1. U titwa njhani hi ntiyiso?

 VANHU va Yehovha va wu rhandza ntiyiso lowu humaka eRitweni rakwe. Hi pfumela eka swilo leswi humaka eka rona. (Rhom. 10:17) Ha tiyiseka leswaku Yehovha hi yena a sunguleke vandlha ra Vukreste leswaku ri va “phuphu tlhelo xiseketelo xa ntiyiso.” (1 Tim. 3:15) Nakambe hi ku swi rhandza hi titsongahata eka “lava rhangelaka” exikarhi ka hina loko va hlamusela ntiyiso wa le Bibeleni ni ku hi nyika nkongomiso lowu fambisanaka ni ku rhandza ka Xikwembu.—Hev. 13:17.

2. Hi ku ya hi Yakobo 5:​19, ku nga ha endleka yini endzhaku ka loko hi dyondze ntiyiso?

² Hambiswiritano, endzhaku ka loko hi amukele ntiyiso ni ku yingisa nkongomiso lowu humaka eka nhlangano wa Xikwembu, hi nga ha hambukisiwa. (Hlaya Yakobo 5:19.) Sathana u swi lava hi mbilu hinkwayo ku hi endla hi nga ha yi tshembi Bibele kumbe nkongomiso lowu humaka eka nhlangano wa Xikwembu.—Efe. 4:14.

3. Hikwalahokayini hi fanele hi yima hi tiyile entiyisweni? (Vaefesa 6:​13, 14)

³ Hlaya Vaefesa 6:​13, 14. Ku nga ri khale Diyavulosi u ta tirhisa mavunwa ya rihlaza ku hambukisa matiko hinkwawo leswaku ma lwisana na Yehovha. (Nhlav. 16:​13, 14) Hi nga tlhela hi langutela leswaku Sathana u ta tirha hi matimba leswaku a hambukisa vanhu va Yehovha. (Nhlav. 12:9) Hikwalaho, i swa nkoka ku va hi tidyondzisa ku hambanisa ntiyiso eka mavunwa  naswona hi yingisa ntiyiso. (Rhom. 6:17; 1 Pet. 1:22) Sweswo i swa nkoka swinene leswaku hi kota ku pona nhlomulo lowukulu!

4. Hi ta bula hi yini eka nhlokomhaka leyi?

⁴ Eka nhlokomhaka leyi, hi ta dyondza hi swilo swimbirhi leswi nga hi pfunaka hi tiva ntiyiso lowu kumekaka eBibeleni ni ku yingisa nkongomiso lowu humaka eka nhlangano wa Xikwembu. Kutani hi ta tlhela hi bula hi swilo swinharhu leswi hi faneleke hi swi endla leswaku hi khomelela entiyisweni.

SWILO LESWI HI PFUNAKA HI VONA NTIYISO

5. Ku chava Yehovha swi hi pfuna njhani ku tiva ntiyiso?

⁵ Chava Yehovha. Loko hi chava Yehovha hi ndlela leyi faneleke, hi ta n’wi rhandza swinene lerova a hi nge pfuki hi endle nchumu lowu nga ta n’wi twisa ku vava. Hi tiyimisele ku dyondza ku hambanisa leswi lulameke ni leswi nga lulamangiki, ntiyiso ni mavunwa leswaku hi ta amukeleka eka Yehovha. (Swiv. 2:​3-6; Hev. 5:14) Hi nga tshuki hi pfumelela ndlela leyi hi va chavaka hayona vanhu yi tlula ndlela leyi hi rhandzaka Yehovha hayona hikuva mikarhi yo tala, leswi tsakisaka vanhu eka Yehovha a swi amukeleki.

