1. Hi ku ya hi Matewu 24:9, hikwalahokayini hi nga fanelanga hi hlamala loko vanhu va hi venga?

YEHOVHA u hi vumbe hi rini xilaveko xa ku rhandza ni ku rhandziwa. Hikwalaho, loko vanhu va hi venga hi twa ku vava swinene. Hi xikombiso, makwerhu wa xisati Georgina loyi a tshamaka eYuropa, u ri: “Loko ndzi ri ni malembe ya 14, leswi manana a a ndzi vengisa xiswona hikwalaho ko tirhela Yehovha, a swi endla ndzi tivona ndzi nga rhandziwi naswona ndzi nga pfuni nchumu.” * Makwerhu Danylo, u ri: “Loko masocha ma ndzi bukutela ni ku ndzi rhuketela hileswi ndzi nga Mbhoni ya Yehovha, a ndzi hele matimba ni ku tivona ndzi nga pfuni nchumu.” Ku vengiwa hi ndlela yo tano, swa vava kambe a swi hi hlamarisi. Yesu u vule leswaku hi ta vengiwa.—Hlaya Matewu 24:9.

2-3. Hikwalahokayini valandzeri va Yesu va vengiwa?

² Valandzeri va Yesu va vengiwa swinene. Hikwalahokayini? Hikuva ku fana na Yesu, na hina a hi “xiphemu xa misava.” (Yoh. 15:17-19) Hambileswi hi xiximaka valawuri va tiko kambe a hi va gandzeli kumbe ku xixima swifaniso swa vona. Hi gandzela Yehovha ntsena. Ha swi tiva leswaku hi yena ntsena loyi a nga ni mfanelo yo fuma hambileswi Sathana ni “vana” vakwe va lwisanaka ni mafumelo ya yena. (Gen. 3:1-5, 15) Hi byela vanhu leswaku Mfumo wa Xikwembu hi wona ntsena lowu nga ta tisela vanhu ku rhula naswona ku nga ri khale wu ta herisa hinkwavo lava lwisanaka na wona. (Dan. 2:44; Nhlav. 19:19-21) Lawa i mahungu yo tsakisa eka vanhu lava titsongahataka kambe eka lavo homboloka ma bava.—Ps. 37:10, 11.

 ³ Xin’wana lexi endlaka hi vengiwa hileswi hi hanyaka hi milawu ya Xikwembu. Milawu leyi yi hambanile swinene ni milawu ya vanhu leyi hlohlotelaka manyala. Hi xikombiso, namuntlha vanhu vo tala va pasisa mahanyelo ya manyala yo fana ni lawa ma endleke leswaku Xikwembu xi lovisa muti wa Sodoma na Gomora. (Yuda 7) Leswi hi yingisaka milawu ya Bibele mayelana ni mahanyelo yo tano, vanhu vo tala va hi hlekula naswona va vula leswaku hi ni xihlawuhlawu!—1 Pet. 4:3, 4.

4. I yini lexi endlaka hi kota ku tiyisela loko vanhu va hi venga?

⁴ I yini lexi nga endlaka hi kota ku tiyisela loko vanhu va hi venga ni ku hi rhuketela? I ku va ni ripfumelo leri tiyeke ra leswaku Yehovha u ta hi pfuna. Ku fana ni xitlhangu, ripfumelo ra hina ri nga timela “miseve hinkwayo leyi pfurhaka ya lowo homboloka.” (Efe. 6:16) Nakambe hi fanele hi va ni rirhandzu. Hikwalahokayini? Hikuva rirhandzu “a ri hlundzuki.” Ri tiyisela swilo hinkwaswo swo vava. (1 Kor. 13:4-7, 13) Sweswi a hi voneni ndlela leyi ku rhandza Yehovha, vamakwerhu ni valala va hina swi nga hi pfunaka hayona hi kota ku tiyisela loko hi vengiwa.

