1-2. A ku ri mani Sadoki? (1 Tikronika 12:​22, 26-28)

 EHLEKETA hi ntshungu wa vavanuna vo tlula 340 000 lava hlengeletaneke leswaku va endla Davhida hosi ya Israyele. Ku ringana masiku manharhu, vavanuna volavo a va tshame entshaveni leyi a yi ri ekusuhi na Hebroni va tsakile, va dya mabulo ni ku tlhela va yimbelela tinsimu to dzunisa Yehovha. (1 Tikr. 12:39) Exikarhi ka ntshungu wolowo a ku ri ni jaha leri vuriwaka Sadoki leri a ri nga dumanga. Hambiswiritano, Yehovha u tiyisekile leswaku hi swi tiva ku Sadoki a a ri kona kwalaho. (Hlaya 1 Tikronika 12:​22, 26-28.) A a ri mani Sadoki?

² Sadoki a a ri muprista loyi a a tirha ekusuhi ni Muprista Lonkulu Abiyatara. Sadoki a a kota ku vona swivono a tlhela a va ni vuswikoti byo twisisa ku rhandza ka Xikwembu naswona a a nyikiwe vutlhari lebyi tlulaka lebyi tolovelekeke. (2 Sam. 15:27) Vanhu a va ya eka yena loko va lava switsundzuxo swa vutlhari. Nakambe a a ri ni xivindzi. Eka nhlokomhaka leyi, hi ta dyondza hi ndlela leyi Sadoki a kombiseke xivindzi hayona.

3. (a) Hikwalahokayini vagandzeri va Yehovha va fanele va va ni xivindzi? (b) Hi ta bula hi yini eka nhlokomhaka leyi?

³ Emasikwini lawa yo hetelela, Sathana u ya emahlweni a va hlasela swinene vanhu va Xikwembu. (1 Pet. 5:8) Hi fanele hi va ni xivindzi loko hi ri karhi hi rindzela Yehovha leswaku a herisa Sathana ni misava yakwe yo homboloka. (Ps. 31:24) A hi kambisiseni tindlela tinharhu leti hi nga vaka ni xivindzi ku fana na Sadoki.

 SEKETELA MFUMO WA XIKWEMBU

4. Hikwalahokayini vanhu va Yehovha va fanele va va ni xivindzi leswaku va kota ku seketela Mfumo wakwe? (Nakambe vona xifaniso.)

⁴ Tanihi vanhu va Yehovha, hi seketela Mfumo wa yena hi timbilu hinkwato kambe mikarhi yin’wana swi lava hi va ni xivindzi leswaku hi endla tano. (Mat. 6:33) Hi xikombiso, emisaveni leyi yo homboloka swi lava hi va ni xivindzi leswaku hi hanya hi milawu ya Yehovha hi tlhela hi chumayela mahungu lamanene ya Mfumo. (1 Tes. 2:2) Hakanyingi swi lava hi va ni xivindzi leswaku hi nga katseki eka tipolitiki ta misava leyi, leyi yaka yi nyanya ku avana. (Yoh. 18:36) Vanhu va Yehovha vo tala va ve ni swiphiqo swa timali, va biwile kumbe va khomiwa hileswi va aleke ku katseka eka swa tipolitiki kumbe enyimpini.

5. Hikwalahokayini Sadoki a a fanele a va ni xivindzi leswaku a seketela Davhida?

⁵ Sadoki a a nga yanga eHebroni ku ya tlangela ku vekiwa ka Davhida tanihi hosi ntsena kambe u fambe ni matlhari naswona a a lunghekele ku lwa. (1 Tikr. 12:38) A a tiyimisele ku ya enyimpini na Davhida ni ku sirhelela Vaisrayele eka valala va vona. Hambileswi Sadoki a a nga ri na ntokoto eka swa tinyimpi kambe a a ri wanuna wa xivindzi.

6. Davhida u n’wi vekele xikombiso xihi lexinene Sadoki mayelana ni ku va ni xivindzi? (Pisalema 138:3)

⁶ Xana muprista wo fana na Sadoki u swi dyondzele kwihi ku va ni xivindzi? A a tiva vavanuna vo tala lava a va ri ni matimba va tlhela va va ni xivindzi. A swi kanakanisi leswaku u vuyeriwe swinene eka swikombiso swa vona. Hi xikombiso, ku va Davhida hi xivindzi a “rhangel[e] Israyele etinyimpini” swi endle leswaku Vaisrayele va n’wi seketela hi timbilu ta vona hinkwato. (1 Tikr. 11:​1, 2) Mikarhi hinkwayo, Davhida a a titshega hi Yehovha leswaku a a ta n’wi pfuna eka valala vakwe. (Ps. 28:7; hlaya Pisalema 138:3.) Sadoki u tekelele vavanuna van’wana lava a va ri ni xivindzi vo fana na Yoyada ni n’wana wakwe Benaya  loyi a ri nhenha ku katsa ni tindhuna ta 22 leti a ti yima na Davhida. (1 Tikr. 11:​22-25; 12:​26-28) Vavanuna lava a va tiyimisele ku endla Davhida hosi ya vona ni ku n’wi sirhelela.

