1. Hikwalahokayini Yesu a kombele Yehovha leswaku a sirhelela vadyondzisiwa vakwe?

HI VUSIKU byakwe byo hetelela a nga si dlayiwa, Yesu a a ehleketa hi mitlhontlho leyi vadyondzisiwa vakwe a va ta langutana na yona. Leswi a a va rhandza ngopfu, u kombele Tata wakwe leswaku a va “sirhelela eka lowo homboloka.” (Yoh. 17:14, 15) A a swi tiva leswaku loko se a ta va a tlhelele etilweni, Sathana Diyavulosi a a ta ya emahlweni a hlasela vanhu lava lavaka ku tirhela Yehovha. Swi le rivaleni leswaku vanhu va Yehovha a va ta lava ku sirheleriwa.

2. Hi nga tiyiseka njhani leswaku Yehovha u ta swi hlamula swikhongelo swa hina?

² Yehovha u hlamule xikhongelo xa N’wana wakwe Yesu hileswi a N’wi rhandzaka. Na hina loko hi tikarhatela ku N’wi tsakisa, u ta hi rhandza naswona u ta swi hlamula swikhongelo swa hina loko hi n’wi kombela leswaku a hi sirhelela. Leswi a nga nhloko ya ndyangu leyi khathalaka, a nge tshiki ku sirhelela vana vakwe. Vito rakwe ri nga thyaka loko o ka a nga va sirheleli!

3. Hikwalahokayini namuntlha hi lava leswaku Yehovha a hi sirhelela?

³ Namuntlha hi lava ku sirheleriwa hi Yehovha ku tlula rini na rini. Sathana u caciwe etilweni, “a hlundzukile swinene.” (Nhlav. 12:12) U khorwise vanhu van’wana lava hi xanisaka leswaku loko va hi xanisa va endlela “Xikwembu ntirho wo kwetsima.” (Yoh. 16:2) Lava nga pfumeriki eka Xikwembu, va hi xanisa hileswi mahanyelo ya hina ma hambaneke ni ya vanhu lava nga dyondzisiwiki hi Yehovha. Ku nga khathariseki xivangelo xa kona, a hi va chavi nikatsongo! Hikwalahokayini? Rito ra Xikwembu ri ri: “Hosi ya tshembeka, yi ta mi tiyisa ni ku mi sirhelela eka lowo homboloka.” (2 Tes. 3:3) Xana Yehovha u hi sirhelela njhani? A hi buleni hi tindlela timbirhi.

4. Hi ku ya hi Vaefesa 6:13-17, Yehovha u hi nyike yini leswi nga ta hi sirhelela?

⁴ Yehovha u hi nyike swiambalo swa nyimpi leswi nga ta hi sirhelela loko Sathana a hi hlasela. (Hlaya Vaefesa 6:13-17.) Swiambalo swo tisirhelela enyimpini leswi hi nyikiweke swona swi tiyile naswona swa pfuna swinene! Kambe leswaku hi ta tshama hi sirhelelekile, hi fanele hi swi ambala hinkwaswo. Xana xiambalo ha xin’we xi yimela yini? A hi buleni hi mhaka leyi.    

5. I yini bandhi ra ntiyiso naswona hikwalahokayini hi fanele hi ri boha?

⁵ Bandhi ra ntiyiso ri yimela ntiyiso lowu nga eRitweni ra Xikwembu, ku nga Bibele. Hikwalahokayini hi fanele hi boha bandhi leri? Hikuva Sathana i “tata wa mavunwa.” (Yoh. 8:44) Se i khale swinene a ri karhi a hemba naswona u hambukise “misava hinkwayo”! (Nhlav. 12:9) Ntiyiso lowu nga eBibeleni wa hi sirhelela leswaku hi nga hambukisiwi. Xana hi ri boha njhani bandhi leri ro fanekisela? Hi endla tano hi ku dyondza ntiyiso hi Yehovha, hi ku n’wi gandzela hi “moya ni ntiyiso” ni hi ku tikhoma hi ku tshembeka eka swilo hinkwaswo.—Yoh. 4:24; Efe. 4:25; Hev. 13:18.

