1. Hi yihi miringo leyi vanhu va Yehovha va nga langutanaka na yona?

XANA ku ni ndzingo wo karhi lowu nga ku dyisiki byi rhelela? Swi nga endleka u twa ku vava hileswi u khunguvanyisiweke hi makwerhu un’wana evandlheni. (Yak. 3:2) Kumbexana wa hlekuriwa entirhweni kumbe exikolweni hileswi u tirhelaka Yehovha. (1 Pet. 4:3, 4) Kumbexana maxaka ya wena ma ringeta ku ku tshikisa ku ya etinhlengeletanweni ta vandlha kumbe ku chumayela van’wana. (Mat. 10:35, 36) Loko ndzingo wa kona wu ku tikela swinene, u nga vona onge swa antswa ku tshika ku tirhela Yehovha. Kambe swi tive leswaku swi nga ri na mhaka leswaku u langutana ni miringo ya njhani, Yehovha u ta ku nyika vutlhari ni matimba yo kota ku tiyisela.

2. Hi ku ya hi Varhoma 15:4, hi ta vuyeriwa njhani loko hi hlaya Rito ra Xikwembu?

² Yehovha u endle leswaku eRitweni rakwe, ku tsariwa vuxokoxoko bya vanhu lava velekiweke ni xidyoho lava koteke ku tiyisela miringo. Hikwalahokayini? Leswaku hi ta dyondza eka vona. Hi yona mhaka a rhumeke muapostola Pawulo ku tsala hi mhaka leyi. (Hlaya Varhoma 15:4.) Loko hi hlaya hi timhaka ta muxaka lowu, hi tlhela hi tikarhatela ku tirhisa leswi hi swi hlayeke, hi ta chaveleleka ni ku va ni ntshembo. Kambe hi fanele hi endla yini loko hi lava xitsundzuxo lexi nga hi pfunaka loko hi ri ni xiphiqo? Magoza lama landzelaka ya mune ma nga hi pfuna: (1) Khongela, (2) Swi vone hi mahlo ya mianakanyo, (3) Anakanyisisa, (4) Tirhisa leswi u swi dyondzaka. A hi buleni hi magoza lawa. * Magoza lawa ma ta hi pfuna hi dyondza swo tala eka Hosi Davhida na muapostola Pawulo.

3. Loko u nga si sungula ku hlaya Bibele, i yini leswi u faneleke u swi endla naswona hikwalahokayini?

 ³ (1) Khongela. Loko u nga si sungula ku hlaya Bibele, kombela Yehovha a ku pfuna u twisisa leswi u nga ta swi hlaya. Hi xikombiso, loko u lava xitsundzuxo lexi nga ku pfunaka loko u langutane ni xiphiqo, n’wi kombele a ku pfuna u kuma matsalwa lama nga ku pfunaka.—Filp. 4:6, 7; Yak. 1:5.

4. I yini lexi nga ku pfunaka u teka leswi u swi hlayaka eBibeleni swi ri swa xiviri?

⁴ (2) Swi vone hi mahlo ya mianakanyo. Yehovha u hi endle hi kota ku vona swilo hi mahlo ya mianakanyo. Leswaku u kota ku teka leswi u swi hlayaka eBibeleni swi ri swa xiviri, ringeta ku vona leswi endlekaka hi mahlo ya mianakanyo u tlhela u ti teka u ri munhu loyi ku vulavuriwaka ha yena. Ringeta ku vona swilo leswi munhu yoloye a swi voneke u tlhela u titwa ku fana na yena.