5. Yesu u kote ku endla yini hileswi a a rhandza Tata wakwe?

⁵ Hi vusiku byakwe byo hetelela loko valala vakwe va nga si n’wi dlaya, Yesu u byele valandzeri vakwe a ku: “Ndzi endla hilaha Tatana a ndzi leriseke hakona [hikuva] ndza n’wi rhandza Tatana.” (Yoh. 14:31) Yesu u kote ku tiyisela maxangu hileswi a a rhandza Yehovha. Na hina loko hi rhandza Yehovha, hi ta swi kota ku tiyisela maxangu.

6. Hi ku ya hi Varhoma 5:3-5, malandza ya Yehovha ma titwa njhani loko ma vengiwa?

⁶ Malandza ya Yehovha ma kota ku tiyisela loko ma xanisiwa hileswi ma rhandzaka Yehovha Xikwembu xa wona. Hi xikombiso, loko huvo leyi tlakukeke ya Vayuda yi lerise vaapostola leswaku va tshika ku chumayela, leswi a va rhandza Xikwembu, va “[yingise] Xikwembu tanihi mufumi ku tlula vanhu.” (Mit. 5:29; 1 Yoh. 5:3) Rirhandzu ro tano, hi rona leri tiyisaka vamakwerhu lava xanisiwaka hi ndlela ya tihanyi namuntlha hi mifumo ya le matikweni ya ka vona. Loko vanhu va hi venga a hi heli matimba kambe hi swi teka ku ri nkateko.—Mit. 5:41; hlaya Varhoma 5:3-5.

7. Hi fanele hi endla yini loko swirho swa ndyangu swi hi kaneta?

⁷ Nchumu wun’wana lowu nga hi tikelaka swinene i ku kanetiwa hi swirho swa ndyangu. Loko hi sungula ku amukela ntiyiso, van’wana ekaya va nga vula leswaku hi humbiwe mano. Kasi van’wana va nga vula leswaku a ta ha khomi kahle. (Ringanisa Marka 3:21.) Va nga sungula ni ku hi xanisa hi ndlela ya tihanyi. Kambe leswi a swi fanelanga swi hi hlamarisa. Yesu u te: “Valala va munhu ku ta va vandyangu wa ka vona.” (Mat. 10:36) Swi nga ri na mhaka leswaku swirho swa mindyangu ya hina swi hi kaneta ku fikela kwihi kambe a hi swi teki tanihi valala va hina. Kurinasweswo, hi ta swi rhandza tanihi leswi hi rhandzaka Yehovha. (Mat. 22:37-39) Kambe lexi hi nga ta ka hi nga xi endli, i ku honisa milawu ya Yehovha hi xikongomelo xo lava ku tsakisa vanhu.

8-9. Makwerhu un’wana wa xisati u swi kote njhani ku tiyisela loko a kanetiwa?

⁸ Georgina loyi ku vulavuriweke hi yena eku sunguleni, u swi kotile ku tiyisela loko a kanetiwa hi mana wakwe. U ri: “Mina na manana hi sungule ku dyondza Bibele ni Timbhoni. Kambe endzhaku ka tin’hweti ta tsevu loko se ndzi lava ku sungula ku ya etinhlengeletanweni ta Timbhoni, manana u sungule ku cinca. Ndzi kume leswaku a a ri ni vanghana lava nga vagwinehi kutani loko a vulavula na mina a a tirhisa  leswi vanghana vakwe va n’wi byelaka swona. A a ndzi rhuketela, a ndzi tlurhula misisi, a ndzi tlimba nhamu a tlhela a lahla ni tibuku ta mina. Loko ndzi ri ni malembe ya 15, ndzi khuvuriwile. Manana u ringete ku ndzi tshikisa ku tirhela Yehovha hi ku ndzi teka a ya ndzi veka endhawini leyi ku tshamaka vantshwa, van’wana va vantshwa volavo a va dzaha swidzidziharisi naswona a va yiva. A ku na nchumu wo vava ku fana ni ku kanetiwa hi munhu loyi a a fanele a ku rhandza ni ku ku wundla.”