7. (a) Hi swihi swikombiso swa manguva lawa swa vanhu lava nga ni xivindzi leswi hi nga swi tekelelaka? (b) U dyondza yini eka Makwerhu Nsilu hilaha swi kombisiweke hakona eka vhidiyo?

⁷ Loko hi kambisisa swikombiso swa lava seketeleke vuhosi bya Yehovha hi xivindzi, hi kuma matimba hi tlhela hi va ni xivindzi. Hi xivindzi, Hosi ya hina Yesu Kreste u papalate ku va xiphemu xa tipolitiki ta misava ya Sathana loko a ha ri emisaveni. (Mat. 4:​8-11; Yoh. 6:​14, 15) Mikarhi hinkwayo u titshege hi Yehovha leswaku a n’wi nyika matimba. Nakambe hi ni swikombiso swa ntsandza vahlayi swa manguva lawa swa vantshwa va xinuna lava aleke ku ya evusocheni kumbe ku katseka eka swa tipolitiki. Hi ku khutaza leswaku u hlaya hi mitokoto ya vona eka jw.org. a

PFUNA VAMAKWENU EVANDLHENI

8. Hi le ka swiyimo swihi laha vakulu va faneleke va va ni xivindzi leswaku va kota ku pfuna vamakwavo evandlheni?

⁸ Vanhu va Yehovha va swi rhandza ku pfunana. (2 Kor. 8:4) Hambiswiritano, mikarhi yin’wana swi lava xivindzi ku endla tano. Hi xikombiso, loko ku tlhekeka nyimpi, vakulu va swi tekela enhlokweni leswaku vamakwavo va lava ku khutaziwa, ku seketeriwa ni ku tiyisiwa eripfumelweni kumbe ku phalariwa. Hikwalaho ka leswi vakulu va rhandzaka tinyimpfu, va veka vutomi bya vona ekhombyeni leswaku va nyika vamakwerhu leswi lavekaka. (Yoh. 15:​12, 13) Loko va endla tano, va tekelela xivindzi lexi Sadoki a a ri na xona.

9. Hi ku ya hi 2 Samuwele 15:​27-29, Davhida u lerise Sadoki leswaku a endla yini? (Nakambe vona xifaniso.)

⁹ Vutomi bya Davhida a byi ri ekhombyeni. N’wana wakwe Absalomu a a tiyimisele ku n’wi wutlela vuhosi. (2 Sam. 15:​12, 13) Davhida u boheke ku baleka eYerusalema hi ku hatlisa! Kutani u byele malandza yakwe a ku: “Sukani  mi yima, a hi balekeni hikuva a hi nge poni eka Absalomu!” (2 Sam. 15:14) Loko malandza ma ri karhi ma baleka, Davhida u xiye leswaku a ku fanele ku va ni loyi a salaka leswaku a ta n’wi tivisa hi makungu ya Absalomu. Kutani Davhida u rhumele Sadoki ni vaprista van’wana emutini leswaku va ya va matihlo ni tindleve takwe. (Hlaya 2 Samuwele 15:​27-29.) A va fanele va va ni vuxiyaxiya. Swilo leswi Davhida a byeleke vaprista volavo leswaku va swi endla a swi ta veka vutomi bya vona ekhombyeni. Ehleketa leswi Absalomu wanuna la nga ni manyunyu, tihanyi naswona a kanganyisaka a a ta swi endla eka Sadoki ni vaprista volavo loko a a lo swi kuma leswaku a va n’wi veke tihlo leswaku va sirhelela Davhida!

10. Sadoki ni lava a a ri na vona va n’wi sirhelele njhani Davhida?

¹⁰ Davhida u kombele munghana wakwe wo tshembeka Huxayi na Sadoki leswaku va n’wi pfuna eka kungu rakwe. (2 Sam. 15:​32-37) Huxayi u tiendle onge u seketela Absalomu naswona u n’wi nyike pulani ya ndlela leyi a a fanele a hlasela Davhida hayona, leyi a yi ta nyika Davhida nkarhi wo tilulamisela ku tilwela. Endzhaku ka sweswo, Huxayi u byele Sadoki na Abiyatara hi kungu rolero. (2 Sam. 17:​8-16) Kutani vavanuna volavo va tivise Davhida. (2 Sam. 17:17) Hi ku pfuniwa hi Yehovha, Sadoki ni vaprista lavan’wana va kote ku sirhelela Davhida.—2 Sam. 17:​21, 22.

