1. Hi fanele hi endla yini leswaku hi pona siku ra Yehovha?

 LOKO Bibele yi vulavula hi “siku ra Yehovha,” yi vulavula hi nkarhi lowu Yehovha a nga ta avanyisa valala ni ku tlhela a ponisa vanhu vakwe. Enkarhini lowu hundzeke, Yehovha u xupule matiko man’wana. (Esa. 13:1, 6; Ezek. 13:5; Sof. 1:8) Enkarhini wa hina, “siku ra Yehovha” ri ta sungula hi ku hlaseriwa ka Babilona Lonkulu ivi ri fika emakumu hi nyimpi ya Armagedoni. Leswaku hi pona “siku” rero, hi fanele hi lungheka sweswi. Yesu u dyondzise leswaku a hi fanelanga hi lunghekela “nhlomulo lowukulu” ntsena kambe hi fanele hi tlhela hi ‘tshama hi lunghekile.’—Mat. 24:21; Luka 12:40.

2. Hi nga dyondza yini eka 1 Vatesalonika?

² Eka papila rakwe ro sungula leri a ri tsaleleke Vatesalonika, muapostola Pawulo u tirhise swikombiso swo tala ku pfuna Vakreste leswaku va tshama va lunghekele siku lerikulu ra Yehovha ra vuavanyisi. Pawulo a a swi tiva leswaku siku ra Yehovha a ri nga ta fika hi nkarhi wolowo. (2 Tes. 2:1-3) Hambiswiritano, u khutaze vamakwavo leswaku va tshama va lunghekele siku rero onge hiloko a ri ta mundzuku naswona na hina hi nga xi tirhisa xikhutazo xakwe. A hi kambisiseni nhlamuselo yakwe hi leswi landzelaka: (1) ndlela leyi siku ra Yehovha a ri ta fika hayona, (2) lava nga taka va nga poni loko siku rero ri fika ni (3) ndlela leyi hi nga lunghekelaka ku pona hayona.

3. Xana siku ra Yehovha ri ta ta ku fana ni khamba ni vusiku hi ndlela yihi? (Nakambe vona xifaniso.)

³ “Ku fana ni khamba nivusiku.” (1 Tes. 5:2) Lexi i xikombiso xo sungula eka swinharhu leswi tirhisiweke ku hlamusela ndlela leyi siku ra Yehovha ri nga ta fika hayona. Mikarhi yo tala makhamba ma yiva nivusiku hi ku hatlisa vanhu va nga swi rindzelanga. Siku ra Yehovha na rona ri ta fika hi xitshuketa vanhu va nga swi rindzelanga.  Hambi ku ri Vakreste va ntiyiso va nga ha hlamarisiwa hi ndlela leyi swilo swi nga ta endleka hayona hi ku hatlisa. Kambe ku hambana ni lavo homboloka, hina a hi nge lovisiwi.

4. Siku ra Yehovha ri fana ni switlhavi swa ku veleka hi ndlela yihi?

⁴ “Ku fana ni switlhavi swa ku veleka eka wansati la tikeke.” (1 Tes. 5:3) Manana la tikeke a nge wu tivi hi ku kongoma nkarhi lowu a nga ta veleka ha wona. Kambe a nga kanakani leswaku nkarhi wolowo wu ta fika. Loko nkarhi wolowo wu fika, u twa ku vava swinene hi xitshuketa naswona switlhavi swa kona a swi siveleki. Hilaha ku fanaka, a hi ri tivi siku ni nkarhi lowu siku ra Yehovha ri nga ta fika ha wona. Kambe ha tiyiseka leswaku ri ta fika naswona Xikwembu xi ta xupula vanhu vo homboloka va nga swi langutelanga naswona a va nge poni.

