NHLOKOMHAKA LEYI DYONDZIWAKA YA VU 10
Hikwalahokayini U Fanele U Khuvuriwa?
“Un’wana ni un’wana wa n’wina a a khuvuriwe.”—MIT. 2:38.
RISIMU 34 Ku Famba Hi Ku Tshembeka
LESWI HI NGA TA SWI DYONDZA a
1-2. I yini leswi endlekaka mikarhi yo tala loko vanhu va khuvuriwa naswona u fanele u kambisisa yini?
XANA u tshame u vona vanhu lava yaka eku khuvuriweni? Loko va ri karhi va hlamula swivutiso swimbirhi va nga si khuvuriwa, swa twala leswaku va tiyiseka hi xiboho xa vona. Maxaka ni vanghana a va ha tikoti hi ntsako. Loko va huma ematini, u twa vanhu va phokotela naswona va tsakile. Hi xiringanyeto, vhiki na vhiki vanhu va magidi va tinyiketela kutani va khuvuriwa va va Timbhoni ta Yehovha Xikwembu.
2 Wena ke? Loko ku ve u ehleketa hi ku khuvuriwa, u hambanile ni misava leyi yo homboloka hileswi u “lavaka Yehovha.” (Ps. 14:1, 2) Swi nga ri na mhaka leswaku u kurile kumbe wa ha ri ntsongo, nhlokomhaka leyi yi vulavula na wena. Kambe na hina lava se hi khuvuriweke hi lava ku ya emahlweni hi tiyimisela ku tirhela Yehovha hilaha ku nga heriki. Ku ni swivangelo swo tala leswi endlaka hi tirhela Yehovha kambe sweswi hi ta kambisisa swinharhu ntsena.
U RHANDZA NTIYISO NI LESWI NGA SWINENE
Se swi endla malembe ya magidi Sathana a ri karhi a onha vito lerinene ra Yehovha naswona wa ha ya emahlweni a endla tano (Vona tindzimana 3-4)
3. Hikwalahokayini malandza ya Yehovha ma rhandza ntiyiso ni leswi lulameke? (Pisalema 119:128, 163)
3 Yehovha u lerise vanhu vakwe leswaku va ‘rhandza ntiyiso.’ (Zak. 8:19) Yesu u khutaze valandzeri vakwe leswaku va endla leswo lulama. (Mat. 5:6) Leswi swi vula leswaku munhu u fanele a swi lava hi mbilu hinkwayo ku endla leswinene ni leswi tengeke ematihlweni ya Xikwembu. Xana wa wu rhandza ntiyiso ni leswi lulameke? Ha tshemba leswaku wa swi rhandza. U venga mavunwa ni swilo hinkwaswo swo biha. (Hlaya Pisalema 119:128, 163.) Mavunwa na Sathana mufumi wa misava leyi i bandhi na buruku. (Yoh. 8:44; 12:31) Mikarhi hinkwayo Sathana u lava ku thyakisa vito ro kwetsima ra Yehovha Xikwembu. Ku sukela loko vanhu va xandzukile eEdeni, Sathana u hangalasa mavunwa hi Xikwembu xa hina. U vula leswaku Yehovha i Mufumi loyi a nga riki na mhaka ni vanhu, a nga tshembeki naswona wa tsonana. (Gen. 3:1, 4, 5) Ku ta fikela namuntlha Sathana u ya emahlweni a hembela Yehovha naswona vanhu va n’wi tshemba. Loko vanhu va hlawula ku nga wu ‘rhandzi ntiyiso,’ Sathana u endla leswaku va endla swilo hinkwaswo swo homboloka ni ku tikhoma ku biha.—Rhom. 1:25-31.
