Ndzi velekiwe eSt. Paul, Minnesota, U.S.A., hi 1954, endyangwini lowu a wu nghena kereke ya Rhoma Khatoliki. Ndzi n’wana wa vumbirhi eka va ntlhanu. Ndzi nghene xikolo xa Makhatoliki naswona a ndzi pfuna vaprista hi migingiriko ya le kerekeni. Kambe a ndzi nga tivi swo tala hi Bibele. Hambileswi a ndzi tshemba leswaku ku ni Xikwembu lexi tumbuluxeke swilo hinkwaswo kambe leswi a ndzi swi dyondza ekerekeni a ndzi nga swi tshembi.

Loko ndzi endla lembe ro sungula eWilliam Mitchell College of Law, ndzi endzeriwe hi Timbhoni ta Yehovha. A ndzi ri eku hlantsweni ka mpahla kutani ndzi kombele vatekani volavo leswaku va tlhela va vuya. Loko va vuya, ndzi va vutise swivutiso swimbirhi leswi landzelaka: “Hikwalahokayini vanhu lavanene swilo swi nga va fambeli kahle?” ni lexi nge “Vanhu va nga wu kuma njhani ntsako?” Va ndzi nyike buku leyi nge Ntiyiso Lowu Yisaka Evuton’wini Lebyi Nga Heriki ni Bibele yo xonga ya muhlovo wa rihlaza ya Vuhundzuluxeri Bya Misava Leyintshwa Bya Matsalwa Yo Kwetsima. Ndzi tlhele ndzi pfumela ku dyondzisiwa Bibele. Dyondzo yoleyo, yi ndzi pfule matihlo. Ndzi tsakisiwe hi ku tiva leswaku Mfumo wa Xikwembu hi wona lowu nga ta tlhantlha swiphiqo leswi vanhu va nga na swona. Ndzi swi vonile leswaku mifumo ya vanhu yi tsandzekile naswona yi lo vangela vanhu mbitsi ni maxangu ntsena.

 Ndzi tinyiketele eka Yehovha eku sunguleni ka 1982 naswona loko lembe rero ri ya eku heleni ndzi khuvuriwile enhlengeletanweni ya xifundzha, leyi a yi ri ni nhlokomhaka leyi nge “Ntiyiso Wa Mfumo,” a yi khomeriwe eSt.Paul Civic Center. Hi vhiki leri landzeleke ndzi tlhelele ecivic center eMinnesota leswaku ndzi ya tsala xikambelo xo va gqweta. Eku sunguleni ka October, ndzi kume rhipoto leyi kombisaka leswaku ndzi pasile, leswi vulaka leswaku a ndzi ta sungula ku tirha tanihi gqweta.

Enhlengeletanweni leyi nge “Ntiyiso Wa Mfumo,” ndzi hlangane na Mike Richardson loyi a tirha eBethele ya le Brooklyn, u ndzi byele leswaku entsindza wa Timbhoni ta Yehovha ku simekiwe ndzawulo ya swa nawu. Ndzi tsundzuke marito lama vuriweke hi mutsheniwa wa Muetiyopiya, lama nga eka Mintirho 8:36 kutani ndzi tivutisile, ‘I yini lexi ndzi sivelaka ku endla xikombelo xo ya tirha eka Ndzawulo ya swa Nawu?’ Kutani ndzi endle xikombelo xo ya tirha eBethele.

Vatswari va mina a swi va khomanga kahle loko ndzi va Mbhoni ya Yehovha. Tatana u ndzi vutise leswaku ku tirha eBethele swi ta ndzi pfuna njhani eka ntirho wa mina wa vugqweta. Ndzi n’wi byele leswaku ndzo tirha hi ku tirhandzela. Kambe hi n’hweti va ta ndzi nyika 75 wa tidolara leswaku ndzi kota ku tixavela swo karhi, ku nga mali leyi vatirhi va le Bethele a va kuma yona.

Endzhaku ka loko ndzi fikelele swipimelo swa mina swo tirha ehubyeni, hi 1984, ndzi sungule ku tirha eBethele ya le Brooklyn, eNew York. Ndzi komberiwe ku ya tirha eNdzawulweni ya swa Nawu. Ntirho lowu a ndzi wu endla ehubyeni, a wu ndzi hlomisile.