5. Swi vula yini ku anakanyisisa naswona u nga swi endla njhani?

⁵ (3) Anakanyisisa. Ku anakanyisisa swi vula ku ehleketisisa hi leswi u swi hlayeke ni ku ehleketa hi ndlela leyi u nga swi tirhisaka hayona. Swi endla u kota ku yi twisisa hi vuenti mhaka leyi a wu yi hlaya. Ku hlaya Bibele handle ko anakanyisisa swi fana ni tinsimbi ta xitendara leti nga siki hlanganisiwaka. Ku anakanyisisa swi fana ni ku khomanisa tinsimbi teto kutani ti endla xitendara lexi heleleke. Leswaku u kota ku anakanyisisa, tivutise swivutiso leswi landzelaka u tlhela u swi hlamula: ‘Munhu loyi u hlayaka ha yena u swi kote njhani ku hlula xiphiqo lexi a a langutane na xona? Yehovha u n’wi pfune njhani? Leswi ndzi swi hlayeke swi nga ndzi pfuna njhani ndzi kota ku tiyisela miringo?’

6. Hikwalahokayini hi fanele hi tirhisa leswi hi swi dyondzaka?

⁶ (4) Tirhisa leswi u swi dyondzaka. Yesu u vule leswaku loko hi nga swi tirhisi leswi hi swi dyondzaka, hi fana ni wanuna loyi a akaka yindlu ehenhla ka sava. U tirha hi matimba kambe matimba yakwe mo va nyuku wa mbyana. Hikwalahokayini? Hikuva xidzedze ni ndhambi swi ta yi kukula hi ku olova yindlu yoleyo. (Mat. 7:24-27) Hilaha ku fanaka, loko hi khongela, hi vona leswi hi swi hlayaka hi mahlo ya mianakanyo ni ku anakanyisisa hi swona kambe hi nga swi tirhisi, swi ta fana ni nyuku wa mbyana. A hi nge swi koti ku tiyisela loko hi langutana ni miringo kumbe loko hi xanisiwa. Hi hala tlhelo, loko hi tirhisa leswi hi swi dyondzaka, hi ta kota ku teka swiboho leswinene, hi ta va ni ku rhula ni ripfumelo leri tiyeke. (Esa. 48:17, 18) Loko ha ha ri ni magoza lawa ya mune emiehleketweni, a hi voneni leswi hi nga swi dyondzaka eka Hosi Davhida.

7. I mani munhu wa le Bibeleni loyi hi nga ta dyondza hi yena sweswi?

⁷ Xana u tshame u twisiwa ku vava hi munghana kumbe xaka? Loko swi ri tano, ku dyondza hi leswi Hosi Davhida a swi endleke loko n’wana wakwe Absalomu a n’wi xenga hi xikongomelo xo lava ku n’wi tekela vuhosi, swi ta ku pfuna.—2 Sam. 15:5-14, 31; 18:6-14.

8. U fanele u endlaka yini loko u lava Yehovha a ku pfuna?

⁸ (1) Khongela. Loko munhu un’wana a ku twise ku vava, khongela u byela Yehovha ndlela leyi u titwaka hayona. (Ps. 6:6-9) N’wi byele hi ku kongoma leswi munhu wa kona a ku endleke swona. U tlhela u n’wi kombela a ku pfuna u kuma tsalwa leri nga ku pfunaka u teka xiboho lexinene.

9. U nga swi hlamusela njhani hi ku komisa leswi humeleleke exikarhi ka Davhida na Absalomu?

⁹ (2) Swi vone hi mahlo ya mianakanyo. Hi mahlo ya mianakanyo, vona leswi endlekeke ni ndlela leyi Hosi Davhida a a twa ku vava hayona. N’wana wakwe Absalomu u hete malembe  yo tala a ri karhi a wonga vanhu leswaku va n’wi rhandza. (2 Sam. 15:7) Loko a vona leswaku se wa rhandziwa, u rhumele tinhlori eIsrayele leswaku ti ya wonga vanhu leswaku va ta n’wi amukela tanihi hosi. U tlhele a yenga na Ahitofele, munghana lonkulu, tlhelo mutsundzuxi wa Davhida leswaku a n’wi joyina. Absalomu u tiendle hosi, a tlhela a ringeta ku dlaya Davhida loyi hi nkarhi wolowo a a vabya. (Ps. 41:1-9) Loko Davhida a twa mhaka yoleyo, u balekile eYerusalema. Eku heteleleni, ku tlhekeke nyimpi exikarhi ka masocha ya Absalomu ni ya Davhida. Masocha ya Absalomu ma hluriwile naswona Absalomu n’wana wa Davhida u dlayiwile.

