1. I yini leswi pfunaka vanhu va Yehovha va ya emahlweni va n’wi gandzela hambiloko va langutana ni swiphiqo?

 BIBELE yi hlamusela mikarhi leyi hi hanyaka eka yona tanihi “mikarhi yo nonon’hwa leyi swi tikaka ku hanya eka yona.” (2 Tim. 3:1) Ku engetela eka swiphiqo leswi vanhu hinkwavo va langutanaka na swona eka misava leyi, vanhu va Yehovha va kanetiwa va tlhela va xanisiwa. I yini lexi hi pfunaka hi ya emahlweni hi gandzela Yehovha hambiloko hi langutana ni swiphiqo leswi? Xivangelo xin’we xa nkoka hileswi hi tivaka Yehovha a ri “Xikwembu lexi hanyaka.”—Yer. 10:10; 2 Tim. 1:12.

2. Yehovha i Xikwembu lexi hanyaka hi ndlela yihi?

² Yehovha i wa xiviri, wa hi seketela loko hi ri emiringweni naswona u lava tindlela ta ku hi pfuna. (2 Tikr. 16:9; Ps. 23:4) Loko hi n’wi teka tanihi Xikwembu lexi hanyaka, swi ta hi pfuna ku hlula miringo leyi hi langutanaka na yona. Twana ndlela leyi leswi swi veke tano hayona eka Hosi Davhida.

3. Davhida a a vula yini loko a ku “Yehovha wa hanya”?

³ Davhida a a n’wi tiva Yehovha naswona u titshege hi yena. Loko a hlongorisiwa hi valala vakwe ku katsa na Hosi Sawulo, u khongele eka Yehovha leswaku a n’wi pfuna. (Ps. 18:6) Endzhaku ka loko Xikwembu xi hlamule xikhongelo xakwe ni ku n’wi ponisa, Davhida u te: “Yehovha wa hanya!” (Ps. 18:46) Xana Davhida a a vula yini? Buku yin’wana yi vula leswaku Davhida a a hlamusela ndlela leyi a tshembaka Yehovha hayona “tanihi Xikwembu lexi hanyaka lexi mikarhi hinkwayo xi pfunaka vanhu va xona.” Davhida a a swi tiva leswaku Xikwembu xa hanya hikwalaho ka leswi xi n’wi endleleke swona evuton’wini naswona sweswo swi n’wi endle a ya emahlweni a xi dzunisa.—Ps. 18:​28, 29, 49.

4. Swi hi vuyerisa njhani ku teka Yehovha a ri Xikwembu lexi hanyaka?

 ⁴ Loko hi tiyiseka leswaku Yehovha i Xikwembu lexi hanyaka, swi ta hi pfuna hi n’wi tirhela hi ku hiseka. Hi ta va ni matimba yo tiyisela miringo hi tlhela hi swi navela hi mbilu hinkwayo ku ya emahlweni hi tirha hi matimba entirhweni wakwe. Nakambe hi ta tiyimisela ku tshama hi ri ekusuhi na Yehovha.

XIKWEMBU LEXI HANYAKA XI TA KU TIYISA

5. I yini lexi nga hi tiyisekisaka leswaku Yehovha u ta hi pfuna loko hi langutana ni miringo? (Vafilipiya 4:13)

⁵ Loko hi nga rivali leswaku Yehovha wa hanya ni leswaku u tiyimisele ku hi seketela, hi ta kota ku tiyisela ndzingo wun’wana ni wun’wana hambi i wukulu kumbe i wutsongo. Phela, a wu kona ndzingo lowu nga hlulaka Xikwembu xa hina. I Xikwembu xa Matimba Hinkwawo naswona xi nga hi nyika matimba yo tiyisela. (Hlaya Vafilipiya 4:13.) Hikwalaho hi ni swivangelo leswi twalaka swo va hi langutana ni miringo hi nga chavi nchumu. Loko hi vona ndlela leyi Yehovha a hi seketelaka hayona loko hi langutana ni miringo leyitsongo, swi hi tiyisekisa leswaku u ta hi pfuna ni loko hi langutane ni miringo leyikulu.