Hi November 1983, ku xaviwe muako lowu vuriwaka Stanley Theater, eJersey City, eNew Jersey. Vamakwerhu va endle xikombelo xo pfuxeta fambiselo ra gezi ni mati emuakweni wolowo. Vamakwerhu va byele valawuri va ndhawu yoleyo leswaku va lava ku tirhisa muako wa Stanley Theater tanihi holo ya tinhlengeletano ya Timbhoni ta Yehovha. Mhaka yoleyo yi pfuxe ngundzungundzu. Nawu a wu koxa leswaku miako leyi tirhiseriwaka swa vugandzeri, yi fanele yi va laha vanhu va tshamaka kona. Muako wa Stanley Theater, a wu ri endhawini ya mabindzu hikwalaho valawuri va arile ku nyika vamakwerhu mpfumelelo wo pfuxeta muako wolowo. Vamakwerhu va tsale papila ra xivilelo kambe xivilelo xa vona xi bakanyiwile.

Hi vhiki ra mina ro sungula ndzi ri eBethele, nhlangano wu yise mhaka yoleyo ehubyeni leyi tlakukeke, wu yi tivisa hi ta ku aleriwa ka wona ku aka. Leswi ndzi tirheke ehubyeni leyi tlakukeke ya le  St. Paul, Minnesota, malembe mambirhi, a ndzi ti tiva kahle timhaka to tano. Un’wana wa vayimeri va hina u tlakuse xivutiso a vula leswaku muako wa Stanley Theater a wu tirhisiwa ku khomela swiendlakalo swa mani na mani, swo tanihi ku hlalela tifilimi ni tikhonsati ta vuyimbeleri bya rock. Hikwalahokayini swi nga pfumeleriwi leswaku wu tirhiseriwa timhaka ta swa vukhongeri? Huvo leyi tlakukeke yi yingisele mhaka yoleyo kutani yi vule leswaku valawuri va le Jersey City, va kandziyele timfanelo ta hina to gandzela hi ntshunxekile. Yi lerise valawuri va doroba rero leswaku va hi pfumelela hi pfuxeta muako wolowo, ndzi sungule ku vona ndlela leyi Yehovha a wu katekisaka hayona nhlangano wakwe hi ku tirhisa timhaka ta nawu leswaku a yisa ntirho wakwe emahlweni. A ndzi tsake ngopfu leswi na mina ndzi hoxeke xandla emhakeni yoleyo.

Vamakwerhu va sungule projeke leyikulu yo pfuxeta muako naswona hi September 8, 1985, mathwasana ya tlilasi ya vu-79, ya Xikolo xa Giliyadi ma thwasele eHolweni ya Tinhlengeletano eJersey City ni lembe ri nga si hela ku sunguriwe projeke yo pfuxeta muako. Ndzi titwa ndzi ri wa nkateko leswi ndzi hoxeke xandla eku yiseni ka rungula ra Mfumo emahlweni tanihi un’wana wa vayimeri va nawu naswona ntsako lowu ndzi wu kumeke, a wu pimaniseki na nchumu. Hi nkarhi wolowo, a ndzi nga swi tivi leswaku Yehovha wa ha ta ndzi tirhisa swinene.

Hi va-1980, swibedlhele ni madokodela a va nga yi xiximi mfanelo ya vanhu lavakulu lava nga Timbhoni, yo tshunguriwa handle ko pomperiwa ngati. Vamakwerhu va xisati lava tikeke a va langutana ni ntlhontlho lowukulu hikuva vaavanyisi a va vula leswaku wansati a nga na mfanelo yo ala ku pomperiwa ngati. A va vula leswaku loko wansati o ka a nga pomperiwi ngati, u ta fa kutani n’wana a sala a nga ri na manana.

Hi December 29, 1988, Makwerhu wa xisati Denise Nicoleau, u lahlekeriwe hi ngati yo tala endzhaku ka loko a veleke n’wana wakwe wa jaha. Leswi vutomi byakwe a byi ri ekhombyeni, dokodela wakwe a lava ku n’wi pompela ngati. Makwerhu loyi wa xisati u arile. Hi xa mundzuku wa kona nimpundzu, xibedlhele xi ye eka vaavanyisi xi ya kombela mpfumelelo wo pompela makwerhu loyi ngati. Handle ko vulavurisana na Makwerhu wa xisati Nicoleau ni nuna wakwe, muavanyisi u nyike xibedlhele mpfumelelo wo pompela Denise Nicoleau ngati.