5. Nhlomulo lowukulu wu fana ni matakuxa hi ndlela yihi?

⁵ Ku fana ni matakuxa. Xikombiso xa vunharhu xa Pawulo xi vulavula hi makhamba lama yivaka nivusiku. Kambe sweswi swi tikomba onge Pawulo u fanisa siku ra Yehovha ni matakuxa. (1 Tes. 5:4) Makhamba lama yivaka ni vusiku ma nga ha rivateka hi ku yiva lerova ma nga wu xiyi nkarhi. Ma nga ha jumiwa hi ku tlhava ka dyambu loko ri ya ri xa ivi ma paluxeka. Hilaha ku fanaka, nhlomulo lowukulu wu ta paluxa lava ku fana ni makhamba va tshamaka emunyameni hi ku va va endla swilo leswi nga xi tsakisiki Xikwembu. Ku hambana na vona, hi nga tshama hi lunghekile hi ku papalata mahanyelo lama nga n’wi tsakisiki Yehovha ni ku endla nchumu ‘wun’wana ni wun’wana lowunene, wo lulama ni ntiyiso.’ (Efe. 5:8-12) Pawulo u ya emahlweni a tirhisa swikombiso swimbirhi ku hlamusela vanhu lava nga taka va nga poni.

6. Xana vanhu vo tala va etlele hi ndlela yihi? (1 Vatesalonika 5:6, 7)

⁶ “Lava etlelaka.” (Hlaya 1 Vatesalonika 5:6, 7.) Pawulo u fanise vanhu lava nga taka va nga  poni loko siku ra Yehovha ri fika ni vanhu lava etleleke. A va wu lemuki nkarhi naswona a va swi tivi leswi nga eku endlekeni. Hikwalaho, a va swi voni swilo swa nkoka leswi nga eku endlekeni naswona a va endli nchumu. Vanhu vo tala namuntlha va etlele loko swi ta eka vuxaka bya vona ni Xikwembu. (Rhom. 11:8) A va byi tshembi vumbhoni lebyi kombisaka leswaku hi hanya “emasikwini yo hetelela” nileswaku nhlomulo lowukulu wu kwala nyongeni. Swiendlakalo leswikulu leswi endlekaka emisaveni hinkwayo swi nga ha pfuxa van’wana evurhongweni ni ku endla leswaku va tsakela rungula ra hina ra Mfumo. Kambe vo tala va tlhela va khudzehela ematshan’weni yo xalamuka. Hambi ku ri van’wana lava pfumelaka leswaku siku ra vuavanyisi ri ta fika va tibyela leswaku ra ha ri ekule swinene. (2 Pet. 3:3, 4) Hambiswiritano, ha swi xiya leswaku siku ni siku swi ya swi va swa xihatla ku tshama hi rindzile.

7. Xana lava langutanaka ni vukarhi bya Xikwembu va fana ni swidakwa hi ndlela yihi?

⁷ “Lava dakwaka.” Muapostola Pawulo u fanise lava langutanaka ni vukarhi bya Xikwembu ni swidakwa. Vanhu lava dakweke va hlwela ku endla swilo naswona va endla swiboho leswi hoxeke. Hilaha ku fanaka, vanhu vo homboloka a va swi yingisi swilemukiso swa Xikwembu. Va hlawula ku hanya vutomi lebyi va yisaka eku lovisiweni. Kambe Vakreste va byeriwa leswaku va tshama va xalamukile va nga etleli. (1 Tes. 5:6) Xidyondzi xin’wana xa Bibele xi hlamusela leswaku loko munhu a xalamukile hiloko “a ri ni ku rhula a kota ku ehleketa kahle leswi n’wi pfunaka a kota ku endla xiboho lexinene.” Hikwalahokayini hi fanele hi tshama hi ri ni ku rhula naswona hi xalamukile? Leswaku hi nga tikumi hi nghenise nhompfu eka swa tipolitiki kumbe eka swiphiqo leswi karhataka vanhu namuntlha. Loko siku ra Yehovha ri ya ri tshinela, swi ta ya swi hi tikela ku nga katseki eka swilo leswi. Kambe a hi fanelanga hi vilela hileswaku hi ta endla yini. Moya wa Xikwembu wu nga hi pfuna hi va ni ku rhula ni ku tshama hi xalamukile leswaku hi kota ku endla swiboho swa vutlhari.—Luka 12:11, 12.