4. Yehovha u swi kombise njhani leswaku i “Xikwembu xa ntiyiso”? (Nakambe vona xifaniso.)
4 Yehovha i “Xikwembu xa ntiyiso” naswona u dyondzisa lava n’wi rhandzaka ntiyiso. (Ps. 31:5) Hi ku endla tano, wa va tlharihisa ni ku va tshunxa eka mavunwa ya Sathana. Nakambe Yehovha u dyondzisa malandza yakwe leswaku ma tshembeka nileswaku ma va lama lulameke. Hikwalaho ka sweswo, ma xiximeka naswona ma ni ku rhula. (Swiv. 13:5, 6) Xana u swi endlile leswi eka wena loko u ri karhi u dyondza Bibele? U dyondze leswaku tindlela ta Yehovha ti pfuna vanhu hinkwavo ku katsa na wena. (Ps. 77:13) Hikwalaho u lava ku endla leswi Xikwembu xi nge swi lulamile. (Mat. 6:33) U lava ku yimela ntiyiso ni ku kombisa leswaku leswi Sathana a swi vuleke hi Xikwembu xa hina Yehovha i mavunwa. U nga swi endlisa ku yini sweswo?
5. U nga swi kombisa njhani leswaku u rhandza ntiyiso ni leswo lulama?
5 U nga hlawula ku hanya hi ndlela leyi nge: “Ndzi bakanya mavunwa ya Sathana naswona ndzi yima na ntiyiso. Ndzi lava ku fumiwa hi Yehovha naswona ndzi lava ku endla leswi a nge i swinene.” U swi kombisa njhani sweswo? Khongela eka Yehovha ivi u tinyiketela eka yena ni ku tlhela u kombisa vanhu leswaku u tinyiketerile hi ku khuvuriwa. Ku rhandza ntiyiso ni leswinene, hi xona xivangelo xa nkoka swinene xo hlawula ku khuvuriwa.
WA N’WI RHANDZA YESU KRESTE
6. Hi swihi swivangelo leswi nga eka Pisalema 45:4 leswi endlaka u rhandza Yesu Kreste?
6 Hikwalahokayini u rhandza Yesu Kreste? Twana swivangelo leswi twalaka leswi kumekaka eka Pisalema 45:4. (Yi hlaye.) Yesu u rhandza ntiyiso ni leswo lulama naswona wa titsongahata. Loko u rhandza ntiyiso ni leswo lulama a swi kanakanisi leswaku wa n’wi rhandza na Yesu Kreste. Ehleketa ndlela leyi Yesu a yimeleleke ntiyiso ni leswo lulama hi xivindzi hayona. (Yoh. 18:37) Yesu u va khutaza njhani van’wana leswaku va titsongahata?
7. I yini leswi ku tsakisaka hi ku titsongahata ka Yesu?
7 Yesu u hi dyondzisa ku titsongahata hi swiendlo. Hi xikombiso, u yise ku vangama hinkwako eka Tata wakwe ku nga ri eka yena. (Mar. 10:17, 18; Yoh. 5:19) Xana ku titsongahata ka Yesu ku endla u titwa njhani? Xana a swi ku endli u rhandza N’wana wa Xikwembu ni ku n’wi landzela? A swi kanakanisi leswaku swi endla u n’wi rhandza. Hikwalahokayini Yesu a titsongahata? Hikuva u rhandza ni ku tekelela Tata wakwe la titsongahataka. (Ps. 18:35; Hev. 1:3) Xana a swi ku endli u lava ku va ni vuxaka na Yesu hileswi a tekelelaka vumunhu bya Yehovha hilaha ku heleleke?
8. Hikwalahokayini hi rhandza Yesu tanihi Hosi ya hina?
8 Ha n’wi rhandza Yesu tanihi Hosi ya hina hikuva i Mufumi lonene. Yehovha u letele N’wana wakwe naswona u n’wi hlawurile leswaku a fuma. (Esa. 50:4, 5) Nakambe ehleketa hi ndlela leyi Yesu a hi rhandzeke hayona. (Yoh. 13:1) Swa fanela leswaku Yesu u n’wi rhandza tanihi Hosi ya wena. U vule leswaku lava n’wi rhandzaka hi mbilu hinkwayo, ku nga lava a va tekaka va ri vanghana vakwe, va kombisa ndlela leyi va n’wi rhandzaka hayona hi ku yingisa swileriso swakwe. (Yoh. 14:15; 15:14, 15) I nkateko lowukulu ku va munghana wa N’wana wa Yehovha!