10. Hosi Davhida a ta va a endle yini?

¹⁰ Ehleketa ndlela leyi Davhida a titweke hayona loko a langutane ni ndzingo wolowo. Phela a a n’wi rhandza ngopfu Absalomu naswona a a tshemba Ahitofele. Kambe va n’wi twise ku vava, va tlhela va ringeta ku n’wi dlaya. Davhida a a ta va a tshike ku tshemba vanghana vakwe lavan’wana hi ku ehleketa leswaku na vona va joyine Absalomu. A a ta va a lo tiehleketelela, a tlhela a baleka a ri yexe. Kumbexana a a ta va a hele matimba. Kambe a nga swi endlanga sweswo hinkwaswo. Kurinasweswo, u wu hlurile ndzingo wolowo. U pfuniwe hi yini?

11. Davhida u endle yini loko a langutane ni xiyimo xo tika?

¹¹ (3) Anakanyisisa. U dyondza yini emhakeni leyi? Hlamula xivutiso lexi, “I yini lexi pfuneke Davhida?” Davhida a a nga chuhanga naswona a nga tekanga swiboho hi magugu. Nakambe, a nga va nga na xinamu kumbe ku hela matimba. Ematshan’wini ya sweswo, u khongele eka Yehovha a kombela ku pfuniwa. U tlhele a kombela vanghana vakwe leswaku va n’wi pfuna. Hi ku hatlisa u tirhise switsundzuxo leswi a swi kumeke. Hambileswi Davhida a a vavisekile swinene emoyeni kambe a nga va nga na mahlundzu naswona a nga tshikanga ku tshemba van’wana. U ye emahlweni a tshemba Yehovha ni vanghana vakwe.

12. Yehovha u n’wi pfune njhani Davhida?

¹² Yehovha u n’wi pfune njhani Davhida? Loko u endla ndzavisiso, u ta swi vona leswaku Yehovha u nyike Davhida matimba yo kota ku tiyisela ndzingo. (Ps. 3:1-8; xingheniso) Yehovha u katekise swiboho swa Davhida. U tlhele a seketela vanghana va Davhida loko va ri karhi va lwela ku sirhelela hosi ya vona.

13. U nga n’wi tekelela njhani Davhida loko munhu un’wana a ku twise ku vava? (Matewu 18:15-17)

¹³ (4) Tirhisa leswi u swi dyondzaka. Tivutise, ‘Ndzi nga n’wi tekelela njhani Davhida?’ Loko u langutane ni xiphiqo u nga ha yimayimi namba u xi lulamisa. Loko swi koteka, tirhisa xitsundzuxo xa Yesu lexi nga eka Matewu ndzima 18. (Hlaya Matewu 18:15-17.) Kambe u nga teki swiboho hi ku hatlisa loko wa ha hlundzukile. Khongela u kombela Yehovha a ku pfuna u ehlisa moya ni ku ku pfuna u tiva leswi u nga swi endlaka. U nga tshiki ku tshemba vanghana va wena. Kurinasweswo, loko va ku pfuna swi amukele. (Swiv. 17:17) Xa nkoka swinene, landzela switsundzuxo leswi Yehovha a ku nyikaka swona hi ku tirhisa Rito rakwe.—Swiv. 3:5, 6.  

14. Timotiya wa Vumbirhi 1:12-16; 4:6-11, 17-22, yi nga ku pfuna loko u ri eka swiyimo swa njhani?

¹⁴ Xana u kanetiwa hi swirho swa ndyangu? Kumbe xana u tshama etikweni leri ntirho wa Yehovha wu yirisiweke? Loko swi ri tano, 2 Timotiya 1:12-16 na 4:6-11, 17-22 yi ta ku chavelela. * Pawulo u tsale Matsalwa lawa a ri ejele.

