1. Ntshungu wa le nkarhini wa vaapostola wu byeriwe ku endla yini?

NTSHUNGU lowukulu lowu katsaka vavanuna ni vavasati lowu humaka ematikweni yo hambanahambana naswona wu vulavulaka tindzimi leti nga faniki, a wu hlengeletanile. Hi siku rero ku endleke nchumu wo hlamarisa. Ntlawa wa Vayuda wu sungule ku vulavula hi tindzimi to hambanahambana! Ntshungu wolowo wu hlamale ngopfu loko wu twa leswi a swi vuriwa hi Vayuda volavo ni leswi a swi vuriwa hi muapostola Petro. Wu byeriwe leswaku wu ta ponisiwa loko wu kombisa ripfumelo eka Yesu Kreste. Ntshungu wolowo wu khumbiwe swinene hi marito wolawo. Wu kale wu vutisa leswi: “Xana hi fanele hi endla yini?” Petro u te: “Un’wana ni un’wana wa n’wina a a khuvuriwe.”—Mit. 2:37, 38.

2. Hi ta bula hi yini eka nhlokomhaka leyi? (Vona xifaniso lexi nga eka xifunengeto.)

² Endzhaku ka sweswo ku endleke swilo swo hlamarisa. Hi siku rero ku khuvuriwe vanhu va kwalomu ka 3 000, va va vadyondzisiwa va Kreste. Wolawo a ku ri masungulo ya ntirho lowukulu lowu Yesu a leriseke valandzeri vakwe leswaku va wu endla. Ntirho wolowo wa ha ya emahlweni ninamuntlha. Enkarhini lowu hi hanyaka eka wona, a hi nge swi koti ku pfuna xichudeni leswaku xi khuvuriwa hi tiawara ti nga ri tingani. Swi nga ha teka tin’hweti, lembe kumbe malembe yo tala leswaku xichudeni xi khuvuriwa. Hilaha mi tivaka ha kona swi lava ku gingiriteka swinene leswaku hi pfuna xichudeni xi va mudyondzisiwa. Eka nhlokomhaka leyi, hi ta bula hi tindlela leti hi nga ti tirhisaka leswaku  hi pfuna xichudeni xa Bibele xi kota ku khuvuriwa.

3. Hilaha swi hlamuseriwaka hakona eka Matewu 28:19, 20, xichudeni xi fanele xi endla yini leswaku xi fanelekela ku khuvuriwa?

³ Loko xichudeni xa Bibele xi nga si khuvuriwa xi fanele xi tirhisa leswi swi dyondzaka eBibeleni. (Hlaya Matewu 28:19, 20.) Loko xi endla tano, xi ta fana ni “wanuna wo tlhariha” wa le xifanisweni xa Yesu loyi a akeke yindlu yakwe ehenhla ka ribye. (Mat. 7:24, 25; Luka 6:47, 48) Hi nga xi pfuna njhani xichudeni leswaku xi tirhisa leswi xi swi dyondzaka? A hi buleni hi swiringanyeto swinharhu.

4. Hi nga xi pfuna njhani xichudeni leswaku xi fanelekela ku khuvuriwa? (Vona bokisi leri nge, “ Pfuna Xichudeni Xa Wena Leswaku Xi Tiyimisela Ku Endla Swo Karhi Ni Ku Tlhela Xi Swi Fikelela.”)

