1. Hikwalahokayini malandza ya Yehovha mikarhi yin’wana ma titwa ma ri ni xivundza?

VAN’WANA va hina mikarhi yin’wana hi ni xivundza. Van’wana va hatla va xi hlula. Kasi van’wana swi va tekela nkarhi wo leha leswaku va xi hlula. Hi nga ha titwa hi ri ni xivundza hambiloko hi tshame ni vanhu van’wana. Van’wana swa va tikela ku kuma vanghana loko va rhurhela evandlheni rin’wana. Van’wana va huma emindyangwini leyi toloveleke ku endla swilo swo tala swin’we kambe loko va ri ekule ni ndyangu wa vona va titwa va ri ni xivundza. Kasi van’wana va tsundzuka leswi a va tolovele ku swi endla swin’we ni maxaka ya vona lama feke. Kasi Vakreste van’wana ngopfungopfu lava ha ku kumaka ntiyiso, va titwa va ri ni xivundza loko va kanetiwa kumbe ku papalatiwa hi maxaka kumbe vanghana va vona.

2. Hi swihi swivutiso leswi hi nga ta swi kambisisa?

² Yehovha wa yi tiva ni ku yi twisisa ndlela leyi hi titwaka hayona. Wa swi vona loko hi titwa hi ri ni xivundza naswona u lava ku hi pfuna hi xi hlula. Yehovha u hi pfuna njhani? I yini leswi hina hi nga swi endlaka? Hi nga va pfuna njhani van’wana evandlheni lava titwaka va ri ni xivundza? A hi kambisiseni tinhlamulo ta swivutiso leswi.

3. Yehovha u n’wi khathalele njhani Eliya?

³ Yehovha u lava leswaku vanhu hinkwavo lava n’wi gandzelaka va tshama va tsakile. U le kusuhi ni un’wana ni n’wana naswona wa swi vona loko hi ri ni gome. (Ps. 145:18, 19) Xiya ndlela leyi Yehovha a n’wi khathaleleke hayona muprofeta Eliya.  Wanuna yoloye wo tshembeka u hanye emikarhini leyi swiyimo a swi tika eIsrayele. Vagandzeri va Yehovha a va xanisiwa swinene, naswona valala va Xikwembu lava a va ri na matimba a va lava ku dlaya Eliya. (1 Tih. 19:1, 2) Xin’wana lexi a xi endla muprofeta Eliya a karhateka, a a ehleketa leswaku hi yena ntsena loyi a saleke eka vaprofeta va Yehovha. (1 Tih. 19:10) Xikwembu xi teke goza ro n’wi pfuna. Yehovha u rhumele ntsumi yi n’wi tiyisekisa leswaku a nga yexe, yi n’wi byele leswaku ku ni Vaisrayele vo tala lava chavaka Xikwembu!—1 Tih. 19:5, 18.

4. Marka 10:29, 30, yi swi kombisa njhani leswaku Yehovha wa khathala hi malandza yakwe lama maxaka ya vona ma va papalataka?

⁴ Yehovha wa swi tiva leswaku vanhu van’wana lava hlawulaka ku n’wi tirhela, va ta lahlekeriwa hi swilo swo karhi. Sweswo swi katsa maxaka ni vanghana lava nga gandzeriki Yehovha. Leswi Petro a a karhateka, u tshame a vutisa Yesu a ku: “Hi siye swilo hinkwaswo hi ku landzela; kahlekahle hi ta vuyeriwa hi yini?” (Mat. 19:27) Yesu u byele vadyondzisiwa vakwe leswaku va ta kuma maxaka evandlheni. (Hlaya Marka 10:29, 30.) Yehovha Tata wa hina wa le Tilweni, u tshembise leswaku u ta pfuna hinkwavo lava lavaka ku n’wi tirhela. (Ps. 9:10) Twana tindlela leti Yehovha a nga ku pfunaka hatona loko u ri ni xivundza.

5. Hikwalahokayini swi ri swinene ku ehleketa hi ndlela leyi Yehovha a ku pfunaka hayona?

⁵ Ehleketa hi ndlela leyi Yehovha a ku pfunaka hayona. (Ps. 55:22) Swi ta ku pfuna u pfuna u xiya leswaku a wu wexe. Carol, * makwerhu wa xisati loyi a nga Mbhoni a ri yexe ekaya ka vona u ri: “Loko ndzi ehleketa hi tindlela leti Yehovha a ndzi pfuneke hatona leswaku ndzi tiyisela swiyimo swo tika, swi endla ndzi swi vona leswaku a ndzi ndzexe. Ndza tshemba leswaku Yehovha u ta ndzi pfuna mikarhi hinkwayo.”