6. Ku chava vanhu ku endle tinhlori ta khume ta Vaisrayele ti cinca ntiyiso hi ndlela yihi?

⁶ Loko hi chava vanhu ku tlula Xikwembu, hi nga hambukisiwa entiyisweni. Xiya xikombiso xa tinhlori ta 12 leti kambeleke tiko leri Yehovha a a tshembise ku ri nyika Vaisrayele. Tinhlori ta khume a ti chava Vakanana ku tlula ndlela leyi ti rhandzaka Yehovha hayona. Ti byele Vaisrayele ti ku: “A hi nge swi koti ku lwa ni vanhu lavaya hikuva va ni matimba ku hi tlula.” (Tinhl. 13:​27-31) Hi ku ya hi langutelo ra vanhu, Vakanana a va ri ni matimba ku tlula Vaisrayele naswona sweswo a ku ri ntiyiso. Kambe loko ti vula leswaku Vaisrayele a va nga ta swi kota ku hlula valala va vona, swi kombisa leswaku a ti nga n’wi tshembi Yehovha.  Tinhlori teto ta khume a ti fanele ti ehlekete hi leswi Yehovha a a lava Vaisrayele va swi endla. A ti fanele ti tsundzuke leswi Yehovha a swi endleleke Vaisrayele enkarhini lowu hundzeke. Kutani a ti ta va ti swi vonile leswaku matimba ya Vakanana a ma nga ri nchumu loko ma pimanisiwa ni matimba ya Yehovha lamakulu. Ku hambana ni tinhlori leti a ti nga ri na ripfumelo, Yoxuwa na Kalebe a va lava ku amukeriwa hi Yehovha. Va byele vanhu va ku: “Loko ho tsakisa Yehovha, kunene u ta hi yisa etikweni leri, a hi nyika rona.”—Tinhl. 14:​6-9.

7. I yini leswi hi faneleke hi swi endla leswaku hi ya hi chava Yehovha? (Nakambe vona xifaniso.)

⁷ Leswaku hi ya hi chava Yehovha, hi fanele hi ehleketa hi ndlela leyi hi nga ta n’wi tsakisa hayona loko hi endla swiboho. (Ps. 16:8) Loko u ri karhi u hlaya mhaka yo karhi eBibeleni, tivutise leswi, ‘Xana a ndzi ta va ndzi endle xiboho xihi loko a ndzi ri eka xiyimo xexo?’ Hi xikombiso, tivone u yingisile loko tinhlorhi ta khume ti ri karhi ti vula rungula leri hoxeke. Xana a wu ta tshemba rungula rero kutani u sungula ku chava vanhu kumbe ndlela leyi u rhandzaka Yehovha hayona ni ku navela ku n’wi tsakisa a yi ta va yikulu ku tlula ku chava koloko? Vaisrayele hinkwavo va tsandzeke ku vona leswaku Yoxuwa na Kalebe a va vulavula ntiyiso. Hikwalaho ka sweswo, Yehovha a nga pfumelanga leswaku va nghena eTikweni leri Tshembisiweke.—Tinhl. 14:​10, 22, 23.

8. Hi fanele hi tikarhatela ku va ni vumunhu bya njhani naswona hikwalahokayini?

⁸ Titsongahate. Yehovha u paluxa ntiyiso eka lava titsongahataka. (Mat. 11:25) Hi ku titsongahata, hi amukele mpfuno leswaku hi dyondza ntiyiso. (Mit. 8:​30, 31) Hambiswiritano, hi fanele hi tivonela leswaku hi nga tikukumuxi. Ku tikukumuxa ku nga hi endla hi vona onge mavonelo ya hina i manene ku fana ni milawu ya le Matsalweni ni nkongomiso lowu humaka enhlanganweni wa Yehovha.

9. Hi nga endla yini leswaku hi ya emahlweni hi titsongahata?

⁹ Leswaku hi tshama hi titsongahata, hi fanele hi tsundzuka leswaku a hi va nchumu loko hi ringanisiwa ni vukulu bya Yehovha. (Ps. 8:​3, 4) Hi nga kombela Yehovha hi xikhongelo leswaku a hi pfuna hi titsongahata ni ku tlhela hi dyondziseka. Yehovha u ta hi pfuna hi teka nkongomiso lowu humaka eRitweni rakwe ni le ka nhlangano wakwe swi ri swa nkoka ku tlula mavonelo ya hina. Loko u hlaya Bibele, lavisisa swilo leswi kombisaka ndlela leyi Yehovha a va rhandzaka hayona vanhu lava titsongahataka ku nga ri lava tikukumuxaka ni lava nga ni makatla. Tikarhatele ku titsongahata loko u nyikiwa xiavelo lexi nga ha endlaka van’wana va ku teka u tlakukile.

