Swivutiso Swa Vahlayi

Hikwalahokayini “Ximanimani” a vule leswaku loko o teka Rhuti a va nsati wakwe a a ta “onha” ndzhaka yakwe? (Rhu. 4:1, 6)

EMikarhini ya Bibele, loko wanuna la tekeke a fa a nga ri na n’wana, a ku va ni swivutiso leswi a swi fanele ku hlamuriwa leswi nge: Ku ta endleka yini hi ndhawu yakwe? Xana xivongo xakwe a xi ta lovela makumu? Nawu wa Muxe a wu hlamula swivutiso leswi.

A ku endleka yini hi ndhawu ya wanuna la feke kumbe loyi a hundzukeke xisiwana kutani a yi xavisa? Makwavo kumbe xaka ra le kusuhi ra wanuna yoloye a ta yi kutsula kumbe a tlhela a yi xava ndhawu yoleyo. Leswi a swi endla leswaku ndyangu wu nga lahlekeriwi hi ndhawu yoleyo.—Lev. 25:23-28; Tinhl. 27:8-11.

Xana xivongo xa wanuna la feke a xi sirheleriwa njhani? A ku endleka leswi nga endleka emhakeni ya Rhuti, ku nga leswaku makwavo u ta teka nsati wa makwavo la feke. Wanuna a a teka nsati wa makwavo la feke ivi va veleka n’wana loyi a nga ta va mudyandzhaka naswona a nga ta vitaniwa hi vito ra makwavo la feke ni ku teka ndzhaka yakwe. Lunghiselelo leri a ri vuyerisa ni nsati wa mufi.—Det. 25:5-7; Mat. 22:23-28.

Xiya mhaka ya Nawomi. A a tekiwe hi Elimeleke. Loko nuna wakwe ni vana va vona vambirhi va majaha va fa, a ku nga ha ri na loyi a a ta n’wi khathalela. (Rhu. 1:1-5) Loko Nawomi a tlhelele eYuda, u byele n’wingi wakwe Rhuti leswaku a kombela Bowazi a xava ndhawu ya vona. A a ri xaka ra le kusuhi ra Elimeleke. (Rhu. 2:1, 19, 20; 3:1-4) Kambe Bowazi a a swi tiva leswaku ku ni xaka rin’wana ra le kusuhi ku tlula yena, loyi Bibele yi n’wi vitanaka “Ximanimani.” A ku ri yena wo sungula ku kuma mfanelo yo xava.—Rhu. 3:9, 12, 13.

Eku sunguleni, “Ximanimani” a a tiyimisele ku pfuna. (Rhu. 4:1-4) Hambileswi a swi ta lava leswaku a humesa mali, u swi xiyile leswaku Nawomi a a nga ta kota ku va ni n’wana loyi a ta kuma ndhawu ya Elimeleke. Entiyisweni, ndhawu ya Elimeleke a yi ta tekiwa hi Ximanimani ku engetela eka ndhawu yakwe kutani leswi a swi ta n’wi vuyerisa.

Kambe Ximanimani u cince miehleketo loko a twa leswaku Rhuti a a swi lava ku tlhela a tekiwa. U te: “A ndzi nge swi koti ku yi xava, hikuva ndzi nga onha ndzhaka ya mina.” (Rhu. 4:5, 6) Hikwalahokayini a cince miehleketo?

Loko Ximanimani kumbe munhu un’wana o teka Rhuti naswona a veleka n’wana wa jaha, n’wana yoloye a a ta kuma ndhawu ya Elimeleke. Xana leswi a swi ta “onha ndzhaka” ya Ximanimani hi ndlela yihi? Bibele a yi hi byeli kambe hi leswi swivangelo leswi nga ha vaka swi endle a vula marito wolawo.

• Xo sungula, mali leyi a a ta yi tirhisa ku xava ndhawu ya Elimeleke a yi ta lova hikuva ndhawu yoleyo a yi nga ta va ya yena. A yi ta va ya n’wana wa Rhuti.

• Xa vumbirhi, a a ta boheka ku hlayisa Rhuti na Nawomi.

• Xa vunharhu, loko Rhuti o va ni vana van’wana na Ximanimani, vana volavo a va ta avelana ndzhaka ni vana va Ximanimani lava se a nga na vona.

• Xa vumune, loko ku ve Ximanimani a a nga ri na vana, n’wana loyi Rhuti a a ta n’wi veleka a a ta kuma ndhawu ya Elimeleke ni ya Ximanimani. Ndhawu yakwe a yi ta tekiwa hi n’wana yoloye loyi a a ta vitaniwa hi xivongo xa Elimeleke ku nga ri xa yena. Ximanimani a a nga swi lavi ku lahlekeriwa hi ndzhaka yakwe leswaku a pfuna Nawomi. U pfumelele Bowazi loyi a a ri munhu wa vumbirhi loyi a nga ni mfanelo yo xava leswaku ku va yena a yi xavaka. Bowazi u pfumerile hikuva a a lava ku “pfuxa vito ra wanuna loyi a nga fa ni ku pfuxa ndzhaka yakwe.”—Rhu. 4:10.

Swi vonaka onge Ximanimani a a nga swi lavi ku lahlekeriwa hi ndzhaka yakwe ni vito rakwe. A a lava leswi vuyerisaka yena ntsena. Hambileswi Ximanimani a ringeteke ku sirhelela vito rakwe, namuntlha a hi swi tivi nileswaku a ku ri mani vito rakwe. U lahlekeriwe na hi njombo leyi Bowazi a yi kumeke, ku nga ku boxiwa eka rixaka ra vanhu lava Mesiya, ku nga Yesu Kreste a humeke eka rona. A hi ku vava ka swona ku va Ximanimani a ale ku pfuna munhu loyi a a lava ku pfuniwa!—Mat. 1:5; Luka 3:23, 32.