6. I swilo swihi leswi endlekeke loko Davhida a ha ri muntshwa leswi endleke a ya a tshemba Yehovha?

⁶ A hi twe hi swilo swimbirhi leswi endlekeke evuton’wini bya Davhida leswi n’wi endleke a ya a tshemba Yehovha. Loko Davhida a ha ri jaha leri nga murisi, bere ni nghala swi ringete ku teka tinyimpfu ta bava wakwe. Eka swiendlakalo sweswo hinkwaswo, hi xivindzi u hlongorise swivandzana sweswo kutani a ponisa tinyimpfu. Kambe u swi xiyile leswaku a nga swi endlanga hi matimba ya yena, a a swi tiva leswaku a ku ri Yehovha. (1 Sam. 17:​34-37) Davhida a nga swi rivalanga sweswo. Hi ku anakanyisisa hi swona, swi n’wi pfunile a tshemba leswaku Xikwembu lexi hanyaka xi ta n’wi tiyisa ni le nkarhini lowu taka.

7. Ku va Davhida a ve ni langutelo lerinene swi n’wi pfune njhani leswaku a lwa na Goliyadi?

⁷ Hi ku famba ka nkarhi, loko Davhida a ha ri muntshwa u endzele nxaxa wa masocha ya Vaisrayele. U kume masocha ma ri karhi ma rhurhumela hikwalaho ka leswi xihontlovila xa Vafilista lexi vuriwaka Goliyadi a xi tele ku “tlhontlha masocha ya Vaisrayele.” (1 Sam. 17:​10, 11) Masocha a ma rhurhumerisiwa hi leswi a ma langute vukulu bya xihontlovila ni leswi a xi ma byela swona. (1 Sam. 17:​24, 25) Kambe Davhida a a languta xiyimo hi ndlela leyi hambaneke. Eka yena a xi nga tlhontlhi masocha ya Vaisrayele ntsena kambe ni “mavuthu ya Xikwembu lexi hanyaka.” (1 Sam. 17:26) Davhida a a ehleketa hi Yehovha. A a tshemba leswaku Xikwembu lexi n’wi pfuneke a ha ri murisi a xi ta tlhela xi n’wi pfuna eka xiyimo lexi. Leswi a a tiyiseka leswaku Xikwembu xi ta n’wi seketela, u jamelane na Goliyadi naswona u hlurile!—1 Sam. 17:​45-51.

8. I yini lexi nga hi pfunaka hi ya hi tshemba Yehovha loko hi langutana ni miringo? (Nakambe vona xifaniso.)

⁸ Na hina hi nga hlula miringo loko hi tsundzuka leswaku Xikwembu lexi hanyaka xi ta hi seketela. (Ps. 118:6) Hi ta ya hi tshemba Yehovha swinene loko hi dyondza hileswi a swi endleke enkarhini lowu hundzeke. Hlaya hi timhaka ta le Bibeleni leti ku tsundzuxaka hi ndlela leyi Yehovha a poniseke vagandzeri vakwe hayona. (Esa. 37:​17, 33-37) Tlhela u hlaya kumbe u hlalela swiviko leswi nga eka website ya hina ya jw.org leswi kombisaka ndlela leyi Yehovha a seketelaka vamakwerhu hayona emikarhini ya hina. Nakambe tsundzuka mikarhi leyi Yehovha a ku seketeleke hayona. Swi nga ku vilerisi loko u nga tsundzuki ndlela yo hlamarisa leyi Yehovha a ku pfuneke hayona ku fana ni ku ku ponisa eka bere ni nghala.  Hikwalahokayini? Mhaka hileswaku Yehovha u tshame a ku seketela evuton’wini. U ku vitanile leswaku u va munghana wakwe. (Yoh. 6:44) Ni sweswi, u kota ku ya emahlweni u tirhela Yehovha hileswi a ku seketelaka. N’wi kombele a ku pfuna u tsundzuka mikarhi leyi a hlamuleke swikhongelo swa wena, a ku seketeleke hi nkarhi lowu faneleke kumbe a ku tiyisa hi nkarhi wa maxangu. Ku anakanyisisa hi swiendlakalo leswi, swi ta endla u ya u tshemba leswaku Yehovha u ta ya emahlweni a ku seketela.

9. I yini leswi u faneleke u swi tsundzuka loko u langutana ni miringo? (Swivuriso 27:11)

⁹ Loko hi teka Yehovha a ri Xikwembu lexi hanyaka swi ta hi pfuna leswaku hi nga chavi ku langutana ni miringo. Njhani? Hi sungula ku vona miringo ya hina tanihi xiphemu xa mhaka leyikulu leyi nga kona exikarhi ka Yehovha na Sathana. Diyavulosi u vula leswaku loko hi xaniseka, hi ta tshika ku tirhela Yehovha. (Yobo 1:​10, 11; hlaya Swivuriso 27:11.) Kambe loko hi hlula miringo, hi kombisa ndlela leyi hi rhandzaka Yehovha hayona nileswaku Diyavulosi i muhembi. Xana u tshama etikweni leri mfumo wu lwisanaka ni ntirho wa hina wo chumayela, u langutane ni swiphiqo swa timali, vanhu lava nga swi tsakeriki loko u va chumayela kumbe miringo yin’wana? Loko swi ri tano, swiyimo swoleswo swi ku nyika nkarhi wo tsakisa mbilu ya Yehovha. Nakambe tsundzuka leswaku a nge ku tshiki u langutana ni miringo leyi u nga taka u nga koti ku yi hlula. (1 Kor. 10:13) U ta ku nyika matimba yo tiyisela.