⁴ Pfuna Xichudeni Xa Wena Leswaku Xi Tiyimisela Ku Endla Swo Karhi. Hikwalahokayini u fanele u endla tano? Xiya xikombiso lexi: Loko u kunguhata ku teka riendzo ro leha, u nga ha ehleketa hi tindhawu to tsakisa leti u nga ta wisa eka tona. Sweswo swi ta endla u nga karhateki hi mpfhuka lowu u faneleke u wu famba. Hilaha ku fanaka, loko xichudeni xi fikelela leswi xi nga swi kunguhata hi nkarhi wo koma, xi ta swi xiya leswaku kungu ra xona ro khuvuriwa xi ta ri fikelela. Leswaku u pfuna xichudeni xi khuvuriwa tirhisa xiyenge lexi nge, “Tiyimisele ku endla leswi” lexi kumekaka ebukwini leyi nge, Tiphine Hi Vutomi Hilaha ku nga Heriki! Emakumu ka dyondzo yin’wana ni yin’wana, bulani hi ndlela leyi xiyenge lexi xi nga xi pfunaka hayona xichudeni leswaku xi tirhisa leswi xi swi dyondzeke. Loko u lava xichudeni xa wena xi fikelela swo karhi, tirhisa xiyenge lexi nge, “Swin’wana leswi u nga swi endlaka.” Mikarhi hinkwayo tirhisa xiyenge lexi leswaku u kambisisa leswi xichudeni xi lavaka  ku swi fikelela hi nkarhi wo koma kumbe wo leha.

5. Eka Marka 10:17-22, Yesu u byele wanuna la fuweke leswaku a endla yini naswona hikwalahokayini?

⁵ Pfuna xichudeni xi cinca mahanyelo ya xona. (Hlaya Marka 10:17-22.) Yesu a a swi tiva leswaku munhu la fuweke a swi ta n’wi tikela ku xavisa swilo swakwe hinkwaswo. (Mar. 10:23) Kambe, Yesu u byele wanuna loyi leswaku a titsona swo karhi. Hikwalahokayini? Hikuva a a n’wi rhandza. Mikarhi yin’wana hi chava ku khutaza xichudeni ku tirhisa leswi xi swi dyondzaka hileswi xi nga ni mikhuva yo karhi leyi swi xi tikelaka ku yi tshika. Swi nga ha teka nkarhi leswaku vanhu va hluvula vumunhu bya khale kutani va ambala vumunhu lebyintshwa. (Kol. 3:9, 10) Kambe loko u bula na xona u ta xi pfuna xi tsuvula mikhuva yoleyo hakatsongotsongo. Sweswo swi ta kombisa leswaku wa khathala hi xona.—Ps. 141:5; Swiv. 27:17.

6. Hikwalahokayini hi fanele hi twa mavonelo ya xichudeni?

⁶ I swa nkoka ku vutisa xichudeni ndlela leyi xi titwaka ha yona hi mhaka yo karhi. Vutisa swivutiso leswaku xichudeni xi hlamusela leswi xi swi twisisaka ni leswi xi pfumelaka eka swona. Loko u endla tano mikarhi hinkwayo, swi ta ku olovela ku bula na xona hi dyondzo leyi swi nga ha xi tikelaka ku yi twisisa. Buku leyi nge Tiphine Hi Vutomi Hilaha ku nga Heriki! yi ni swivutiso swo tala leswi nga ku pfunaka leswaku u twa mavonelo ya xichudeni. Hi xikombiso, dyondzo 04 yi ni xivutiso lexi nge: “U ehleketa leswaku Yehovha u titwa njhani loko u tirhisa vito rakwe?” Dyondzo 09 na yona yi ni xivutiso lexi nge: “Hi swihi swilo swin’wana leswi u nga tsakelaka ku khongela ha swona?” Swi nga ha xi tekela nkarhi xichudeni ku hlamula swivutiso leswi. Xi pfune xi hlamula hi ku tirhisa matsalwa ni swifaniso leswi xi swi vonaka.

