1. Hi vuyeriwa njhani loko hi va kona eka Xitsundzuxo xa rifu ra Kreste xa lembe ni lembe?

 A SWI kanakanisi leswaku wa pfumela ku nkutsulo i nyiko ya risima. (2 Kor. 9:15) U kota ku va ni vuxaka lebyikulu na Yehovha Xikwembu hileswi Yesu a nyikeleke hi vutomi byakwe. Nakambe u nga tlhela u hanya hilaha ku nga heriki. Hi ni swivangelo swo tala swo khensa Yehovha loyi a hi nyikeke nkutsulo hikwalaho ka leswi a hi rhandzaka swinene. (Rhom. 5:8) Yesu u hi lerise leswaku hi va kona eXitsundzuxweni xa rifu rakwe, lexi endliwaka lembe ni lembe leswaku a hi pfuna hi tlangela ni ku wu teka wu ri wa nkoka nkutsulo.—Luka 22:​19, 20.

 2. Hi ta bula hi yini eka nhlokomhaka leyi?

² A swi kanakanisi leswaku hinkwerhu hi tiyimisele ku va kona eka Xitsundzuxo xa lembe leri, lexi nga ta va hi Mugqivela wa ti 12 ta April 2025. Hi nkarhi wa Xitsundzuxo hi ta vuyeriwa swinene loko hi anakanyisisa hileswi Yehovha ni N’wana wakwe va hi endleleke swona. Eka nhlokomhaka leyi, hi ta bula hileswi nkutsulo wu hi dyondzisaka swona hi Yehovha na hi N’wana wakwe. Nhlokomhaka leyi landzelaka yi ta hi pfuna hi twisisa ndlela leyi nkutsulo wu hi vuyerisaka hayona ni leswi hi nga swi endlaka ku kombisa leswaku ha wu tlangela.

LESWI NKUTSULO WU HI DYONDZISAKA SWONA HI YEHOVHA

 3. Swi kotekisa ku yini leswaku rifu ra munhu un’we ri kutsula vanhu va timiliyoni? (Nakambe vona xifaniso.)

³ Nkutsulo wu hi dyondzisa hi vululami bya Yehovha. (Det. 32:4) Njhani? Ehleketa hi leswi: Leswi Adamu a nga yingisangiki,  u endle leswaku hi tluleriwa hi xidyoho lexi endlaka hi fa. (Rhom. 5:12) Leswaku a hi ntshunxa eka xidyoho ni rifu, Yehovha u rhumele Yesu leswaku a hi kutsula. Xana a swi ta kotekisa ku yini leswaku rifu ra munhu un’we loyi a a nga ri na xidyoho ri kutsula vanhu va timiliyoni? Muapostola Pawulo u nyikele nhlamulo, u te: “Hikuva tanihi leswi vo tala va veke vadyohi hikwalaho ka leswi munhu un’we [Adamu] a nga yingisangiki, vanhu vo tala va ta va lava lulameke hikwalaho ka ku yingisa ka munhu un’we [Yesu].” (Rhom. 5:19; 1 Tim. 2:6) Hi tluleriwe hi xidyoho ni rifu hikwalaho ka leswi munhu un’we a nga yingisangiki. Kutani a ku laveka munhu un’we loyi a yingisaka Xikwembu naswona a nga riki na xidyoho leswaku a hi tshunxa eka swona.

 4. Hikwalahokayini Yehovha a nga va pfumelelanga vatukulu va Adamu lava yingisaka leswaku va hanya hilaha ku nga heriki handle ko rhumela Yesu a ta hi fela?

⁴ Xana a swi boha ku Yesu a fa leswaku a hi kutsula? Xana Yehovha a nga ta swi kota ku pfumelela vatukulu va Adamu lava nga ni timbilu letinene leswaku va hanya hilaha ku nga heriki? Hi ku ya hi vanhu, yoleyo ku nga vonaka ku ri ndlela leyinene yo lulamisa xiphiqo xexo. Kambe ndlela yoleyo a yi fambisani ni vululami bya Yehovha lebyi hetisekeke. Leswi Yehovha a lulameke, a a nga ta pfuka a xi bakanyile xidyoho xa Adamu.

 5. Hikwalahokayini hi nga fanelanga hi kanakana leswaku Yehovha u ta endla leswi lulameke mikarhi hinkwayo?

⁵ Xana a ku ta endleka yini loko Yehovha a lo endla leswaku ku nga vi na nkutsulo kambe a tshika vatukulu va Adamu lava nga ni xidyoho leswaku va hanya hilaha ku nga heriki? A hi ta tivutisa loko Xikwembu xi ta endla hilaha ku fanaka ni le ka timhaka tin’wana. Nakambe a hi nga ta tshemba leswaku Xikwembu xi ta swi hetisisa hinkwaswo switshembiso swa xona. A hi fanelanga hi vilela leswaku sweswo swi nga tshuka swi endlekile. Leswi Yehovha a endleke leswi lulameke hambileswi ku endla tano a swi lava leswaku a nyikela hi N’wana wakwe, hi nga tiyiseka leswaku mikarhi hinkwayo u ta endla leswinene.

