1. I yini leswi malandza man’wana ya Yehovha yo tshembeka ma tivutisaka swona?

 SWA khutaza ku tiva leswaku Yehovha u amukela vanhu vakwe hinkwavo! Bibele yi ri: “Yehovha u tsakela vanhu vakwe.” (Ps. 149:4) Hambiswiritano, mikarhi yin’wana van’wana va hela matimba ivi va sungula ku tivutisa leswi, ‘Xana Yehovha wa ndzi amukela?’ Vagandzeri va Yehovha vo hlayanyana va le mikarhini ya ku tsariwa ka Bibele, mikarhi yin’wana a va pfa va titwa hi ndlela yoleyo.—1 Sam. 1:​6-10; Yobo 29:​2, 4; Ps. 51:11.

2. I vamani lava Yehovha a va amukelaka?

² Bibele yi swi veka erivaleni leswaku swa koteka ku va vanhu lava tswariweke ni xidyoho va amukeriwa hi Yehovha. Njhani? Hi fanele hi va ni ripfumelo eka Yesu Kreste ni ku tlhela hi khuvuriwa. (Yoh. 3:16) Hi ndlela yoleyo, hi swi kombisa erivaleni leswaku hi hundzukile eswidyohweni swa hina naswona hi tshembise Xikwembu ku endla ku rhandza ka xona. (Mit. 2:38; 3:19) Yehovha wa tsaka loko hi endla sweswo leswaku hi va ni vuxaka na yena. Loko hi endla leswi hi nga swi kotaka leswaku hi hanya hi xihlambanyo lexi hi xi endleke, Yehovha wa hi amukela naswona u hi teka hi ri vanghana vakwe lavakulu.—Ps. 25:14.

3. Sweswi hi ta bula hi yini?

³ Hikwalahokayini mikarhi yin’wana van’wana va vona onge Xikwembu a xi va amukeli? Yehovha u hi kombisa njhani leswaku wa hi amukela? Mukreste a nga tiyiseka njhani leswaku Xikwembu xa n’wi amukela?

 LESWI ENDLAKA VAN’WANA VA VONA ONGE YEHOVHA A NGA VA AMUKELI

4-5. Hambiloko hi titwa hi nga pfuni nchumu, i yini leswi hi nga tiyisekaka ha swona?

⁴ Ku sukela ha ha kula, vo tala va hina a hi titwa hi nga pfuni nchumu. (Ps. 88:15) Makwerhu la vuriwaka Adrián u ri: “Mikarhi hinkwayo a ndzi titwa ndzi nga pfuni nchumu. Loko ndza ha ri xifanyetana, ndzi tsundzuka ndzi khongelela leswaku ndyangu wa ka hina wu nghena eParadeyisini hambileswi mina a ndzi tibyela leswaku a ndzi nge pfuki ndzi fanelekile ku hanya kona.” Tony loyi a kurisiweke hi vatswari lava nga riki Timbhoni u ri: “Vatswari va mina a va si tshama va ndzi byela leswaku va ndzi rhandza kumbe va ti ba xifuva hi mina. Sweswo swi endle ndzi tibyela leswaku a ndzi nge pfuki ndzi va tsakise hi nchumu.”

⁵ Loko mikarhi yin’wana hi titwa hi ri vampheheleni, hi fanele hi tsundzuka leswaku Yehovha u hi kokele eka yena hi ndlela yakwe. (Yoh. 6:44) U languta leswinene eka hina, leswi kumbexana na hina vini hi nga kotiki ku swi vona naswona u tiva timbilu ta hina. (1 Sam. 16:7; 2 Tikr. 6:30) Hikwalaho, hi nga n’wi tshemba loko a vula leswaku hi va risima.—1 Yoh. 3:​19, 20.