6. 1 Petro 5:9, 10, yi nga ku pfuna njhani loko u karhatiwaka hi xivundza?

⁶ Ehleketa ndlela leyi Yehovha a va pfunaka hayona lava karhatiwaka hi xivundza. (Hlaya 1 Petro 5:9, 10.) Hiroshi, Makwerhu loyi a  heteke malembe yo tala a ri Mbhoni a ri yexe u ri: “Loko u ri evandlheni wa swi vona leswaku a nga kona munhu loyi a nga riki ni swiphiqo. Ku tiva leswaku hinkwerhu hi fanele hi kulula hi n’watseka loko hi lava ku ya emahlweni hi tirhela Yehovha, swi nga va khutaza ngopfu lava va nga riki na wona maxaka lama nga Timbhoni.”

7. Xikhongelo xi nga ku pfuna njhani?

⁷ Yana emahlweni u tiyisa vuxaka bya wena na Yehovha. Leswi swi katsa ku phofula ndlela leyi u titwaka hayona eka Yehovha. (1 Pet. 5:7) Massiel, muntshwa loyi ndyangu wa ku vona wu n’wi tshikeke loko a sungula ku tirhela Yehovha u ri: “Ku khongela hi ku phikelela swi ndzi pfunile loko ndzi ri ni xivundza. Yehovha a a fana ni bava eka mina naswona a ndzi vulavula na yena siku ni siku ndzi n’wi phofulela ndlela leyi ndzi titwaka hayona.”

8. Ku hlaya Bibele ni ku anakanyisisa hi swona swi nga ku pfuna njhani?

⁸ Hlaya Rito ra Xikwembu nkarhi ni nkarhi, u anakanyisisa hileswi u swi hlayaka leswi kombisaka ndlela leyi Yehovha a ku rhandzaka hayona. Bianca, makwerhu wa xisati loyi a tiyiseleke marito yo tlhava lama humaka eka vandyangu wakwe, u ri: “Ku hlaya ni ku anakanyisisa hi rungula ra le Bibeleni ni hi malandza ya Yehovha lama langutaneke ni swiyimo leswi fanaka ni swa mina swi ndzi pfunile.” Vakreste van’wana va tiva matsalwa lama va chavelelaka hi nhloko, yo tanihi Pisalema 27:10 na Esaya 41:10. Van’wana va vone swi pfuna ku yingisela rungula leri rhekhodiweke loko va lunghiselela tinhlengeletano ta vandlha kumbe va endla dyondzo ya munhu hi yexe, sweswo swi endla va nga vi na xivundza.

9. Ku ya etinhlengeletanweni ta vandlha swi ku pfuna njhani?

⁹ Vana kona etinhlengeletanweni ta vandlha nkarhi ni nkarhi. Leswi u nga ta swi dyondza swi ta ku khutaza naswona u ta tolovelana ni vamakwerhu. (Hev. 10:24, 25) Massiel, loyi a boxiweke eku sunguleni u ri: “Hambileswi ndzi nga ni tingana, a ndzi va kona etinhlengeletanweni ta vandlha nkarhi ni nkarhi naswona a ndzi hlamula. Sweswo swi ndzi pfunile ndzi titwa ndzi ri ekaya.”

10. Hikwalahokayini swi ri swa nkoka ku hlawula vanghana lavanene evandlheni?

¹⁰ Hlawula vanghana lavanene evandlheni. Hlawula vanghana lava u nga dyondzaka swo karhi eka vona, hambiloko va ri vakulu, va ri vatsongo kumbe va huma eka mindhavuko yin’wana. Bibele yi vula leswaku vutlhari “byi na lava kuleke.” (Yobo 12:12) Vamakwerhu lava kuleke va nga dyondza swo tala eka vantshwa. Davhida a a ri ntsongo eka Yonathani kambe sweswo a swi va sivelanga leswaku  va va vanghana. (1 Sam. 18:1) Davhida na Yonathani va pfunanile leswaku va tirhela Yehovha hambiloko va langutana ni mitlhontlho. (1 Sam. 23:16-18) Irina, makwerhu wa xisati loyi a nga Mbhoni a ri yexe ekaya ka vona u ri: “Vamakwerhu va nga va vatswari kumbe vamakwenu. Yehovha a nga va tirhisa leswaku va hi pfuna.”