6. I yini xisirhelelo xa xifuva xa ku lulama naswona hikwalahokayini hi fanele hi xi ambala?

⁶ Xisirhelelo xa xifuva xa ku lulama xi yimela milawu yo lulama ya Yehovha. Hikwalahokayini hi fanele hi ambala xisirhelelo xa xifuva? Xisirhelelo xa xifuva xa xiviri xi sirhelela mbilu ya socha leswaku yi nga tlhaviwi, hilaha ku fanaka, xisirhelelo xa xifuva xa ku lulama xi sirhelela mbilu ya hina yo fanekisela leswaku yi nga thyakisiwi hi moya wo biha wa misava leyi. (Swiv. 4:23) Yehovha u lava leswaku hi n’wi rhandza ni ku n’wi tirhela hi mbilu hinkwayo. (Mat. 22:36, 37) Kambe Sathana u ringeta ku ava mbilu ya hina hi ku hi endla hi rhandza swilo swa misava leyi, ku nga swilo leswi Yehovha a swi nyenyaka. (Yak. 4:4; 1 Yoh. 2:15, 16) Loko rhengu leri ri nga tirhi, u ringeta ku hi xanisa hi tindlela tin’wana leswaku hi ta tlula milawu ya Yehovha.

7. Hi xi ambala njhani xisirhelelo xa xifuva xa ku lulama?

⁷ Hi ambala xisirhelelo xa xifuva xa ku lulama hi ku amukela milawu ya Yehovha ya leswinene ni leswo biha ni hi ku tlhela hi hanya hi yona. (Ps. 97:10) Van’wana va vona onge milawu ya Yehovha yi hi tsona tshunxeko. Kambe loko ho tshika ku hanya hi milawu ya Yehovha leyi nga eBibeleni, hi ta fana ni socha leri hluvulaka xisirhelelo xa xifuva laha nyimpi se yi hisaka kona ri vula leswaku xa tika. Sweswo ku ta va ku ri vuphukuphuku! Vanhu lava rhandzaka Yehovha a va teki milawu yakwe tanihi leyi ‘tikaka’ kambe va yi teka tanihi leyi va sirhelelaka.—1 Yoh. 5:3.

8. Swi vula yini ku ambala maphaxani yo chumayela mahungu lamanene?

⁸ Pawulo u tlhela a hi khutaza leswaku hi ambala maphaxani yo chumayela mahungu lamanene ya ku rhula. Hi marito man’wana, hi fanele hi tshama hi lunghekele ku chumayela mahungu lamanene ya Mfumo wa Xikwembu. Loko hi chumayela van’wana, ripfumelo ra hina ra tiya. Swa khutaza hakunene ku vona ndlela leyi vanhu va Yehovha va wu hisekelaka hayona ntirho wo chumayela mahungu lamanene. Hi xikombiso, va chumayela loko va ri entirhweni, exikolweni, eswitolo, hi yindlu ni yindlu, loko va endzela maxaka lama nga riki Timbhoni, loko va hlangana ni vanhu ni loko va nga swi koti ku huma emakaya a va tshiki ku chumayela. Loko ho tshika ku chumayela hikwalaho ko chavisiwa, hi ta fana ni socha leri hluvulaka maphaxani enyimpini naswona mikondzo ya rona yi ta vaviseka hi ku olova. Hikwalaho, swi ta ri tikela ku tisirhelela loko ri hlaseriwa naswona a ri nge swi koti ku yingisa swileriso swa murhangeri wa rona.

9. Hikwalahokayini hi fanele hi rhwala xitlhangu lexikulu xa ripfumelo?

 ⁹ Xitlhangu lexikulu xa ripfumelo xi yimela ripfumelo leri hi nga na rona eka Yehovha. Ha tiyiseka leswaku u ta swi endla hinkwaswo leswi a hi tshembiseke swona. Ripfumelo rero ri ta hi pfuna hi kota ku “timela . . . miseve hinkwayo leyi pfurhaka ya lowo homboloka.” Hikwalahokayini hi fanele hi rhwala xitlhangu lexi lexikulu xa ripfumelo? Hikuva xa hi sirhelela leswaku hi nga hambukisiwi hi tidyondzo ta vagwinehi kumbe hi nga heli matimba loko vanhu va hi poyila hikwalaho ka ripfumelo ra hina. Loko a hi nga ri na ripfumelo, a hi nga ta swi kota ku yima hi tiyile loko van’wana va hi kucetela leswaku hi tlula milawu ya Yehovha. Nkarhi ni nkarhi loko hi yima hi tiyile entirhweni kumbe exikolweni loko hi kuceteriwa leswaku hi tlula milawu ya Yehovha, xitlhangu xa hina, ku nga ripfumelo xa hi sirhelela. (1 Pet. 3:15) Loko hi ala ku amukela ntirho lowu holelaka swi nyawula hileswi wu nga ta endla hi nga swi koti kahle ku tirhela Yehovha, xitlhangu xa hina, ku nga ripfumelo xa hi sirhelela. (Hev. 13:5, 6) Nakambe loko hi wa hi pfuka leswaku hi tirhela Yehovha hambiloko hi kanetiwa, xitlhangu xa hina xa ripfumelo xa hi sirhelela.—1 Tes. 2:2.