LESWI NGA HI PFUNAKA HI KHOMELELA ENTIYISWENI

10. I vamani lava Yehovha a a va tirhisa ku kongomisa vanhu vakwe ni ku va nyika swiletelo?

¹⁰ Tshama u ri karhi u landzela nkongomiso wa nhlangano wa Yehovha. Enkarhini wa Vaisrayele, Yehovha a a nyika vanhu vakwe swiletelo hi ku tirhisa Muxe na Yoxuwa. (Yox. 1:​16, 17) Vaisrayele a swi va fambela kahle loko va teka vavanuna lava tanihi vayimeri va Yehovha Xikwembu. Endzhaku ka malembe ya madzana loko vandlha ro sungula ra Vakreste ri ve kona, vaapostola va 12 hi vona a va nyikela nkongomiso. (Mit. 8:​14, 15) Hi ku famba ka nkarhi, ntlawa wolowo wa vaapostola wu joyiniwe hi vakulukumba van’wana va le Yerusalema. “Mavandlha a ma ya ma tiya eripfumelweni ni ku andza siku ni siku” loko ma landzela nkongomiso lowu a wu huma eka vavanuna volavo vo tshembeka. (Mit. 16:​4, 5)  Na hina namuntlha, Yehovha wa hi katekisa loko hi yingisa nkongomiso lowu humaka enhlanganweni wakwe. Kambe, xana Yehovha a nga titwa njhani loko hi nga pfumeli leswaku lava hi kongomisaka va hlawuriwe hi yena? Leswaku hi hlamula xivutiso xexo, a hi kambisiseni leswi endlekeke loko Vaisrayele va yisiwa eTikweni leri Tshembisiweke.

11. Enkarhini wa Vaisrayele ku endleke yini hi vanhu lava soleke Muxe loyi a a hlawuriwe hi Xikwembu leswaku a rhangela? (Nakambe vona xifaniso.)

¹¹ Loko Vaisrayele va ri eriendzweni ro ya eTikweni leri Tshembisiweke, vavanuna lava dumeke va pfukele ni ku sola Muxe hikwalaho ka xikhundlha lexi Yehovha a a n’wi nyike xona. Va te: “Nhlengeletano hinkwayo [ku nga ri Muxe ntsena] yi hlawulekile naswona Yehovha u le xikarhi ka yona.” (Tinhl. 16:​1-3) Hambileswi eka Yehovha “nhlengeletano hinkwayo” a yi kwetsima, a a hlawule Muxe leswaku a kongomisa vanhu Vakwe. (Tinhl. 16:28) Loko vaxandzuki volavo va sola Muxe, entiyisweni a va sola Yehovha. A va nga ri na mhaka nileswi Yehovha a a swi lava kambe a va rhangisa leswi a va swi lava, ku nga ku tekeriwa enhlokweni ni swikhundlha. Xikwembu xi dlaye varhangeri va vaxandzuki volavo xikan’we ni vaseketeri va vona va madzana. (Tinhl. 16:​30-35, 41, 49) Namuntlha, ha tiyiseka leswaku Yehovha a nga tsaki hi vanhu lava delelaka nkongomiso wa nhlangano wakwe.

12. Hikwalahokayini hi fanele hi ya emahlweni hi tshemba nhlangano wa Yehovha?

¹² Hi nga swi kota ku ya emahlweni hi tshemba nhlangano wa Yehovha. Loko swi va erivaleni leswaku ku fanele ku antswisiwa matwisiselo ya hina hi tidyondzo to karhi ta le Bibeleni kumbe ndlela leyi hi gandzelaka Yehovha hayona, lava rhangelaka a va bi mariri loko va fanele va endla ku cinca koloko. (Swiv. 4:18) Va endla tano hileswi va lavaka ku tsakisa Yehovha. Va tikarhatela ku endla swiboho leswi sekeriweke eBibeleni, ku nga  leswi vanhu va Yehovha hinkwavo va faneleke va swi endla.

13. I yini “marito lamanene” naswona hi fanele hi endla yini hi wona?

¹³ “Yana emahlweni u landzela marito lamanene.” (2 Tim. 1:13) “Marito lamanene” i tidyondzo ta Vukreste leti humaka eBibeleni. (Yoh. 17:17) Hinkwaswo leswi hi swi pfumelaka swi huma eka tidyondzo toleto. Nhlangano wa Yehovha wu hi dyondzise ku hanya hi tona. Loko ntsena hi endla tano, hi ta katekisiwa.