6. Muapostola Pawulo u titwe njhani hi swidyoho leswi a swi endleke khale?

⁶ Loko hi nga si dyondza ntiyiso, van’wana va hina hi endle swilo leswi endleke hi biwa hi ripfalo. (1 Pet. 4:3) Hambi ku ri Vakreste vo tshembeka va ha lwisana ni xidyoho. Xana mikarhi yin’wana u pfa u titwa onge Yehovha a nge ku rivaleli? Loko swi ri tano, swi nga ku chavelela ku tiva leswaku ni malandza yo tshembeka ya Yehovha ma titwe ku fana na wena. Hi xikombiso, muapostola Pawulo u titwe a nga pfuni nchumu loko a ehleketa hi swilo leswi a nga tshama a swi endla. (Rhom. 7:24) I ntiyiso leswaku Pawulo a a hundzukile ni ku tlhela a khuvuriwa. Nilokoswiritano, u vule leswaku hi yena “lontsongo eka vaapostola” naswona i “mudyohi lonkulu.”—1 Kor. 15:9; 1 Tim. 1:15.

7. I yini leswi hi faneleke hi swi tsundzuka mayelana ni swidyoho leswi hi nga tshama hi swi endla?

⁷ Tata wa hina wa le matilweni u tshembisa ku hi rivalela loko hi hundzukile. (Ps. 86:5) Kutani loko hi tisola hikwalaho ka swidyoho swa hina, hi nga tshemba leswaku Yehovha u ta endla leswi a swi vuleke ni ku tlhela a hi rivalela.—Kol. 2:13.

8-9. I yini leswi nga hi pfunaka hi tshika ku titwa onge a hi nge pfuki hi tsakise Yehovha?

⁸ Hinkwerhu hi lava ku endla leswi hi nga swi kotaka leswaku hi gandzela Yehovha. Kambe van’wana va vona onge a va nge pfuki va endle leswi eneleke leswaku va n’wi tsakisa. Makwerhu wa xisati Amanda u ri: “Hi ntolovelo ndzi tibyela leswaku ku nyika Yehovha leswi nga ematimbeni ya mina swi vula ku va mikarhi hinkwayo ndzi endla leswi engetelekeke. Mikarhi yo tala ndzi ringeta ku endla leswi nga le henhla ka matimba ya mina. Loko ndzi ‘tsandzeka,’ ndzi titwa ndzi khomise mina na Yehovha tingana.”

⁹ I yini leswi nga hi pfunaka hi tshika ku ehleketa leswaku a hi nge pfuki hi tsakise Yehovha? Tsundzuka leswaku Yehovha wa anakanyela. A nga lavi hi endla leswi nga ehenhla ka matimba ya hina. Wa swi tlangela leswi hi n’wi endlelaka swona, ntsena loko hi n’wi nyika leswi hi nga swi kotaka. Nakambe anakanyisisa hi vanhu va le Bibeleni lava tirheleke Yehovha hi mbilu hinkwayo. Ehleketa hi Pawulo. U tirhe hi ku hiseka malembe yo tala, a famba mimpfhuka yo leha ni ku sungula mavandlha yo tala. Kambe, xana Xikwembu xi tshike ku n’wi amukela loko swiyimo swi cinca evuton’wini byakwe? Doo! U ye emahlweni a endla leswi a nga swi kotaka naswona Yehovha u n’wi katekisile. (Mit. 28:​30, 31) Hilaha ku fanaka, ndlela leyi hi tirhelaka Yehovha hayona yi nga cinca. Kambe xa nkoka eka Yehovha i xikongomelo xa hina xa ku va hi n’wi tirhela. A hi buleni hi tindlela tin’wana leti  Yehovha a ti tirhisaka ku hi kombisa leswaku wa hi amukela.

XANA YEHOVHA U HI KOMBISA NJHANI LESWAKU WA HI AMUKELA?

