1-2. Hi yihi mitlhontlho leyi Timbhoni to tala ti langutanaka na yona?

MUAPOSTOLA Pawulo u khutaze Timotiya, ku katsa ni Vakreste hinkwavo leswaku va endla ntirho wa Xikwembu hi tinghitsi. (2 Tim. 4:5) Xitsundzuxo lexi Pawulo a xi vuleke, i xa nkoka eka hina hinkwerhu. Kambe, ku ni mitlhontlho leyi hi langutanaka na yona. Leswaku vamakwerhu vo tala va kota ku chumayela, swi lava xivindzi. (2 Tim. 4:2) Hi xikombiso, ehleketa hi vamakwerhu lava tshamaka ematikweni lama yiriseke ntirho wa hina. Va chumayela hambileswi sweswo swi nga hoxaka vutomi bya vona ekhombyeni!

² Vanhu va Yehovha va langutana ni mitlhontlho yo hambanahambana leyi nga va hetaka matimba. Hi xikombiso, vo tala va boheka ku tirha tiawara to tala leswaku va ta kota ku wundla mindyangu ya vona. Va swi lava ku ya ensin’wini kambe loko vhiki ri hela va va va karhele. Van’wana va karhatiwa hi mavabyi lama nga tshungulekiki kumbe hi ku dyuhala, kasi van’wanyana a va ha swi koti ni ku huma emakaya hikwalaho ka mavabyi. Van’wana va tivona va nga pfuni nchumu eka Yehovha. Mary, * loyi a tshamaka eMiddle East, u ri: “Ndzi sala ndzi karhele hikwalaho ko lwa hi matimba leswaku ndzi hlula ku titwa ndzi nga pfuni nchumu. Ndzi titwa nandzu hikuva sweswo swi endla ndzi nga wu kumi ni nkarhi wa ku ya ensin’wini.”

3. Hi ta bula hi yini eka nhlokomhaka leyi?

³ Swi nga ri na mhaka leswaku hi langutana ni mitlhontlho ya njhani, Yehovha u ta hi nyika matimba yo kota ku tiyisela leswaku hi ya emahlweni hi n’wi tirhela hilaha hi nga kotaka hakona. Hi nga si bula hi ndlela leyi Yehovha a hi pfunaka hayona, a hi voneni ndlela leyi a pfuneke Pawulo na Timotiya hayona leswaku va n’wi tirhela hi tinghitsi hambiloko va langutane ni mitlhontlho.

4. Hi yihi mitlhontlho leyi Pawulo a a langutane na yona?

⁴ Pawulo a a langutane ni mitlhontlho yo tala. A a lava matimba, ngopfungopfu hi nkarhi lowu a a ri eku biweni, a khandliwa hi maribye ni ku pfaleriwa ejele. (2 Kor. 11:23-25) U tlhele a vula leswaku mikarhi yin’wana a a lwa hi matimba ku susa langutelo ro biha leri a ri n’wi fikela. (Rhom. 7:18, 19, 24) Nakambe, u boheke ku tiyisela “mutwa enyameni,” lowu a a swi lava hi mbilu hinkwayo leswaku Xikwembu xi n’wi susela wona.—2 Kor. 12:7, 8.