11. I yini leswi nga hi pfunaka ku tiyisa xinghana?

¹¹ A swi olovi ku kuma vanghana loko u ri ni tingana. Ratna, loyi a dyondzeke ntiyiso hambiloko a kanetiwa u ri: “Ndzi xiye leswaku ndza wu lava mpfuno ni nseketelo wa vamakwerhu.” Swa tika ku phofula ndlela leyi u titwaka hayona eka munghana wa wena kambe loko u endla tano, hi kona laha xinghana xa n’wina xi nga ta tiya. Leswaku vanghana va wena va ku khutaza ni ku ku pfuna, swi lava u tiphofula eka vona.

12. Xana nsimu yi nga ku pfuna njhani leswaku u kuma vanghana lavanene?

¹² Ndlela yin’wana yo kuma vanghana lavanene i ku famba ni vamakwerhu ensin’wini. Carol, loyi a boxiweke eku sunguleni u ri: “Ndzi kume vanghana lavanene hi ku tshama ndzi ri ni vamakwerhu ensin’wini ni ku endla mitirho yin’wana na vona evandlheni. Yehovha u ndzi pfunile hi ku tirhisa vamakwerhu lava.” Loko u va ni vanghana lava nga Vakreste swi ta ku pfuna. Yehovha u tirhisa vanghana lava leswaku va hi pfuna loko hi ri ntshikilelo kumbe xivundza.—Swiv. 17:17.

13. Hi byihi vutihlamuleri lebyi hinkwerhu hi nga na byona evandlheni?

¹³ Hinkwerhu evandlheni hi ni vutihlamuleri byo kondletela ku rhula ni ku komba van’wana rirhandzu leswaku va nga titwi va ri ni xivundza. (Yoh. 13:35) Leswi hi swi endlaka ni ku swi vula swi nga khutaza van’wana! Twana leswi vuriweke hi makwerhu un’wana, u ri: “Loko ndza ha ku dyondza ntiyiso vamakwerhu evandlheni va ve maxaka ya mina. A ndzi nga ta swi kota ku va Mbhoni handle ka mpfuno wa vona.” U nga va pfuna njhani lava nga Timbhoni va ri voxe emakaya ya vona leswaku va titwa va ri ekaya loko va ri evandlheni?

14. U nga endla yini leswaku u endla xinghana ni lava ha ku fikaka evandlheni?

¹⁴ Ringeta ku va munghana wa lava ha ku fikaka. Hi nga endla tano hi ku amukela lava ha ku fikaka evandlheni. (Rhom. 15:7) Hambiswiritano, a hi lavi ku va pfuxela ntsena. Hi lava ku va vanghana va vona. Va kombe leswaku wa khathala ha vona. U nga ngheneleli etimhakeni ta vona kambe ringeta ku twisisa leswi va langutanaka na swona. Van’wana swa va tikela ku phofula ndlela leyi va titwaka hayona kutani tivoneli leswaku u nga va sindzisi ku vulavula loko va nga swi lavi. Ku hambana ni sweswo, va vutise swivutiso leswi nga ta va endla va tsakela ku vulavula naswona u va yingisela hi vukheta. Hi xikombiso, u nga ha va vutisa ndlela leyi va wu kumeke hayona ntiyiso.

15. Vamakwerhu lava nga ni ntokoto va nga va pfuna njhani van’wana evandlheni?

¹⁵ Vakulu ni vamakwerhu lava nga ni ntokoto evandlheni, va nga pfuna vamakwerhu van’wana leswaku va va ni vuxaka lebyinene na Yehovha loko va khathala ha vona. Melissa loyi a kurisiweke hi mana wakwe loyi a ri yexe entiyisweni, u ri: “Ndza va khensa vamakwerhu lava a va fana ni va bava eka mina, lava ndzi pfuneke ndzi va ni vuxaka lebyinene na Yehovha ku ringana malembe yo tala. Loko ndzi lava ku pfuniwa, a ndzi swi tiva leswaku ndzi ta ya eka mani.” Mauricio, muntshwa loyi a titweke a ri ni xivundza loko mudyondzisi wakwe wa Bibele a tshika ku tirhela  Yehovha, u ri: “Ndlela leyi vakulu a va khathala hayona ha mina yi ndzi pfunile swinene. A va vulavula na mina nkarhi ni nkarhi. A hi tirha swin’we nsimu, va ndzi byela leswi va swi kumeke eka dyondzo ya vona ya Bibele ni ku tlhela hi tlanga swin’we bolo.” Sweswi hi vulavulaka, Melissa na Mauricio va le ka ntirho wa nkarhi hinkwawo.

