1-2. Hikwalahokayini u nga fanelanga u hela matimba loko u nga si swi lunghekela ku khuvuriwa? (Vona xifaniso lexi nga eka xifunengeto.)

 LOKO u navela ku khuvuriwa, wolowo i nchumu lowunene lowu u nga tikarhatelaka ku wu fikelela. Xana u swi lunghekerile ku khuvuriwa sweswi? Loko u vona onge u lunghekile naswona vakulu va vona u faneleka, u nga ha yimayimi. Mikateko yi lo mphaa, entirhweni wa Xikwembu.

² Kambe, xana u tshame u byeriwa leswaku u fanele u antswisa swo karhi u nga si khuvuriwa? Kumbe, xana u vona onge ka ha ri ni laha u faneleke u antswisa kona? Loko swi ri tano, u nga heli matimba. U nga swi kota ku antswisa leswaku u kota ku teka xiboho xexo xa nkoka, swi nga ri na mhaka leswaku wa ha ri muntshwa kumbe u dyuharile.

3. Mutirhelamfumo wa Muetiyopiya u vutise Filipi yini naswona ku va ni xivutiso xihi? (Mitirho 8:36, 38)

³ Hlaya Mitirho 8:36, 38. Mutirhelamfumo wa Muetiyopiya u vutise muchumayeri Filipi a ku: “I yini lexi ndzi sivelaka ku khuvuriwa?” Muetiyopiya loyi a a navela ku khuvuriwa kambe xana a a swi lunghekerile ku khuvuriwa?

4. Xana Muetiyopiya u swi kombise njhani leswaku a a tiyimisele ku ya emahlweni a dyondza?

⁴ Muetiyopiya loyi “a a ye eYerusalema a ya gandzela.” (Mit. 8:27) Hikwalaho, swi vula leswaku se a a ri evukhongerini bya Vayuda. A swi kanakanisi leswaku u dyondze hi Yehovha  eMatsalweni yo kwetsima ya Xiheveru. Nilokoswiritano, a ha lava ku dyondza swo tala. Xana loko Filipi a hlangana ni wanuna loyi exitarateni, u n’wi kume a ri karhi a endla yini? A a ri karhi a hlaya buku ya muprofeta Esaya. (Mit. 8:28) Vuprofeta byolebyo a ku ri swakudya leswi tiyeke. Muetiyopiya loyi a a ngo lava ku tiva tidyondzo ti nga ri tingani ta le Bibeleni kambe a a lava ku ya emahlweni a dyondza.

5. Muetiyopiya u endle yini hi leswi a swi dyondzeke?

⁵ Muetiyopiya loyi a a ri ni xikhundlha lexikulu emfun’weni wa Hosi ya xisati Kandake; “a a langutela xuma xa yena hinkwaxo.” (Mit. 8:27) A a ri ni mitirho yo tala. Hambiswiritano u tinyike nkarhi wo gandzela Yehovha. A a ngo enerisiwa hi ku dyondza ntiyiso ntsena kambe a a hanya hileswi a a swi dyondza. U teke riendzo ro leha a suka eEtiyopiya leswaku a ya gandzela Yehovha eYerusalema etempeleni. Riendzo rero ri fanele ri n’wi koxe mali ni nkarhi kambe hinkwaswo sweswo a swi nga vuli nchumu eka yena ntsena loko a gandzela Yehovha.

6-7. Ndlela leyi Muetiyopiya a a rhandza Yehovha hayona yi ye emahlweni yi kula njhani?

⁶ Filipi u dyondzise Muetiyopiya tidyondzo letintshwa ni ku tlhela a n’wi pfuna a tiva Mesiya. (Mit. 8:34, 35) Loko Muetiyopiya a dyondza hi leswi Yesu a n’wi endleleke swona, sweswo swi n’wi khumbe mbilu. Xana a a ta endla yini? A a ta va a hlawule ku nga byi tshiki vukhongeri byakwe bya Xiyuda tanihi leswi a a xiximiwa. Ematshan’weni ya sweswo, u ye a rhandza Yehovha ni N’wana Wakwe swinene. Sweswo swi endle leswaku a endla xiboho lexikulu xo va a khuvuriwa a va mulandzeri wa Yesu Kreste. Filipi u swi vonile leswaku wanuna loyi u swi lunghekerile ku khuvuriwa kutani u n’wi khuvurile.

