Yehovha u lava leswaku vatekani va tshama va tsakile, va va ni vuxaka lebyinene ni ku tiphina hi rirhandzu ra vona naswona ri tshama hilaha ku nga heriki. (Mat. 19:4-6) Loko u lava ku cata, u nga n’wi kuma njhani loyi u nga tekanaka na yena? Leswi Yehovha a nga Muvumbi wa hina, wa swi tiva leswi hi faneleke hi swi endla loko hi lava ku tsaka evukatini. Loko u tirhisa nkongomiso wa le Matsalweni lowu a hi nyikaka wona, u ta tshama u tsakile. A hi kambisiseni yin’wana ya yona.

Hi fanele hi tshama hi ri karhi hi tsundzuka leswi: “Mbilu yi kanganyisa ngopfu ku tlula swilo hinkwaswo naswona yi ni khombo.” (Yer. 17:9) Loko vanhu vambirhi va sungula ku rhandzana, mitlhaveko ya vona yi nga ha kula swinene naswona va nga ha sungula ku navelana. Vanhu lava tekanaka hikwalaho ko tsandzeka ku tikhoma, va hetelela va nga tsakanga evukatini. (Swiv. 28:26) Hi yona mhaka ku nga vutlhari ku nga tsutsumeli ku byelana ndlela leyi mi titwaka hayona kumbe ku endla switshembiso swo tekana mi nga se tivana ku antswa.

Swivuriso 22:3 yi ri: “Lowo tlhariha u vona khombo kutani a tumbela, Kambe loyi a nga riki na ntokoto u ya emahlweni a famba kutani a langutana ni vuyelo bya swiendlo swakwe.” Xana ku tirhisa ti-website to rhandzana eka tona, swi ni khombo hi ndlela yihi? Lexi twisaka ku vava, van’wana va dyondze ku vava hi ku rhandzana ni munhu loyi va nga n’wi tiviki eka ti-website ivi va ya swi kuma ku ri khale leswaku u va kanganyisile. Kasi van’wana va tirhisa mavito ya vukanganyisi leswaku va xisa vanhu ni ku va yivela mali. Ku kumeke leswaku van’wana lava endlaka manyala yo tano hi lava ti endlaka onge i Timbhoni.

Xiya khombo rin’wana. Ti-website tin’wana ti tirhisa minongonoko ya le ka khompyuta leswaku ti vhumbha loko vanhu vo karhi va fanelana. Kambe a ku na vumbhoni lebyi kombaka leswaku ku vhumba koloko i ka ntiyiso. Ku ta va ku nga ri vutlhari ku tshemba minongonoko ya le ka khompyuta loko u lava ku teka xiboho xa nkoka xo fana ni ku hlawula loyi u nga tekanaka na yena. Switsundzuxo leswi nga eBibeleni swi yi tlula ekule minongonoko ya le ka khompyuta.—Swiv. 1:7; 3:5-7.

Xitsundzuxo lexi nga eka Swivuriso 14:15 xi ri: “Munhu loyi a nga riki na ntokoto u tshemba rito rin’wana ni rin’wana, kambe lowo tlhariha u anakanyisisa  hi leswi a nga ta swi endla.” Loko u nga se tibyela leswaku munhu wo karhi i munghana lonene wa vukati, u fanele u rhanga u n’wi tiva ku antswa. Kambe swi ta tika ku endla tano loko mi rhandzana eka ti-website. Loko mi kombana vuxokoxoko bya n’wina eka ti-website ni ku rhumelana marungula nkarhi ni nkarhi, xana sweswo swi vula leswaku se ma tivana? Vo tala lava a va tibyela leswaku se va kume loyi va nga rhandzanaka na yena, va hlamarile hileswi va swi voneke eka munhu wa kona loko se va hlangana hi xiviri.

Mupisalema u te: “A ndzi tshami ni vanhu lava kanganyisaka, naswona ndzi papalata vanhu lava fihlaka leswi va nga swona.” (Ps. 26:4) Van’wana va fihla leswi va nga swona eka ti-website leswaku va ta rhandziwa. Va tumbeta vumunhu bya vona byo biha ni ku vulavula kahle hi vona vini loko va rhumela marungula. I swa nkoka ku tivutisa swivutiso leswi: “Loko van’wana va vula leswaku i Timbhoni ta Yehovha, xana va khuvuriwile? Xana va ni vuxaka lebyinene na Yehovha? Xana i swikombiso leswinene evandlheni? Kumbexana i swikombiso swo biha ni “vanghana vo biha”? (1 Kor. 15:33; 2 Tim. 2:20, 21) Xana va ntshunxekile ku nghenela vukati hi ku ya hi milawu ya le Matsalweni?” U fanele u kuma tinhlamulo ta swivutiso leswi kambe swi ta ku tikela ku endla tano loko u nga kombeli mpfuno eka Timbhoni kuloni leti tivaka munhu wa kona ku antswa. (Swiv. 15:22) Ku engetela kwalaho, nandza wo tshembeka wa Yehovha a nge pfumeli ku ‘paniwa’ ni loyi a nga riki mupfumeri.’—2 Kor. 6:14; 1 Kor. 7:39.

Leswi ku rhandzana eka ti-website swi nga ni khombo, ku ni tindlela to antswa leti u nga ti tirhisaka leswaku u kuma munghana wa vukati loyi mi nga ta va ni vuxaka lebyinene swin’we vutomi hinkwabyo. U nga n’wi kuma njhani munghana wa vukati? Loko Timbhoni ta Yehovha ti hlengeletana swin’we etinhlengeletanweni ta vandlha, ta muganga ni ta xifundzha kumbe kun’wana, kwalaho u nga kota ku lava munhu loyi u nga tekanaka na yena.

Leswi ntungu wa COVID-19 wu hi sivelaka ku hlangana, hi khoma tinhlengeletano ta vandlha hi ku tirhisa switirhisiwa swa elektroniki laha u nga kotaka ku hlangana ni Timbhoni tin’wana leti nga catangiki. Kwalaho u ta kota ku vona leswi va swi endlaka evandlheni ni ku twa tinhlamulo ta vona leti akaka. (1 Tim. 6:11, 12) Mi nga tlhela mi bula swin’we loko tinhlengeletano ta vandlha ti herile. Loko Timbhoni ti hlangana swin’we hi ntlawa leswaku ti tiphina hi ku tirhisa switirhisiwa swa elektroniki, n’wi langutise hi vurhon’wana loyi u n’wi tsakelaka leswaku u kota ku vona ndlela leyi a va khomaka hayona van’wana, sweswo swi ta ku pfuna u tiva vumunhu byakwe. (1 Pet. 3:4) Hi ku famba ka nkarhi, loko se u n’wi tiva ku antswa u nga kambisisa loko leswi mi swi lavaka evuton’wini swi fambisana kumbe ku vona loko mi ta va vatekani lava nga ta khomisana.

Loko lava nga catangiki va tirhisa switsundzuxo swa le Bibeleni loko va lava munghana wa vukati, va ta tsaka evukatini naswona va ta pfumelelana ni buku ya Swivuriso loko yi ku: “La kumaka nsati [kumbe nuna] lonene u kume nchumu lowunene, naswona u kuma tintswalo ta Yehovha.”—Swiv. 18:22.