1. Hi fanele hi titwa njhani hileswi Yehovha a hi pfumelelaka leswaku hi khongela eka yena?

 HI NI njombo yikulu ku nga ku vulavula ni Mutumbuluxi wa tilo ni misava hi xikhongelo. Ehleketa hi mhaka leyi: Hi nga phofulela Yehovha ta le mbilwini nkarhi wun’wana ni wun’wana hi ririmi rin’wana ni rin’wana naswona a swi kali swi lava hi buka nkarhi wo vulavula na yena. Hi nga khongela eka yena hi ri exibedlhele loko hi vabya kumbe loko hi ri ejele hi ri karhi hi tiyiseka leswaku Tata wa hina la nga ni rirhandzu u ta hi twa. Ha yi khensa swinene nyiko leyi.

2. Hosi Davhida u swi kombise njhani leswaku u teka nyiko ya xikhongelo ku ri ya nkoka?

² Hosi Davhida a a swi teka swi ri swa nkoka ku khongela. U yimbelelele Yehovha a ku: “Xikhongelo xa mina a xi fane ni murhi wo nun’hwela lowu endliweke kahle lowu nyikeriwaka eka wena.” (Ps. 141:1, 2) Enkarhini wa Davhida, murhi wo nun’hwela wo kwetsima lowu a wu tirhisiwa evugandzerini bya ntiyiso hi vaprista a wu endliwa hi vukheta. (Eks. 30:34, 35) Loko Davhida a fanisa xikhongelo xakwe ni murhi wo nun’hwela, a swi kombisa leswaku a a lava ku ehleketisisa hi vukheta hileswi a a lava ku swi byela Tata wakwe wa le tilweni. Na hina hi lava ku endla tano. Hi lava leswaku swikhongelo swa hina swi tsakisa Yehovha.

3. Hi fanele hi va ni langutelo rihi loko hi vulavula na Yehovha hi xikhongelo naswona hikwalahokayini?

 ³ Loko hi khongela eka Yehovha, hi fanele hi n’wi xixima swinene. Ehleketa hi swivono swo hlamarisa leswi Esaya, Ezekiyele, Daniyele na Yohane va swi voneke. Swivono leswi swi hambanile kambe ku ni nchumu wo karhi lowu swi fanaka ha wona. Hinkwaswo swi kombisa Yehovha a ri Hosi leyi tlakuke. Esaya u “vone Yehovha a tshame exiluvelweni lexi tlakukeke ni lexi nga ehenhla.” (Esa. 6:1-3) Ezekiyele u vone Yehovha a tshame ekalichini yakwe ya le tilweni a rhendzeriwe hi ku “vangama loku fanaka ni nkwangulatilo.” (Ezek. 1:26-28) Daniyele u vone “Nkulukumba wa Masiku” a ambale swiambalo swo basa kasi exiluvelweni Xakwe a ku huma malangavi ya ndzilo. (Dan. 7:9, 10) Nakambe Yohane u vone Yehovha a tshame exiluvelweni xakwe a rhendzeriwe hi nchumu wo saseka lowu fanaka ni nkwangulatilo wa emeralda wa rihlaza. (Nhlav. 4:2-4) Loko hi anakanyisisa hi ku vangama ka Yehovha loku ku nga pimanisiwiki na nchumu, swi hi tsundzuxa hi nkateko lowukulu lowu hi nga na wona wo vulavula na yena hi xikhongelo ni nkoka wo endla tano hi xichavo. Kambe hi fanele hi khongela njhani?

4. Hi dyondza yini eka marito yo sungula ya xikhongelo lexi kumekaka eka Matewu 6:9, 10?

⁴ Hlaya Matewu 6:9, 10. Eka Dyondzo ya le Ntshaveni, Yesu u dyondzise vadyondzisiwa vakwe ku khongela hi ndlela leyi tsakisaka Xikwembu. Endzhaku ko vula leswaku “mi fanele mi khongela hi ndlela leyi,” Yesu u rhange hi ku boxa swilo swa nkoka leswi fambisanaka ni xikongomelo xa Yehovha ku nga: ku kwetsimisiwa ka vito Rakwe; ku ta ka Mfumo lowu nga ta hlasela vakaneti va Yehovha ni ndlela leyi A nga ta katekisa misava na vanhu hayona enkarhini lowu taka. Loko hi katsa swilo leswi eswikhongelweni, hi kombisa leswaku ku rhandza ka Xikwembu i ka nkoka eka hina.

