hi nga ta tiphina hayona eParadeyisini laha misaveni. A ku nge he vi na mavabyi kumbe rifu. (Esa. 25:8; 33:24) Yehovha u ta hi nyika swilo hinkwaswo leswinene. Hi ta tshama ni swiharhi, hi ta tiphina hi ku dyondza ku yimbelela ni ku tlanga swichayachayana. A hi kanakani leswaku enkarhini lowu taka ku ta va ni xilaveko xa vampfampfarhuti va tiyindlu, vaaki ni varimi. Hi ta byala ni ku khathalela masimu ya hina. Hi ta tlhela hi endla switirhisiwa swo tirha hiswona ni ku tiphina hi swakudya. (Esa. 35:1; 65:21) Hakunene hi ta tiphina hi vutomi enkarhini lowu taka.
12 Yehovha u nyikele hi N’wana wakwe hileswi a hi rhandzaka leswaku hi ta va ni vumundzuku lebyinene. Ku hanya hilaha ku nga heriki a hi norho, i nchumu wa xiviri lowu nga ta endleka ku nga ri khale. Hi ta tsaka swinene loko hi amukela lava nga ta pfuxiwa. (Mit. 24:15) Hi ta tsaka ku dyondza hi swilo swo tala leswi Yehovha a swi tumbuluxeke. (Ps. 104:24; Esa. 11:9) Kambe xa nkoka ku tlula hinkwaswo, hi ta tiphina hi ku gandzela Yehovha hi nga ri na xidyoho. Ha tiyiseka leswaku hinkwerhu a hi swi lavi ku lahlekeriwa hi mikateko leyi ya le nkarhini lowu taka hi ku va sweswi hi “tiphina hi xidyoho swa nkarhinyana.” (Hev. 11:25) Namuntlha a ku na nchumu lowu tlulaka mikateko leyi hi nga ta tiphina ha yona enkarhini lowu taka!
Hi yihi mikateko leyi u yi languteleke hi mahlongati eParadeyisini? (Vona tindzimana 11-12)
SWI KOMBISE LESWAKU WA RI TLANGELA RIRHANDZU RA YEHOVHA
13. Hi nga swi kombisa njhani leswaku ha ri khensa rirhandzu ra Yehovha? (2 Vakorinto 6:1)
13 Hi nga endla yini ku kombisa leswaku ha wu khensa nkutsulo lowu Yehovha a hi nyikeke wona? Hi ku va hi rhangisa ku endla ku rhandza ka yena evuton’wini bya hina. (Mat. 6:33) Phela Yesu u file leswaku “lava hanyaka va nga ha tihanyeli, kambe va hanyela loyi a va feleke a tlhela a pfuxiwa.” (2 Kor. 5:15) A hi swi lavi ku tlanga hi tintswalo ta Yehovha.—Hlaya 2 Vakorinto 6:1.
14. Hi nga swi kombisa njhani leswaku ha wu tshemba nkongomiso wa Yehovha?
14 Hi nga kombisa leswaku ha ri tlangela rirhandzu ra Yehovha hi ku va hi tshemba nkongomiso wakwe. Njhani? Loko hi fanele hi endla swiboho etimhakeni to fana ni dyondzo kumbe ntirho, hi ta ehleketisisa hileswi Yehovha a lavaka hi swi endla. (1 Kor. 10:31; 2 Kor. 5:7) Loko hi endla tano, vuxaka bya hina na Yena byi ta ya byi tiya naswona ntshembo wa ku hanya hilaha ku nga heriki wu ta ya wu va wa xiviri eka hina.—Rhom. 5:3-5; Yak. 2:21, 22.