7. Hi nga yi tirhisa njhani mitokoto ya vanhu van’wana?

⁷ Loko xichudeni xi swi twisisa leswi xi faneleke xi swi endla, tirhisa mitokoto ya vanhu van’wana leswaku u xi khutaza. Hi xikombiso, loko xichudeni swi xi tikela ku ta etinhlengeletanweni ta vandlha, xi kombe vhidiyo leyi nge, Yehovha U Ndzi Hlayisile, leyi kumekaka eka xiyenge lexi nge “Kuma leswi engetelekeke” lexi nga eka dyondzo 14. Eka tidyondzo leti kumekaka eka buku leyi nge Tiphine Hi Vutomi Hilaha ku nga Heriki! ku ni mitokoto eka xiyenge lexi nge “Anakanyisisa” kumbe eka lexi nge “Kuma leswi engetelekeke.” * U nga fanisi xichudeni xa wena ni munhu un’wana hi ku vula u ku: “Loko ximanimani a kote ku swi endla na wena u nga swi kota.” Tshika xichudeni xi tihlawulela hi xoxe. Ematshan’weni yo xi byela leswi xi faneleke xi swi endla, boxa leswi pfuneke munhu loyi a nga eka vhidiyo leswaku a tirhisa leswi a swi dyondzaka eBibeleni. U nga boxa tsalwa ro karhi kumbe swin’wana leswi pfuneke munhu yoloye. Loko swi koteka, boxa ndlela leyi Yehovha a n’wi pfuneke hayona.

8. Hi nga swi pfuna njhani swichudeni swa hina leswaku swi rhandza Yehovha?

⁸ Pfuna xichudeni leswaku xi rhandza Yehovha. Njhani? Ti nyike nkarhi wo xi hlamusela leswi Yehovha a nga xiswona. Pfuna xichudeni xi teka Yehovha tanihi Xikwembu lexi tsakeke naswona xi pfunaka lava xi rhandzaka. (1 Tim. 1:11; Hev. 11:6) Xi byele ndlela leyi xi nga ta vuyeriwa hayona loko xi tirhisa leswi xi swi dyondzaka, u tlhela u xi komba leswaku sweswo swi kombisa leswaku Yehovha wa xi rhandza. (Esa. 48:17, 18) Xi ta endla nhluvuko loko xi ya xi rhandza Yehovha swinene.—1 Yoh. 5:3.

9. Hi ku ya hi Marka 10:29, 30, i yini lexi nga pfunaka xichudeni leswaku xi tisona swo karhi leswaku xi khuvuriwa?

⁹ Leswaku xichudeni xi fanelekela ku khuvuriwa, xi fanele xi endla ku cinca ko karhi. Ku fana ni wanuna loyi a fuweke loyi hi buleke ha yena eku sunguleni, swichudeni swin’wana swi nga ha boheka ku lahlekeriwa hi rifuwo ra swona. Loko mitirho ya swona ya ku tihanyisa yi lwisana ni milawu ya Bibele, swi nga endla xiboho xo lava yin’wana. Van’wana va nga ha boheka ku tshika vanghana lava nga n’wi rhandziki Yehovha. Van’wana va nga ha fularheriwa hi maxaka ya vona lama nga laviki ku twa nchumu hi Timbhoni ta Yehovha. Yesu u vule leswaku van’wana a swi ta va tikela ku tshika leswi va swi rhandzaka. Kambe u tshembise leswaku lava n’wi landzelaka va ta kuma mikateko. Va ta kuma maxaka yo tala loko va tirhela Yehovha. (Hlaya Marka 10:29, 30.) U nga xi pfuna njhani xichudeni leswaku xi kuma mikateko leyi?

10. U dyondza yini eka xikombiso xa Manuel?

¹⁰ Vana munghana ni loyi u dyondzaka na yena. I swa nkoka ku n’wi komba leswaku wa n’wi rhandza. Hikwalahokayini? Twana leswi vuriweke hi Manuel, loyi a tshamaka eMexico. U hlamusela ndlela leyi mudyondzisi wakwe a n’wi pfuneke hayona loko a ha dyondza Bibele, u ri: “Loko hi nga se dyondza, mudyondzisi wa mina a ndzi vutisa leswaku swi famba njhani. A a ndzi pfuna ndzi ntshunxeka ni ku phofula ta le mbilwini. A ndzi swi vona leswaku wa khathala hi mina.”