 6. Xana nkutsulo wu ri kombisa njhani rirhandzu ra Yehovha? (1 Yohane 4:​9, 10)

⁶ Hambileswi nkutsulo wu hi pfunaka ku twisisa leswaku Yehovha i lulamile, xa nkoka swinene wu hi pfuna hi twisisa ndlela leyi a hi rhandzaka hayona. (Yoh. 3:16; hlaya 1 Yohane 4:​9, 10.) Nkutsulo wu hi dyondzisa leswaku Yehovha u lava hi hanya hilaha ku nga heriki ni ku tlhela hi va xiphemu xa ndyangu wakwe. Ehleketa hileswi: Loko Adamu a dyoha, Yehovha u n’wi hlongorile endyangwini wakwe, hikwalaho ka sweswo hinkwerhu hi velekeriwe ehandle ka ndyangu wa Xikwembu. Yehovha u hi rivalela swidyoho hikwalaho ka  nkutsulo naswona eku heteleleni u ta tisa vanhu hinkwavo lava nga ni ripfumelo naswona va yingisaka endyangwini wakwe. Ni sweswi hi nga swi kota ku va ni vuxaka na Yehovha ni vagandzerikulorhi. Entiyisweni Yehovha wa hi rhandza.—Rhom. 5:​10, 11.

 7. Ku xaniseka ka Yesu ku hi pfuna njhani hi twisisa ndlela leyi Yehovha a hi rhandzaka hayona?

⁷ Hi kota ku yi twisisa kahle ndlela leyi Yehovha a hi rhandzaka hayona loko hi anakanyisisa hileswi swi n’wi koxeke swona leswaku hi kuma nkutsulo. Sathana u vula leswaku malandza ya Xikwembu a ma nge swi koti ku tshama ma tshembekile eka xona loko ma ri eswiyin’weni swo tika. Yehovha u pfumelele Yesu leswaku a rhanga a xaniseka a nga si dlayiwa leswaku swi ta va erivaleni ku leswi Sathana a swi vulaka i mavunwa. (Yobo 2:​1-5; 1 Pet. 2:21) Yehovha a lo swi nhwii, loko N’wana wa yena loyi a n’wi rhandzaka a hlekuriwa hi varhangeri va vukhongeri, a biwa hi masocha, a beleriwa emhandzini ivi eku heteleleni a fa hi ndlela yo vava. (Mat. 27:​28-31, 39) Leswi Yehovha a nga ni matimba a a ta swi kota ku n’wi ponisa. Hi xikombiso, loko valala va ku: “[Xikwembu] a xi n’wi ponise loko xi n’wi rhandza,” a xi ta va xi swi endlile sweswo. (Mat. 27:​42, 43) Hambiswiritano, loko Xikwembu a xi lo nghenelela, nkutsulo a wu ta va wu nga va nga kona naswona hina a hi nga ta va na ntshembo. Kutani xi tshike N’wana wa xona leswaku a xaniseka kukondza a fa.

 8. Xana Yehovha u twe ku vava loko a vona N’wana wa yena a xaniseka? Hlamusela. (Nakambe vona xifaniso.)

⁸ Leswi Xikwembu xi nga ni matimba hinkwawo, a hi fanelanga hi tibyela leswaku a xi na mintlhaveko. Phela hi endliwe hi xifaniso xa xona naswona xi hi endle hi ri ni mintlhaveko kutani swi le rivaleni leswaku xi na yona. Bibele yi hlamusela leswaku ku ve ni mikarhi leyi Xikwembu xi tweke ku “vava.” (Ps. 78:​40, 41) Ehleketa hi mhaka ya Abrahama na Isaka. Yehovha u byele Abrahama leswaku a endla gandzelo hi n’wana wakwe loyi o va yexe. (Gen. 22:​9-12; Hev. 11:​17-19) Ehleketa ndlela leyi Abrahama a nga ha vaka a titwe hayona loko a ri karhi a endla malunghiselelo leswaku a ta dlaya Isaka hi mukwana. A swi kanakanisi leswaku Yehovha u twe ku vava swinene loko a vona N’wana wakwe a ri karhi a xanisiwa hi ndlela ya tihanyi hi vanhu lava nga n’wi chaviki ni ku hetelela va n’wi dlaya.—Hlalela vhidiyo leyi nge, Tekelela Ripfumelo Ra Vona—Abrahama, Xiyenge 2 eka jw,org.