15. Hi nga swi kombisa njhani leswaku ha ri tlangela rirhandzu ra Yehovha hi nkarhi wa Xitsundzuxo?
15 Ndlela yin’wana leyi hi nga kombisaka ku khensa rirhandzu leri Yehovha a hi kombeke rona, i ku va hi tlangela nkutsulo hi nkarhi lowu wa Xitsundzuxo. Hi nga endla tano hi ku hlela swiyimo swa hina leswaku hi va kona eXitsundzuxweni ni ku tlhela hi rhamba van’wana. (1 Tim. 2:4) Hi nga tirhisa vhidiyo leyi nge, Hikwalaho Ka Yini Yesu A File? ni leyi nge, Tsundzuka Rifu Ra Yesu leswaku hi va hlamusela leswi nga ta endleka eXitsundzuxweni. Vakulu va fanele va rhamba ni lava tshikeke ku ta etinhlengeletanweni ta vandlha. Ku va ni ntsako lowukulu etilweni ni le misaveni loko tinyimpfu ta Yehovha leti lahlekeke ti tlhelela entlhambini! (Luka 15:4-7) Hi siku ra Xitsundzuxo, u nga xeweti vamakwerhu ntsena kambe xeweta ni lava taka ro sungula ni lava ku nga khale hi nga ha va voni etidyondzweni. Hi lava ku va endla va titwa va ri ekaya.—Rhom. 12:13.
16. Hikwalahokayini hi fanele hi tikarhatela ku endla leswi engetelekeke hi nkarhi lowu wa Xitsundzuxo?
16 Ndlela yin’wana leyi hi nga swi kombisaka hayona leswaku ha swi khensa leswi Xikwembu na Kreste va hi endleleke swona, i ku endla leswi engetelekeke hi nkarhi lowu wa Xitsundzuxo. U nga endla tano hi ku fambisana ni ku hlaya ka Bibele ka Xitsundzuxo loku nga eka xibukwana lexi nge, Ku Kambisisa Matsalwa Siku Ni Siku kumbe eka chati leyi kumekaka eka xibukwana xa nhlengeletano ya le xikarhi ka vhiki. U nga tlhela u tirhisa tindzimana teto ku endla dyondzo ya munhu hi yexe. Loko hi ya hi endla swilo leswi, hi ta ya hi vona ndlela leyi Yehovha a hi seketelaka hayona naswona hi ta ya hi n’wi tshemba.—1 Kor. 3:9.
17. Xana Yehovha u tsakisiwa hi yini? (Nakambe vona bokisi leri nge, “ Tindlela Leti U Nga Kombisaka Ku Tlangela Rirhandzu Ra Yehovha Hatona.”)
17 Swi nga endleka u nga swi koti ku swi endla hinkwaswo swilo leswi hi buleke ha swona eka nhlokomhaka leyi. Kambe tsundzuka leswaku leswi Yehovha a tivaka mbilu ya wena, a nga ku ringanisi ni van’wana. Wa tsaka loko a vona hinkwaswo leswi u swi endlaka leswaku u kombisa ku tlangela nyiko leyi ya risima, ku nga nkutsulo.—1 Sam. 16:7; Mar. 12:41-44.
18. Hikwalahokayini hi fanele hi khensa leswi Yehovha Xikwembu na Yesu Kreste va hi endleleke swona?
18 Onge mikarhi hinkwayo hi nga kombisa ku tlangela rirhandzu ra Yehovha leri endleke leswaku a hi nyika nkutsulo lowu endlaka swi koteka ku va hi rivaleriwa swidyoho, hi va vanghana va Yena ni ku tlhela hi kuma vutomi lebyi nga heriki. (1 Yoh. 4:19) Nakambe onge hi nga kombisa ku tlangela leswi Yesu a hi endleleke swona hi ku va a hi fela hileswi a hi rhandzaka!—Yoh. 15:13.
RISIMU 154 Rirhandzu A Ri Heli
a Yehovha u va rivalerile vagandzeri vakwe lava hanyeke Yesu a nga si hi kutsula. Yehovha u endle sweswo hileswi a a swi tiva leswaku N’wana wakwe a a ta tshama a tshembekile kukondza a fa. Kutani eka Yehovha a swi fana ni loko Yesu a hi kutsurile hambiloko a nga si hi fela.—Rhom. 3:25.