10. I yini xihuku xa ku ponisa naswona hikwalahokayini hi fanele hi xi ambala?

 ¹⁰ Xihuku xa ku ponisa i ntshembo lowu Yehovha a hi nyikeke wona, ku nga ntshembo wa leswaku u ta hi ponisa eka rifu nileswaku vanhu hinkwavo lava endlaka ku rhandza ka yena u ta va hakela. (1 Tes. 5:8; 1 Tim. 4:10; Tito 1:1, 2) Xihuku xa xiviri xi sirhelela nhloko ya socha, hilaha ku fanaka, ntshembo lowu hi nga na wona wa ku ponisiwa wa hi sirhelela leswaku hi nga ehleketi swilo swo biha. Hi ndlela yihi? Wu endla hi dzikisa miehleketo ya hina eka leswi Xikwembu xi hi tshembisaka swona, wu tlhela wu endla leswaku hi nga karhateki ku tlula mpimo loko hi langutana ni swiphiqo. Hi xi ambala njhani xihuku lexi? Hi endla tano hi ku ehleketa hi swilo leswi fambisanaka ni ku rhandza ka Xikwembu. Hi xikombiso, hi veka ntshembo wa hina eka Xikwembu, ku nga ri eka rifuwo.—Ps. 26:2; 104:34; 1 Tim. 6:17.

11. I yini banga ra moya naswona hikwalahokayini hi fanele hi ri tirhisa?

¹¹ Banga ra moya i Rito ra Xikwembu, ku nga Bibele. Banga leri ri ni matimba yo heta vukanganyisi hinkwabyo ni yo tshunxa vanhu evuhlongeni bya tidyondzo ta mavunwa ni le ka mikhuva yo biha. (2 Kor. 10:4, 5; 2 Tim. 3:16, 17; Hev. 4:12) Dyondzo ya munhu hi yexe ni ndzetelo lowu hi wu kumaka eka nhlangano wa Xikwembu swi ta hi pfuna hi kota ku ri tirhisa kahle banga leri. (2 Tim. 2:15) Ku engetela eka swiambalo swa nyimpi leswi nga ta hi sirhelela, Yehovha u tlhela a hi sirhelela hi ndlela yin’wana. Hi yihi ndlela ya kona?

12. I yini swin’wana leswi hi swi lavaka naswona hikwalahokayini?

¹² Socha leri nga ni ntokoto ra swi tiva leswaku a ri nge swi koti ku hlula vuthu lerikulu ra valala ri ri roxe, ri lava ku pfuniwa hi masochakulobye. Hilaha ku fanaka, a hi nge swi koti ku hlula Sathana ni valandzeri vakwe hi ri hexe, hi lava ku seketeriwa hi vamakwerhu. Hikwalaho, Yehovha u hi nyike “vamakwerhu” emisaveni hinkwayo lava tiyimiseleke ku hi pfuna.—1 Pet. 2:17.

13. Hi ku ya hi Vaheveru 10:24, 25, hi vuyeriwa njhani loko hi va kona etinhlengeletanweni ta vandlha?

¹³ Loko hi va kona etinhlengeletanweni ta vandlha, vamakwerhu va ta hi seketela. (Hlaya Vaheveru 10:24, 25.) Leswi hinkwerhu hi pfaka hi titwa hi hele matimba, loko sweswo swi endleka, hi ta phyuphya loko hi ya etinhlengeletanweni ta vandlha. Tinhlamulo ta vamakwerhu ti ta hi chavelela. Mivulavulo ni mimbulavurisano leyi vaka kona swi ta hi hlohlotela ku ya emahlweni hi tirhela Yehovha. Nakambe ha tiyisana hi mabulo lawa hi vaka na wona loko nhlengeletano yi nga si sungula ni loko se yi herile. (1 Tes. 5:14) Xin’wana, tinhlengeletano ta vandlha ti hi nyika nkarhi wo pfuna van’wana, ku nga swilo leswi endlaka hi tsaka. (Mit. 20:35; Rhom. 1:11, 12) Tinhlengeletano leti ti tlhela ti hi pfuna ni hi tindlela tin’wana. Ta hi hlomisa leswaku hi va vachumayeri lava nga ni vutshila. Hi xikombiso, hi dyondzisiwa ndlela yo yi tirhisa kahle mikandziyiso leyi nga eka Switirhisiwa Swo Pfuna Ku Dyondzisa. Hikwalaho, lunghiselela kahle loko u ya etinhlengeletanweni ta vandlha. Loko ku ri karhi ku dyondziwa, rhiya ndleve. Endzhaku ka nhlengeletano, tikarhatele ku tirhisa leswi u swi dyondzeke. Loko u endla tano, u ta va “socha lerinene ra Kreste Yesu.”—2 Tim. 2:3.