10. I yini lexi nga hi pfunaka hi “twa” Yehovha loko a hi byela leswaku wa hi amukela? (Yohane 16:27)

¹⁰ U hi nyike Bibele. Yehovha wa swi rhandza ku kombisa lava a va rhandzaka leswaku wa va amukela. Matsalwa ma boxa swiendlakalo swimbirhi laha Yehovha a byeleke Yesu leswaku i N’wana wakwe la rhandzekaka, loyi a n’wi amukeleke. (Mat. 3:17; 17:5) Xana na wena u nga tsakela leswaku Yehovha a ku byela leswaku wa ku amukela? Yehovha a nga vulavuli na hina a ri etilweni kambe u vulavula na hina hi ku tirhisa Rito rakwe. Hi “twa” Yehovha a hi byela leswaku wa hi amukela loko hi hlaya hi leswi Yesu a swi vuleke eka Tievhangeli. (Hlaya Yohane 16:27.) Yesu u tekelele vumunhu bya Tata wakwe kwatsaa! Loko hi hlaya hi ndlela leyi Yesu a byeleke valandzeri vakwe hayona leswaku wa va amukela, hi nga vona Yehovha hi tihlo ra mianakanyo a hi byela marito wolawo.—Yoh. 15:​9, 15.

11. Hikwalahokayini loko hi weriwa hi maxangu swi nga vuli swona leswaku Yehovha a nga hi amukeli? (Yakobo 1:12)

¹¹ U hi nyika leswi hi swi pfumalaka. Yehovha u lunghekele ku hi pfuna, u endla tano hi ku hi nyika leswi hi swi pfumalaka. Mikarhi yin’wana Yehovha a nga hi sirheleli leswaku hi nga weriwi hi maxangu hilaha a endleke hakona eka Yobo. (Yobo 1:​8-11) Loko hi weriwa hi miringo, a swi vuli swona leswaku Xikwembu a xa ha hi amukeli. Ku ri na sweswo, miringo yi hi nyika nkarhi wo kombisa ndlela leyi hi xi rhandzaka hayona Xikwembu ni ku xi tshemba. (Hlaya Yakobo 1:12.) Loko hi langutane ni miringo, hi ta vona ndlela leyi xi hi rhandzaka ni ku hi pfuna hayona leswaku hi tiyisela.

12. Hi nga dyondza yini eka ntokoto wa Dmitrii?

¹² Twana leswi endlekeleke makwerhu Dmitrii wa le Asia. U heleriwe hi ntirho naswona ku hele tin’hweti to tala a nga kumi wun’wana. Kutani u endle xiboho xo tshemba Yehovha hi ku heta nkarhi wo tala entirhweni wo chumayela. Tin’hweti ti hele ti ku bii, kambe ntirho a ko fana ni kwala. Maxangu yakwe a ma ha lo vuya, u sungule ku vabya lerova a nga ha koti nchumu. U sungule ku titwa a ri nuna ni tatana la nga pfuniki nchumu naswona a a tivutisa loko Yehovha a n’wi hlundzukerile. Kutani siku rin’wana ni madyambu, n’wana wakwe wa nhwanyana u n’wi nyike phepha leri a ri tsariwe marito ya Esaya 30:​15, leyi nge: “Mi ta va ni matimba loko mi tshamiseka mi tlhela mi ndzi tshemba.” U fike a ri veka etlhelo ka mubedo wakwe a ku, “Papa,  loko u titwa u nga pfuni nchumu, tsundzuka marito ya tsalwa leri.” Dmitrii u swi xiyile leswaku hi ku pfuniwa hi Yehovha, ndyangu wakwe a wu ri ni swakudya leswi ringaneke, swiambalo ni ndhawu yo tshama. U ri: “Leswi a ndzi fanele ndzi swi endla a ku ri ku ya emahlweni ndzi tshemba Xikwembu xa mina ni ku tshama ndzi ri ni ku rhula.” Loko u langutane ni ndzingo lowu fanaka, u nga tiyiseka leswaku Yehovha wa khathala hi wena naswona u ta ku pfuna u tiyisela.