9. Nkhuvulo wa Vakreste wu yelana njhani ni wa Kreste?
9 Xin’wana xa swileriso leswi Yesu a swi byeleke valandzeri vakwe i xa leswaku va khuvuriwa. (Mat. 28:19, 20) U kombise leswi hi swiendlo. Nkhuvulo wakwe wu hambanile ni wa valandzeri vakwe hi tindlela to karhi. (Vona bokisi leri nge, “ Nkhuvulo Wa Yesu Ni Wa Valandzeri Vakwe Yi Hambana Njhani?”) Kambe hi tindlela to karhi ya fana. Loko Yesu a khuvuriwa, u kombise leswaku u lava ku endla ku rhandza ka Tata wakwe. (Hev. 10:7) Hilaha ku fanaka, loko valandzeri va Kreste va khuvuriwa va komba vanhu leswaku va tinyiketerile eka Yehovha Xikwembu. A va ha tihanyeli kambe va hanyela ku endla ku rhandza kakwe. Kutani va landzela xikombiso xa N’wini wa vona.
10. Hikwalahokayini ku rhandza Yesu swi fanele swi ku endla u lava ku khuvuriwa?
10 U teka Yesu tanihi N’wana wa Yehovha la tswariweke a ri swakwe tlhelo Hosi leyi Yehovha a yi hlawuleke leswaku yi hi fuma. Wa swi tiva leswaku Yesu wa titsongahata naswona u tekelela Tata wakwe hilaha ku heleleke. U dyondzile leswaku u phamele lava a va ri ni ndlala, a chavelela lava heleke matimba ni ku horisa lava vabyaka. (Mat. 14:14-21) U yi vonile ndlela leyi a ri kongomisaka hayona vandlha namuntlha. (Mat. 23:10) Nakambe wa swi tiva leswaku u ta endla swo tala ngopfu ku nga ri khale tanihi Hosi ya Mfumo wa Xikwembu. U nga swi kombisa njhani leswaku wa n’wi rhandza? U nga swi kombisa hi ku n’wi tekelela. (Yoh. 14:21) U nga sungula ku endla sweswo hi ku tinyiketela eka Yehovha ivi u khuvuriwa.
WA N’WI RHANDZA YEHOVHA XIKWEMBU
11. Hi xihi xivangelo xa nkoka swinene xo va u khuvuriwa naswona hikwalahokayini?
11 Hi xihi xivangelo xa nkoka swinene xo va u khuvuriwa? Yesu u kombise leswaku nawu lowukulu wa Xikwembu ku tlula hinkwayo hi lowu nge: “U fanele u rhandza Yehovha Xikwembu xa wena hi mbilu ya wena hinkwayo, hi vutomi bya wena hinkwabyo, hi mianakanyo ya wena hinkwayo ni hi matimba ya wena hinkwawo.” (Mar. 12:30) Xana na wena u xi rhandza hi ndlela yoleyo Xikwembu?
Swilo hinkwaswo leswinene leswi u tshameke u tiphina ha swona ni leswi u nga ta tiphina ha swona swi huma eka Yehovha (Vona tindzimana 12-13)
12. Hikwalahokayini u rhandza Yehovha? (Nakambe vona xifaniso.)
12 Ku ni swivangelo swo tala leswi endlaka hi rhandza Yehovha. Hi xikombiso, u dyondze leswaku hi yena “xihlovo xa vutomi” nileswaku i Munyiki wa “nyiko yin’wana ni yin’wana leyinene ni nyiko yin’wana ni yin’wana leyi hetisekeke.” (Ps. 36:9; Yak. 1:17) Swilo hinkwaswo leswinene leswi u tiphinaka ha swona swi huma eka Xikwembu xa hina xa rirhandzu lexi hananaka.