Hi Wavuntlhanu, December 30, xibedlhele xi pompele Makwerhu wa xisati Nicoleau ngati handle ka mpfumelelo wa nuna wakwe swin’we ni swirho swin’wana swa ndyangu leswi a swi ri kwale xibedlhele. Hi madyambu wolowo, swirho swin’wana swa ndyangu ni nkulu un’we kumbe vambirhi va khomiwile, va hehliwa hi ku sivela Makwerhu wa xisati Nicoleau leswaku a nga pomperiwi ngati. Hi Mugqivela nimpundzu, hi December 31, swihaxamahungu  swa le New York City, a swi vulavula hi ku khomiwa ka vamakwerhu ni swirho swa ndyangu wa Denise Nicoleau.

Hi Musumbhunuku ni mpundzu, ndzi vulavurisane na Milton Mollen loyi a ri muavanyisi ehubyeni leyi tlakukeke. Ndzi n’wi vikele hi ta nandzu wolowo, ndzi n’wi hlamusela leswaku muavanyisi u nyike mpfumelelo wo pompela muvabyi ngati handle ka mpfumelelo. Muavanyisi Mollen u ndzi kombele leswaku ndzi ya ehofisini yakwe ni nhlikanhi leswaku hi ta vulavurisana hi timhaka ta nawu leti fambisanaka ni mhaka yoleyo. Hi madyambu ya siku rero, mulanguteri wa mina, Philip Brumley, u fambe na mina hi ya ehofisini ya Muavanyisi Mollen. Muavanyisi u rhambe ni gqweta leri yimelaka xibedlhele xexo leswaku na rona ri va kona. Bulo leri hi veke na rona a ri tikile swinene. Makwerhu Brumley u tsale swin’wana exibukwanini xakwe kutani a ndzi byela leswaku ndzi “ehlisa moya.” Ndzayo yakwe yi ndzi pfunile swinene hikuva se a ndzi virile naswona a ndzi lava ku komba gqweta leri yimelaka xibedlhele leswaku ri endle xihoxo.

Endzhaku ka kwalomu ka awara, Muavanyisi Mollen u vule leswaku mhaka yoleyo ku ta pfukiwa hi yona mundzuku ehubyeni. Loko hi ri karhi hi huma ehofisini yakwe, Muavanyisi Mollen u vule leswaku gqweta leri yimelaka xibedlhele ri ta “khoma xo tika mundzuku.” Leswi vulaka leswaku gqweta rero a swi ta ri tikela ku yimela timhaka ta rona. Ndzi titwe onge hi loko Yehovha a ndzi tiyisekisa a vula leswaku mhaka ya hina ya khomeka. Swi ndzi hlamarisile ku vona Yehovha a tirhisa hina leswaku a hetisisa xikongomelo xakwe.

Hi tirhe ku kala ku va vusiku hi hlela leswi hi nga ta swi vula hi xa mundzuku wa kona nimpundzu. Laha mhaka yoleyo a yi ta tengeriwa kona a ku nga ri ekule ni Bethele ya le Brooklyn hikwalaho vo tala lava a va tirha na hina eNdzawulweni ya swa Nawu va tifambele hi milenge va ya kwale. Endzhaku ka loko vaavanyisi va mune va yingisele mhaka yoleyo, va vule leswaku a swi nga fanelanga ku nyikiwe mpfumelelo wo pompela ngati. Huvo leyi tlakukeke yi yime na Makwerhu wa xisati Nicoleau, yi tlhele yi vula leswaku ku nyika mpfumelelo handle ko vulavurisana ni muvabyi, i ku lwisana ni timfanelo ta vanhu.

Endzhakunyana ka sweswo, huvo leyi tlakukeke ya le New York, yi byele Makwerhu wa xisati Nicoleau leswaku u ni mfanelo yo tshunguriwa handle ko pomperiwa ngati. Yoleyo a ku ri mhaka yo sungula eka ta mune leti khumbaka ngati leti huvo leyi tlakukeke yi yimeke na hina eka tona  naswona ndzi hoxeke xandla eka tona. (Vona bokisi leri nge “ Milandzu Leyi Hluriweke eHubyeni Ya Swivilelo.”) Ndzi tlhele ndzi joyina magqweta man’wana eBethele lawa a ma tenga timhaka leti fambisanaka ni ku sirheleriwa ka vana, ku dlaya vukati ni timhaka leti fambisanaka ni tindhawu ni miako.