XIKWEMBU LEXI HANYAKA XI TA KU KATEKISA

10. Xikwembu lexi hanyaka xi ta va endlela yini lava xi gandzelaka?

¹⁰ Mikarhi hinkwayo Yehovha u katekisa lava n’wi gandzelaka. (Hev. 11:6) U hi nyika ku rhula ni ku hi pfuna hi eneriseka sweswi naswona u ta tlhela a hi nyika vutomi lebyi nga heriki enkarhini lowu taka. Hi nga tshemba Yehovha hilaha ku heleleke, hi tiyiseka leswaku wa swi lava ku hi katekisa naswona u ni matimba yo endla tano. Hikwalaho ka sweswo, hi  tshama hi khomekile hi ku gandzela Xikwembu ku fana ni malandza ya xona yo tshembeka ya le nkarhini lowu hundzeke. Hileswi Timotiya na yena a swi endleke.—Hev. 6:​10-12.

11. I yini lexi endleke Timotiya a tirha hi matimba evandlheni? (1 Timotiya 4:10)

¹¹ Hlaya 1 Timotiya 4:10. Timotiya a a tshemba Xikwembu lexi hanyaka. Hi yona mhaka a a ri ni xivangelo lexi twalaka xo va a tikarhatela ku tirhela Yehovha. Hi tindlela tihi? Muapostola Pawulo u n’wi khutaze leswaku a antswisa tanihi mudyondzisi tlhelo xivulavuri xa le rivaleni. Timotiya a a fanele a va xikombiso lexinene eka vagandzerikulorhi lavatsongo ni lavakulu. A a nyikiwe swiavelo swo tika leswi katsaka ku nyika ndzayo eka lava faneleke ku tshinyiwa kambe hi ndlela ya rirhandzu. (1 Tim. 4:​11-16; 2 Tim. 4:​1-5) Timotiya a a tiyiseka leswaku hambiloko mikarhi yin’wana vanhu va nga yi xiyi mitirho yakwe kumbe ku yi tlangela, Yehovha a a ta n’wi katekisa.—Rhom. 2:​6, 7.

12. I yini lexi endlaka vakulu va tirha hi matimba eswiavelweni swa vona? (Nakambe vona xifaniso.)

¹² Ni sweswi, vakulu va nga tiyiseka leswaku Yehovha wa yi vona ni ku yi tlangela mitirho leyi va yi endlaka. Ku engetela eka ku endla maendzo ya vurisi, ku dyondzisa ni ku chumayela, vakulu vo tala va tlhela va seketela tiprojeke to aka ni ku phalala loko ku ri ni timhangu. Van’wana va pfuneta eka Mitlawa yo Endzela Vavabyi ni le ka Tikomiti to Vulavurisana ni Swibedlhele. Vakulu lava endlaka mitirho yoleyo va yi endla hileswi va tshembaka leswaku vandlha i ra Yehovha ku nga ri ra munhu. Hikwalaho ka sweswo, va tirha hi matimba eswiavelweni swa vona naswona a va kanakani leswaku Xikwembu xi ta va katekisa.—Kol. 3:​23, 24.

13. Yehovha u titwa njhani hileswi hi n’wi endlelaka swona?

¹³ A hi nge vi vakulu hinkwerhu. Kambe hinkwerhu hi nga swi kota ku endlela Yehovha swo karhi. Xikwembu xa hina xa tsaka loko hi endla hinkwaswo leswi nga ematimbeni ya  hina leswaku hi xi gandzela. Hambiloko hi nga koti ku nyikela hi swo tala ku va hi seketela ntirho wa misava hinkwayo, Yehovha wa yi tlangela minyikelo yoleyo. Wa tsaka loko a vona hi tikarhatela ku hlamula etidyondzweni hambiloko hi ri na tingana niloko hi rivalela van’wana. Hambiloko u titwa onge leswi u swi endlaka a hi swa nchumu, tiyiseka leswaku Yehovha wa swi tlangela. Wa ku rhandza hikwalaho ka swona naswona u ta ku katekisa.—Luka 21:​1-4.