5. Xana swi fanerile leswaku hi khongela hi timhaka leti khumbaka hina vini?

⁵ Eka xikhongelo lexi Yesu a vulavuleke ha xona, u swi kombisile leswaku swi fanerile ku khongela hi timhaka leti hi khumbaka. Hi nga kombela Yehovha leswaku a hi nyika swakudya swa siku, a hi rivalela swidyoho, a nga hi tshiki hi nghena endzingweni ni ku hi sirhelela eka lowo homboloka. (Mat. 6:11-13) Loko hi kombela Yehovha leswaku a hi endlela swilo leswi,  hi va hi kombisa leswaku hi titshege hi yena naswona hi lava leswaku a hi amukela.

6. Xana hi fanele hi khongelela ntsena swilo leswi boxiweke eka Xikhongelo xa Hosi? Hlamusela.

⁶ Yesu a a nga langutelanga leswaku valandzeri vakwe va xi hlokohata kunene xikhongelo lexi a va dyondziseke xona. Eka swikhongelo swin’wana swa Yesu, u boxe swilo swo hambanahambana leswi a swi n’wi khumba hi nkarhi wolowo. (Mat. 26:39, 42; Yoh. 17:1-26) Hilaha ku fanaka, hi nga khongela hi nchumu wun’wana ni wun’wana lowu hi karhataka. Loko hi fanele hi endla xiboho, hi nga khongelela ku va ni vutlhari ni ku twisisa. (Ps. 119:33, 34) Loko hi lava ku endla xiavelo xo tika, hi nga khongelela leswaku hi va ni ku twisisa ni vutlhari. (Swiv. 2:6) Vatswari va nga khongelela vana va vona, vana va nga khongelela vatswari va vona naswona hinkwerhu hi fanele hi khongelela lava hi dyondzaka na vona Bibele swin’we ni lava hi va chumayelaka. Loko hi khongela, a hi fanelanga hi endla swikombelo ntsena.

7. Hikwalahokayini hi fanele hi dzunisa Yehovha loko hi khongela?

⁷ Hi fanele hi tsundzuka ku dzunisa Yehovha loko hi khongela. I Xikwembu xa hina lexi faneleke xi dzunisiwa. Xi ‘lulamile naswona xi lunghekele ku rivalela.’ Nakambe i Xikwembu lexi nga ni “tintswalo ni ntwelavusiwana, lexi hlwelaka ku hlundzuka naswona xi nga ni rirhandzu ni ntiyiso.” (Ps. 86:5, 15) Hi ni xivangelo lexinene xo dzunisa Yehovha hikwalaho ka leswi a swi endlaka ni leswi a nga swona.

8. Hi swihi swilo swin’wana leswi hi nga khensaka Yehovha hikwalaho ka swona? (Pisalema 104:12-15, 24)

⁸ Nakambe hi susumeteleka ku khensa Yehovha hikwalaho ka swilo leswinene leswi a hi nyikaka swona. Hi xikombiso, hi nga khensa Yehovha hikwalaho ka mihlovo yo xonga leyi hi yi vonaka eka swiluva, ndzalo ya swakudya swo namba ni vanghana lavanene lava endlaka hi tsaka. Tata wa hina u hi nyika leswi na swin’wana swo tala leswaku hi tsaka. (Hlaya Pisalema 104:12-15, 24.) Xa nkoka swinene, ha n’wi khensa Yehovha hikwalaho ka ndzalo ya swakudya leswi hi tiyisaka ripfumelo ni vumundzuku byo tsakisa lebyi a hi tshembiseke byona.

9. I yini lexi nga hi pfunaka hi tsundzuka ku khensa Yehovha? (1 Vatesalonika 5:17, 18)

⁹ Swa olova ku rivala ku khensa Yehovha hikwalaho ka swilo hinkwaswo leswi a hi endleleke swona. I yini lexi nga ku pfunaka u tsundzuka?  U nga tsala ehansi swilo leswi u swi kombeleke naswona nkarhi ni nkarhi u kamba ku vona loko se Yehovha a ku hlamurile. Endzhaku ka sweswo, khongela u n’wi khensa hileswi a ku pfuneke. (Hlaya 1 Vatesalonika 5:17, 18.) Ha tsaka naswona hi titwa hi ri va nkoka loko van’wana va hi khensa. Hilaha ku fanaka, loko hi tsundzuka ku khensa Yehovha hileswi a hlamuleke swikhongelo swa hina, sweswo swa n’wi tsakisa. (Kol. 3:15) Hi xihi xivangelo xin’wana xa nkoka lexi endlaka hi khensa Xikwembu xa hina?

