1. Yehovha u lava leswaku ku endleka yini namuntlha?

 NAMUNTLHA Xikwembu xi lava leswaku mahungu lamanene ya Mfumo ma chumayeriwa emisaveni hinkwayo. (Mar. 13:10; 1 Tim. 2:3, 4) Ntirho lowu i wa Yehovha naswona i wa nkoka ngopfu lerova u hlawule N’wana wakwe loyi a n’wi rhandzaka leswaku a wu kongomisa. Hi nga tiyiseka leswaku leswi ntirho lowu wu languteriwaka hi Yesu loyi a nga ni vuswikoti, wu ta hetiwa hilaha Yehovha a lavaka hakona makumu ma nga si fika.—Mat. 24:14.

2. Hi ta bula hi yini eka nhlokomhaka leyi?

² Eka nhlokomhaka leyi, hi ta vona ndlela leyi Yesu a tirhisaka “nandza wo tshembeka ni wo tlhariha” leswaku a hi phamela swakudya leswi hi tiyisaka ripfumelo ni ku hlela valandzeri vakwe leswaku va endla ntirho lowukulu wo chumayela. (Mat. 24:45) Hi ta tlhela hi vona leswi un’wana ni un’wana wa hina a nga swi endlaka leswaku a seketela Yesu ni nandza wo tshembeka.

3. Yesu u nyikiwe matimba yo lawula yini?

³ Yesu u langutela ntirho wo chumayela. Hi swi tiva njhani sweswo? Loko Yesu a nga si tlhelela etilweni, u hlangane ni valandzeri vakwe vo tshembeka va nga ri vangani entshaveni ya Galeliya. U te: “Ndzi nyikiwe matimba yo lawula swilo hinkwaswo etilweni ni le misaveni.” U tlhele a ku: “Hikwalaho, fambani mi ya endla vanhu va matiko hinkwawo va va vadyondzisiwa.” (Mat. 28:18, 19) Hikwalaho, ku langutela ntirho wo chumayela i swin’wana swa swilo leswi Yesu a nyikiweke vulawuri eka swona.

4. Hikwalahokayini hi tiyiseka leswaku Yesu wa ha ya emahlweni a langutela ntirho wo chumayela?

 ⁴ Yesu u vule leswaku ntirho wo chumayela ni wo endla vadyondzisiwa a wu ta endliwa ‘ematikweni hinkwawo’ naswona a a ta va ni valandzeri vakwe “mikarhi hinkwayo kukondza makumu ma fika.” (Mat. 28:20) Marito wolawo ma swi veka erivaleni leswaku Yesu a ta ya emahlweni a kongomisa ntirho wo chumayela ku ta fikela ni le nkarhini wa hina.

5. Hi pfuneta njhani leswaku Pisalema 110:3 yi hetiseka?

⁵ Yesu a a nga karhateki hi leswaku a ku nge vi na vatirhi vo tala loko makumu ma fika. A a swi tiva leswaku marito ya mupisalema lama nge: “Vanhu va wena va ta tinyiketela hi ku swi rhandza loko vuthu ra wena ri ya enyimpini” a ma ta hetiseka. (Ps. 110:3) Loko u chumayela mahungu lamanene, u le ku seketeleni ka Yesu ni nandza wo tshembeka naswona u le ku hoxeni ka xandla leswaku vuprofeta lebyi byi hetiseka. Ntirho wu ya emahlweni wu endliwa kambe ku ni swihinga.

6. Vachumayeri va Mfumo va langutana ni xihinga xihi namuntlha?

⁶ Xihinga lexi vachumayeri va Mfumo va langutanaka na xona i ku kanetiwa. Vagwinehi, vafundhisi ni van’watipolitiki va endle leswaku vanhu vo tala va nga wu tsakeli ntirho wa hina. Loko maxaka, vanghana ni lava hi tirhaka na vona va tshemba mavunwa lawa, va nga ha hi sindzisa ku tshika ku tirhela Yehovha ni ku chumayela. Ematikweni man’wana valala va hi chavisela, va hi xungeta ni ku hi pfalela ejele. Sweswo a swi hi hlamarisi. Yesu u te: “Mi ta vengiwa hi matiko hinkwawo hikwalaho ka vito ra mina.” (Mat. 24:9) Loko hi vengiwa, byebyo i vumbhoni bya leswaku Yehovha wa hi amukela. (Mat. 5:11, 12) Diyavulosi hi yena a endlaka leswaku hi kanetiwa. Kambe Yesu u ni matimba ku n’wi tlula! Vanhu va matiko hinkwayo va chumayeriwa mahungu lamanene hileswi Yesu a seketelaka ntirho lowu. A hi kambisiseni vumbhoni bya sweswo.