5. Pawulo u kote ku endla yini hambileswi a a langutane ni mitlhontlho?

⁵ Yehovha u nyike Pawulo matimba yo ya emahlweni ni ntirho wo chumayela hambileswi a a langutane ni mitlhontlho. Ehleketa hi swilo leswi Pawulo a koteke ku swi endla. Hi xikombiso, hi nkarhi lowu a pfaleriwe endlwini eRhoma, a nga tshikanga ku chumayela varhangeri va Vayuda ni vatirhela mfumo. (Mit. 28:17; Filp. 4:21, 22) U tlhele a chumayela Varindzi vo tala va Mufuminkulu ni vanhu lava a va ta va ta n’wi pfuxela laha a pfaleriwe kona. (Mit. 28:30, 31; Filp. 1:13) Hi nkarhi wolowo, Pawulo u tsale mapapila lama huhuteriweke lama pfuneke Vakreste va ntiyiso ku ta fikela namuntlha. Ku engetela kwalaho, Pawulo u tiyise vandlha ra le Rhoma naswona sweswo swi endle leswaku vamakwavo va “va ni xivindzi xa ku chumayela rito ra Xikwembu va nga chavi nchumu.” (Filp. 1:14) Hambileswi mikarhi yin’wana Pawulo a a nga swi koti ku endla leswi a a swi lava kambe u endle hinkwaswo leswi a a swi kota naswona sweswo swi “endle leswaku mahungu lamanene ma ya emahlweni.”—Filp. 1:12.

6. Hi ku ya hi 2 Vakorinto 12:9, 10, i yini lexi pfuneke Pawulo leswaku a kota ku ya emahlweni ni ntirho wakwe wo chumayela?

⁶ Pawulo u swi vonile leswaku Yehovha hi yena loyi a n’wi nyikeke matimba yo kota ku ya emahlweni a n’wi tirhela. U vule leswaku matimba ya Xikwembu “ma endliwa lama hetisekeke eku tsaneni.” (Hlaya 2 Vakorinto 12:9, 10.) Yehovha u tirhise moya wakwe wo kwetsima leswaku a nyika Pawulo matimba yo ya emahlweni ni ntirho wakwe wo chumayela, ku nga khathariseki ku xanisiwa, ku pfaleriwa ejele ni mitlhontlho yin’wana leyi a a langutane na yona.

7. Hi yihi mitlhontlho leyi Timotiya a a langutane na yona leyi a yi ta endla swi n’wi tikela ku endla ntirho wa Xikwembu hi tinghitsi?

⁷ Timotiya, ku nga jaha leri a ri tirha na Pawulo na rona a ri titshege hi matimba ya  Xikwembu leswaku ri kota ku endla ntirho wa xona hi tinghitsi. Loko Pawulo a teka maendzo yo leha ya vurhumiwa a a famba na Timotiya. Pawulo u tlhele a rhuma Timotiya leswaku a endzela mavandlha a tlhela a ma tiyisa. (1 Kor. 4:17) Swi nga endleka leswaku Timotiya a a tivona a nga faneleki ku endla ntirho wolowo. Kumbexana sweswo hi swona leswi endleke Pawulo a n’wi tsundzuxa a ku: “Vanhu va nga tshuki va ku langutela ehansi hileswi u nga muntshwa.” (1 Tim. 4:12) Nakambe hi nkarhi wolowo, Timotiya a a ri ni mutwa enyameni, a a tshamela “ku vabya.” (1 Tim. 5:23) Kambe a a swi tiva leswaku moya wo kwetsima wa Yehovha wu ta n’wi nyika matimba yo kota ku chumayela mahungu lamanene ni ku tirhela vamakwavo.—2 Tim. 1:7.

8. Yehovha u va tiyisa njhani vanhu vakwe namuntlha?

⁸ Namuntlha, Yehovha u nyika vanhu vakwe “matimba lama tlulaka lama tolovelekeke” leswaku va kota ku ya emahlweni va n’wi tirhela ni ku tshama va tshembekile. (2 Kor. 4:7) A hi buleni hi swilo swa mune leswi Yehovha a hi nyikeke swona leswi hi pfunaka hi kota ku tiyisela ni ku tshama hi tshembekile: xikhongelo, Bibele, vamakwerhu ni ntirho wo chumayela.