⁹ Georgina u swi kote njhani ku tiyisela? U ri: “Siku leri manana a sunguleke ku ndzi komba mavala ha rona, a ndza ha ku fika emakumu ni ku hlaya Bibele hinkwayo. Se a ndzi tiyiseka leswaku ndzi kume ntiyiso naswona a ndzi titwa ndzi ri ni vuxaka lebyinene na Yehovha. A ndzi tshamela ku khongela naswona Yehovha a a swi yingisa swikhongelo swa mina. Loko ndza ha tshama endhawini leyi a ku tshama vantshwa, makwerhu un’wana wa xisati u ndzi komberile leswaku ndzi ya tshama na yena ekaya rakwe naswona a hi dyondza swin’we Bibele. Loko ndzi ri eHolweni, vamakwerhu va ndzi tiyisile. Va endle ndzi titwa ndzi ri xirho xa mindyangu ya vona. Ndzi swi vonile leswaku Yehovha u ni matimba lamakulu ku tlula vanhu lava hi kanetaka, swi nga ri na mhaka leswaku i vamani.”

10. I yini leswi hi nga tiyisekaka hi swona mayelana na Yehovha Xikwembu xa hina?

¹⁰ Muapostola Pawulo u vule leswaku a xi kona lexi nga “hi [hambanisaka] ni rirhandzu ra Xikwembu leri xi hi kombiseke rona ha Kreste Yesu Hosi ya hina.” (Rhom. 8:38, 39) Hambileswi hi nga xanisekaka swa nkarhinyana kambe mikarhi hinkwayo Yehovha u na hina naswona wa hi chavelela ni ku hi tiyisa. Hilaha hi swi voneke hakona eka Georgina, Yehovha u tlhela a hi pfuna hi ku tirhisa vamakwerhu.

11. Rirhandzu leri Yesu a vulavuleke hi rona eka Yohane 15:12, 13, a ri ta va pfuna njhani vadyondzisiwa vakwe? Kombisa.

¹¹ Loko Yesu a nga si dlayiwa, hi vusiku byakwe byo hetelela u byele vadyondzisiwa vakwe leswaku va rhandzana. (Hlaya Yohane 15:12, 13.) A a swi tiva leswaku loko va rhandzana va ta va ni vun’we naswona a swi ta va pfuna va kota ku tiyisela loko va vengiwa. Tsundzuka vandlha ra le Tesalonika. Loko ra ha ku simekiwa, swirho swa vandlha rero swi xanisiwile. Kambe vamakwerhu evandlheni rero, va kote ku tiyisela hileswi a va rhandzana. (1 Tes. 1:3, 6, 7) Pawulo u va khutazile leswaku va ya emahlweni va rhandzana “hilaha ku engetelekeke.” (1 Tes. 4: 9, 10) Loko va rhandzana, a va ta kota ku chavelela ni ku seketela lava tsaneke. (1 Tes. 5:14) Va xi yingisile xikhutazo xa Pawulo hikuva eka papila rakwe ra vumbirhi leri a ri tsaleke endzhaku ka kwalomu ka lembe, u te: “Ndlela leyi mi rhandzanaka hayona ya kula.” (2 Tes. 1:3-5) Leswi a va rhandzana, va kote ku tiyisela loko va xanisiwa.