14. I yini swin’wana leswi hi pfunaka?

¹⁴ Ku ni tintsumi ta ntsandzavahlayi leti nga ni matimba lamakulu leti hi pfunaka. Ntsumi yin’we ntsena, yi nga endla swilo swo hlamarisa swinene! (Esa. 37:36) Loko ntsumi yin’we yi kota ku endla swilo swo hlamarisa, ehleketa hi leswi ti nga swi endlaka loko se ti hlanganile ti ri ntlawa. A ku na munhu kumbe dimona ni  rin’we leri nga hlulaka tintsumi ta Yehovha. Loko Yehovha a ri na hina, hi ta swi kota ku hlula valala swi nga ri na mhaka leswaku va tale ku fikela kwihi. (Vaav. 6:16) Ha tiyiseka hi mhaka leyi! Mikarhi hinkwayo, loko u xanisiwa entirhweni, exikolweni kumbe hi maxaka lama nga riki Timbhoni, tsundzuka leswaku a wu wexe. Yehovha u ta ku sirhelela.

15. Hi ku ya hi Esaya 54:15, 17, i yini lexi endlaka swi nga koteki ku tshikisa vanhu va Xikwembu ntirho wa vona?

¹⁵ Ku ni swivangelo swo tala leswi endlaka vanhu lava lawuriwaka hi Sathana va hi venga. A hi ngheneleli eka swa tipolitiki naswona a hi katseki etinyimpini. Hi tivisa vanhu vito ra Xikwembu, hi va byela leswaku Mfumo wa xona hi wona ntsena lowu nga ta tlhantlha swiphiqo hinkwaswo leswi nga kona nakambe hi hanya hi milawu ya xona. Hi paluxa mufumi wa misava leyi leswaku i muhembi ni mudlayi loyi a nga ni lunya. (Yoh. 8:44) Nakambe hi byela vanhu leswaku Sathana u ta lovisiwa ku nga ri khale. Hambi loko Sathana ni valandzeri vakwe vo endla yini na yini, a ve nge hi tshikisi ku endla leswi. Hi ta ya emahlweni hi vangamisa Yehovha hilaha hi nga kotaka hakona! Hambileswi Sathana a nga ni matimba, u tsandzekile ku endla leswaku vanhu va misava leyi va nga fikeleriwi hi mahungu lamanene ya Mfumo wa Xikwembu. Hi kota ku endla swilo leswi hinkwaswo hikwalaho ko sirheleriwa hi Yehovha.—Hlaya Esaya 54:15, 17.

16. Yehovha u ta va ponisa njhani vanhu vakwe hi nkarhi wa nhlomulo lowukulu?

¹⁶ I yini leswi nga ta endleka enkarhini lowu taka? Hi nkarhi wa nhlomulo lowukulu, Yehovha u ta hi ponisa hi ku tirhisa tindlela timbirhi. Yo sungula, u ta ponisa malandza yakwe yo tshembeka hi nkarhi lowu a nga ta endla leswaku tihosi ta misava ti lovisa Babilona Lonkulu, ku nga mana wa vukhongeri hinkwabyo bya mavunwa. (Nhlav. 17:16-18; 18:2, 4) Ya vumbirhi, u ta ponisa vanhu vakwe loko a lovisa xiphemu xo hetelela xa misava leyi lawuriwaka hi Sathana eArmagedoni.—Nhlav. 7:9, 10; 16:14, 16.

17. Hi vuyeriwa njhani hi ku tshama hi ri ni vuxaka lebyinene na Yehovha?

¹⁷ Loko hi tshama hi ri ni vuxaka lebyinene na Yehovha, Sathana a nge swi koti ku hi vavisa hilaha ku nga heriki. Kambe hi yena loyi a nga ta loviseriwa makumu. (Rhom. 16:20) Hikwalaho, tshama u ambale swiambalo hinkwaswo swa nyimpi swo tisirhelela, u nga swi hluvuli! U nga ringeti ku lwa nyimpi u ri wexe. Seketela vamakwenu. Nakambe, landzela nkongomiso lowu Yehovha a ku nyikaka wona. Loko u endla tano, Tata wa wena wa le tilweni u ta ku tiyisa a tlhela a ku sirhelela.—Esa. 41:10.