13. Hikwalahokayini nkutsulo ku ri nyiko ya risima?
13 Nkutsulo i nyiko leyinene leyi Yehovha a hi nyikeke yona. Hikwalahokayini hi vula tano? Ehleketa hi vuxaka lebyi Yehovha na Yesu va nga na byona. Yesu u te: ‘Tatana wa ndzi rhandza’ naswona “ndza n’wi rhandza Tatana.” (Yoh. 10:17; 14:31) Leswi va heteke malembe ya tibiliyoni va ri swin’we ndlela leyi va rhandzanaka hayona yi ye yi kula swinene. (Swiv. 8:22, 23, 30) Ehleketa ndlela leyi Xikwembu xi tweke ku vava hayona loko N’wana wa xona a xaniseka ni ku fa. Yehovha u rhandza vanhu swinene ku katsa na wena lerova a a tiyimisele ku nyikela hi N’wana wakwe loyi a n’wi rhandzaka a va gandzelo leswaku wena ni van’wana mi kota ku hanya hilaha ku nga heriki. (Yoh. 3:16; Gal. 2:20) Lexi hi xona xivangelo lexikulu xo va u rhandza Xikwembu.
14. Hi wihi nchumu wa nkoka swinene evuton’wini lowu u nga wu endlaka?
14 U ye u rhandza Yehovha swinene loko u ri karhi u dyondza hi yena. A swi kanakanisi leswaku u lava ku va munghana wa yena sweswi ni hilaha ku nga heriki. Sweswo swa koteka. U ku khutaza leswaku u tsakisa mbilu yakwe. (Swiv. 23:15, 16) U nga endla leswi hi marito ni hi swiendlo. Mahanyelo ya wena ma ta swi kombisa loko u rhandza Yehovha hi mbilu hinkwayo. (1 Yoh. 5:3) Lowu i nchumu wa nkoka swinene lowu u nga wu endlaka evuton’wini.
15. U nga swi kombisa njhani leswaku wa n’wi rhandza Yehovha?
15 U nga swi kombisa njhani leswaku wa n’wi rhandza Yehovha? Rhanga hi ku khongela u tinyiketela eka Xikwembu xa ntiyiso. (Ps. 40:8) Endzhaku ka sweswo, u khuvuriwa u komba vanhu leswaku u tinyiketerile. Hilaha se hi buleke hakona, ku khuvuriwa i swa nkoka swinene naswona swa tsakisa. Sweswi a wa ha tihanyeli kambe u hanyela Yehovha. (Rhom. 14:8; 1 Pet. 4:1, 2) Lexi i xiboho xa nkoka swinene. Kambe xi endla leswaku u tiphina hi vutomi. Njhani?
16. Hi ku ya hi Pisalema 41:12, Yehovha u ta va katekisa njhani lava tinyiketelaka leswaku va n’wi tirhela?
16 A ku na munhu la hananaka ku fana na Yehovha. Swi nga ri na mhaka leswaku u n’wi nyika yini, mikarhi hinkwayo u ta ku tlherisela swo tala swinene ku tlula leswi u n’wi nyikeke swona. (Mar. 10:29, 30) U ta endla leswaku u hanya vutomi lebyi tsakisaka ni lebyi vuyerisaka hambiloko ha ha hanya emisaveni leyi yo biha. Kambe swo tala swa ha ri endleleni. Ku khuvuriwa ka wena ko va masungulo ntsena. U nga swi kota ku tirhela Tata wa wena loyi u n’wi rhandzaka hilaha ku nga heriki. Ndlela leyi u rhandzaka Tata wa wena hayona yi ta ya yi kula naswona u ta hanya hilaha ku nga heriki ku fana na yena.—Hlaya Pisalema 41:12.
17. Hi wihi nchumu lowu Yehovha a nga riki na wona lowu u nga n’wi nyikaka wona?
17 Loko u tinyiketela ni ku khuvuriwa, u kota ku nyika Tata wa wena nchumu wa nkoka swinene. U ku nyike swilo hinkwaswo leswinene, swo tsakisa ni leswi u tiphineke ha swona. U nga nyika N’wini wa tilo ni misava nchumu lowu a nga riki na wona, ku nga ku n’wi gandzela hi ku swi rhandza. (Yobo 1:8; 41:11; Swiv. 27:11) Leyi i ndlela leyinene yo tirhisa vutomi bya wena. A swi kanakanisi leswaku ndlela leyi u rhandzaka Yehovha hayona, hi yona yi ku endlaka u khuvuriwa.