⁷ Loko u tekelela Muetiyopiya u nga lunghekela ku khuvuriwa. Na wena u ta swi kota ku vula u nga kanakani u ku: “I yini lexi ndzi sivelaka ku khuvuriwa?” A hi kambisiseni ndlela leyi u nga tekelelaka Muetiyopiya hayona eka ndlela leyi a yeke emahlweni a dyondza, a tirhisa leswi a swi dyondzeke ni ku ya emahlweni a rhandza Xikwembu.

8. I yini leswi hi faneleke hi swi endla hi ku ya hi Yohane 17:3?

⁸ Hlaya Yohane 17:3. Xana marito lama ya Yesu ya ku pfunile leswaku u dyondza Bibele? Vo tala va hina ma hi pfunile. Xana marito wolawo ma tlhela ma hi khutaza ku ya emahlweni hi dyondza? Ina. A hi nge tshiki ku “kuma vutivi hi  . . Xikwembu xi ri xin’we xa ntiyiso.” (Ekl. 3:11) Hi ta dyondza hilaha ku nga heriki. Loko hi ya hi dyondza hi Yehovha hi ta ya hi n’wi rhandza.—Ps. 73:28.

9. Hi fanele hi endla yini endzhaku ka loko hi tive tidyondzo to sungula ta Bibele?

 ⁹ I ntiyiso leswaku hi sungula ku dyondza hi Yehovha hakatsongotsongo. Eka papila rakwe leri a ri ya eka Vaheveru, muapostola Pawulo u vitana ku dyondza koloko “swilo swo sungula.” A a nga yi tekeli ehansi “dyondzo ya masungulo” kambe a a yi fanisa ni ntswamba lowu wundlaka n’wana. (Hev. 5:12; 6:1) Hambiswiritano u khutaze Vakreste hinkwavo leswaku va nga khomeleli eka tidyondzo teto ntsena kambe va ya emahlweni va dyondza ntiyiso lowu nga eRitweni ra Xikwembu. Xana na wena wa swi navela ku tiva tidyondzo leti enteke ta le Bibeleni? Xana u tiyimisele ku engetela vutivi bya wena, ku dyondza hi Yehovha Xikwembu ni hi swikongomelo swakwe?

10. Hikwalahokayini van’wana swi va tikela ku dyondza?

¹⁰ Vo tala va hina swa hi tikela ku dyondza. Xana wena swa ku olovela? Xana u dyondze ku hlaya hi ndlela leyinene exikolweni? Xana a wu swi rhandza ku hlaya ni ku tlhela u vona swi vuyerisa? Kumbe u tibyele leswaku swa tibuku a hi swa wena? Loko swi ri tano, a wu wexe. Yehovha a nga ku pfuna. U hetisekile naswona i Mudyondzisi lonene ku tlula hinkwavo.

11. Yehovha u swi kombisa njhani leswaku i ‘Muleteri Lonkulu’?

¹¹ Yehovha u tivitana “Muleteri wa [wena] Lonkulu.” (Esa. 30:20, 21) I Mudyondzisi la nga ni musa, a lehisaka mbilu naswona wa twisisa. U languta leswinene eka swichudeni swakwe. (Ps. 130:3) A nga langutelanga leswaku hi endla leswi hi nga kotiki ku swi endla. Tsundzuka leswaku hi yena a endleke byongo bya wena, ku nga nyiko leyinene. (Ps. 139:14) I swa ntumbuluko ku lava ku dyondza. Muvumbi wa hina u lava leswaku hi ya emahlweni hi tiphina hi ku dyondza hilaha ku nga heriki. Kutani sweswi i vutlhari ku “tikarhatel[a] ku navela” ku dyondza ntiyiso wa le Bibeleni. (1 Pet. 2:2) Hlela leswi u nga ta kota ku swi fikelela ni ku tlhela u hlaya ni ku dyondza Bibele nkarhi ni nkarhi. (Yox. 1:8) Yehovha u ta ku pfuna leswaku u ya u tiphina hi ku hlaya ni ku dyondza ha yena.