11. Hi nga xi tekelela njhani xivindzi xo fana ni xa Sadoki loko hi pfuna vamakwerhu?

¹¹ Loko hi fanele hi pfuna vamakwerhu hi mikarhi ya khombo, hi nga swi kombisa njhani leswaku hi ni xivindzi ku fana na Sadoki? (1) Landzela nkongomiso. Eka swiyimo swo tano, i swa nkoka leswaku hi tshama hi ri nyandza yin’we. Yingisa nkongomiso lowu humaka erhavini ra n’wina. (Hev. 13:17) Nkarhi ni nkarhi vakulu va fanele va kambela swiletelo leswi humaka eka mfumo ku katsa ni leswi humaka eka nhlangano swa mayelana ni leswi faneleke ku endliwa loko ku ri ni mhangu.  (1 Kor. 14:​33, 40) (2) Vana ni xivindzi u tlhela u va ni vuxiyaxiya. (Swiv. 22:3) Endla swilo hi vutlhari. U nga endli swilo leswi nga ta ku veka ekhombyeni. (3) Titshege hi Yehovha. Tsundzuka leswaku Yehovha u lava wena ni vamakwenu mi sirheleleka. U ta ku pfuna u khoma vamakwenu xikatla.

12-13. U dyondza yini eka ntokoto wa Viktor na Vitalii? (Nakambe vona xifaniso.)

¹² Ehleketa hi Viktor na Vitalii ku nga vamakwerhu lava a va tirha ku yisa swakudya ni mati eka vamakwerhu eUkraine. Viktor u ri: “Hi hlotane ni swakudya tindhawu hinkwato. Mikarhi yo tala a ku tshwa xibamu lomu a hi ri kona. Makwerhu un’wana u nyikele hi swakudya swa le xitolo xakwe. Swakudya sweswo swi pfune vahuweleri vo tala ku ringana nkarhinyana. Loko hi ri karhi hi layicha swilo elorini, ku we bomo ekusuhi na hina eka mpfhuka wa kwalomu ka timitara ta 20. Siku hinkwaro, ndzi khongele Yehovha leswaku a ndzi nyika xivindzi xo ya emahlweni ndzi pfuna vahuweleri.”

¹³ Vitalii u ri: “A swi lava xivindzi hakunene. Riendzo ra mina ro sungula a ri lehe tiawara ta 12. Ndzi khongele Yehovha ndlela hinkwayo.” Vitalii a a ri ni xivindzi ni vuxiyaxiya. U ya emahlweni a ku: “A ndzi tshamela ku kombela Yehovha leswaku a ndzi nyika vutlhari ni ku ndzi pfuna ndzi nga titshegi hi vutivi bya mina. A ndzi chayela ntsena eka magondzo lama pfumeleriweke hi valawuri. Swi ndzi tiyise ripfumelo ku vona vamakwerhu va tirha swin’we. Va basise ndlela, va hlengeleta ni ku layicha swakudya, swiambalo ni swilo swin’wana swa nkoka elorini va tlhela va hi nyika ndhawu yo wisela eka yona.”

TSHAMA U TSHEMBEKILE EKA YEHOVHA

14. Hi nga titwa njhani loko munhu loyi hi n’wi rhandzaka a nga tshembeki eka Yehovha?

¹⁴ Yin’wana ya miringo yo tika swinene leyi nga hi welaka hiloko xirho xa ndyangu kumbe munghana lonkulu a tshika ku tirhela Yehovha. (Ps. 78:40; Swiv. 24:10) Swa tika swinene ku xi amukela xiyimo xexo loko munhu yoloye hi n’wi rhandza swinene. Loko u tshame u va eka xiyimo xo tano xo tika, xikombiso xa ku tshembeka ka Sadoki xi nga ku tiyisa.