11. Xana lava hi dyondzaka na vona va nga vuyeriwa njhani loko hi heta nkarhi wo tala na vona?

¹¹ Dzumba ni lava u dyondzaka na vona Bibele hilaha Yesu a endleke hakona eka valandzeri vakwe. (Yoh. 3:22) Loko swi koteka, rhamba xidyondzo lexi endlaka nhluvuko eka swakudya kumbe mi ta hlalela vuhaxi bya JW. Xi ta tsaka ngopfu loko u xi rhamba hi nkarhi lowu xi nga ni xivundza laha maxaka ni vanghana va xona va vaka va khomekile hi ku tlangela tiholideyi. Kazibwe loyi a tshamaka  eUganda u ri: “Ndzi dyondze swo tala hi Yehovha eka mudyondzisi wa mina hileswi a hi tshama hi ri swin’we. Ndzi vone ndlela leyi Yehovha a khathalaka hayona hi vanhu vakwe ni ndlela leyi va tshamaka va tsakile hayona. Leswi hi swona a ndzi swi lava evuton’wini.”

12. Hikwalahokayini hi fanele hi famba ni vamakwerhu vo hambanahambana loko hi ya dyondza ni swichudeni swa Bibele?

¹² Famba ni vamakwerhu vo hambanahambana loko u ya dyondza ni swichudeni swa Bibele. Mikarhi yin’wana u nga tsakela ku famba u ri wexe kumbe ni makwerhu wo karhi loyi u toloveleke ku famba na yena. Loko u tolovele ku endla tano, tsundzuka leswaku xichudeni xi nga vuyeriwa ngopfu loko mikarhi yin’wana u pfa u famba ni vamakwerhu vo hambanahambana. Dmitrii loyi a tshamaka eMoldova u ri: “Vamakwerhu lava a va ta ni loyi a a ndzi dyondzisa a va hlamusela swilo hi tindlela to hambana. Sweswo swi ndzi pfune ndzi vona tindlela to tala to tirhisa leswi ndzi swi dyondzaka. Leswi se a ndzi tolovele vamakwerhu vo tala, a ndzi nga chavi loko ndzi ya ro sungula etinhlengeletanweni ta vandlha.”

13. Hikwalahokayini hi fanele hi pfuna swichudeni swa hina leswaku swi ta etinhlengeletanweni ta vandlha?

¹³ Pfuna swichudeni swi ta etinhlengeletanweni ta vandlha. Hikwalahokayini? Yehovha u lava leswaku lava n’wi gandzelaka va endla tano, hikuva i xiphemu xa vugandzeri bya vona. (Hev. 10:24, 25) Nakambe, vamakwerhu evandlheni i maxaka ya hina. Loko hi tiphina na vona evandlheni, swi fana ni loko hi tshame ekaya hi dya swakudya swo nandziha. Ndlela yin’wana yo pfuna xichudeni leswaku xi teka goza ro khuvuriwa, i ku xi pfuna xi va kona nkarhi ni nkarhi etinhlengeletanweni ta vandlha. Kambe swi nga ha xi tikela ku endla tano. Buku leyi nge Tiphine Hi Vutomi Hilaha ku nga Heriki! yi nga xi pfuna njhani xichudeni leswaku xi hlula mitlhontlho leyi xi langutanaka na yona?

14. Hi nga xi khutaza njhani xichudeni leswaku xi ta etinhlengeletanweni ta vandlha?

¹⁴ Loko u lava ku khutaza xichudeni xa wena, tirhisa dyondzo 10 ya buku leyi nge Tiphine Hi Vutomi Hilaha ku nga Heriki! Vahuweleri van’wana lava komberiweke ku tirhisa buku leyi loko yi nga se humesiwa, va kote ku pfuna swichudeni swi sungula ku ta etinhlengeletanweni ta vandlha. A swi bohi leswaku u yimela ku fika eka dyondzo 10 leswaku u xi rhamba ku ta etinhlengeletanweni ta vandlha. Xi rhambe to ho suka naswona u nga tshiki ku xi rhamba. Swichudeni swi langutana ni mitlhontlho leyi nga faniki. Tiva xiyimo xa xichudeni xa wena leswaku u ta kota ku xi pfuna. Loko xi heta nkarhi xi nga se ta, u nga heli matimba. Xi lehisele mbilu naswona u ya emahlweni u xi rhamba.