13. Yehovha a nga tirhisa vamani leswaku va hi pfuna hi swi vona leswaku wa hi amukela naswona u va tirhisa njhani?

¹³ U hi nyika vamakwerhu. Yehovha u hi komba leswaku wa hi amukela hi ku tirhisa vamakwerhu. Hi xikombiso, a nga endla leswaku va hi khutaza hi nkarhi lowu hi lavaka ku khutaziwa. Makwerhu wa xisati wa le Asia, u swi tokotile leswi loko a ri emaxangwini. U heleriwe hi ntirho ni ku tlhela a vabya swinene. Endzhaku ka sweswo, nuna wakwe u endle xidyoho lexikulu ivi a tshikisiwa ku va nkulu. U ri: “A ndzi nga swi twisisi leswaku hikwalahokayini leswi swi endleka. A ndzi ehleketa leswaku ndzi dyohele Yehovha naswona sweswo swi endle leswaku a nga ha ndzi amukeli.” Makwerhu wa xisati u kombele Yehovha a n’wi tiyisekisa leswaku wa n’wi amukela. Xana Yehovha u swi endle njhani sweswo? U ri: “Vakulu evandlheni va vulavule na mina va ndzi tiyisekisa leswaku Yehovha wa ha ndzi rhandza.” Endzhaku ka nkarhi, u tlhele a kombela Yehovha leswaku a n’wi pfuna. U ri: “Hi siku rero ndzi kume papila leri humaka eka ntlawa wa vamakwerhu va le vandlheni. Loko ndzi ri karhi ndzi hlaya papila rolero leri khutazaka, a ndzi vona onge Yehovha u ndzi twile.” Mikarhi yo tala Yehovha u hi komba leswaku wa hi amukela hi ku tirhisa vanhu lava vulavulaka kahle na hina.—Ps. 10:17.

14. Hi yihi ndlela yin’wana leyi Yehovha a yi tirhisaka ku hi kombisa leswaku wa hi amukela?

¹⁴ Yehovha u tlhela a kombisa leswaku wa hi amukela hi ku tirhisa vamakwerhu leswaku va hi  tshinya loko hi lava ku pfuniwa. Hi xikombiso, hi nkarhi wa vaapostola, Yehovha u tirhise muapostola Pawulo leswaku a tsalela vapfumerikulobye mapapila ya 14 lama huhuteriweke. Eka mapapila wolawo, Pawulo u tshinye vamakwavo evandlheni hi ku kongoma kambe hi ndlela ya rirhandzu. Hikwalahokayini Yehovha a kongomise Pawulo leswaku a va tshinya hi ndlela yo tano? Yehovha i Tatana lonene loyi a tshinyaka vana vakwe ‘lava a va rhandzaka.’ (Swiv. 3:​11, 12) Hikwalaho, loko makwerhu a tirhisa Bibele leswaku a hi tshinya, a swi vuli swona leswaku Yehovha u hi hlundzukerile kambe swi kombisa leswaku Yehovha wa hi rhandza. (Hev. 12:6) Hi swihi swin’wana leswi kombisaka leswaku Yehovha wa hi amukela?

VUMBHONI BYIN’WANA LEBYI KOMBISAKA LESWAKU YEHOVHA WA HI AMUKELA

15. Xana Yehovha u nyika vamani moya wakwe lowo kwetsima naswona hikwalahokayini sweswo swi nga hi tiyisekisaka?

¹⁵ Yehovha u nyika lava a va amukelaka moya wakwe lowo kwetsima. (Mat. 12:18) Hi nga tivutisa leswi, ‘Xana ndza yi kombisa yin’wana ya mihandzu ya moya lowo kwetsima wa Xikwembu?’ Xana wa swi xiya leswaku se u ya u lehisa mbilu ku tlula leswi a wu ri xiswona loko u nga si tiva Yehovha? Entiyisweni, loko u ya u dyondza ku kombisa mihandzu ya moya lowo kwetsima wa Xikwembu, u ta ya u swi xiya leswaku Yehovha wa ku amukela!—Vona bokisi leri nge, “ Mihandzu Ya Moya Lowo Kwetsima I . . . ”

16. Xana Yehovha u tirhisa vamani ku chumayela mahungu lamanene naswona sweswo swi ku endla u titwa njhani? (1 Vatesalonika 2:4)