12. Hikwalahokayini hi fanele hi dyondza ngopfungopfu hi Yesu loko hi endla dyondzo ya munhu hi yexe?

¹² Nkarhi ni nkarhi anakanyisisa hi vutomi bya Yesu ni ntirho wakwe wo chumayela. Hi ta kota ku tirhela Yehovha ngopfungopfu emikarhini leyi yo tika loko hi tekelela Yesu. (1 Pet. 2:21) Yesu u yi vule hi ku kongoma mitlhontlho leyi valandzeri vakwe a va ta langutana na yona. (Luka 14:27, 28) Kambe a a tiyiseka leswaku valandzeri vakwe va ta yi hlula ku fana na yena. (Yoh. 16:33) Dyondza hi vutomi bya Yesu ni ku tlhela u endla matshalatshala yo n’wi tekelela.

13. I yini leswi u faneleke u ya emahlweni u swi kombela eka Yehovha naswona hikwalahokayini?

¹³ A swi enelanga ku tiva nchumu wo karhi. Xa nkoka swinene i ndlela leyi vutivi byi ku pfunaka hayona u ya u dyondza hi Yehovha, u n’wi rhandza ni ku tlhela u va ni ripfumelo eka yena. (1 Kor. 8:1-3) Loko u ri karhi u dyondza, kombela Yehovha a ku pfuna u ya u va ni ripfumelo. (Luka 17:5) Wa swi hlamula swikhongelo swo tano. Loko u va ni ripfumelo hikwalaho ka leswi u tivaka Xikwembu xa hina sweswo swi ta ku pfuna leswaku u ri kombisa hi mitirho.—Yak. 2:26.

14. Muapostola Petro u wu kombise njhani nkoka wo tirhisa leswi hi swi dyondzaka? (Nakambe vona xifaniso.)

¹⁴ Muapostola Petro u hlamusele ndlela leyi swi nga swa nkoka hayona leswaku valandzeri va Kreste va ya emahlweni va tirhisa leswi va swi dyondzaka. U vulavule hi Nowa wa le Bibeleni. Yehovha u byele Nowa leswaku U ta  tirhisa ndhambi ku herisa vanhu vo homboloka va le nkarhini wakwe. Nowa ni ndyangu wakwe a swi nga ta va ponisa ku tiva ntsena leswaku ndhambi yi le ku teni. Xiya leswaku Petro u vulavule hi nkarhi lowu a ka ha “akiwa ngalava” Ndhambi yi nga si fika. (1 Pet. 3:20) Nowa ni ndyangu wakwe va endle leswi Xikwembu xi va byeleke swona hi ku aka ngalava ku nga xikepe lexikulu. (Hev. 11:7) Petro u fanise leswi Nowa a swi endleke ni nkhuvulo hi ku tsala a ku: “Na n’wina ma ponisiwa hi nchumu lowu yelanaka ni lowu, ku nga nkhuvulo.” (1 Pet. 3:21) Hi ndlela yin’wana, hi nga fanisa leswi u swi endlaka sweswi leswaku u tilunghiselela ku khuvuriwa ni ntirho wo aka ngalava lowu Nowa ni ndyangu wakwe va wu endleke malembe yo tala. U fanele u endla yini leswaku u lunghekela ku khuvuriwa?