8. 1 Vatesalonika 5:8 yi swi kombisa njhani swilo leswi nga ta hi pfuna leswaku hi tshama hi xalamukile ni ku yi tirhisa kahle mianakanyo ya hina? (Nakambe vona xifaniso.)

⁸ “Ambala xisirhelelo xa xifuva . . . ni . . . xihuku.” Pawulo u hi fanisa ni masocha lama tshamaka ma xalamukile naswona ma ambaleke swiambalo swa nyimpi. (Hlaya 1 Vatesalonika 5:8.) Socha leri nga enyimpini ri fanele ri tshama ri lunghekele ku lwa mikarhi hinkwayo. Swi tano ni le ka hina. Hi tshama hi lunghekele siku ra Yehovha hi ku ambala xisirhelelo xa xifuva xa ripfumelo, rirhandzu ni xihuku xa ntshembo. Swilo leswi swi nga hi pfuna swinene.

9. Ripfumelo ra hina ri hi sirhelela njhani?

⁹ Xisirhelelo xa xifuva a xi sirhelela mbilu ya socha. Rirhandzu ni ripfumelo swi sirhelela mbilu ya hina yo fanekisela. Swi ta hi pfuna leswaku hi nga tshiki ku tirhela Xikwembu ni ku landzela Yesu. Ripfumelo ri hi tiyisekisa leswaku Yehovha u ta hi katekisa loko hi ya emahlweni hi n’wi lava hi timbilu ta hina hinkwato. (Hev. 11:6) Swi ta hi pfuna leswaku hi tshama hi tshembekile eka Yesu Murhangeri wa hina hambiloko hi fanele hi tiyisela swiphiqo. Hi nga kota ku va ni ripfumelo ro tiyisela swiphiqo hi ku dyondza eka vamakwerhu va manguva lawa lava tshameke va tshembekile hambiloko va xanisiwa kumbe loko va langutana ni swiphiqo swa timali. Hi nga tlhela hi papalata ku hlongorisa rifuwo hi ku tekelela lava tshikeke swilo swo tala evuton’wini bya vona leswaku va rhangisa Mfumo. b

10. Ku rhandza Xikwembu ni vanhu swi hi pfuna njhani leswaku hi tiyisela?

¹⁰ Leswaku hi tshama hi xalamukile ni ku yi tirhisa  kahle mianakanyo ya hina i swa nkoka leswaku hi va ni rirhandzu. (Mat. 22:37-39) Ku rhandza Xikwembu swi hi pfuna leswaku hi tiyisela entirhweni wo chumayela hambiloko hi xanisiwa hikwalaho ka wona. (2 Tim. 1:7, 8) Leswi hi rhandzaka ni lava nga riki Timbhoni, a hi tshiki ku chumayela ni ku tirha nsimu leyi hi averiweke yona naswona hi tlhela hi chumayela hi ku tirhisa mapapila ni foni. Hi tshama hi ri ni ntshembo wa leswaku siku rin’wana vanhu lava hi va chumayelaka va ta cinca ivi va sungula ku endla leswinene.—Ezek. 18:27, 28.