10. Hi ku ya hi 1 Petro 2:21, hikwalahokayini hi ri ni xivangelo xo khensa Yehovha hileswi a rhumeke Yesu laha misaveni?

¹⁰ Hlaya 1 Petro 2:21. Hi fanele hi khensa Yehovha hikwalaho ka leswi a rhumeleke N’wana wakwe loyi a n’wi rhandzaka leswaku a ta hi dyondzisa. Loko hi hlaya hi vutomi bya Yesu, hi dyondza swo tala hi Yehovha ni ndlela leyi hi nga n’wi tsakisaka hayona. Loko hi va ni ripfumelo eka gandzelo ra Kreste, hi nga kota ku va ni vuxaka lebyinene na Yehovha Xikwembu ni ku tiphina hi ku rhula na Yena.—Rhom. 5:1.

11. Hikwalahokayini loko hi khongela eka Yehovha hi tirhisa vito ra Yesu?

¹¹ Ha n’wi khensa Yehovha hileswi hi kotaka ku khongela eka yena hi ku tirhisa N’wana wakwe. Yehovha u tirhisa Yesu ku hlamula swikombelo swa hina. U yingisa ni ku hlamula swikhongelo loko ku tirhisiwa vito ra Yesu. Yesu u hlamusele a ku: “Xin’wana ni xin’wana lexi mi xi kombelaka hi vito ra mina ndzi ta xi endla leswaku Tatana a ta dzunisiwa hikwalaho ka N’wana.”—Yoh. 14:13, 14.

12. Hi xihi xivangelo xin’wana lexi endleka hi khensa Yehovha hikwalaho ka N’wana wakwe?

¹² Yehovha u hi rivalela swidyoho hikwalaho ka gandzelo ra nkutsulo ra Yesu. Matsalwa ma hlamusela Yesu tanihi ‘muprista lonkulu loyi a tshameke evokweni ra xinene ra xiluvelo xa Xikwembu ematilweni.’ (Hev. 8:1) Yesu i “mupfuni [wa hina] loyi a nga na Tatana.” (1 Yoh. 2:1) Hi khensa Yehovha hileswi a hi nyikeke Muprista Lonkulu loyi a nga ni ntwelavusiwana naswona a twisisaka ku tsana ka hina ni loyi a “hi kombelela[ka]”! (Rhom. 8:34; Hev. 4:15) Hi velekiwe hi ri ni xidyoho, kutani handle ka gandzelo ra Yesu a hi nga ta swi kota ku vulavula na Yehovha hi xikhongelo. A swi kanakanisi ku wa pfumela leswaku a hi nge swi koti ku khensa Yehovha hilaha ku heleleke hikwalaho ka nyiko ya risima leyi a hi nyikeke yona ku nga N’wana wakwe la n’wi rhandzaka!

13. Yesu u swi kombise njhani leswaku a a va rhandza vadyondzisiwa vakwe hi vusiku byo hetelela a nga si dlayiwa?

¹³ Hi vusiku byo hetelela a nga si dlayiwa, Yesu u khongelele vadyondzisiwa vakwe nkarhi wo leha a kombela Tata wakwe leswaku a “va sirhelela eka lowo homboloka.” (Yoh. 17:15) Hakunene Yesu a a va rhandza. Hambileswi a a ta langutana ni ndzingo lowukulu ku nga ri khale kambe a a karhateka hi vaapostola vakwe.

14. Hi nga swi kombisa njhani leswaku ha va rhandza vamakwerhu?

¹⁴ Ku fana na Yesu a hi khathali hi swilaveko swa hina ntsena. Ematshan’weni ya sweswo, nkarhi ni nkarhi ha va katsa vamakwerhu eswikhongelweni swa hina. Loko hi endla tano, hi yingisa xileriso xa Yesu xa leswaku hi rhandzana naswona hi komba Yehovha ndlela leyi hi va rhandzaka hayona vamakwerhu. (Yoh. 13:34) A hi tlangi hi nkarhi loko hi khongelela vamakwerhu. Rito ra Xikwembu ri hi byela leswaku “xikhongelo xa munhu la lulameke xi ni matimba.”—Yak. 5:16.

15. Hikwalahokayini vamakwerhu va lava swikhongelo swa hina?

 ¹⁵ Vamakwerhu va swi lava swikhongelo swa hina hikuva va langutana ni miringo yo tala. Hi nga kombela Yehovha leswaku a va pfuna va tiyisela mavabyi, timhangu ta ntumbuluko, tinyimpi, ku xanisiwa kumbe swiphiqo swin’wana. Nakambe hi nga khongelela vamakwerhu lava titsonaka swo karhi leswaku va pfuna lava lavaka ku pfuniwa. Kumbexana u tiva van’wana lava langutaneke ni swiyimo swo tika. Swi nga va kahle loko wo va vula hi mavito eswikhongelweni swa wena. Hi kombisa leswaku ha va rhandza vamakwerhu hi mbilu hinkwayo loko hi kombela Yehovha leswaku a va pfuna va tiyisela.