15. I yini leswi u nga swi kombelaka eka Yehovha?

¹⁵ (1) Khongela. Loko u nga si ma hlaya matsalwa lawa, byela Yehovha xiphiqo lexi u nga  na xona ni ndlela leyi u titwaka hayona. Swi boxe hi ku kongoma leswi ku karhataka. Kombela Yehovha a ku pfuna u twisisa ndlela leyi matsalwa lama vulavulaka hi miringo leyi Pawulo a a langutane na yona, ma nga ku pfunaka hayona u kota ku tiyisela miringo leyi u langutaneke na yona.

16. Hi ku komisa u nga xi hlamusela njhani xiyimo lexi Pawulo a a langutane na xona?

¹⁶ (2) Swi vone hi mahlo ya mianakanyo. Hi mahlo ya mianakanyo tivone u ri eka xiyimo lexi Pawulo a a ri eka xona. U boheleriwe hi tinketana ejele ra le Rhoma. A hi ro sungula a khomiwa kambe wa swi vona leswaku ri n’wi xele kambirhi u ta dlayiwa ku nga ri khale. Vanghana vakwe van’wana va balekile va n’wi siya naswona a nga ha koti nchumu.—2 Tim. 1:15.

17. Xana Pawulo a a ta va a endle yini?

¹⁷ Pawulo a a ta va a ehlekete hi swilo swa khale, a tibyela leswaku loko a a hlawule ntirho wun’wana, a ta va a nga ri ejele sweswi. A ta va a hlundzukele vanghana vakwe lava balekeke va n’wi siya exifundzheni xa Asiya naswona a ta va a tshike ku tshemba vanghana vakwe lavan’wana. Kambe Pawulo a nga swi endlanga sweswo hinkwaswo. Hikwalahokayini a nga tshikanga ku tshemba vanghana vakwe?

18. Pawulo u endle yini loko a langutane ni ndzingo?

¹⁸ (3) Anakanyisisa. Hlamula xivutiso lexi, “I yini lexi pfuneke Pawulo?” Hambiloko rifu se ri n’wi ahlamisele nomu, Pawulo a nga tshikanga ku vangamisa Yehovha hikuva sweswo hi swona leswi a swi ri swa nkoka eka yena. U ye emahlweni a ehleketa hi ndlela leyi a nga va khutazaka hayona van’wana. Nkarhi ni nkarhi a a khongela eka Yehovha. (2 Tim. 1:3) Ematshan’wini yo tshamela ku ehleketa hi vanghana vakwe lava balekeke va n’wi siya, a a ehleketa ngopfu hi vanghana vakwe lava n’wi seketeleke hi nkarhi wa mangava. Nakambe, a nga tshikanga ku hlaya Rito ra Xikwembu. (2 Tim. 3:16, 17; 4:13) Xa nkoka swinene, a a swi tiva leswaku Yehovha na Yesu va n’wi rhandza. A va n’wi fularhelanga naswona va ta n’wi katekisa hileswi a tshameke a tshembekile.

19. Yehovha u n’wi pfune njhani Pawulo?

¹⁹ Yehovha u lemukise Pawulo leswaku u ta langutana ni maxangu loko a va Mukreste. (Mit. 21:11-13) Yehovha u n’wi pfune njhani Pawulo? U hlamule swikhongelo swakwe naswona hi ku famba ka nkarhi u n’wi nyike matimba. (2 Tim. 4:17) Pawulo u byeriwe leswaku u ta hakeriwa hileswi a tirheke hi matimba. Yehovha u tlhele a tirhisa vanghana va Pawulo vo tshembeka leswaku va n’wi pfuna.