TSHAMA U RI EKUSUHI NI XIKWEMBU LEXI HANYAKA

14. Ku va ni vuxaka lebyi tiyeke na Yehovha swi nga hi pfuna njhani leswaku hi tshama hi tshembekile? (Nakambe vona xifaniso.)

¹⁴ Loko Yehovha a ri wa xiviri eka hina, swi ta hi olovela ku tshama hi tshembekile eka yena. Sweswo swi ve tano eka Yosefa. A nga pfumelanga ku endla vuoswi. Xikwembu a xi ri xa xiviri eka yena naswona a a nga lavi ku xi twisa ku vava. (Gen. 39:9) Leswaku Yehovha a va wa xiviri eka hina, hi fanele hi tinyika nkarhi wo khongela eka yena ni ku dyondza Rito rakwe. Hi ndlela yoleyo, vunghana bya hina na yena byi ta kula. Ku fana na Yosefa, loko Yehovha a ri munghana wa hina lonkulu, a hi nge lavi ku endla nchumu lowu nga ta N’wi twisa ku vava.—Yak. 4:8.

15. Hi dyondza yini eka xikombiso xa Vaisrayele loko va ri emananga? (Vaheveru 3:12)

¹⁵ Lava rivalaka leswaku Yehovha i Xikwembu lexi hanyaka swi nga va olovela leswaku va nga tshembeki eka yena. Xiya leswi endlekeke eka Vaisrayele loko va ri emananga. A va swi tiva leswaku Yehovha u kona kambe va sungule ku kanakana loko a ta va khathalela. Va vutise va ku: “Xana Yehovha u kona exikarhi ka hina kumbe a nga kona?” (Eks. 17:​2, 7) Sweswo swi endle va xandzukela Xikwembu. Hakunene hi lava ku papalata xikombiso xa vona xo biha.—Hlaya Vaheveru 3:12.

16. I yini leswi nga hi ringaka ripfumelo?

¹⁶ Misava yi endla swi tika ku tshama hi ri vanghana va Yehovha. Vo tala a va pfumeli leswaku Xikwembu xi kona. Hakanyingi lava  nga endliki leswi Xikwembu xi swi lavaka, va vonaka swi va fambela kahle. Loko hi vona sweswo swi endleka, swi nga hi ringa ripfumelo. Hambileswi hi tshembaka leswaku Xikwembu xi kona, hi nga sungula ku kanakana leswaku xi ta hi pfuna. Mutsari wa Pisalema 73 u tshame a titwa hi ndlela yoleyo. U vone lava a va honisa milawu ya Xikwembu swi va fambela kahle. Hikwalaho ka sweswo, u sungule ku kanakana loko swi pfuna ku tirhela Xikwembu.—Ps. 73:​11-13.

17. I yini leswi nga ta hi pfuna hi tshama hi ri vanghana va Yehovha?

¹⁷ I yini leswi pfuneke mupisalema a lulamisa langutelo rakwe? U anakanyisise hi leswi a swi ta endlekela lava rivalaka Yehovha. (Ps. 73:​18, 19, 27) U tlhele a anakanyisisa hi mikateko leyi tisiwaka hi ku gandzela Xikwembu. (Ps. 73:24) Na hina hi nga anakanyisisa hi ndlela leyi Yehovha a hi katekiseke hayona. Ehleketa ndlela leyi vutomi bya hina a byi ta va hayona loko a hi nga tirheli Yehovha. Ku endla tano swi ta hi pfuna hi tshama hi tshembekile naswona hi ta vula hilaha mupisalema a vuleke hakona loko a ku: “Loko ku ri mina, ku tshinela eka Xikwembu i swinene eka mina.”—Ps. 73:28.

18. Hikwalahokayini hi nga fanelanga hi chava swilo leswi nga ta endleka enkarhini lowu taka?

¹⁸ Hi nga kota ku langutana ni mitlhontlho yin’wana ni yin’wana emasikwini lawa yo hetelela hikuva hi “tirhela Xikwembu lexi hanyaka ni xa ntiyiso.” (1 Tes. 1:9) Xikwembu xa hina i xa xiviri naswona xi pfuna lava xi gandzelaka. Xi pfune malandza ya xona ya le nkarhini lowu hundzeke, ninamuntlha xa ha endla tano. Ku nga ri khale hi ta langutana ni nhlomulo lowukulu laha misaveni. Kambe a hi nge vi hexe, Yehovha u ta hi seketela. (Esa. 41:10) Onge hinkwerhu hi nga “va ni xivindzi xo vula hi ku: ‘Yehovha i mupfuni wa mina; a ndzi nge chavi.’”—Hev. 13:​5, 6.