11. Xana ku rhandza vamakwerhu swi hi pfuna njhani? (1 Vatesalonika 5:11)

¹¹ Van’wana lava hi va rhandzaka i vamakwerhu. Hi kombisa leswaku ha va rhandza hi ku va hi “khutazana ni ku akana.” (Hlaya 1 Vatesalonika 5:11.) Ku fana ni masocha lama yimaka swin’we enyimpini, ha khutazana. I ntiyiso leswaku socha ri nga ha vavisa sochakuloni hi xihoxo loko nyimpi yi ri karhi yi hisa kambe a ri nge pfuki ri endle tano hi vomu. Hilaha ku fanaka, a hi nge pfuki hi twise vamakwerhu ku vava hi vomu kumbe hi tirihisela eka vona. (1 Tes. 5:13, 15) Hi tlhela hi kombisa leswaku hi rhandza ni ku xixima vamakwerhu lava rhangelaka evandlheni. (1 Tes. 5:12) Loko Pawulo a tsala papila leri, vandlha ra le Tesalonika a ro va ni tinh’weti ri ri kona. A swi kanakanisi leswaku vakulu lava a va ri kona evandlheni rero a va nga si va ni ntokoto naswona a va endla swihoxo swo tala. Hambiswiritano, a va fanele va xiximiwa. Loko nhlomulo lowukulu wu ya wu tshinela, swi nga ha lava hi titshega hi vakulu leswaku hi kuma nkongomiso ku tlula sweswi. Swi nga endleka hi nga ha swi koti ku kuma nkongomiso lowu humaka entsindza kumbe erhavini; hikwalaho i swa nkoka ku dyondza ku rhandza ni ku xixima vakulu sweswi. Swi nga ri na mhaka leswaku ku endleka yini, a hi tirhiseni mianakanyo ya hina hi nga languti ngopfu swihoxo swa vona kambe hi xiya leswaku Yehovha u kongomisa vavanuna lava vo tshembeka hi ku tirhisa Kreste.

12. Xana ntshembo wu yi sirhelela njhani miehleketo ya hina?

¹² Ku fana ni leswi xihuku xi sirhelelaka nhloko ya socha, ntshembo lowu hi nga na wona wa leswaku hi ta ponisiwa wu sirhelela miehleketo ya hina. Ntshembo lowu tiyeke wu hi pfuna hi kota ku xiya leswaku leswi misava leyi yi hi nyikaka  swona a swi pfuni nchumu. (Filp. 3:8) Ntshembo wu hi pfuna leswaku hi tshama hi ri ni ku rhula ni ku xalamuka. Leswi swi ve tano eka Wallace na Laurinda lava averiweke ku tirha eAfrika. Hi mavhiki manharhu ntsena, havumbirhi va loveriwe hi vatswari. Leswi a ku ri ni ntungu wa COVID-19, a va nga swi koti ku tlhelela ekaya leswaku va ya va ni mindyangu ya vona. Wallace u tsale a ku: “Ntshembo wa leswaku vafi va ta pfuxiwa wu ndzi pfuna leswaku ndzi nga ehleketi hi xiyimo lexi a va ri eka xona loko va ri ekusuhi ni ku lova, kambe ndzi ehleketa hi ndlela leyi va nga ta va hayona loko va pfuxiwa emisaveni leyintshwa. Ntshembo lowu wu ndzi pfuna leswaku ndzi va ni ku rhula loko ndzi va ni gome kumbe loko ndzi va tsundzuka swinene.”

13. Hi nga endla yini leswaku hi kuma moya lowo kwetsima?

¹³ “Mi nga siveli moya wa Xikwembu ku tirha eka n’wina.” (1 Tes. 5:19) Pawulo u fanise moya lowo kwetsima ni ndzilo lowu pfurhaka endzeni ka hina. Loko hi ri ni moya lowo kwetsima wa Xikwembu, hi hiseka bya ndzilo naswona hi tikarhatela ku endla leswinene ni ku va ni matimba yo endla ntirho wa Yehovha. (Rhom. 12:11) Hi nga endla yini leswaku hi kuma moya lowo kwetsima? Hi nga wu kombela eka Yehovha hi xikhongelo, hi dyondza Rito ra Xikwembu leri huhuteriweke ni ku nga tshiki ku tihlanganisa ni nhlangano wa xona lowu kongomisiwaka hi moya lowo kwetsima. Ku endla tano swi ta hi pfuna leswaku hi va ni “mihandzu ya moya lowo kwetsima.”—Gal. 5:22, 23.