WA HA YIMELE YINI?
18. Hi swihi swivutiso leswi u nga tivutisaka swona?
18 Xana u nga xi hlamula njhani xivutiso lexi nge, Xana u ta khuvuriwa? Hi wena ntsena u tivaka nhlamulo. Kambe swi nga ku pfuna ku tivutisa leswi, ‘Ndza ha yimele yini?’ (Mit. 8:36) U nga swi rivali swivangelo swinharhu leswi hi buleke ha swona. Xo sungula, u rhandza ntiyiso ni leswi lulameke. Tivutise, ‘Xana ndzi ri langutele emahlweni siku leri vanhu hinkwavo va nga ta vulavula ntiyiso ni ku endla leswi lulameke?’ Xa vumbirhi, wa n’wi rhandza Yesu Kreste. Tivutise, ‘Xana ndza swi lava leswaku N’wana wa Xikwembu a va Hosi ya mina ni ku tlhela ndzi n’wi tekelela?’ Xa vunharhu ku nga xa nkoka swinene, wa n’wi rhandza Yehovha. Tivutise, ‘Xana ndza swi lava ku tsakisa mbilu ya Yehovha hi ku n’wi gandzela tanihi Xikwembu xa mina?’ Loko ku ve u hlamule swivutiso leswi hi ina, hikwalahokayini u nga khuvuriwi? Wa ha yimele yini?—Mit. 16:33.
19. Hikwalahokayini u nga fanelanga u kanakana ku khuvuriwa? Kombisa. (Yohane 4:34)
19 Loko u kanakana ku khuvuriwa, ehleketa hi xikombiso lexi Yesu a xi tirhiseke. (Hlaya Yohane 4:34.) Xiya leswaku Yesu u fanise ku endla ku rhandza ka Tata wakwe ni swakudya. Hikwalahokayini? Swakudya i swa nkoka eka hina. Yesu a a swi tiva leswaku swilo hinkwaswo leswi Yehovha a hi kombelaka ku swi endla i swinene eka hina. Yehovha a nga lavi hi endla swilo leswi nga ta hi vavisa. Xana Yehovha u lava leswaku u khuvuriwa? Ina. (Mit. 2:38) U nga tiyiseka leswaku ku yingisa xileriso xa leswaku u khuvuriwa swi ta ku vuyerisa. Loko u nga kanakani ku dya swakudya swo xawula, hikwalahokayini u kanakana ku khuvuriwa?
20. Hi ta bula hi yini eka nhlokomhaka leyi landzelaka?
20 Wa ha yimele yini? Vo tala va nga ha ku, “A ndzi si lungheka.” Xiboho xo va u tinyiketela eka Yehovha ni ku khuvuriwa i xa nkoka swinene ku tlula hinkwaswo. Kutani swi lava u tinyika nkarhi wo anakanyisisa hi xona ni ku endla matshalatshala leswaku u lungheka. Kambe loko u swi lava hi mbilu hinkwayo ku khuvuriwa, u nga endla yini sweswi leswaku u lungheka? Hi ta bula hi nhlamulo ya xivutiso lexi eka nhlokomhaka leyi landzelaka.
RISIMU 28 Ku Va Munghana Wa Xikwembu
a I swa nkoka leswaku xichudeni xin’wana ni xin’wana xa Bibele xi khuvuriwa. I yini lexi nga pfunaka xichudeni leswaku xi khuvuriwa? I rirhandzu. Kambe xi fanele xi rhandza yini naswona mani? Eka nhlokomhaka leyi, hi ta kuma tinhlamulo ta swivutiso leswi ni ku tlhela hi bula hi ndlela leyi Vakreste lava khuvuriweke va faneleke va hanya hayona.