9. Xikhongelo xi hi pfuna njhani?

⁹ Xikhongelo xa hi tiyisa. Eka Vaefesa 6:18, Pawulo u hi khutaza leswaku hi khongela eka Xikwembu “nkarhi hinkwawo.” Loko hi endla tano, Xikwembu xi ta hi tiyisa. Jonnie, loyi a tshamaka eBolivia, u kote ku swi vona leswaku Xikwembu xa hi seketela hi nkarhi lowu a a langutane ni miringo. Nsati wakwe ni vatswari vakwe va sungule ku vabya swinene hi nkarhi wun’we. A swi n’wi tikela ku va khathalela ha vunharhu bya vona hi nkarhi wun’we. Mana wakwe u lovile naswona swi teke nkarhi ku va bava wakwe ni nsati wakwe va hlakarhela. Loko a swi tsundzuka, u ri: “Lexi ndzi pfuneke hi nkarhi lowu xiyimo a xi tikile, i ku boxa leswi a swi ndzi karhata hi ku kongoma loko ndzi khongela.” Yehovha u nyike Jonnie matimba yo kota ku tiyisela. Ronald, loyi a nga nkulu eBolivia, u twe leswaku mana wakwe u khomiwe hi khensa. Endzhaku ka n’hweti, mana wakwe u lovile. I yini lexi n’wi pfuneke a kota ku tiyisela? U ri: “Loko ndzi khongela eka Yehovha a ndzi kuma nkarhi wo tiphofula ndzi n’wi byela ndlela leyi ndzi titwaka hayona. Ndza swi tiva leswaku u ndzi tiva kahle ku tlula vanhu hinkwavo naswona u ndzi tiva ku tlula ni ndlela leyi ndzi titivaka hayona.” Mikarhi yin’wana, hi titwa hi hlangahlanganile lerova hi nga swi tivi leswaku hi ta khongela hi ku yini. Hambiswiritano, Yehovha wa hi rhamba leswaku hi khongela eka yena hambiloko swi hi tikela ku phofula ndlela leyi hi titwaka hayona.—Rhom. 8:26, 27.

10. Hi ku ya hi Vaheveru 4:12, hikwalahokayini swi ri swa nkoka ku hlaya Bibele ni ku anakanyisisa hi leswi hi swi hlayaka?

¹⁰ Bibele ya hi tiyisa. Matsalwa ma chavelele Pawulo ni ku n’wi pfuna leswaku a kuma matimba, na hina ma nga hi pfuna. (Rhom. 15:4) Loko hi hlaya Bibele ni ku anakanyisisa hi leswi hi swi hlayaka, Yehovha u ta hi pfuna hi ku tirhisa moya wakwe wo kwetsima leswaku hi twisisa ndlela leyi Bibele yi nga hi pfunaka hayona. (Hlaya Vaheveru 4:12.) Ronald, loyi a boxiweke eku sunguleni, u ri: “Ndza tsaka leswi ndzi koteke ku tixavela nkarhi wo hlaya Bibele madyambu man’wana ni man’wana ndzi nga si etlela. Ndzi kota ku anakanyisisa hi vumunhu bya Yehovha ni hi ndlela leyi a khathalaka hayona hi malandza yakwe. Leswi swa ndzi tiyisa swinene.”

11. Bibele yi n’wi tiyise njhani makwerhu un’wana wa xisati loyi a a ri ni gome?

¹¹ Loko hi anakanyisisa hi leswi hi swi hlayaka eBibeleni, swi ta endla leswaku hi va  ni langutelo lerinene loko hi langutana ni swiphiqo. Twana leswaku Bibele yi n’wi pfune njhani makwerhu un’wana wa xisati loyi a a ri ni gome hikwalaho ko loveriwa hi nuna. Nkulu un’wana u n’wi tsundzuxe leswaku a ya hlaya buku ya Yobo yi ta n’wi pfuna. Loko a ri karhi a yi hlaya, u xiye leswaku Yobo a a ri ni langutelo leri hoxeke kutani u n’wi sorile. Hi miehleketo u tikume se a tsundzuxa Yobo a ku: “Wena Yobo! Tshika ku tiehleketelela ngopfu hikwalaho ka swiphiqo swa wena!” Endzhaku, u swi xiyile leswaku langutelo rakwe a ri yelana ni ra Yobo. Leswi swi n’wi pfunile leswaku a lulamisa langutelo rakwe leri hoxeke, a tlhela a kuma matimba yo kota ku tiyisela ku loveriwa hi nuna.