15. Swi vula yini ku hundzuka hi mbilu hinkwayo?

¹⁵ Nchumu wun’wana wo sungula lowu hi faneleke hi wu endla i ku hundzuka hi mbilu hinkwayo. (Mit. 2:37, 38) Loko hi hundzuka hi cinca ni mahanyelo ya hina. Xana u swi tshikile swilo leswi nyenyetsaka Yehovha swo fana ni ku tikhoma ku biha, ku dzaha, nhlambha kumbe ku vula marito lama tlhavaka? (1 Kor. 6:9, 10; 2 Kor. 7:1; Efe. 4:29) Loko u nga si ma tshika mahanyelo lawa, yana emahlweni u cinca. Kombela mpfuno eka loyi a ku dyondzisaka Bibele kumbe eka vakulu. Loko wa ha ri muntshwa naswona wa ha tshama ekaya, u nga tshiki ku kombela vatswari va wena va ku pfuna u tshika mikhuva yo biha leyi nga ku sivelaka ku khuvuriwa.

16. Hi fanele hi endla yini leswaku hi gandzela Yehovha nkarhi ni nkarhi?

¹⁶ Nakambe i swa nkoka ku nga tshiki ku endla leswi ku tshinetaka ekusuhi na Yehovha. Swi katsa ku va kona etinhlengeletanweni ta vandlha ni ku katseka eka tona. (Hev. 10:24, 25) Loko se u fanelekela ku chumayela, titolovete ku swi endla. Loko u ya u wu endla ntirho lowu, lowu ponisaka vutomi u ta ya u wu rhandza. (2 Tim. 4:5) Loko wa ha ri muntshwa naswona u tshama ekaya, tivutise leswi: ‘Xana vatswari va mina va boheka ku ndzi tsundzuxa ku ya etinhlengeletanweni ta vandlha kumbe ensin’wini? Kumbe, xana ndza swi endla swilo leswi ndzi nga tsundzuxiwanga?’ Loko u endla swilo leswi, u kombisa leswaku u ni ripfumelo, u rhandza  Yehovha Xikwembu ni ku khensa leswi a ku endleleke swona. Leswi i “ku tinyiketel[a] eka Xikwembu” ku nga tinyiko leti u tinyikaka Yehovha. (2 Pet. 3:11; Hev. 13:15) Xikwembu xa hina xi rhandza lava nyikelaka hi ku swi rhandza va nga sindzisiwi. (Ringanisa 2 Vakorinto 9:7.) Hi endla leswi hikuva swa hi tsakisa ku nyika Yehovha hilaha hi nga kotaka hakona.

17-18. Hi wihi nchumu wa nkoka lowu nga ta ku pfuna leswaku u fanelekela ku khuvuriwa naswona hikwalahokayini? (Swivuriso 3:3-6)

¹⁷ Loko u ya emahlweni u tikarhatela ku fanelekela ku khuvuriwa, u ta langutana ni mitlhontlho. Van’wana va nga ha ku hleka hikwalaho ka leswi u swi pfumelaka; va ku kaneta hambi ku ri ku ku xanisa. (2 Tim. 3:12) Loko u ri karhi u wa u pfuka leswaku u tshika mukhuva wo biha, mikarhi yin’wana u nga ha tikuma u tlhelerile eka wona. Kumbe u nga ha hela mbilu hileswi u vonaka onge leswi u lavaka ku swi fikelela a swi fikeleleki. I yini lexi nga ta ku pfuna u tiyisela? I ku rhandza Yehovha.

¹⁸ Ku rhandza Yehovha hi swona swa nkoka eka hinkwaswo. (Hlaya Swivuriso 3:3-6.) Loko u rhandza Xikwembu swinene u nga swi kota ku hlula mitlhontlho. Mikarhi yo tala Bibele yi vulavula hi rirhandzu lerikulu leri Yehovha a nga na rona eka malandza yakwe. Hikwalaho ka rirhandzu leri, a nge pfuki a fularhele malandza yakwe kumbe a tshika ku ma rhandza. (Ps. 100:5) U endliwe hi xifaniso xa Xikwembu. (Gen. 1:26) U nga ri kombisa njhani rirhandzu ro tano?