20. Hi ku ya hi Varhoma 8:38, 39, u nga n’wi tekelela njhani Pawulo?

²⁰ (4) Tirhisa leswi u swi dyondzaka. Tivutise, ‘Ndzi nga n’wi tekelela njhani Pawulo?’ Ku fana na Pawulo, hi fanele hi langutela ku xanisiwa hikwalaho ka ripfumelo ra hina. (Mar. 10:29, 30) Leswaku hi kota ku tshama hi tshembekile loko hi langutana ni ndzingo, hi fanele hi khongela eka Yehovha hi tlhela hi tinyika nkarhi wo dyondza Rito rakwe siku ni siku. Nakambe a hi fanelanga hi rivala leswaku xa nkoka evuton’wini bya hina, i ku vangamisa Yehovha. Ha tiyiseka leswaku Yehovha a nge pfuki a hi fularherile nileswaku a nge tshiki ku hi rhandza.—Hlaya Varhoma 8:38, 39; Hev. 13:5, 6.

21. I yini lexi pfuneke Aya na Hector va hlula mitlhontlho leyi a va langutane na yona?

²¹ Swi nga ri na mhaka leswaku hi langutana ni swiyimo swa njhani, ku dyondza hi vanhu lava ku vulavuriwaka hi vona eBibeleni swi ta hi pfuna swinene. Hi xikombiso, Aya loyi a nga phayona eJapan, u vula leswaku ku dyondza hi Yonasi swi n’wi pfunile leswaku a hlula ku chava ku chumayela endhawini ya mani na mani. Hector loyi a ha riki muntshwa naswona a tshamaka  eIndonesia, loyi vatswari vakwe va nga riki Timbhoni, u kote ku tirhela Yehovha hi ku tshembeka hikwalaho ko dyondza hi Rhuti.

22. Tidrama ta ku hlayiwa ka Bibele ni tinhlokomhaka leti nge “Tekelela Ripfumelo Ra Vona” ti nga ku pfuna njhani?

²² U nga ri kuma kwihi rungula leri vulavulaka hi vanhu va le Bibeleni leri nga ku pfunaka? Tivhidiyo ta hina ni tidrama leti ngo yingiseriwa kunene ni tinhlokomhaka leti nge, “Tekelela Ripfumelo Ra Vona” ti endla hi kota ku vona swiendlakalo leswi ku vulavuriwaka ha swona eBibeleni. * Loko u nga si hlalela, u nga si yingisela kumbe u nga si hlaya timhaka teto, kombela Yehovha a ku pfuna u vuyeriwa eka leswi u swi dyondzaka. Tivone u ri ximunhuhatwankulu lexi ku vulavuriwaka ha xona. Anakanyisisa hileswi malandza wolawo ya Yehovha ma swi endleke ni ndlela leyi Yehovha a ma pfuneke hayona ma hlula miringo. Endzhaku, ehleketa hi ndlela leyi u nga swi tirhisaka hayona leswi u swi dyondzaka. Khensa Yehovha hileswi a ku pfunaka. Khutaza u tlhela u seketela van’wana ku kombisa leswaku wa khensa leswi Yehovha a ku pfunaka.

23. Eka Esaya 41:10, 13, Yehovha u hi tshembisa yini?

²³ Emisaveni leyi yi lawuriwaka hi Sathana hi koka exilogweni, mikarhi yin’wana a hi swi tivi leswaku hi ta khoma kwihi hi tshika kwihi. (2 Tim. 3:1) Kambe a hi fanelanga hi karhateka kumbe ku chava. Yehovha wa ma vona maxangu lama hi langutanaka na wona. Loko hi langutana ni miringo, u vula leswaku u ta hi khoma swi tiya hi voko rakwe ra xinene. (Hlaya Esaya 41:10, 13.) Handle ko kanakana, hi ta swi kota ku hlula miringo hinkwayo leyi hi nga langutanaka na yona, hi ku pfuniwa hi Yehovha ni Rito rakwe.