15. Hikwalahokayini Sadoki a a fanele a va ni xivindzi leswaku a tshama a tshembekile eka Yehovha? (1 Tihosi 1:​5-8)

¹⁵ Sadoki u tshame a tshembekile eka Yehovha loko munghana wakwe lonkulu Abiyatara a tshika ku tshembeka. Sweswo swi endleke emakumu ka vuhosi bya Davhida. Loko Davhida a ri ekusuhi ni ku fa, n’wana wakwe Adoniya u ringete ku wutla vuhosi lebyi Yehovha a a byi tshembise Solomoni. (1 Tikr. 22:​9, 10) Abiyatara u hlawule ku seketela Adoniya. (Hlaya 1 Tihosi 1:​5-8.) Hi ku endla tano, Abiyatara a a nga tshembekanga eka Davhida ni le ka Yehovha. Ehleketa ndlela leyi Sadoki a heleke matimba hayona ni ku va ni gome. Yena na Abiyatara va tirhe swin’we tanihi vaprista malembe yo tlula 40. (2 Sam. 8:17) A va yi hlayisa swin’we “Areka ya Xikwembu xa ntiyiso.” (2 Sam. 15:29) Eku sunguleni, vavanuna lava va seketele Davhida tanihi hosi ya vona ni ku endla swo tala entirhweni wa Yehovha.—2 Sam. 19:​11-14.

16. I yini leswi nga ha vaka swi pfune Sadoki leswaku a a tshama a tshembekile?

¹⁶ Sadoki u tshame a tshembekile eka Yehovha hambileswi Abiyatara a hlawuleke ku nga tshembeki. Davhida a a swi tiva leswaku a nga n’wi tshemba Sadoki. Loko kungu ra Adoniya ri tivekile, Davhida u hlawule Sadoki, Nathani na Benaya leswaku va veka Solomoni a va hosi. (1 Tih. 1:​32-34) Ku va ni vagandzeri va Yehovha vo tshembeka vo fana na Nathani ni van’wana lava a va seketela Hosi Davhida, swi fanele swi n’wi tiyisile Sadoki. (1 Tih. 1:​38, 39)  Loko Solomoni a va hosi, u “hlawul[e] muprista Sadoki leswaku a siva Abiyatara.”—1 Tih. 2:35.

17. U nga n’wi tekelela njhani Sadoki loko xaka kumbe munghana a nga tshembeki eka Yehovha?

¹⁷ U nga n’wi tekelela njhani Sadoki? Loko xaka kumbe munghana a hlawula ku tshika ku gandzela Yehovha, swi veke erivaleni leswaku u nge n’wi fularheli Yehovha. (Yox. 24:15) U ta ku nyika matimba ni xivindzi leswi lavekaka. Titshege hi yena hi xikhongelo ni ku tshinela ekusuhi ni vagandzeri vakwe. Wa ku tlangela ku tshembeka ka wena naswona u ta ku katekisa.—2 Sam. 22:26.

18. U dyondza yini eka ntokoto wa Marco na Sidse?

¹⁸ Xiya xikombiso xa Marco ni nsati wakwe Sidse, lava vana va vona vambirhi va vanhwanyana va tshikeke ku tirhela Yehovha. Marco u ri: “Ku sukela siku leri vana va wena va tswariwaka ha rona, u va rhandza swinene. U ta endla hinkwaswo leswaku u va sirhelela. Kutani loko va tshika ku tirhela Yehovha, swi hlomula mbilu.” U ya emahlweni a ku: “Kambe Yehovha a a hi seketela. A a tiyiseka leswaku loko ndzi hele matimba, nsati wa mina a a ri ni matimba kasi loko yena a hele matimba, mina a ndzi va na wona.” Sidse u ri: “A hi nga ta swi kota ku tiyisela loko Yehovha a a nga hi nyikanga matimba yo tiyisela. A ndzi tshamela ku tivona nandzu kutani ndzi phofulele Yehovha ndlela leyi a ndzi titwa hayona. Endzhakunyana, makwerhu wa xisati loyi a ndzi ri ni malembe ndzi nga n’wi voni u fike a ndzi khoma makatla ivi a ndzi languta a ku: ‘Sidse tsundzuka leswaku a hi xihoxo xa wena!’ Hi ku pfuniwa hi Yehovha, ndzi kote ku ya emahlweni ndzi tirhela Yehovha ndzi tsakile.”

19. U tiyimisele ku endla yini?

¹⁹ Yehovha u lava leswaku vagandzeri vakwe hinkwavo va va ni xivindzi ku fana na Sadoki. (2 Tim. 1:7) Hambiswiritano, A nga swi lavi hi titshega hi matimba ya hina vini. U lava hi titshega hi yena. Kutani loko u tikuma u ri eka xiyimo lexi lavaka u va ni xivindzi, xi kombele eka Yehovha. U nga tiyiseka leswaku u ta endla u va ni xivindzi ku fana na Sadoki!—1 Pet. 5:10.