16. Hikwalahokayini hi fanele hi khongelela lava rhangelaka?

¹⁶ Lava rhangelaka evandlheni va swi tlangela swinene swikhongelo swa van’wana naswona swa va pfuna. Muapostola Pawulo na yena u swi tlangerile. U tsale a ku: “Na mina mi ndzi khongelela, leswaku ndzi nyikiwa marito yo ma vula loko ndzi pfula nomu, leswaku ndzi kota ku vulavula hi xivindzi loko ndzi twarisa xihundla xo kwetsima xa mahungu lamanene.” (Efe. 6:19) Namuntlha ku na vamakwerhu vo tala lava tirhaka hi matimba lava hi rhangelaka. Hi kombisa leswaku ha va rhandza hi ku kombela Yehovha leswaku a katekisa ntirho wa vona.

17-18. Hi le ka swiyimo swihi laha hi nga ha komberiwaka ku yimela van’wana hi xikhongelo naswona hi fanele hi tsundzuka yini?

¹⁷ Mikarhi yin’wana ha komberiwa ku yimela van’wana hi xikhongelo. Hi xikombiso, makwerhu waxisati la fambisaka dyondzo ya Bibele a nga ha kombela makwerhu waxisati loyi a fambeke na yena leswaku a pfula hi xikhongelo. Swi nga endleka makwerhu yoloye waxisati a nga xi tivi kahle xichudeni kutani a nga ha tsakela ku pfala hi xikhongelo. Hi ndlela yoleyo, a nga ha kota ku tiva leswi a faneleke a swi vula hi ku ya hi swilaveko swa xichudeni.

¹⁸ Makwerhu a nga ha komberiwa ku khongela eka nhlengeletano ya nsimu kumbe ya vandlha. Vamakwerhu lava komberiwaka ku endla tano va fanele va nga xi rivali xikongomelo xa nhlengeletano. Xikhongelo a xi fanelanga xi tirhiseriwa ku tshinya vandlha kumbe ku endla switiviso. Eka tinhlengeletano ta vandlha, hi ntolovelo timinete ta ntlhanu ti vekeriwe risimu ni xikhongelo, hikwalaho makwerhu loyi a  khongelaka a nga fanelanga a tirhisa “marito yo tala” ngopfungopfu loko tinhlengeletano ta vandlha ti sungula.—Mat. 6:7.

19. I yini lexi nga ta hi pfuna hi tshama hi lunghekele siku ra Yehovha ra vuavanyisi?

¹⁹ Leswi siku ra Yehovha ra vuavanyisi ri nga kwala nyongeni, hi fanele hi teka xikhongelo xi ri xa nkoka ngopfu evuton’wini bya hina. Yesu u vule leswi emhakeni leyi: “Kutani tshamani mi rindzile, mi khongela nkarhi hinkwawo leswaku mi ta kota ku pona swilo leswi hinkwaswo leswi faneleke ku endleka.” (Luka 21:36) Loko hi khongela nkarhi ni nkarhi, swi ta hi pfuna leswaku hi tshama hi ri ni vuxaka lebyinene ni Xikwembu leswaku loko siku ra xona ri fika ri nga hi jumi.

20. Hi nga endla njhani leswaku swikhongelo swa hina swi fana ni murhi wo nun’hwela?

²⁰ Hi dyondze yini? Hi yi teka yi ri ya risima nyiko leyi hi nga na yona yo khongela. Swilo swa nkoka leswi hi faneleke hi swi katsa eswikhongelweni swa hina hi leswi fambisanaka ni xikongomelo xa Yehovha. Hi khensa Xikwembu hikwalaho ka N’wana wa xona ni Mfumo wa xona naswona hi khongelela vamakwerhu. Nakambe hi nga khongelela swilo leswi hi swi pfumalaka nileswaku hi tshama hi ri ni ripfumelo leri tiyeke. Loko hi ehleketisisa kahle hi leswi hi swi vulaka eswikhongelweni swa hina, hi kombisa leswaku xikhongelo i xa nkoka eka hina. Marito ya hina ma ta fana ni murhi wo nun’hwela eka Yehovha ma “N’wi tsakisa.”—Swiv. 15:8.