12. Yehovha u hi tiyisa njhani hi ku tirhisa vamakwerhu?

¹² Vamakwerhu va hi tiyisa. Yehovha wa hi tiyisa hi ku tirhisa vamakwerhu. Pawulo u tsale leswaku a a navela ku vona vamakwavo va ta “khutazana.” (Rhom. 1:11, 12) Mary, loyi a boxiweke eku sunguleni, u vula leswaku wa tsaka loko a ri ni vamakwavo. U ri: “Yehovha u ndzi pfunile hi ku tirhisa vamakwerhu lava a va nga swi tivi ni swiphiqo swa mina. Va ndzi tiyisile kumbe va ndzi rhumela khadi, sweswo hi swona leswi a ndzi swi lava. Xin’wana lexi ndzi pfuneke i ku burisana ni vamakwerhu va xisati lava tshameke va langutana ni swiphiqo leswi fanaka ni swa mina. Vakulu na vona va ndzi pfunile swinene, mikarhi hinkwayo a va endla ndzi titwa ndzi ri ekaya loko ndzi ri evandlheni.”

13. Hi nga tiyisana njhani loko hi ri etinhlengeletanweni ta vandlha?

¹³ Hi kuma nkarhi wa kahle wo tiyisana loko hi ri etinhlengeletanweni ta vandlha. Loko u ya etinhlengeletanweni ta vandlha, tiyisa van’wana hi ku va byela swi suka embilwini leswaku wa va rhandza naswona wa swi tlangela leswi va swi endlaka. Hi xikombiso, Peter loyi a nga nkulu, siku rin’wana loko nhlengeletano yi nga si sungula, u byele makwerhu un’wana wa xisati loyi nuna wakwe a a nga riki Mbhoni a ku: “Wa tiva ha khutazeka loko hi ku vona. Mikarhi hinkwayo a wu lovhi ni vana va wena va tsevu naswona mi tshama mi lunghiselerile leswaku mi ta hlamula.” Mhaka yoleyo yi n’wi khumbile swinene lerova a a xiririka ni mihloti loko a ri karhi a hlamula a ku: “I nga ku a wo swi tiva leswaku marito wolawo hi wona lawa a ndzi lava ku ma twa namuntlha.”

14. Ku chumayela swi hi pfuna njhani?

¹⁴ Ntirho wo chumayela wa hi tiyisa. Loko hi chumayela van’wana, ha phyuphya ni ku tlhela hi kuma matimba, swi nga ri na mhaka leswaku va angula njhani. (Swiv. 11:25) Makwerhu wa xisati Stacy, u swi vonile leswaku ku chumayela swa phyuphyisa hakunene. Loko un’wana ekaya ka vona a susiwile evandlheni, u twe ku vava swinene lerova a a tshamela ku tivutisa leswi, ‘Xana ku na leswi a ndzi fanele ndzi swi endlile leswaku ndzi n’wi pfuna?’ Mhaka yoleyo a yi n’wi tsona vurhongo. I yini lexi n’wi pfuneke leswaku a kota ku tiyisela xiyimo xexo xo tika? I ku chumayela! Ntirho wo chumayela wu endle leswaku a sungula ku ehleketa hi ndlela leyi a nga va pfunaka hayona vanhu va le nsin’wini ya ka vona. U ri: “Hi nkarhi wolowo, hi ku pfuniwa hi Yehovha, ndzi kume xichudeni xa Bibele lexi endleke nhluvuko hi ku hatlisa. Sweswo swi ndzi tiyisile swinene. Ku chumayela swi ndzi pfunile swinene leswaku ndzi kota ku hlakarhela.”