 9. Varhoma 8:​32, 38, 39 yi ku pfuna njhani u twisisa ndlela leyi Yehovha a ku rhandzaka hayona wena ni vagandzerikuloni?

⁹ Nkutsulo wu hi dyondzisa leswaku a ku na munhu loyi a nga hi rhandzaka ku fana na Yehovha hambi i xaka kumbe i munghana. (Hlaya  Varhoma 8:​32, 38, 39.) Yehovha u hi rhandza ku tlula na ndlela leyi hina hi tirhandzaka hayona. Yehovha u lava hi hanya hilaha ku nga heriki ku tlula ni ndlela leyi wena u swi lavaka hayona naswona u lava ku ku rivalela swidyoho ku tlula ni ndlela leyi wena u swi lavisaka xiswona. Kambe u lava leswaku hi tlangela nyiko yakwe ya risima hi ku va hi kombisa ripfumelo ni ku tlhela hi n’wi yingisa. Nkutsulo wu hi komba ndlela leyi Xikwembu xi hi rhandzaka hayona naswona ni le misaveni leyintshwa ha ha ta dyondza swo tala hi rirhandzu ra xona.—Ekl. 3:11.

LESWI NKUTSULO WU HI DYONDZISAKA SWONA HI YESU

10. (a) I yini leswi endleke Yesu a karhateka hi rifu rakwe? (b)Yesu u ri kwetsimise hi tindlela tihi vito ra Yehovha? (Nakambe vona bokisi leri nge “ Ku Tshembeka Ka Yesu Ku Kwetsimise Vito Ra Yehovha.”)

¹⁰ Yesu wa khathala swinene hi ndhuma ya Tata wakwe. (Yoh. 14:31) Yesu a a karhatekile swinene hileswi vito ra Tata wakwe a ri ta thyakisiwa hileswi yena a hehliwaka hi ku va murhukani ni musandzi. Sweswo hi swona swi endleke a khongela a ku: “Tatana, loko swi koteka, xinwelo lexi a xi hundze eka mina.” (Mat. 26:39) Yesu u kwetsimise vito ra Tata wakwe hileswi a tshameke a tshembekile eka yena kukondza a fa.

11. Yesu u swi kombise njhani leswaku u va rhandza swinene vanhu? (Yohane 13:1)

¹¹ Nkutsulo wu tlhela wu hi dyondzisa leswaku Yesu u va rhandza swinene vanhu, ngopfungopfu vadyondzisiwa vakwe. (Swiv. 8:31; hlaya Yohane 13:1.) Hi xikombiso, Yesu a a swi tiva leswaku swin’wana swa swilo leswi a a fanele a swi endla emisaveni a swi ta tika, ngopfungopfu ku va a fa rifu ro vava swinene. Yesu u endle ntirho wo chumayela, wo dyondzisa ni ku tirhela van’wana ku nga ri hileswi a a boheka kambe hileswi a a rhandza vanhu. Hambi ku  ri hi siku leri a a ta dlayiwa ha rona, Yesu u hlambise vadyondzisiwa vakwe milenge ni ku tlhela a va lela hi ku va chavelela ni ku va dyondzisa. (Yoh. 13:​12-15) Kutani loko a ri emhandzini, Yesu u nyike xigevenga lexi a xi ta dlayiwa ntshembo ni ku tlhela a hlela leswaku mana wakwe a sala a khathaleriwa. (Luka 23:​42, 43; Yoh. 19:​26, 27) Yesu u kombise leswaku u rhandza vanhu hi ku va fela ni hi ndlela leyi a hanyeke hayona emisaveni.

12. Yesu u ya emahlweni a hi tirhela hi tindlela tihi?

¹² Hambileswi Yesu a feke “kan’we swi helela kwalaho” wa ha ya emahlweni a hi tirhela. (Rhom. 6:10) Njhani? U ya emahlweni a hi nyika swilo swo tala leswi hi kotaka ku swi kuma ntsena hikwalaho ka nkutsulo. Ehleketa hi leswi sweswi a nga le ku swi endleni. I Hosi, Muprista Lonkulu ni nhloko ya vandlha. (1 Kor. 15:25; Efe. 5:23; Hev. 2:17) Wa rhangela eka ntirho wo hlengeleta vatotiwa ni ntshungu lowukulu, ku nga ntirho lowu faneleke wu hetiwa nhlomulo lowukulu wu nga si hela. a (Mat. 25:32; Mar. 13:27) U tlhela a tiyiseka leswaku malandza yakwe yo tshembeka ma kuma swakudya leswi ma tiyisaka ripfumelo emasikwini lawa yo hetelela. (Mat. 24:45) Nakambe wa ha ta ya emahlweni a hi tirhela ni hi nkarhi wa ku Fuma kakwe ka Gidi ra Malembe. Hakunene Yehovha u hi nyike N’wana wakwe tanihi nyiko ya risima!