¹⁶ Yehovha u nyika lava a va amukelaka vutihlamuleri bya ku chumayela mahungu lamanene. (Hlaya 1 Vatesalonika 2:4.) Xiya ndlela leyi ku chumayela mahungu lamanene swi n’wi vuyeriseke hayona makwerhu wa xisati la vuriwaka Jocelyn. Siku rin’wana Jocelyn u pfuke a nga tsakanga. U ri: “A ndzi nga ri na matimba yo endla nchumu naswona a ndzi titwa ndzi ri xikangalafula. Kambe a ndzi phayona naswona siku rero a ku ri leri a ndzi ya ha rona ensin’wini. Ndzi khongerile kutani ndzi ya ensin’wini.” Hi mixo wolowo, Jocelyn u hlangane na Mary, wansati loyi a a ri ni musa naswona u pfumele ku dyondzeriwa Bibele. Endzhaku ka tinh’weti to hlayanyana, Mary u vule leswaku loko Jocelyn a gongondza ekaya rakwe, a a ri karhi a khongela eka Xikwembu leswaku xi n’wi pfuna. Loko a ehleketa hi ntokoto lowu, Jocelyn u ri: “A ndzi titwa onge Yehovha a a ndzi byela leswi, ‘ndza ku amukela.’” I ntiyiso leswaku van’wana a va  ma amukeli mahungu lamanene loko hi ringeta ku va chumayela. Kambe hi nga tiyiseka ku Yehovha wa tsaka loko hi endla leswi nga ematimbeni ya hina leswaku hi chumayela van’wana.

17. Xana u dyondza yini eka leswi vuriweke hi Vicky mayelana ni nkutsulo? (Pisalema 5:12)

¹⁷ Yehovha u tirhisa nkutsulo eka lava a va amukelaka. (1 Tim. 2:​5, 6) Kambe ku vuriwa yini loko timbilu ta hina ti nga pfumeli leswaku Yehovha wa hi amukela hambiloko hi ri ni ripfumelo eka yena naswona hi khuvuriwile? Tsundzuka leswaku a hi nge yi tshembi ndlela leyi hi titwaka hayona kambe hi nga n’wi tshemba Yehovha. U va teka va lulamile lava nga ni ripfumelo eka nkutsulo naswona u tshembisa ku va katekisa. (Hlaya Pisalema 5:12; Rhom. 3:26) Swi n’wi pfunile Vicky ku anakanyisisa hi nkutsulo. Siku rin’wana endzhaku ko anakanyisisa swinene hi nkutsulo, u xiye leswi: “Yehovha u ndzi lehisele mbilu. . . . Kambe a swi fana ni loko ndzi byela Yehovha ndzi ku: ‘Rirhandzu ra wena a ri enelanga eka mina. Xitlhavelo xa N’wana wa wena a xi ringananga leswaku u ndzi rivalela swidyoho swa mina.’” Hi ku va a anakanyisise hi nyiko leyi ya nkutsulo, u sungule ku titwa a rhandziwa hi Yehovha. Na hina hi titwa hi rhandziwa hi Yehovha ni ku swi vona leswaku wa hi amukela loko hi anakanyisisa hi nkutsulo.

18. Hi nga tiyiseka hi yini loko hi ya emahlweni hi rhandza Tata wa hina wa le matilweni?

¹⁸ Hambiloko hi tirha hi matimba leswaku hi tirhisa swiringanyeto leswi nga laha henhla, mikarhi yin’wana hi nga hela matimba ivi hi tivutisa loko Yehovha a hi amukela. Loko sweswo swi endleka, tsundzuka leswaku u amukela “lava tshamaka va ri karhi va N’wi rhandza.” (Yak. 1:12) Kutani yana emahlweni u tshinela eka Yehovha ni ku xiya tindlela leti a ti tirhisaka ku ku kombisa leswaku wa ku amukela. Mikarhi hinkwayo u nga rivali leswaku Yehovha a nga le kule “ni un’wana ni un’wana wa hina.”—Mit. 17:27.