12. Vamakwerhu va le tikweni rin’wana va swi kombise njhani leswaku va rhandzana hi nkarhi lowu a ku ri ni nyimpi?

¹² Twana leswi humeleke Danylo loyi ku vulavuriweke hi yena eku sunguleni ni nghamu yakwe. Loko edorobeni ra ka vona ku tlhekeke nyimpi, a va tshikanga ku ya etinhlengeletanweni ta vandlha ni ku chumayela hilaha va nga kotaka hakona naswona va ye emahlweni va avelana swakudya ni vamakwerhu lava pfumalaka. Siku rin’wana Danylo u teriwe hi masocha lawa a ma hlomile. Danylo u ri: “Ma ndzi sindzise ku tshika ku va Mbhoni. Loko ndzi ala, ma ndzi himeterile ma tlhela ma ndzi xungeta hi xibamu ma duvula emoyeni maqulu ma hundza ehenhla ka nhloko ya mina. Loko ma nga si famba, ma xungete ku jika ma ta pfinya nghamu ya mina. Kambe hi ku hatlisa vamakwerhu va hi khandziyise xitimela va hi yisa edorobeni rin’wana. A ndzi nge ri rivali rirhandzu ronghasi leri va hi kombeke rona. Loko hi fika edorobeni rero, vamakwerhu va kwalaho va hi nyike swakudya va tlhela va ndzi pfuna ndzi kuma ntirho ni xitandi! Sweswo swi endle hi kota ku rhurhela vamakwerhu van’wana lava a va baleka nyimpi.” Leswi hinkwaswo, swi kombisa leswaku loko hi rhandzana, hi ta swi kota ku tiyisela loko hi vengiwa.

13. Moya wo kwetsima wu hi pfuna njhani leswaku hi kota ku tiyisela entirhweni wa Yehovha hambiloko vanhu va hi venga?

¹³ Yesu u byele valandzeri vakwe leswaku va rhandza valala va vona. (Mat. 5:44, 45) Xana swa olova ku endla tano? Nikatsongo! Kambe moya wo kwetsima wa Xikwembu wu nga hi pfuna hi kota ku endla tano. Phela mihandzu ya moya wo kwetsima, yi katsa rirhandzu, ku lehisa mbilu, vunene, ku olova ni ku tikhoma. (Gal. 5:22, 23) Mihandzu leyi ya hi pfuna leswaku hi kota ku tiyisela loko hi vengiwa. Vo tala lava a va hi kaneta va hundzukile hikwalaho ka matikhomelo lamanene ya vanuna, vasati, vana kumbe vaakelani va vona lava nga Timbhoni. Vunyingi bya vona sweswi hi vulavulaka se i vamakwerhu. Loko swi ku tikela ku  rhandza vanhu lava ku vengaka hileswi u tirhelaka Yehovha, khongela u kombela moya wo kwetsima. (Luka 11:13) Tiyiseka leswaku mikarhi hinkwayo ku endla swilo hi ndlela ya Xikwembu swa pfuna swinene.—Swiv. 3:5-7.

14-15. Varhoma 12:17-21, yi n’wi pfune njhani Yasmeen leswaku a ya emahlweni a rhandza nuna wakwe hambiloko a n’wi kaneta?

¹⁴ Twana hi ta Yasmeen, loyi a tshamaka eMiddle East. Loko a va Mbhoni ya Yehovha, nuna wakwe a a ehleketa leswaku u humbiwe mano naswona u ringete ku n’wi tshikisa ku tirhela Xikwembu. U n’wi phyandlasele nhlambha a tlhela a kucetela maxaka ni mufundhisi ni noyi leswaku va n’wi chavisa ni ku n’wi byela leswaku leswi a swi endlaka swi ta n’wi dlayela muti. Nuna wakwe u kale a rhuketela ni vamakwerhu loko va ri enhlengeletanweni ya vandlha! Yasmeen a a rila yi oma siku ni siku hileswi a a cinisiwa rhuvurhuvu.

¹⁵ Loko Yasmeen a ri etinhlengeletanweni ta vandlha, vamakwavo a va n’wi chavelela ni ku n’wi tiyisa. Vakulu va n’wi tsundzuxe leswaku a tirhisa xitsundzuxo lexi nga eka Varhoma 12:17-21. (Hlaya.) Yasmeen u ri: “A swi tika. Kambe ndzi kombele Yehovha leswaku a ndzi pfuna ni ku tlhela ndzi hanya hi leswi Bibele yi swi dyondzisaka. Loko nuna wa mina a thyakisa ekhixini hi vomu, a ndzi ri basisa ri ku paa! Loko a ndzi rhuketela, a ndzi n’wi hlamula hi ndlela ya xichavo. Loko a vabya, a ndzi n’wi khathalela.”

16-17. U dyondza yini eka Yasmeen?