16-17. Hi tihi tindlela leti hi nga va pfunaka hatona van’wana?

¹⁶ Tindlela leti u nga va pfunaka hatona. (Gal. 6:10) Leo, loyi a nga murhumiwa etikweni ra le kule ni le kaya ka vona u ri: “Lexi hi xi lavaka i ku kombiwa rirhandzu hi nkarhi lowu faneleke. Ndzi tsundzuka loko ndzi humeleriwe hi mhangu ya movha. A ndzi tshikilelekile loko ndzi fika ekaya. Makwerhu un’wana ni nsati wakwe va ndzi rhambe eswakudyeni ekaya ra vona. A ndza ha swi tsundzuki kahle leswi hi swi dyeke siku rero kambe ndza ha yi tsundzuka ndlela leyi va ndzi yingiseleke hayona loko ndzi tiphofula. Ndzi titwe ndzi chavelelekile!”

¹⁷ Hinkwerhu ha wu rhandza nkarhi lowu hi tiphinaka ni vamakwerhu ha wona loko hi ri etinhlengeletanweni ta muganga ni ta xifundzha hikuva hi va ni nkarhi wo tala wo bula na vona hileswi hi swi dyondzeke. Hambiswiritano, Carol, loyi a boxiweke eku sunguleni u ri: “Mikarhi yin’wana ndzi titwa ndzi ri ni xivundza loko ndzi ri etinhlengeletanweni.” Hikwalahokayini? U ri: “Hambileswi ku vaka ni vamakwerhu vo tala kambe va va va tshame ni mindyangu ya vona. Hi nkarhi wolowo, ndzi va ndzi ri ni xivundza.” Van’wana swa va tikela ku ya etinhlengeletanweni ta muganga ni ta xifundzha loko va ha ku loveriwa hi munghana wa vona wa vukati. Xana u kona makwerhu loyi u n’wi tivaka loyi a langutaneke ni swiyimo swo fana ni leswi? Swi nga va njhani u n’wi rhamba leswaku mi ta tshama swin’we loko mi ya enhlengeletanweni leyi landzelaka?

18. Hi nga swi tirhisa njhani leswi nga eka 2 Vakorinto 6:11-13, loko hi komba van’wana malwandla?

¹⁸ Tinyikeni nkarhi wo va swin’we. Tinyike nkarhi wo va ni vamakwerhu vo hambanahambana, ngopfungopfu lava nga ni xivundza. Hi lava ku va kombisa leswaku ha va ‘rhandza hi mbilu yo basa.’ (Hlaya 2 Vakorinto  6:11-13.) Melissa, loyi a boxiweke eku sunguleni u ri: “A hi tsaka ngopfu loko vamakwerhu va hi rhamba emakaya ya vona kumbe loko hi tihumesa na vona.” Xana u kona makwerhu loyi u nga n’wi kombaka malwandla evandlheni ra ka n’wina?

19. Hi rini laha ku heta nkarhi ni vamakwerhu swi nga vaka swinene?

¹⁹ Ku ni mikarhi leyi vamakwerhu va tsakaka ngopfu loko hi tinyika nkarhi wo va na vona. Van’wana swa va tikela ku tshama ni maxaka ya vona lawa ma nga riki Timbhoni hi mikarhi ya tiholideyi. Van’wana va va ni gome, loko siku leri maxaka ya vona ma loveke ha rona ri fika. Loko hi tinyika nkarhi wo va ni vamakwerhu lava langutaneke ni swiyimo swo tika, hi kombisa leswaku ha va “khathalela hi mbilu hinkwayo.”—Filp. 2:20.

20. Marito ya Yesu lama nga eka Matewu 12:48-50 ma nga hi pfuna njhani loko hi ri ni xivundza?

²⁰ Ku ni swilo swo tala leswi endlaka Vakreste mikarhi yin’wana va titwa va ri ni xivundza. Kambe hi fanele hi tshama hi ri karhi hi tsundzuka leswaku Yehovha wa yi tiva ndlela leyi hi titwaka hayona. Mikarhi yo tala u hi pfuna hi ku tirhisa vamakwerhu. (Hlaya Matewu 12:48-50.) Hi kombisa leswaku ha swi khensa leswi Yehovha a hi endlelaka swona hi ku tiyimisela ku pfuna vamakwerhu. Loko mikarhi yin’wana hi titwa hi ri ni xivundza, a hi tsundzukeni leswaku a hi hexe hikuva Yehovha u na hina!