Loko ndzi hlangana ni nghamu ya mina Dawn, a hambane ni nuna wakwe naswona a ri ni vana vanharhu. A nga tirhi naswona a ri phayona. A vone xo tika evuton’wini naswona ndlela leyi a gingiriteka hayona entirhweni wa Yehovha yi ndzi khumbe mbilu. Hi 1992, hi ye eNhlengeletanweni ya Xifundzha eNew York City naswona ndzi veke ra vusiwana. Endzhaku ka lembe hi catile. A a ri nyiko leyi humaka eka Yehovha eka mina hikuva a wu hisekela ngopfu ntirho wa Yehovha naswona vumunhu byakwe a byi ndzi hlantswa mbilu. Vutomi bya mina na Dawn a byi ri bya ka tsakani na rhulani.—Swiv. 31:12.

Loko hi cata, vana a va ri ni malembe ya 11, 13, na 16. Leswi a ndzi lava ku va tatana lonene eka vona, ndzi hlaye ndzi tlhela ndzi tirhisa rungula hinkwaro leri vulavulaka hi ku va tatana evukatini bya vumbirhi leri kumekaka etibukwini ta hina. Mitlhontlho yi ve kona kambe ndzi tsakile hileswi vana va ndzi amukeleke hi mandla mambirhi naswona a va ndzi teka tanihi munghana ni tatana loyi a tshembekaka. Hi endle leswaku vanghana va vana va hina va titwa va ntshunxekile ku ta ekaya naswona a swi hi tsakisa ku vona vana va ri karhi va tlulatlula.

Hi 2013, mina na Dawn hi rhurhele eWisconsin leswaku hi ya khathalela vatswari va hina lava se a va dyuharile. Lexi tsakisaka hileswaku a ndzi tshikanga ku tirha eBethele. Nhlangano wu ndzi kombele leswaku ndzi pfuneta hi swa nawu ndzi ri ekaya.

Hi September 2018, ndzi xiye leswaku a ndzi tshamela ku tibasisa nkolo. Ndzi ye eka dokodela leswaku a ndzi kambela kambe a nga kumanga nchumu. Dokodela un’wana u ndzi byele leswaku ndzi ya eka dokodela loyi a tirhaka hi byongo ni fambiselo ra miri (neurologist). Hi January 2019, dokodela yoloye, u kume leswaku ndzi khomiwe hi vuvabyi lebyi vuriwaka neurological, ku nga vuvabyi lebyi nga tshungulekiki lebyi khumbaka fambiselo ra byongo ni miri hinkwawo.

Endzhaku ka masiku manharhu, ndzi suleke mahlangano ya voko ra xinene loko ndzi ri eku tlangeni ka ntlangu lowu ndzi wu rhandzaka ngopfu. I khale ndzi tlanga ntlangu wolowo naswona a ndzi ri mathwarivona eka wona. Kambe ndzi sungule ku xiya leswaku matimba ya mina ma ya ma hela. Hi xitshuketa, vuvabyi bya mina byi nyanyile, a ndzi nga ha swi koti ku vulavula kahle, ku famba ni ku mita.

Ndzi tsake ngopfu leswi ndzi tirhiseke ntokoto wa mina wa vugqweta leswaku ndzi hoxanyana xandla eku pfuneni ka nhlangano wa Yehovha. Ndzi tlhele ndzi va ni njombo yo tsala tinhlokomhaka to tala eka timagazini leti hlayiwaka hi madokodela, magqweta ni vaavanyisi nakambe ndzi ve ni nkateko wo yimela timfanelo ta Timbhoni ta Yehovha to tshunguriwa ni ku endliwa vuhandzuri handle ko pomperiwa ngati. Hambiswiritano, ‘mina ndzo va hlonga leri nga pfuniki nchumu. Leswi ndzi nga swi endla hi leswi a ndzi fanele ndzi swi endla.’—Luka 17:10.