¹⁶ Yasmeen u kume mikateko hileswi a nga tshikangiki ku rhandza nuna wakwe. U ri: “Nuna wa mina u sungule ku ndzi tshemba ngopfu hileswi mikarhi hinkwayo a ndzi vulavula ntiyiso. U sungule ku ndzi yingisa hi xichavo loko ndzi vulavula na yena hi ta vukhongeri naswona u teke xiboho xo kondletela ku rhula ekaya. Sweswi wa tsaka loko ndzi ya etinhlengeletanweni ta vandlha. Swilo se swi famba kahle endyangwini wa hina naswona hi tsakile. Ndzi navela onge siku rin’wana a nga amukela ntiyiso kutani a ndzi joyina hi gandzela Yehovha swin’we.”

¹⁷ Yasmeen u swi kombise kahle leswaku rirhandzu ‘ri tiyisela swilo hinkwaswo naswona ri tshemba swilo hinkwaswo.’ (1 Kor. 13:4, 7) Rirhandzu ri ni matimba ku tlula rivengo. Ri nga endla leswaku vanhu lava hi vengaka va cinca langutelo ra vona. Hi hala tlhelo, ri endla Yehovha a tsaka. Kambe hi nga tsaka hambiloko vanhu lava hi kanetaka va nga tshiki ku hi venga. Njhani?

18. Hikwalahokayini hi tsaka hambiloko hi vengiwa?

¹⁸ Yesu u te: “Tsakani loko vanhu va mi venga.” (Luka 6:22) A ho tihlawulela ku vengiwa. A swi hi tsakisi ku xanisiwa hikwalaho ka ripfumelo ra hina. Hikwalahokayini hi tsaka loko vanhu va hi venga? Twana swivangelo swinharhu leswi endlaka hi tsaka. Xo sungula, loko hi tiyisela hi tsakisa Xikwembu. (1 Pet. 4:13, 14) Xa vumbirhi, ripfumelo ra hina ra tiya. (1 Pet. 1:7) Xa vunharhu, hi ta kuma nkateko lowu nga pimanisiwiki na nchumu, ku nga ku hanya hilaha ku nga heriki.—Rhom. 2:6, 7.

19. Hikwalahokayini vaapostola a va tsakile endzhaku ka loko va himeteriwile?

¹⁹ Endzhakunyana ka loko Yesu a pfuxiwile, vaapostola va himeteriwile kutani va lerisiwa ku tshika ku chumayela. Hambiswiritano, va ve lava tsakeke hilaha Yesu a vuleke hakona. Hikwalahokayini? “Hikuva a va tekiwa va faneriwa hi ku xaniseka hikwalaho ka vito ra Yesu.” (Mit. 5:40-42) A va rhandza N’wini wa vona ngopfu ku tlula ku chava ku vengiwa hi valala. Va kombise leswaku va rhandza N’wini wa vona hi ku ka va nga “tshiki” ku chumayela mahungu lamanene. Ninamuntlha vamakwerhu vo tala va ya emahlweni va tirhela Yehovha, ku nga khathariseki swiyimo swo tika leswi va hlangavetanaka na swona. Va swi tiva leswaku Yehovha a nge wu rivali ntirho ni rirhandzu leri va ri kombiseke hikwalaho ka vito rakwe.—Hev. 6:10.

20. Hi ta bula hi yini eka nhlokomhaka leyi landzelaka?

²⁰ Loko ha ha rindzele makumu, vanhu va ta ya emahlweni va hi venga. (Yoh. 15:19) Kambe sweswo a swi fanelanga swi hi chavisa. Hilaha hi nga ta swi vonaka hakona eka nhlokomhaka leyi landzelaka, Yehovha u ta ‘tiyisa ni ku sirhelela’ malandza yakwe yo tshembeka. (2 Tes. 3:3) Hikwalaho, a hi yeni emahlweni hi rhandza Yehovha, vamakwerhu swin’we ni valala va hina. Loko hi endla tano, hi ta va ni vun’we, ripfumelo ra hina ri ta tiya, hi ta endla leswaku Yehovha a vangamisiwa ni ku kombisa leswaku rirhandzu ri ni matimba ku tlula rivengo.