15. Hi kwihi ku chava loku loyi hi dyondzaka na yena a nga vaka na kona?

¹⁵ Xana wa ha wu tsundzuka nkarhi lowu a wu chava ku va Mbhoni ya Yehovha? Kumbexana a wu tibyela leswaku a wu nge swi koti ku famba hi muti ni muti u chumayela. Kumbexana a wu chava leswaku maxaka ni vanghana va wena va ta ku kaneta. Loko swi ri tano, u xi twisisa kahle xiyimo xa xichudeni xa wena. Yesu a swi vurile leswaku van’wana a va ta chava. Hambiswiritano, u khutaze valandzeri vakwe leswaku va nga pfumeleli ku chava ku va tshikisa ku tirhela Yehovha. (Mat. 10:16, 17, 27, 28) Yesu u va pfune njhani valandzeri vakwe leswaku va hlula ku chava? U nga xi tekelela njhani xikombiso xakwe?

16. Hi nga xi pfuna njhani xichudeni leswaku xi chumayela van’wana?

¹⁶ Pfuna xichudeni xa wena leswaku xi chumayela van’wana. Swi nga endleka vadyondzisiwa va Yesu a va chava loko a va rhuma ku ya chumayela. Kambe Yesu u va pfunile va tiva laha va  nga chumayelaka kona ni leswi va nga swi vulaka. (Mat. 10:5-7) U nga n’wi tekelela njhani Yesu? Pfuna xichudeni xa wena xi tiva laha xi faneleke xi chumayela kona. Hi xikombiso, xi vutise loko xi tiva un’wana loyi a tsakelaka ku dyondza Bibele. Xi dyondzise ndlela yo olova yo chumayela. Loko swi koteka, tirhisa xiyenge lexi nge “Van’wana Va Ri” ni lexi nge “Un’wana A Nga Ha Ku Vutisa A Ku,” leswi kumekaka eka buku leyi nge Tiphine Hi Vutomi Hilaha ku nga Heriki! Loko u ri karhi u endla tano, lwela ku xi pfuna xi tirhisa ngopfu Bibele loko xi hlamula.

17. Hi nga yi tirhisa njhani Matewu 10:19, 20, 29-31, loko hi pfuna xichudeni xa hina leswaku xi tshemba Yehovha?

¹⁷ Pfuna xichudeni xa wena leswaku xi tshemba Yehovha. Yesu u byele vadyondzisiwa vakwe leswaku Yehovha u ta va pfuna hikuva wa va rhandza. (Hlaya Matewu 10:19, 20, 29-31.) Tsundzuxa xichudeni xa wena leswaku Yehovha u ta xi pfuna na xona. U nga xi pfuna leswaku xi tshemba Yehovha hi ku khongela na xona u boxa leswi xi tiyimiseleke ku swi endla. Franciszek loyi a tshamaka ePoland, u ri: “Hi xitalo loko mudyondzisi wa mina a khongela, a a boxa nileswi ndzi navelaka ku swi endla evuton’wini. Loko ndzi vona leswaku Yehovha a a swi hlamula swikhongelo swa mudyondzisi wa mina, ndzi nambe ndzi swi vona leswaku xikhongelo i xa nkoka. Ndzi vone ndlela leyi Yehovha a ndzi pfunaka hayona loko ndzi kombela masiku yo wisa entirhweni wa mina lowuntshwa leswaku ndzi ta kota ku ya etinhlengeletanweni ta vandlha ni ta xifundzha.”

18. Yehovha u wu teka njhani ntirho wo dyondzisa lowu endliwaka hi Vakreste?

¹⁸ Yehovha wa khathala hi swichudeni swa hina swa Bibele. Wa swi tlangela ni ku va rhandza swinene Vakreste lava pfunaka vanhu van’wana leswaku va va ni vuxaka lebyinene na yena. (Esa. 52:7) Hambiloko ku nga ri na loyi u dyondzaka na yena Bibele, u nga swi kota ku pfuna swichudeni leswaku swi khuvuriwa hi ku famba ni vamakwerhu loko va ya dyondza ni swichudeni swa vona.