7. U vona vumbhoni byihi lebyi kombisaka leswaku Nhlavutelo 14:6, 7 yi le ku hetisekeni?

⁷ Tanihi vachumayeri va Mfumo hi tlhela hi langutana ni xihinga xin’wana xo chumayela vanhu va tindzimi tin’wana. Yesu u byele muapostola Yohane leswaku a hi ta xi hlula xihinga lexi enkarhini wa hina loko hi ri karhi hi chumayela mahungu lamanene. (Hlaya Nhlavutelo 14:6, 7.) Njhani? Hi chumayela vanhu vo tala hilaha hi nga kotaka hakona leswaku va twa mahungu lamanene ya Mfumo ivi va tihlawulela. Namuntlha, vanhu emisaveni hinkwayo va kota ku hlaya rungula leri humaka eBibeleni eka website ya hina ya jw.org hikuva ri kumeka hi tindzimi to tlula 1 000. Huvo leyi Fumaka yi nyike mpfumelelo wa leswaku ku hundzuluxeriwa buku leyi nge, Tiphine Hi Vutomi Hilaha Ku Nga Heriki! hi tindzimi to tlula 700 leswaku ku va yona leyi hi yi tirhisaka ku dyondza na vanhu. Ku endliwe malunghiselelo ya leswaku ku humesiwa tivhidiyo ta lava nga twiki ni mikandziyiso ya braille ya lava nga voniki leswaku va kota ku tiyisa ripfumelo ra vona. Hi vona vuprofeta bya Bibele byi endleka. Vanhu “lava humaka eka tindzimi hinkwato ta matiko” va dyondza ku vulavula “ririmi leri tengeke” ra ntiyiso wa Bibele. (Zak. 8:23; Sof. 3:9) Hinkwaswo leswi, swi le ku endlekeni hileswi Yesu Kreste a langutelaka ntirho lowu hi vuswikoti.

8. Ku ta fikela sweswi hi byihi vuyelo lebyi veke kona hikwalaho ka ntirho wa hina wo chumayela?

⁸ Namuntlha vanhu vo tlula 8 000 000, ematikweni ya 240 va le ka nhlangano wa Yehovha naswona lembe ni lembe ku khuvuriwa makume ya magidi ya vanhu! Xa nkoka ku tlula tinhlayo, hileswaku vadyondzisiwa lava lavantshwa va tikarhatela ku ambala “vumunhu  lebyintshwa.” (Kol. 3:8-10) Vo tala va tshike ku tikhoma ku biha, madzolonga, xihlawuhlawu ni ku rhandza ngopfu tiko. Vuprofeta lebyi nga eka Esaya 2:4 byi le ku endlekeni; a va ha “dyondzi nyimpi.” Loko hi ri karhi hi wa hi pfuka leswaku hi ambala vumunhu lebyintshwa, hi pfuna vanhu leswaku va nghena eka nhlangano wa Xikwembu naswona hi kombisa leswaku hi landzela Yesu Kreste mulanguteri wa hina. (Yoh. 13:35; 1 Pet. 2:12) Leswi a swo tiendlekela. Yesu u hi nyika mpfuno lowu hi wu lavaka.

9. Hi ku ya hi Matewu 24:45-47, ku profetiwe leswaku ku ta endleka yini enkarhini wa makumu?

⁹ Hlaya Matewu 24:45-47. Yesu u vule leswaku enkarhini wa makumu a a ta hlawula “nandza wo tshembeka ni wo tlhariha” leswaku a hi nyika nkongomiso lowu humaka eRitweni ra Xikwembu. Enkarhini wa hina hi nga langutela leswaku nandza loyi a va a ri karhi a gingiriteka. U endla tano. Mulanguteri wa hina u tirhise ntlawa lowu lowutsongo wa vahlawuriwa leswaku a nyika vanhu va Xikwembu ni lava navelaka ku dyondza hi xona “swakudya hi nkarhi lowu faneleke.” Vahlawuriwa lava a va titeki tanihi valawuri va ripfumelo ra van’wana. (2 Kor. 1:24) Ematshan’wini ya sweswo, va swi tiva leswaku Yesu Kreste hi yena “murhangeri ni ndhuna” ya vanhu vakwe.—Esa. 55:4.