19. I yini leswi nga endlaka u ya u swi khensa swinene leswi Yehovha a ku endleleke swona? (Vagalatiya 2:20)

¹⁹ Sungula hi ku va la khensaka. (1 Tes. 5:18) Siku rin’wana ni rin’wana tivutise leswi, ‘Yehovha u ndzi endlele yini ku kombisa leswaku wa ndzi rhandza?’ Tiyiseka leswaku u khensa Yehovha loko u khongela naswona u swi boxa hi ku kongoma leswi a ku endleleke swona. Swilo leswi Yehovha a ku endleleke swona swi teke ku ri ndlela yakwe yo ku byela leswaku wa ku rhandza, ku nga leswi muapostola Pawulo na yena a swi xiyeke hi Yehovha. (Hlaya Vagalatiya 2:20.) Tivutise leswi, ‘Xana ndzi lava ku kombisa Yehovha leswaku ndza n’wi rhandza hilaha ku fanaka?’ Ku rhandza Yehovha swi ta ku pfuna u ya emahlweni u hlula mitlhontlho ni ku  papalata miringo. Swi ta ku pfuna leswaku u ya emahlweni u gandzela Yehovha ni ku kombisa Tata wa wena wa le tilweni leswaku wa n’wi rhandza siku ni siku.

20. U fanele u endla yini leswaku u tinyiketela eka Yehovha naswona hikwalahokayini xiboho lexi xi ri xa nkoka?

²⁰ Hi ku famba ka nkarhi, ndlela leyi u n’wi rhandzaka hayona Yehovha yi ta ku susumetela leswaku u endla xikhongelo xo hlawuleka. U ta tinyiketela eka Xikwembu. Tsundzuka leswaku loko wo kala u tinyiketela eka Yehovha u pfulekeriwa hi njombo leyi: U va nandza wakwe hilaha ku nga heriki. Loko u tinyiketela eka Yehovha u tshembisa leswaku u ta n’wi tirhela loko swi famba kahle niloko swi tika. U tinyiketela kan’we ntsena. I ntiyiso leswaku loko hi tinyiketela, hi va hi teka xiboho lexikulu. Ehleketa hi leswi: U ta endla swiboho swo tala evuton’wini, swin’wana swa swona ku ta va ku ri swiboho leswinene kambe a xi nge vi kona lexinene ngopfu ku tlula lexi. (Ps. 50:14) Sathana u ta ringeta ku ku tshikisa ku rhandza Tata wa wena hileswi a lavaka leswaku u nga tshembeki. U nga n’wi pfumeleli Sathana a ku hlula! (Yobo 27:5) Ndlela leyi u n’wi rhandzaka hayona Yehovha yi ta ku pfuna leswaku u endla swilo hi ku pfumelelana ni ku tinyiketela ka wena naswona u ta ya u n’wi rhandza swinene Tata wa wena wa le tilweni.

21. Hikwalahokayini hi nga vulaka leswaku nkhuvulo ko va masungulo ntsena?

²¹ Endzhaku ka loko u tinyiketerile eka Yehovha, vulavula na vakulu va le vandlheni ra wena hi leswi faneleke swi endleka. Mikarhi hinkwayo, u nga rivali leswaku nkhuvulo ko va masungulo ntsena. I masungulo yo gandzela Yehovha hilaha ku nga heriki. Yana emahlweni u n’wi rhandza swinene Tata wa wena wa le tilweni sweswi. Leswaku ndlela leyi u n’wi rhandzaka hayona yi ya kula siku na siku, hlela leswi u lavaka ku swi fikelela. Loko u endla leswi, u ta fanelekela ku khuvuriwa. Rero ku ta va siku ro tsakisa. Kambe lawa ko va masungulo ntsena. Onge ndlela leyi u rhandzaka Yehovha ni N’wana wakwe hayona yi nga ya emahlweni yi kula hilaha ku nga heriki!