14. Vakreste van’wana va tshike hi ndlela yihi ku namarhela “marito lamanene”?

¹⁴ Ku nga endleka yini loko ho tshika ku yingisa “marito lamanene”? A hi twe xikombiso. Enkarhini wa vaapostola, ku hangalake mavarivari exikarhi ka Vakreste ya leswaku siku ra Yehovha a ri fikile. Swi nga endleka a ku ri ni papila leri a ri vonaka ri tsariwe hi muapostola Pawulo, leri tiyisekiseke mhaka yoleyo. Handle ko tinyika nkarhi wo kambisisa vumbhoni, Vakreste van’wana va le Tesalonika va ma tshembile mavarivari wolawo va tlhela va ma hangalasa. Loko a va tsundzuke swilo leswi Pawulo a a va dyondzise swona loko a ri na vona, a va ta va va nga humbiwanga mano. (2 Tes. 2:​1-5) Pawulo u tsundzuxe vamakwavo leswaku va nga tshembi swilo hinkwaswo leswi va swi twaka. Leswaku a va pfuna ni le nkarhini lowu taka, Pawulo u gimete papila rakwe ra vumbirhi leri a ri tsaleleke Vatesalonika hi marito lama nge: “Hi lawa marungula ya mina Pawulo, lama tsariweke hi voko ra mina, ku nga mfungho eka papila rin’wana ni rin’wana; leyi i ndlela leyi ndzi tsalaka ha yona.”—2 Tes. 3:17.

15. Hi nga tisirhelela njhani eka mavunwa lama vonakaka onge i ntiyiso? Nyika xikombiso. (Nakambe vona swifaniso.)

¹⁵ Hi dyondza yini eka marito lawa Pawulo a ma byeleke Vatesalonika? Loko hi twa mhaka leyi nga fambisaniki ni leswi hi swi dyondzeke eBibeleni kumbe mhaka leyi tsemaka nhlana, hi fanele hi tirhisa vutlhari. Hi nkarhi wa ku fuma ka Soviet Union, valala va hina va nyike vamakwerhu papila leri a ri vonaka onge ri huma entsindza wa misava hinkwayo. Papila rero a ri khutaza vamakwerhu van’wana leswaku  va tivumbela nhlangano lowu tiyimelaka woxe. Leswi papila a ri swi vula a swi vonaka swi ri ntiyiso. Kambe vamakwerhu vo tshembeka a va pfariwanga mahlo. Va swi xiyile leswaku rungula leri a ri ri eka papila rero a ri nga fambisani ni leswi a va dyondzisiwe swona. Ninamuntlha, valala lava nga laviki ku twa nchumu hi ntiyiso va nga tirhisa thekinoloji ya manguva lawa leswaku va hi pfilunganya ni ku endla leswaku hi avana. Ematshan’weni ya ku ‘pfumelela mianakanyo ya hina yi hatla yi pfilunganyiwa,’ hi nga tisirhelela hi ku kambisisa loko leswi hi swi tweke kumbe ku swi hlaya swi fambisana ni ntiyiso lowu se hi wu dyondzeke.—2 Tes. 2:2; 1 Yoh. 4:1.

16. Hi ku ya hi Varhoma 16:​17, 18, hi fanele hi endla yini loko van’wana va hambuka entiyisweni?

¹⁶ Tshama u ri ni vun’we ni vanhu lava tshembekeke eka Yehovha. Xikwembu xi lava leswaku hi xi gandzela hi vun’we ni vamakwerhu. Hi ta tshama hi ri ni vun’we ntsena loko hi namarhela ntiyiso. Lava hambukaka entiyisweni va vanga ku avana evandlheni kutani Xikwembu xi hi tsundzuxa xi ku: “Fambelani ekule na vona.” Loko hi nga endli tano, na hina hi ta hambuka entiyisweni.—Hlaya Varhoma 16:​17, 18.

17. Hi vuyeriwa njhani loko hi tiva ntiyiso hi tlhela hi wu namarhela?

¹⁷ Loko hi tiva ntiyiso hi tlhela hi khomelela eka wona, hi ta va ni vuxaka ni Xikwembu hi tlhela hi va ni ripfumelo leri tiyeke. (Efe. 4:​15, 16) Hi ta sirheleleka eka tidyondzo ta mavunwa ni le ka vuxisi bya Sathana naswona Yehovha u ta hi sirhelela hi nkarhi wa nhlomulo lowukulu. Yana emahlweni u namarhela leswi nga ntiyiso, “kutani Xikwembu xa ku rhula xi ta va na [wena].”—Filp. 4:​8, 9.