10. I buku yihi eka leti kombisiweke exifanisweni, leyi ku tiyisekiseke leswaku u famba endleleni leyi yisaka evuton’wini lebyi nga heriki?

¹⁰ Ku sukela hi 1919, nandza wo tshembeka u humese tibuku to hambanahambana leti pfuneke vanhu lava tsakelaka leswaku va dyondza ntiyiso lowu humaka eRitweni ra Xikwembu. Hi 1921, nandza u humese buku ya Xinghezi leyi nge, The Harp of God leswaku yi pfuna lava tsakelaka ku dyondza Bibele. Loko  nkarhi wu ri karhi wu famba, ku humesiwe tibuku tin’wana. Hi yihi buku leyi ku pfuneke u tiva ni ku rhandza Tata wa hina la nge matilweni? Xana a ku ri “Let God Be True,” The Truth That Leads to Eternal Life, leti kumekaka hi Xinghezi. Kumbe leyi nge, U Nga Hanya Hi Masiku eParadeyisini eMisaveni, Vutivi Lebyi Yisaka eVuton’wini Lebyi Nga Heriki, Xana Bibele Yi Dyondzisa Yini Hakunene?, I Yini Leswi Hi Nga Swi Dyondzaka eBibeleni? Kumbe buku ya hina leyintshwa leyi nge, Tiphine Hi Vutomi Hilaha Ku Nga Heriki! Hinkwato tibuku leti ti tlange ndzima ya tona hi nkarhi lowu ti nga humesiwa ha wona.

11. Hikwalahokayini swi ri swa nkoka leswaku hinkwerhu hi wundla ripfumelo ra hina?

¹¹ A hi vanhu lava ha dyondzaka Bibele ntsena lava faneleke va engetela vutivi bya vona hi Yehovha na hi Bibele. Hinkwerhu hi fanele hi endla tano. Muapostola Pawulo u tsale a ku: “Swakudya leswi tiyeke i swa vanhu lava wupfeke.” U tlhele a vula leswaku ku tirhisa swilo leswi hi swi dyondzaka swi ta hi pfuna leswaku hi “hambanisa leswi lulameke ni leswi nga lulamangiki.” (Hev. 5:14) Emikarhini leyi yo tika leyi mahanyelo ya vanhu ma nga hohloka swinene swi nga hi tikela ku yingisa milawu ya Yehovha. Kambe Yesu wa tiyiseka leswaku hi dyondza swilo leswi nga ta hi pfuna hi tiyisa ripfumelo ra hina. Swilo leswi hi swi dyondzaka swi huma eRitweni ra Xikwembu leri huhuteriweke ku nga Bibele. Nandza wo tshembeka u lunghiselela leswi hi swi dyondzaka a ri karhi a kongomisiwa hi Yesu.

12. Ku fana na Yesu hi ri teka njhani vito ra Xikwembu?

¹² Ku fana na Yesu, hi xixima vito ra Xikwembu hilaha swi faneleke swi va hakona. (Yoh. 17:6, 26) Hi xikombiso hi 1931, hi sungule ku tivitana hi vito leri humaka eMatsalweni leri nge, Timbhoni ta Yehovha naswona hi ku endla tano hi kombise ndlela leyi vito ra Tata wa hina wa le matilweni ri nga ra  nkoka hayona nakambe a hi lava ku tiviwa ha rona. (Esa. 43:10-12) Ku sukela hi October ya lembe rero, vito ra Xikwembu ri sungule ku humelela eka xifunengeto xa nkandziyiso wun’wana ni wun’wana wa magazini lowu. Nakambe, Bibele—Matsalwa Yo Kwetsima Ya Misava Leyintshwa yi vuyisele vito ra Xikwembu laha ri humelelaka kona eRitweni ra xona. Hi hambane ngopfu ni tikereke leti suseke vito ra Yehovha eTibibeleni ta tona to tala!