14. Hi fanele hi papalata yini leswaku hi ya emahlweni hi kuma moya lowo kwetsima wa Xikwembu? (Nakambe vona xifaniso.)

¹⁴ Loko Xikwembu xi hi nyike moya wa xona lowo kwetsima, hi fanele hi tivonela leswaku a hi wu “siveli moya wa Xikwembu ku tirha eka [hina].” Xikwembu a xi nyiki mani na mani moya wa xona lowo kwetsima kambe xi wu nyika lava tshamaka va ehleketa swilo leswi tengeke ni lava nga ni mahanyelo lama baseke. Xi ta tshika ku hi nyika moya wa xona lowo kwetsima loko hi tshamela ku ehleketa hi swilo leswi thyakeke ni ku tlhela hi swi endla. (1 Tes. 4:7, 8) Leswaku hi ya emahlweni hi kuma moya lowo kwetsima, hi “nga sandzi vuprofeta.” (1 Tes. 5:20) Eka  ndzimana leyi, “vuprofeta” i marungula lama hi ma kumaka hikwalaho ka moya lowo kwetsima wa Xikwembu ku katsa ni lama vulavulaka hi siku ra Yehovha ni mikarhi leyi hi hanyaka eka yona. A hi ri tlheriseli endzhaku siku leri emianakanyweni ya hina hi ku tibyela leswaku Armagedoni a yi nge fiki ha ha hanya. Ematshan’weni ya sweswo, ha ri hatlisisa, hi tshama hi ri karhi hi ehleketa ha rona, hi tikhoma hi ndlela leyinene ni ku tshama hi khomekile hi ku ‘tinyiketela eka Xikwembu.’—2 Pet. 3:11, 12.

15. Hi nga swi papalata njhani ku xisiwa hi rungula leri nga riki ra ntiyiso ni mavunwa ya madimona? (1 Vatesalonika 5:21)

¹⁵ Ku nga ri khale, vanhu lava lwisanaka ni Xikwembu hi ndlela yo karhi va ta vula marito lama nge: “Ku ni ku rhula ni nsirhelelo!” (1 Tes. 5:3) Mavunwa lawa lama hlohloteriwaka hi madimona ma ta tata misava ma hambukisa vo tala. (Nhlav. 16:13, 14) Xana ku vuriwa yini hi hina? A hi nge xisiwi loko hi “kambisi[sa] swilo hinkwaswo.” (Hlaya 1 Vatesalonika 5:21.) Rito ra Xigriki leri hundzuluxeriweke ri va “kambisisani” a ri tirhisiwa ku hlamusela ndlela leyi vanhu a va swi vona hayona loko nsuku kumbe silivhere swi ri swa xiviri. Hikwalaho, hi fanele hi kambisisa ku vona loko leswi hi swi twaka kumbe leswi hi swi hlayaka ku ri ntiyiso. Leswi a swi ri swa nkoka eka Vatesalonika naswona swi ta va swa nkoka swinene ni le ka hina tanihi leswi nhlomulo lowukulu wu tshinelaka. Ematshan’weni yo tshemba swin’wana ni swin’wana leswi vanhu va swi vulaka, hi tirhisa miehleketo ya hina ku vona loko leswi hi swi hlayaka kumbe hi swi twaka swi fambisana ni leswi Bibele ni nhlangano wa Yehovha wu swi vulaka. Loko hi endla tano, a hi nge humbiwi mano hi mavunwa ya madimona.—Swiv. 14:15; 1 Tim. 4:1.

16. Hi ni ntshembo wihi lowu tiyeke naswona hi susumeteleka ku endla yini?

¹⁶ Tanihi ntlawa, malandza ya Xikwembu ma ta pona nhlomulo lowukulu. Kambe ha un’we wa hina a hi swi tivi leswaku mundzuku wu hi khomele yini. (Yak. 4:14) Nilokoswiritano, swi nga ri na mhaka leswaku hi ta pona nhlomulo lowukulu kumbe hi fa wu nga si fika, Yehovha u ta hi katekisa hi ku hi nyika vutomi lebyi nga heriki loko hi tshama hi tshembekile. Vahlawuriwa va ta va na Kreste etilweni. Kasi lava tinyimpfu tin’wana va ta hanya emisaveni leyi nga paradeyisi. Onge hi nga tshama hi ri karhi hi anakanyisisa hi ntshembo wa hina wo tsakisa ni ku lunghekela siku ra Yehovha!