15. U dyondza yini eka leswi vuriwaka hi Mary?

¹⁵ Van’wana, va vona onge a va nge swi koti ku chumayela hi laha va lavaka hakona hikwalaho ka swiyimo swo karhi. Loko ku ri leswaku na wena u titwa tano, swi tive leswaku Yehovha wa tsaka loko u endla matshalatshala yo n’wi tirhela. Nakambe, twana hi ta Mary. Loko a rhurhele endhawini leyi ku vulavuriwaka ririmi leri a nga ri tiviki, a a vona onge a ku na lexi a nga xi  endlaka. U ri: “Ku ringana nkarhi wo leha, lexi a ndzi kota ku xi endla a ku ri ku hlaya loko ndzi hlamula, kumbe ndzi hlaya Bibele kumbe ndzi fambisa xiphephana loko ndzi ri ensin’wini.” Leswi swi endle a tivona a nga pfuni nchumu loko a tipimanisa ni vini va ririmi. Hambiswiritano, u ri cincile langutelo rakwe. U swi vonile leswaku Yehovha a nga n’wi tirhisa hambiloko a nga ri tivi kahle ririmi ra kwalaho. U ri: “Ntiyiso lowu Bibele yi wu dyondzisaka wu olovile naswona hi wona lowu vanhu va wu lavaka leswaku va ta kota ku cinca vutomi bya vona.”

16. Lava vabyaka naswona va nga swi kotiki ku huma emakaya va nga ma kuma njhani matimba?

¹⁶ Yehovha wa ma vona ni ku ma tlangela matshalatshala ya hina yo chumayela hambiloko hi nga swi koti ku huma emakaya hikwalaho ka mavabyi. U ta hi pfuna hi kota ku chumayela madokodela ni vaongori. Loko ho pimanisa leswi hi kotaka ku swi endla sweswi ni leswi a hi kota ku swi endla khale, sweswo swi ta hi heta matimba. Kambe loko hi twisisa ndlela leyi Yehovha a hi pfunaka hayona sweswi, hi ta va ni matimba yo kota ku tiyisela miringo hi tsakile.

17. Hi ku ya hi Eklesiasta 11:6, hikwalahokayini hi nga fanelanga hi tshika ku chumayela hambiloko vanhu va nga ri amukeli rungula ra hina?

¹⁷ Loko hi byala mbewu ya ntiyiso, a hi swi tivi leswaku hi yihi leyi nga ta mila. (Hlaya Eklesiasta 11:6.) Hi xikombiso, Barbara, loyi a nga ni malembe ya va-80, hakanyingi u chumayela hi foni ni mapapila. Eka rin’wana ra mapapila yakwe, u hoxe ni Xihondzo xo Rindza xa March 1, 2014, lexi nga ni nhlokomhaka leyi nge “Leswi Xikwembu Xi Ku Endleleke Swona.” A a nga swi tivi leswaku papila rakwe ri fikele emavokweni ya vatekani lava a va tshike ku va Timbhoni ta Yehovha. Va hlaye Xihondzo xolexo hi ku phindhaphindha. Nuna wa kona a a twa onge hiloko Yehovha a vulavula na yena hi ku kongoma. Vatekani volavo va sungule ku ta etinhlengeletanweni ta vandlha naswona va tlhele va va Timbhoni endzhaku ka malembe yo tlula 27. Handle ko kanakana, swi n’wi tiyisile Barbara ku vona mbuyelo wo tsakisa swonghasi lowu vangiweke hi papila leri a ri tsaleke!

18. Hi fanele hi endla yini leswaku hi ta vuyeriwa eka matimba ya Xikwembu?

¹⁸ Yehovha u hi nyika swilo swo tala leswi nga hi tiyisaka. Loko hi swi tirhisa swilo sweswo, leswi katsaka xikhongelo, Bibele, vamakwerhu ni ntirho wo chumayela, hi kombisa leswaku ha n’wi tshemba leswaku u ta hi pfuna. Onge mikarhi hinkwayo hi nga titshega hi Tata wa hina wa le tilweni, loyi a tiyimiseleke ku pfuna vanhu “lava n’wi tshembaka hi mbilu hinkwayo.”—2 Tikr. 16:9.