13. I yini lexi ku tiyisekisaka leswaku Yesu u tirhisa “nandza wo tshembeka ni wo tlhariha” namuntlha? (Yohane 6:68)

¹³ Hi ku tirhisa “nandza wo tshembeka ni wo tlhariha,” Yesu u simeke nhlangano wo hlamarisa laha misaveni leswaku vugandzeri byo tenga byi ya emahlweni. U titwa njhani hi nhlangano wolowo? Kumbexana u ehleketa hi marito ya muapostola Petro loko a byela Yesu a ku: “Hi ta ya eka mani? Hi wena loyi a nga ni marito lama nga ni vutomi lebyi nga heriki.” (Yoh. 6:68) A hi ta va hi ri kwihi namuntlha loko a hi nga ri enhlanganweni wa Yehovha? Hi ku tirhisa nhlangano lowu, Kreste wa tiyiseka ku hi kuma swilo hinkwaswo leswi hi swi lavaka leswaku hi tiyisa ripfumelo ra hina eka Xikwembu. U tlhela a hi letela leswaku hi va ni vuswikoti entirhweni wo chumayela. Nakambe u hi pfuna leswaku hi ambala “vumunhu lebyintshwa” leswaku hi tsakisa Yehovha.—Efe. 4:24.

14. U vuyeriwe njhani hileswi u nga xirho xa nhlangano wa Yehovha hi nkarhi wa ntungu wa COVID-19?

¹⁴ Yesu wa hi kongomisa hi ndlela ya vutlhari hi nkarhi wa maxangu. Hi vone vuyelo bya nkongomiso wolowo loko ku sungula ntungu wa COVID-19. Hambileswi vanhu vo tala emisaveni a va nga swi tivi leswaku va khoma kwihi va tshika kwihi, Yesu u tiyisekise leswaku  hi kuma nkongomiso lowu nga ta hi pfuna hi tshama hi sirhelelekile. Hi khutaziwe ku ambala ti-mask ni ku papalata ku ti manyamanya na vanhu loko hi ri etindhawini ta mani na mani. Vakulu va tsundzuxiwe leswaku va tshama va ri karhi va burisana ni vamakwerhu hinkwavo evandlheni ni ku tiva leswi va swi pfumalaka leswaku va ta kota ku va pfuna va tshama va hlayisekile ni ku va ni vuxaka lebyinene na Yehovha. (Esa. 32:1, 2) Hi nyikiwe nkongomiso ni ku khutaziwa hi ku tirhisa swiviko swa Huvo leyi Fumaka.

15. Hi wihi nkongomiso lowu hi wu kumeke wo khoma tinhlengeletano ta vandlha ni ku chumayela hi nkarhi wa ntungu naswona ku ve ni vuyelo byihi?

¹⁵ Hi nkarhi wa ntungu hi tlhele hi kuma nkongomiso mayelana ni ndlela leyi hi nga khomaka tinhlengeletano ta vandlha ni ku katseka entirhweni wo chumayela. Hi ku copeta ka tihlo, hi sungule ku khoma tinhlengeletano ta vandlha, ta miganga ni ta xifundzha hi ku tirhisa zoom. Hi tlhele hi sungula ku chumayela hi ku tirhisa mapapila na foni. Yehovha u katekise matshalatshala ya hina. Marhavi yo tala ma vike tinhlayo ta le henhla ta vahuweleri. Entiyisweni, vo tala va ve ni mitokoto leyi khutazaka hi nkarhi lowu.—Vona bokisi leri nge, “ Yehovha U Katekisa Ntirho Wa Hina Wo Chumayela.”

16. Hi nga tiyiseka hi yini?

¹⁶ Van’wana va nga ha va va vone onge nhlangano a wu hundzeleta swilo hi nkarhi wa ntungu. Kambe swi ve erivaleni leswaku nkarhi ni nkarhi a hi nyikiwa nkongomiso wa vutlhari. (Mat. 11:19) Loko hi anakanyisisa hi ndlela ya rirhandzu leyi Yesu a rhangelaka vanhu vakwe hayona, ha tiyiseka leswaku hambi ko endleka yini enkarhini lowu taka, Yehovha ni N’wana wakwe loyi a n’wi rhandzaka va ta hi seketela.—Hlaya Vaheveru 13:5, 6.

17. U titwa njhani hileswi Yesu a ku kongomisaka?

¹⁷ Ha khapakhapa hi ntsako leswi Yesu a nga murhangeri wa hina! Hi xiphemu xa nhlangano lowu nga ni vun’we, hambileswi hi vulavulaka tindzimi ni ku huma ematikweni yo hambanahambana naswona hi nga ni mindhavuko leyi nga faniki. Hi phameriwa swakudya leswi hi pfunaka leswaku hi va ni vuxaka lebyinene na Yehovha naswona hi dyondzisiwa ku endla ntirho wo chumayela. Hinkwerhu hi pfuniwa ku ambala vumunhu lebyintshwa naswona hi dyondzisiwa ku rhandzana. Ha tinyungubyisa hileswi Yesu a nga mulanguteri wa hina!