U NGA TSHIKI KU DYONDZA

13. Ku anakanyisisa swi nga ku pfuna njhani leswaku u ya emahlweni u dyondza hi ndlela leyi Xikwembu na Kreste va hi rhandzaka hayona?

¹³ U nga ya emahlweni u dyondza hi ndlela leyi Yehovha Xikwembu na Yesu Kreste va hi rhandzaka hayona loko u nga tshiki ku anakanyisisa hileswi va ku endleleke swona. Kumbexana hi nkarhi wa Xitsundzuxo xa lembe leri, u nga hlaya Evhangeli yin’we kumbe leti engetelekeke hi vukheta. A swi bohi leswaku u hlaya rungula ro tala hi nkarhi wun’we. Ku ri na sweswo, tinyike nkarhi wo lavisisa swivangelo leswi engetelekeke leswi endlaka hi rhandza Yehovha na Yesu. Nakambe u byela van’wana leswi u swi dyondzeke.

14. Hi ku ya hi Pisalema 119:97 ni nhlamuselo ya le hansi, ku endla ndzavisiso swi ta hi pfuna njhani leswaku hi ya emahlweni hi dyondza hi nkutsulo ni tidyondzo tin’wana? (Nakambe vona xifaniso.)

¹⁴ Loko u ri ni malembe yo tala u ri entiyisweni kumbexana wa tivutisa loko u ta dyondza  swilo leswintshwa hi vululami bya Xikwembu, rirhandzu ra xona ni nkutsulo. Ntiyiso wa mhaka hi leswaku ku ta tshama ku ri ni swilo leswintshwa leswi hi swi dyondzaka eka timhaka teto ni tin’wana. Kutani u nga endla yini? Hlaya mikandziyiso ya hina. Loko u hlaya hi mhaka leyi u nga yi twisisiki kahle endla ndzavisiso. Endzhaku ka sweswo anakanyisisa hileswi u swi dyondzeke ni leswi swi ku byelaka swona hi Yehovha, N’wana wakwe ni ndlela leyi va ku rhandzaka hayona.—Hlaya Pisalema 119:97 ni nhlamuselo ya le hansi.

15. Hikwalahokayini hi fanele hi tikarhatela ku dyondza swilo leswintshwa eBibeleni?

¹⁵ U nga heli matimba loko u nga dyondzi swilo leswintshwa kumbe swo tsakisa loko u ri karhi u hlaya kumbe u endla ndzavisiso. Phela u fana ni munhu loyi a nga eku laveni ka nsuku, munhu wo tano a nga ha heta tiawara to tala kumbe masiku yo tala a nga si kuma ni xiphemu lexitsongo xa nsuku. Hambiswiritano, u lehisa mbilu naswona a nga tshiki ku lavisisa hikuva hambi ku ri xiphemu lexitsongo xa nsuku i xa nkoka eka yena. Swi le rivaleni leswaku ntiyiso lowu nga eBibeleni i wa nkoka swinene ku tlula nsuku! (Ps. 119:127; Swiv. 8:10) Hikwalaho u nga heli mbilu, yana emahlweni u hlaya Bibele.—Ps. 1:2.

16. Hi nga va tekelela njhani Yehovha na Yesu?

¹⁶ Loko u ri karhi u dyondza lava tindlela to tirhisa leswi u swi dyondzaka. Hi xikombiso, tekelela vululami bya Yehovha hi ku khoma vanhu ku fana. Nakambe tekelela ndlela leyi Yesu a a rhandza Tata wakwe ni vanhu hayona hi ku va u tiyimisela ku xaniseka hikwalaho ka vito ra Yehovha naswona u tirhela vamakwerhu. Nakambe tekelela Yesu hi ku chumayela van’wana leswaku na vona va ta kuma nkateko wo amukela nyiko ya risima ya Yehovha.

17. Hi ta dyondza hi yini eka nhlokomhaka leyi landzelaka?

¹⁷ Loko hi ya hi twisisa ni ku tlangela nkutsulo hi ta ya hi rhandza Yehovha ni N’wana wakwe, lava na vona va nga ta ya va hi rhandza. (Yoh. 14:21; Yak. 4:8) A hi yeni emahlweni hi tirhisa leswi Yehovha a hi nyikeke swona leswaku hi dyondza hi nkutsulo. Eka nhlokomhaka leyi landzelaka, hi ta dyondza hi tindlela tin’wana leti hi nga vuyeriwaka hatona eka nkutsulo ni leswi hi nga swi endlaka ku kombisa leswaku ha ri tlangela rirhandzu ra Yehovha.